1. Kyebhi Jihova kyatambwijila o misambu ya jiselevende jê?

 EYE wakijidile kuma Jihova utena kutambwijila o musambu wa selevende yê wakate bhukaxi ké? Kiki kidi, kikale se u kafunga, umukwatekexi wa tufunga, se umuboki wathembu yoso mba umuboki mu kilunga. Kikale we se u mwadyakime kya, se u munzangala, se u phange ya diyala mba ya muhatu. Kyoso o muthu wazolo Jihova kyadikola kwa mwene mu kumubhinga kikwatekesu, o Nzambi utambwijila o misambu yiyi bhukaxi ka tufunga ni jiselevende jê jamukwa. Ene atena kukonda o malamba a muthu yu. (Kol. 4:11) Tusanguluka kyavulu mukusidivila Jihova mu kukwatekesa o jiphange jetu! Tutena kubhanga kiki mu ithangana ya mabhebhu, ya mavuwa mba ya izukutisu.

2. Mukonda dyahi kutubhonza kukwatekesa o jiphange jetu mu kithangana kya mabhebhu?

² O mabhebhu atena kutubhonzesa kudikwatekesa. Mu kifika, tumesena kukunda o makamba metu ku mabhata mâ, maji kitutokala kubhanga kiki. Nange tumesena kwixana o jiphange kala ni kitadi phala kudya kubhata dyetu, maji kitutena we kubhanga kiki. Nange tumesena kukwatekesa akwetu, maji kutubhonza kyavulu se sayi athu ku mwiji wetu amutala we hadi. Né kiki, twamesena kukwatekesa o jiphange jetu, Jihova usanguluka we kyoso kitubhanga nguzu phala kwakwatekesa. (Jisa. 3:27; 19:17) Ihi itutena o kubhanga?

3. Ihi itwadilongo mu phangu ya tufunga twa kilunga kya mana Kintinya? (Jelemiya 23:4)

³ Ihi itena kubhanga o tufunga? Se eye u kafunga, twakudyondo, ejiya kyambote o jimbudi. (Tanga Jelemiya 23:4.) Mana Kintinya, phange twamutumbula mu milongi yatundumu, wambe:  “O tufunga mu kibuka kyami kya kuboka, exile muboka kumoxi n’eme ni jiphange jamukwá. Ene exile we mu kala kumoxi n’etu mu kithangana kya kutonoka.” b Kiki kyabhangesa o tufunga kukwatekesa mana Kintinya mu kithangana kya COVID-19, ni kyoso o jindandu jê kyafu ni uhaxi yú.

4. Mukonda dyahi o tufunga atenene kukwatekesa mana Kintinya? Ihi itutena kudilonga ku phangu yâ?

⁴ Mana Kintinya wambe: “Kuma o tufunga exile kyá makamba mami, ki kya ngibhonzo kwatangela kyebhi kingexile mu divwa, ni ihi yexile mu ngitandanganyesa.” Ihi itena kudilonga o tufunga? Kundenu o jiphange ande dya kumoneka o mabhebhu. Kalenu mu makamba mâ. Se mwala mu kithangana kya dibhebhu, kimwamutena kukunda o jiphange ku mabhata mâ, mu akwatekesa mu maukexilu engi. Mana Kintinya wambe: “Sayi bhabha tufunga twavulu exile mungixinda mba ku ngitumikisa jinjimbu mu kizuwa kimoxi. O jivelusu ja ngilondekesa ja ngitula ku muxima, sumbala ngejidile kyá o jivelusu jojo.”

