Kana. O kima kyasoneka Davidi kidi mwene.

Tumone se ihi yazwela mwene bhabha ni mu jivelusu jamukwa: “Ngi kumbidila jinga izuwa yoso o jipolomesa jami.” “Ngi ku ximana Ngana, Nzambi yami, ni muxima wami woso; ngi jingisa jinga o dijina dyé, sé ngó kufula, katé ku hádya ni hádya.” “Ngi tumbula jinga o dijina dyé, kutunda mwiji kwiza mwiji.”—Jisá. 61:8; 86:12; 145:1, 2.

Davidi kexile muvudisa o ima, mukonda mwene wa kijidile kuma ku hádya wejifwa. Mwene wejidile kwila Jihova wambe kuma o athu oso ejifwa mukonda dya ituxi, waxikinine we kuma wexile mukwa ituxi. (Dim. 3:3, 17-19; Jisá. 51:4, 5) Wakijidile we kuma o jiselevende ja fiyele ja Nzambi kala Mbalahamu, Izake ni Jakobo, afu. Davidi wejidile we kwila mukubhita mivu wejifwa. (Jisá. 37:25; 39:4) Maji o izwelu yê mu divulu dya Jisálamu 61:8, ilondekesa o hanji yê ya kuximana Nzambi katé ku hádya ni hádya, kifwa kumwenyu wê woso.—2 Sam. 7:12.

Sayi ithangana Davidi wexile musoneka o ima yabhiti ku mwenyu wê, kala kitumona ku thunda dya Jisálamu 18, 51 ni 52. Mu Sálamu 23, Davidi wambe kuma Jihova wedi kala kafunga ulanga, wendesa ni kunyohesa o jimbudi jê. Davidi wexile kala o kafunga kaka. Mwene wamesenene kusidivila Nzambi “mu izuwa ni izuwa sé dizubhilu.”—Jisá. 23:6.

Kima kyambote kulembalala kwila, yoso yazwela Davidi, Jihova mwene wamubhangesa o ku isoneka. Davidi wasoneka we ikanenu ya ima yanda bhita ku hádya. Mu kifika, mu Sálamu 110, yamba kuma o Ngana ya Davidi ‘weji xikama kumbandu ya kadilu ya Nzambi’ kudyulu ni kwila weji tambula kutena kwadikota. Kutena kwahi? Kwakutolola o jinguma ja Nzambi ni kubatula “o milonga mu’axaxi ka jixi” joso. Davidi wexile kukululu wa Jezú, o Mexiya. O Mexiya weji tumina kudyulu ni kukala mukunji katé hádya ni hádya. (Jisá. 110:1-6) Jezú wambe kuma, o kikanenu kyala mu divulu dya Sálamu 110, kyexile mu lombolola mwene, ni kwila kyeji dikumbidila ku hádya.—Mat. 22:41-45.

Jihova kasolo ngó Davidi phala kusoneka yalungu ni izuwa yê, maji phala kusoneka we o ima yanda bhita ku hádya. Kyoso mwene kyanda mu fukununa, wandasidivila Jihova katé ku hádya ni hádya. Mu kiki o divulu dya Jisálamu 37:10, 11, 29 ki dya dikumbidila ngó mu izuwa ya akwa Izalayele, maji dyanda dikumbidila we ku hádya, kyoso Nzambi kyanda kumbidila o ikanenu yê.—Tanga okaxi 8 mu Mulangidi yu o milongi ni dyambu: “Eye Wanda Kala N’eme mu Palayizu.”

O izwelu itusanga mu Sálamu 61:8, ilondekesa kuma Davidi wamesenene kusidivila Jihova kumwenyu wê woso, katé kyejifwa. O izwelu yiyi ilondekesa ni kidi kyoso se ihi yanda bhanga Davidi ku hádya kyoso Jihova kyanda mufukununa.