MBANDU YAKUDILONGA 6
MWIMBU 18 Twa Sakidila o Sata ya Kukula
Tusakidila Kyavulu Jihova mu Kuloloka o Ituxi Yetu
“Nzambi wazolo kyavulu o mundu, katé kyasuku mu kubhana Mon’ê umoxi-élele.”—NZW. 3:16.
ITWANDADILONGA
Twamesena kubhana valolo yavulu mu muloloki wa Jihova kokwetu. Phala kubhanga kiki twandamona se ihi yabhange Jihova phala kuloloka o ituxi yetu.
1-2. Kyebhi o mwenyu wetu wadifu ni wa munzangala amutumbula mu kaxi 1?
XINGANEKA ku munzangala o jitata jê jimvwama ala ni kitadi kyavulu, anga o jitata afwa mu divuwa. O njimbu yiyi yamubhekela kikote ku muxima. Maji kumoneka dingi kima kyengi kyayibha kinene. Anga amutangela kwila o jitata jê angastala o kitadi kyoso kyexile nakyo, ya ate makongo avulu. Xinganeka ku maka enya: Mu veji dya kulundula o umvwama wa jitata jê, mwene walundula o makongo mâ. O yo asobhesa o kitadi kamesena dingi kukingila, amu mujijidika phala kufuta o kitadi ni lusolo lwoso. Maji mwene nuka wanda tena kufuta o makongo oso ya.
2 O mwenyu wetu wadifu ni wa munzangala yu. O jitata jetu jadyanga Adá ni Eva exile athu ayuka, atungile mu pazayizu, kididi kyafwamene kyavulu. (Dim. 1:27; 2:7-9) Ene exile ni kidyelelu kya kusanguluka ku mwenyo kate ku hadya ni hadya. Maji kwabhiti kima kyayibha, Adá ni Eva ate kituxi. Mukonda dya kiki Jihova wa akaye mu Palayizu mu kiki ene atexi o kidyelelu kya kukala ku mwenyu kate ku hadya ni hadya. Ihi yalundula o twana twa? O Bibidya yamba: “Bhukaxi ka muthu umoxi [Adá], o kituxi kyabokona mu ngongo, o kituxi anga kyabheka o kufwa. Mu kiki, o kufwa kwa dimwange ku athu oso mu ngongo, mukonda ene oso akexile ni ituxi.” (Lom. 5:12) Etu twalundula o kituxi kya Adá ni Eva kyene kitubhekesa o kalunga. O kituxi kyedi kala dikongo dyadikota seku muthu utena kudifuta.—Jisá. 49:8.
3. Mukonda dyahi Jezú wasokesa o kituxi kyetu ni “makongo”?
3 Jezú wasokesa o kituxi kyetu ni “makongo.” (Mat 6:12, tala o nota; Lu 11:4) Kyoso ki tuta kituxi kyedi kala twamuta dikongo kwa Jihova. Jihova weji tujijidika kufuta o dikongo didi. Se Jihova keji bhanga kima phala kuloloka o ituxi yetu, tweji futa o ituxi yetu ni kufwa, kitweji kala ni kidyelelu kya kuvutuka ku mwenyu.—Lom. 6:7, 23.
4. (a) Sé kikwatekesu kya Jihova, ihi yeji bhita netu? (Jisálamu 49:7-9) (b) Mu Bibidya o “ kituxi” kyalungu ni ihi? (Tala o kaxa “Kituxi.”)
4 Etu kitwanda tena kukala ni ima ya texi Adá ni Eva mu nguzu yetu ngo. (Tanga Jisálamu 49:7-9.) Sé kikwatekesu kya Jihova, etu kitweji kala ni kidyelelu kya mwenyu wa kalelaku mba kya kutufukununa. Mu kidi twejifwa sé kukala dingi ni kidyelelu, kala kibhita ni yama.—Ndo. 3:19; 2 Ph. 2:12.