5. Mu ukexilu webhi o tufunga atena kwijiya o ima yabhindamena o jiphange? Kyebhi ene kyatena kwakwatekesa?

⁵ Ukexilu umoxi u utena kwijiya o ima yabhindamena o jiphange jé, o kwabhanga ibhwidisu mu ukexilu ki u abhangesa kudivwa kyayibha. (Jisa. 20:5) O kwila ene ala ni kudya kwasoko, milongo mba ima yamukwá yabhindamena? O kwila ene anda kwakaya ku salu mba kala ni kitadi phala kufuta o inzo? O kwila abhingi o kikwatekesu kyetu phala kwa ejidisa yalungu ni kikwatekesu kyatena kwabhana o jinguvulu? O jiphange mu kilunga akwatekesa mana Kintinya, mu ku mubhana ima. Maji o henda yamulondekesa o tufunga ni kiswinisu kya mubhana bhukaxi ka Bibidya, kyene kyamukwatekesa dingi kudibhana kyambote ni ibhidi yexile nayu. Mwene wambe: “O tufunga exile musamba n’eme. Né mwene ki ngidilembalala kyambote yoso yazwela, maji ngidilembalala kyebhi kingadivu. Ngadivu kwila Jihova wexile mungitangela kuma, ‘Eye ki wala ubheka!’”—Iza. 41:10, 13.

6. Ihi itena kubhanga o jiphange mu kilunga phala kukwatekesa akwâ? (Tala o foto.)

⁶ Ihi itena kubhanga o athu amukwá? Twejiya kwila o tufunga ene ala kupholo mu kukwatekesa o jiphange mu kilunga. Maji Jihova wamesena kuma etu enyoso tukwatekesa ni kuswinisa akwetu. (Nga. 6:10) Né mwene se tubhanga kima kyofele phala kukwatekesa  phange wamukata, kiki kitena kumuswinisa kyavulu. Mona ndenge utena kubhanga jifikula mba kutumikisa kalatá kwa phange wamukata. Phange mwadyakime kyá utena kusumbila ima kwa phange wamukata, mba kubhanga ima yengi phala kumukwatekesa. Jiphange ja mukwá atena kumulambela kudya ni ku kuxisa mu inzo yê. Mu kidi, mu kithangana kya mabhebhu, o athu mu kilunga abhindamena kiswinisu. Nange ku disukilu dya kyônge tutena kuxala bhofele phala kuzwela ni jiphange, kikale mu kididi kya ubhezelu mba mu mutelembe. O tufunga abhingi we kwaswinisa. Sayi jiphange atumikisa mikanda ku tufunga mu kwasakidila mukonda mu kithangana kiki kya mabhebhu, ene abhanga ima yavulu phala kukwatekesa o jiphange. Tusanguluka kyavulu mu kubhanga o mbandu yetu mu ‘kusuluka mu ku dikolokotesa ni kudiswinisa mudyetu’!—1 Te. 5:11.

7. Kibhidi kyebhi kyadibhana nakyu o athu kyoso kikumoneka mavuwa?

⁷ O mavuwa atena kulungulula o mwenyu wa muthu mu kakithangana ni mbandu. O athu abhita mu mavuwa o jimbote jâ jitena kudibota, nange o jinzo jâ jibwa, mba o jindandu jâ jifwa we. O mavuwa ene mutalesa we hadi ku jiphange jetu. Ihi itutena kubhanga phala kwakwatekesa?

8. Ihi itena kubhanga o tufunga ni atwameni a miji ande dya kumoneka o mavuwa?

⁸ Ihi itena kubhanga o tufunga? Tufunga, kwatekesenu o jiphange kudisokejeka ande dya kumoneka o mavuwa. Bhangenu yoso phala o jiphange joso mu kilunga, n’ejiye yatokala kubhanga phala kudilanga ni kuxinda o tufunga. Mamá Margaret, twamutumbula we mu milongi yatundumu, wambe: “Tufunga twetu mu mbandu ibhindamu ya kilunga, atudimuna kwila mu mbanza yetu nange o muxitu wejikwata túbhya. Ene ambe kuma se o jinguvulu ejitutangela kwila o tubhya twandamateka kyá mba twatokala kuxisa o jinzo jetu, twatokalele kulenga ni lusolo lwoso.” Kyokyo kyexile mwene o kitendelesu kyabhindamene o jiphange, mukonda kyoso kyabhiti semana jitanu, o muxitu wakwata tubhya twavulu. Mu ubhezelu ku mwiji, o atwameni a miji atena kuzwela yoso yatokala kubhanga kala muthu ku mwiji wê. Se o jitata ni twana twâ adisokejeka kyambote, kyoso kyandamoneka o mavuwa, ene andatululuka.

