Kyoso Jihova kyabhana o kitumu ku athu kya kwila “izalesenu o ixi ni ku itumina” kiki kilombolola kuma mwene wamesenene kwila o ixi ikale palayizu. (Dim. 1:28) O yó anda lundula o ixi anda kumbidila we o kitumu kiki. Mu kwijiya kwila o ixi ki palayizu dingi, kyoso kyanda bhita o Alumajedone, twandakala ni ikalakalu yavulu phala kuyudika o jimbandu ja ixi jazange o athu. Kiki kyandakala kikalakalu kyadikota!

Kiki kitulembalesa o kikalakalu kya kyexile nakyo akwa Izalayele kyoso kya tundu ku Babilonya phala kuvutuka ku Jeluzaleme. Kwabhitile 70 a mivu seku muthu watungile mu mbanza yenyoyo. Maji polofeta Izaya wambe kwila, ni kikwatekesu kya Jihova ene eji tena kubhanga dingi o ixi yenyoyo kididi kya fwama. O kikanenu ki zwela kuma: “Ngûndu yê u i bhanga kala Edene, ngùzu yê kala ki kala o dibhya dya Jihova.” (Iza. 51:3) Jihova wakwatekesa akwa Izalayele kubhanga o ixi kididi kya fwama. Kyene kimoxi we, ni kikwatekesu kya Jihova o yó  anda lundula o ixi anda ibhangesa kukala palayizu. Sayi ima i watokala kubhanga kindala ilondekesa kwila wamesena kubhanga mbandu mu kikalakalu kiki.

Kima kyadyanga ki watokala kubhanga o kusokejeka o inzo yé ni kwizelesa. Eye utena kubhanga kiki ne mwene se o jivizinyu jé amona kuma o kikalakalu kiki ki kyala ni valolo. Eye we utena kukwatekesa kuzelesa o Kididi kya Ubhezelu ni Ididi ya Yônge ya Makota. Se kibhana, utena kudibhakula phala kukwatekesa yó abhiti ni mavuwa atungu mu mbambe yê. Se kyene ki ubhanga, kiki kyanda londekesa kwila wala polondo phala kukwatekesa yó abhindama. Utena kudibhwidisa, ‘uhete wahi ungitena kudilonga lelu wanda kala ni valolo ku mundu wa ubhe?’

Kyoso kya fukununa o mona wa Jayilu, Jezú watumu phala kumubhana kudya. (Mál. 5:42, 43) Ki kubhonzele kulanga o ibhindamu ya kambonga ka 12 a mivu. Maji xinganeka mu kikalakalu ki twandakala nakyu kyoso Jezú kyanda kumbididila o kikanenu kyê kya kwila: ‘Athu oso ala mu jimbila anda kwívwa o dízwi dyê ni kutunda-mu.’ (Nzw. 5:28, 29) Sumbala o Bibidya ki izwela kyavulu yalungu ni maka ya, maji tutena kuxinganeka kwila o yó anda kwa fukununa anda bhindamena kudya, izwatu ni kididi phala kukalamu. O kwila eye utena kukala polondo phala kwakwatekesa? Twanda mona o kitambwijilu kya kibhwidisu kiki.

Kyoso ki wívwa kwila anda mi kunda ku kafunga ka ilunga, o kwila utena kudibhakula phala kumubhana kudya? Se phange wexile kafunga ka ilunga mba wexile mu sidivila ku betele, há uxisa o kikalakalu kiki anga umateka kusidivila mu kilunga kyé, o kwila utena kumukwatekesa kusanga inzo na kalemu? Se mu dyembu mu wa tungu mubhita kyônge kya dikota mba kyônge kya ilunga, o kwila utena kudibhakula phala kukalakala kudimatekenu mba kudisukilu dya kyônge mba nange utena kusangesa o athu atundu mu jixi jengi?

Kala kilondekesa o divulu dya Ikalakalu 24:15, mazunda ni mazunda a athu anda kwafukununa. Avulu mu dya kezawu mu kwijiya Jihova ande dya kufwa. Anda kala ni ujitu yu kyoso kyanda kwa fukununa. a Nzambi wanda kalakala ni jiselevende jê ja fiyele phala kulonga yó anda kwafukununa. (Iz. 11:9) Phange ya muhatu amwixana Charlotte, waboko kujixi ja Europa, ku América do Sulu ni ku África, wamesena kyavulu kubhanga o kikalakalu kiki. Mwene wambe: “Eme ngala ni hanji yavulu phala kulonga o athu anda kwafukununa. Kyoso ki ngitanga musoso wa muthu wafu mukulu, eme ngi sota kubanza kyebhi kyeji kala o mwenyu wa muthu yu se wejidile Jihova. Eme ngala ni hanji yavulu ya kulonga o athu yalungu ni Jihova kyoso kyanda kwafukununa.”

Katé mwene ni jiselevende ja Jihova exile mu ixi ande dya Jezú kwiza mu ixi anda dilonga ima yavulu yalungu ni Mak’â Nzambi. Xinganeka o kisangusangu ku twanda kalanaku mu kulonga Daniyele o dikumbidilu dya ikanenu ya soneka mwene maji kexile mwitendela. Nange uxinganeka kulonga Lute ni Nowemi kuma o Mexiya watokalele kumiji yâ. Mukidi twanda kala ni kusanguluka kwa dikota mukubhanga o kikalakalu kiki kyakatunda ku mundu woso, ki kwanda kala usweya, mba izukutisu!

Ihi i utena kubhanga kindala phala kulondekesa kuma wala polondo phala kulonga yó anda kwafukununa? O kima kyabeta dingi kota o kubandekesa o uhete wé wa kulonga ni kubhanga nguzu mu kikalakalu kyé kya kuboka. (Mat. 24:14) Ne mwene se ki utena dingi kuboka kala kiwexile mubhanga mu ukulu mukonda dya kitala kyé, mba ibhidi yengi, eye utena kulondekesa kuma wamesena kyavulu kubokela yó anda kwafukununa, mukuboka kindala.

Mu kidi, o kwila eye wala polondo phala ‘kulundula o ixi? Eye wala ni hanji yavulu ya kumona o ixi ku kituka palayízu, ya kuzalela ni kulonga yó anda kwafukununa? Eye utena kubhanga yoso i utena mu sidivisu ya kuboka, kabasa kithangana kiwala nakyu ni kubhanga o ikalakalu ya mukwa kyoso o ixi yanda kituka palayízu!