5. Ihi yabhange o Tat’etu ya kazola phala kufuta o dikongo dyetu dya kituxi? (Tala yakapa.)
5 Xinganeka lwamukwa dingi ku munzangala twamutumbula ku dimatekenu. Kyebhi mwene kyeji divwa se kwamonekene muthu wala ni kitadi kyavulu anga umutangela kwila weji futa o makongo me oso? Sé phata o munzangala weji sakidila ni kuxikina o ujitu yu. Kyene we kimoxi netu, o Tat’etu ya kazola Jihova watubhana ujitu utena kufuta o dikongo dya kituxi kitwalundula ku Adá. Jezú walombolola o maka enya mu ukexilu yu: “Nzambi wazolo kyavulu o mundu, katé kyasuku mu kubhana Mon’ê umoxi-élele, phala woso u muxikana káfwe, maji akale ni mwenyu wakalelaku.” (Nzw. 3:16) O ujitu yu utukwatekesa kukala we ni ukamba wambote ni Jihova.
O muloloki wa Jihova walungu ni sata ya kukula. Jezú waboko yalungu ni maka enyá. (Nzwá 3:16) Mwene wabhana o mwenyu wê phala kufuta o sata ya kukula (Tala okaxi 5)
6. Ihi itwanda dilonga mu milongi yiyi, ni mukonda dyahi?
6 Kyebhi kitutena kukatula mbote ku ujitu yu wa dikota ubhangesa kuloloka o ituxi yetu? Phala kutambwijila o kibhwidisu kiki twanda dilonga izwelu ya Bibidya itukwatekesa kutendela o maka enyá ni ilombolwelu ya izwelu yiyi. Mukonda kyoso kituxinganeka mu ima yabhange Jihova, kiki kitubhangesa kumusakidila kyavulu.
JIHOVA WAMESENA KWILA TUKALA TU MAKAMBA MÊ
7. (a) Mukonda dya kubhukumukina Jihova, ihi yabhiti ni Adá ni Eva? (b) Kuma twatundu ku Adá ni Eva, twatokala kubhanga ihi? (Loma 5:10, 11)
7 Kyoso Adá ni Eva kya te kituxi ene keji tena dingi kukala ni mwenyu wa kalelaku ni kwila akituka jinguma ja Tata yâ, Jihova. Ande dya kuta kituxi Adá ni Eva abhangele mbandu ya mwiji wa Jihova. (Luk. 3:38) Ene abhukumukina Jihova, mwene ka ehela kubhanga mbandu ya mwiji wê. Kiki kyabhiti ande dya kukala ni twana. (Dim. 3:23, 24; 4:1) Kuma twatundu kwa Adá ni Eva, twabhingi kubhanga ukamba ni Jihova. (Tanga Loma 5:10, 11.) Mu kiki twabhingi kikwatekesu phala kukala ni ukamba wambote ni mwene. Twabhingi kweha kukala jinguma ja Nzambi ni kukala tu makamba mê. Phala kiki kibhite Jihova mwene wamateka kubhanga ukamba n’etu. Kyebhi?
JIHOVA WAJIKULA O NJILA PHALA TUTENE KUKALA TU MAKAMBA MÊ
8. Ihi yabhange Jihova?
8 Jihova wajikula o njila phala o athu akwa ituxi atene kukala makamba mê. O kyabhange mwene kyasoko ni kima kyatexi Adá. O Mikanda ya Ngeleku izwela kiki yalungu ni maka enyá: “Nzambi wabhakula Jezú kala sata ya tokala mu kulondekesa kixikanu kwa mwene bhukaxi ka manyinga mê.”—Lom. 3:25.
9. Ihi yexile mubhanga o akwa Izalayele phala Jihova kuloloka o ituxi yâ?
9 Jihova wasoto ukexilu phala kuloloka o ituxi ya akwa Izalayele, nakale we ni ukamba wambote ni mwene. O akwa Izalayele exile mubhanga fesa mu Kizuwa Kya Kuloloka o Ituxi, lumoxi ku muvu. Mu kizuwa kyenyokyo, o mukunji wa dikota wexile musatela o ibhaku phala o mbote ya mundu. Mu kidi, o jisata ja ibhaku ki jexile mujima o ituxi ya akwa Izalayele, mukonda o athu abeta-kota, o ibhaku ndenge. Maji kyoso o akwa Izalayele kyexile mubhana jisata mu kulondekesa kwila adyela o ituxi, Jihova wexile polondo phala kuloloka o ituxi yâ. (Jih. 10:1-4) O jisata jexile mubhana mu Kizuwa kya Kuloloka o ituxi ni mu ithangana yamukwa, jexile mwakwatekesa kumona kwila exile akwa ituxi ni kwila abhindamene kima phala kuloloka o ituxi yâ.