9. Kyebhi o tufunga kyatena kusokejeka o kikalakalu kyâ ande dya kumoneka o mavuwa ni kyoso kyabhita?

⁹ Se u kafunga wamulanga kibuka kya sidivisu ya kuboka, bhanga yoso phala kukala ni dyalwilu dya mutelembe wa jiphange atokala mu kibuka kyé, eye watokala kubhanga kiki ande dya kumoneka o mavuwa. O dyalwilu dya jiphange, udisoneka mu mukanda. Maji mu kithangana ni kithangana, tala se o dyalwilu dyâ dyala mwene kyambote. Se ubhanga kiki, wandatena kuxinda o aboki atokala mu kibuka kyé, se kumoneka mavuwa. O maka oso yá, ni lusolo lwoso tangelawu ku kafunga wala kupholo mu kibuka kya tufunga, mwene wandatangela o kafunga ka ilunga. Kyoso o jiphange jiji kyakalakala kumoxi, ene andatena kukwatekesa kyambote o jimbudi mu kilunga. Kyoso kyabhiti o túbhya, o kafunga ka ilunga ka mamá Margaret kazekele mu 36 a ji ola. Mwene wexile mu kwendesa o kikalakalu kyexile mubhanga o tufunga, kya kuxinda ni kulanga o 450 a jiphange axisa o jinzo jâ. (2 Ko. 11:27) Mukonda dya kiki, ene atenene kukwatekesa ni kulanga oso abhindamene kididi phala kukalamu.

10. Mukonda dyahi o kikalakalu kya kukunda o jimbudi, kikalakalu kya katunda phala o tufunga? (Nzwá 21:15)

¹⁰ O tufunga ene ala ni kikalakalu kya kuswinisa o jiphange ni kukwatekesa yó ala ni hele. (1 Ph. 5:2) Mu kithangana kya mavuwa, o tufunga atokala kubhanga yoso phala kwijiya se o  jiphange ala mu kididi kya kondama, se ala ni kudya mba kana. Kyoso kibhita o mavuwa, jimbeji kupholo o jiphange abhindamena hanji kiswinisu bhukaxi ka Bibidya. (Tanga Nzwá 21:15.) Phange Harold wamusidivila mu Kibuka Kya Filiyale, wakundu kyá jiphange javulu abhiti mu mavuwa. Mwene wambe: “Kubhinga kithangana phala o muthu kudivwa dingi kyambote. Ene atena kudivwa kasembele, maji o kuluwala kwijila mukonda dya jimbote jâ jadiboto, o jindandu jafu, ni mu kwijiya kwila ene ejifwa we, kutena kunangenena. O ilembalesu yiyi, itena kwabhekela ndolo yavulu mu kithangana ni kithangana. Maji kiki ki kilombolola kwila ene kala ni kixikanu.”

11. Ihi yatokala kusuluka kubhanga o miji abhiti mu mavuwa?

¹¹ Tufunga, beleselenu o kitendelesu kya kudila “kumoxi ni yó adila.” (Lom. 12:15) O tufunga abhingi kuxikinisa o jiphange abhiti mu mavuwa kwila Jihova ni jiphange ja mukwá a azolo hanji. O tufunga atokala kukwatekesa o miji phala nasuluke mu kubhanga o ima mu nzumbi kala, o kusamba, kudilonga, kuya mu yônge ni kuboka. O tufunga atena we kuswinisa o jitata kukwatekesa o twana twâ phala kudikwatenena mu ima yala nayu, sumbala abhiti mu mavuwa. Jitata, lembalesenu o twana twenu kwila Jihova wandakala jinga Dikamba dyâ ni kwakwatekesa mu ithangana yoso. Mu atangela kwila ene abhanga mbandu ya mwiji ya jiphange javulu ku mundu woso, ala polondo phala kwakwatekesa mu ithangana yoso.—1 Ph. 2:17.