10. Ihi yabhange Jihova phala kuloloka o ituxi ya athu kate ku hadya ni hadya?
10 Ihi yabhange Jihova phala kuloloka o ituxi ya athu kate ku hadya ni hadya? Mwene wabhakula Mon’ê wakazola nafu ni kwila ambate “o ituxi ya athu avulu.” (Jih. 9:28) Jezú wabhana “o mwenyu wê kala sata ya kukúla o mundu.” (Mat. 20:28) O kukúla ihi?
O SATA YA JEZÚ YENE O FUTU YATOKALA
11. (a) Mukonda dyahi kwabhingile kutukula? (b) Ihi yatokalele kukala nayu o muthu phala kutukula?
11 O Bibidya ilondekesa kuma, Jihova wamono kwila kwabhingile kutukula phala o ituxi yetu a iloloka ni kwila tutene kukala tu makamba mê. Ihi yatexi Adá kwabhingile ku ifuta? Lembalala kwila Adá ni Eva atexi o mwenyu wayuka, keji tena dingi kukala ni mwenyu wakalela-ku. O kukúla kwatokalele kusoka ni kima kyatexi Adá. (1 Ti. 2:6) O muthu watokalele kufuta o kukúla, katokalele kukala mona ndenge. O muthu watokalele kukala: (1) muthu wayuka; (2) muthu weji tena kukala ni mwenyu wakalela-ku; ni (3) kukala muthu wala polondo phala kubhakula o mwenyu wê phala o mbote yetu. Kyene ngo o muthu yú weji tena kufuta yatexi Adá.
12. Mukonda dyahi Jezú mwéne ngo o muthu weji tena kutukula?
12 Tala se mukonda dyahi Jezú weji tena kutukula. (1) Mwene wexile muthu wayuka. O Bibidya yamba kwila “mwene katele kituxi, mu kanu dyê ki mwa monekene makutu.” (1 Ph. 2:22) (2) Mukonda dya kiki, weji tena kutunga mu ixi katé ku hadya ni hadya. (3) Mwene wexile polondo phala kufwa mukonda dyetu. (Jih. 10:9, 10) Jezú wexile muthu wayuka, kala kyexile Adá ande dya kuta kituxi. (1 Ko. 15:45) Kuma Jezú wafu mukonda dyetu, mwene ngó weji tena kufuta yatexi Adá. (Lom. 5:19) Kyenyiki Jezú wakituka “o Adá ya sukidilaku.” Kikwabhingi dingi muthu wengi wayuka kwiza phala kufuta yatexi Adá. Jezú wafu “lumoxi katé ku hádya ni hádya.”—Jih. 7:27; 10:12.
13. Ihi itukwatekesa kukala ni ukamba wambote ni Jihova?
13 Mukonda dya Jihova kutubhana Mon’ê, mwene wajikula o njila phala naloloke o ituxi yetu. Jezú wabhakula o mwenyu wê phala kufuta o ituxi yetu. O ima yiyi itukwatekesa kukala ni ukamba wambote ni Jihova.—Efe. 1:7; Jih. 9:14.
JIHOVA WATUBHULULA KU KITUXI NI KALUNGA, UTUMONA KALA TU ATHU AYUKA
14. Ihi i twanda mona kindala?
14 Mbote yebhi itukatula mu ima yabhange Jihova phala etu? Phala kutambwijila o kibhwidisu kiki, tumone izwelu mu Bibidya itukwatekesa kumona o mbote itukatula ku muloloki wa Jihova.
15-16. (a) Kyebhi Jihova kya tubhulula? (b) O kutubhulula kutukwatekesa kudivwa kyebhi?
15 O Bibidya yamba kwila Nzambi utubhulula bhukaxi ka sata ya kukula. O poxolo Phetele wazwela kiki yalungu ni maka enya: “Enu mwejiya kwila ka mibhulula bhukaxi ka ima ibola, kala o phalata ni ulu ku ukexilu wa mwenyu wenu wayibha u mwakexile nawu u mwalundula ku jikuku jenu. Maji amibhulula ni manyinga a Kidistu abetakota kukala ni valolo, edi kala o manyinga a kambudi kayuka sé dixaka.”—1 Ph. 1:18, 19; tala o nota.
16 Mukonda dya sata ya kukula, Nzambi utubhulula ku kituxi ni kalunga, yene mu tutalesa hadi yavulu. (Lom. 5:21) Sé phata tusanguluka kyavulu mukonda dya Jihova ni Jezú kutubhulula.—1 Ko. 15:22.
17-18. (a) O kutumona kala tu athu ayuka kulombolola ihi? (b) Mbote yebhi itukatula mukonda dya Jihova kutumona kala tu athu ayuka?
17 O Bibidya yamba kwila Jihova umona o jiselevende jê kala athu ayuka. Kiki kilombolola kwila Jihova katujijidika kufuta o kituxi kitwate. Sumbala mwene ubhanga kiki, mwene usuluka mukukala Nzambi ya yuka. Jihova wejiya kwila munguzu yetu kitutena kubhanga o ima yayuka. Kyenyiki Jihova wala polondo phala kuloloka o ituxi yetu mukonda dya kixikanu kitulondekesa mu sata ya Jezú.—Lom. 3:24; Nga. 2:16.
18 Mbote yebhi itukatula kyoso Jihova kyatumona kala tu athu ayuka? Amoxi a amono kala athu ayuka, a asolo phala kutumina kumoxi ni Kidistu ku dyulu, ya akituka an’â Nzambi. (Tit. 3:7; 1 Nz. 3:1) Mwene uloloka o ituxi yâ. Kyadibhange kala nuka atele kituxi, mu kiki afwama phala kukala ku Utuminu wa Nzambi. (Lom. 8:1, 2, 30) Amukwá a amono kala athu ayuka anda tunga mu ixi kate ku hadya ni hadya. Jihova uloloka o ituxi yâ, ene akituka makamba mê. (Tiy. 2:21-23) O mundu wavulu anda bhuluka ku Alumajedone, ala ni kidyelelu kya kukala ni mwenyu wakalela-ku. (Nzw. 11:26) O “athu ayuka” ni “athu akambe o kuyuka” afu kya anda kwafukununa. (Ika. 24:15; Nzw. 5:28, 29) Mu kusuka-ko, o jiselevende joso ja Jihova mu ixi anda kala ni “ufolo wafuma ya an’â Nzambi.” (Lom. 8:21) Twamukingila ni hanji yoso o kithangana kyoso kitwanda kala tu ana ayuka a Tat’etu Jihova!
19. Kyebhi Jihova ni Jezú kya tukwatekesa? (Tala we o kaxa “ O muloloki wa Jihova.”)
19 Mu kidi, etu kitwexile ni kidyelelu kala o munzangala twamutumbula ku dimatekenu. Maji Jihova watukwatekesa. Mwene wabhange kiki mu kujikula o njila phala kuloloka o ituxi yetu ni kwila Jezú wa ifutu ni sata yê. O kixikanu kyetu kwa Jezú Kidistu kyehela kutujituna mba kutubhulula ku kituxi ni kufwa. Jihova utena we kujima o ituxi yetu. O kima kyabeta-kota, lelu tutena kukala ni ukamba wambote ni Tat’etu ya kazola, Jihova.
20. Ihi i twanda dilonga mu milongi yakayela?
20 Kyoso kituxinganeka mu ima yabhange Jihova ni Jezú phal’etu, twanda kwasakidila kyavulu. (2 Ko. 5:15) Sé kikwatekesu kyâ, kitweji kala ni kidyelelu! Mu milongi yakayela twanda dilonga ifika itukwatekesa kumona kyebhi o sata ya kukúla itena kutukwatekesa.
MWIMBU 10 Ximana Jihova Nzambi Yetu!