12. O athu amukwá atena kubhanga ihi phala kukwatekesa yó abhiti mu mavuwa? (Tala o foto.)

¹² Ihi itena kubhanga o athu amukwá? Se o mavuwa abhiti bhu kidiki ki wejiya, ibhula o tufunga se kyebhi ki utena kukwatekesa. Nange eye utena kuzalela o jiphange alenge ku jinzo jâ mba o jiphange atokala mu kibuka kyakwatekesa yó abhiti mu mavuwa. Utena we kubhana kudya ni ima ya mukwá ku aboki abhindama. Se o mavuwa abhiti dikanga, eye utena hanji kukwatekesa. Kyebhi? Mu kusambela yó abhiti mu kibhidi kiki. (2 Ko. 1:8-11) Eye utena kukwatekesa yó abhiti mu mavuwa mu kusangela kitadi phala kukwatekesa o kikalakalu ku mundu woso. (2 Ko. 8:2-5) Se wala ni kitadi phala kuya kukwatekesa mu kididi mwabhiti o mavuwa, zwela ni tufunga. Se akwixana phala kukwatekesa, andakulonga phala utene kukwatekesa mu kithangana ni mu kididi mwanda kubhindamena. Eye wandakala dingi polondo  phala kukwatekesa mukonda dya milongi iwanda tambula.

13. Ibhidi yebhi yene mudibhana nayu o jiphange atungu mu jixi mwa fidisa o kikalakalu kyetu?

¹³ Mu jixi mwafidisa o kikalakalu kyetu, o izukutisu ibhonzesa o myenyu ya jiphange jetu. Mu jixi jiji, o jiphange jetu adibhana ni ibhidi kala, o kukamba kitadi, o kukata, ni kujibha o jindandu jâ. Mukonda dya izukutisu, o tufunga katena kukunda o jiphange pholo ni pholo, mba kuzwela mwaxaxi ka mundu ni yó wabhindamena kikwatekesu. Kiki kyene kyabhiti ni manu Mandele, phange twamutumbula mu milongi yatundumu. Phange umoxi ya muhatu mu kibuka kyê kya sidivisu ya kuboka kexile ni kitadi. Mu kusuluka o phange yu ya muhatu wabhiti mu kilwezu kya dikalu. Mwene amubhange jipelasá javulu, mwene we katokalele kukalakala. Né mwene ni ifidisu yiyi, izukutisu ya uhaxi wa COVID-19, o jiphange abhangele yoso yatenene phala kumukwatekesa, Jihova wexile mumona o ima yoso yiyi.

14. Kyebhi o tufunga kyatena kulondekesa kwila adyelela kwa Jihova?

¹⁴ Ihi itena kubhanga o tufunga? Manu Mandele wasambe yu wabhange yoso yatenene. O kwila Jihova wamutambwijila? Kyene mwene. Jihova wakwatekesa o phange ya muhatu wabhiti mu kilwezu kya dikalu bhukaxi ka jiphange mu kilunga exile dingi ni ufolo. Sayi jiphange exile mu mwambata mu inzo ya kusaka. A mukwa amubhele kitadi. Jihova wa aswinisa phala na kwatekese o phange yu yamuhatu. Mwene wabesowala o nguzu yabhange o jiphange, mukubhana kwa phange yoso yabhindamenene. (Jih. 13:16) Tufunga, se o kikalakalu kyetu akifidisa bhingenu ku jiphange ja mukwa phala ku mikwatekesa. (Jel. 36:5, 6) O kya betakota dyelelenu kwa Jihova. Mwene wanda mikwatekesa kulanga o ibhindamu ya jiphange.

15. Kyebhi kitutena kukala ni muxima umoxi ni jiphange jetu mu kithangana kya izukutisu?

¹⁵ Ihi itena kubhanga o athu amukwá? Mu ithangana ya ifidisu twatokala kudyongeka mu ibuka yofele. Mukonda dya kiki kima kyambote kukala ni paze mwaxaxi ketu. Twatokala kubhânga ni Satanaji, etu mudyetu kana. Tuloloke o itondalu ya jiphange jetu, tusotyenu kubatula o maka ni lusolo lwoso. (Jisa. 19:11; Efe. 4:26) Tukale polondo phala kudikwatekesa mudyetu. (Tit. 3:14) O kikwatekesu kyabhele o jiphange kwa phange yamuhatu wabhitile  mu kilwezu kya dikalu, kyabhekela mbote yavulu mu kibuka kyoso kya sidivisu ya kuboka. Ene akituka kala mwiji umoxi.—Jisá. 133:1.

16. Kala kilondekesa Kolose 4:3, 18, kyebhi kitutena kukwatekesa o jiphange jetu amwazukutisa?

¹⁶ Jiphange javulu amusidivila Jihova ni ufiyele woso né mwene ni ifidisu ya jinguvulu. Amukwa ala mukaleya mukonda dya kixikanu kyâ. Mu misambu yetu tutena kutumbula ene ni jindandu jâ, tusamba we phala o jiphange ene mukwatekesa yó ala mukaleya. Mukubhanga kiki ene adita mu kilwezu kya kwata we mu kaleya. c (Tanga Kolose 4:3, 18.) Kana kujimba kwila o misambu yé yene mukwatekesa kyavulu o jiphange jiji!—2 Te. 3:1, 2; 1 Ti. 2:1, 2.

17. Kyebhi kitutena kudisokejeka kindala phala o izukutisu yanda kwiza ku pholo?

¹⁷ Eye ni mwiji wé mutena kudisokejeka kindala phala o izukutisu yanda kwiza ku pholo. (Ika. 14:22) Kana kubanza ku ima yoso yandabhita. Kolesa o ukamba wé ni Jihova, kwatekesa we o twana twé kubhanga kiki. Se ukala ni hele, samba kwa Nzambi ni muxima woso. (Jisá. 62:7, 8) Dilongyenu ku mwiji se mukonda dyahi mutena ku mudyelela. d Kala kibhita mu mavuwa, o kudisokejeka kwenu ni kidyelelu kyenu kwa Jihova, kyanda kwatekesa o twana twenu kudisokejeka phala kudibhana ni izukutisu. Mukonda dya kiki ene andaswina ni kukala ni kutululuka.

18. Ihi tutena kukinga kuhádya?

¹⁸ O paze ya Nzambi itulanga, yene itutululukisa we. (Fil. 4:6, 7) Jihova utululukisa o mixima yetu bhukaxi ka paze yiyi, né mwene ni mauhaxi mba mavuwa ni izukutisu, mwene ukalakala ni tufunga phala kutukunda izuwa yoso. Mwene we utubhana o ufolo wa kudikwatekesa etu mudyetu. O paze itwala nayu lelu, yanda tukwatekesa phala kudibhana ni ibhidi yanda kwiza kupholo, kala o “hadi yadikota.” (Mat. 24:21) Kyoso o kithangana kiki kyanda bhixila, twanda bhinga kukala ni paze yiyi ni kukwatekesa akwetu. Kyoso o hadi ya dikota ki yanda bhita, o ibhidi yoso ki yanda kalaku dingi, mukonda Jihova wanda tubhana o paze yayuka ni kutululuka kala kya mesenene mwene.—Iza. 26:3, 4.