SE PHATA eye wawabhela o maujitu avulu akubhana Jihova, anga usakidila mu kutubhana o ufolo wa kusola o ima mudyetu. O Bibidya itutangela kwila o vinyu ujitu wa Nzambi. Yene kate yamba: ‘O mbolo ibhekela kisangusangu; o vinyu isangulukisa o mwenyu.’ (Ndo. 10:19; Jisá. 104:15) Maji nange eye wene mumona kwila sayi athu ene mukala ni ibhidi mukonda dya uholwa. Ku mbandu yamukwa, ku mundu woso o athu ala ni ibanzelu ki idifu yalungu ni kunwa uholwa. Mu kiki, ihi itena kukwatekesa o Jikidistá kusola ni unjimu mu maka alungu ni kunwa uholwa?

Kabasa kididi kutwatungu mba o ijila yatusase nayu, se twehela o ibanzelu ya Jihova kwendesa o ixinganeku ni ibhangelu yetu, twandakatula mbote yavulu ni kusanguluka ku mwenyu.

Nange eye wamono kya kwila, athu avulu ku mundu ene munwa uholwa wavulu ithangana yoso. Amoxi ene munwa uholwa mukonda wa abhangesa kudivwa kyambote. Amukwa ene munwa phala kujimba o maka ma. Sayi ididi, o yo anwa uholwa wavulu, a amona kala athu akulu, ni kwila aswina kyavulu.

Maji etu tu Jikisistá twala ni itendelesu ya unjimu ya Mubhangi wetu. Mu kifika, mwene utudimuna yalungu ni ibhidi ijila mu kunwa uholwa wavulu. Nange twatange kya o izwelu itusanga mu divulu dya Jisabhu 23:​29-35 yalungu ni muthu ukodiwa, ni ibhidi ijila mu kubhanga kiki. a Phange Daniyele, kafunga ku ixi ya Europa, udilembalala kyebhi kyexile o mwenyu we ande dya kudilonga yalungu ni Jihova ni kukayela o itendelesu ye. Mwene wambe: Eme ngexile munwa uholwa wavulu; kiki kyangibhangesa kubatula kyayibha o maka ku mwenyu wami. Mukonda dya kiki ngabhiti mu jiphaxi javulu, kate kindala ngiluwala hanji kyoso kingixinganeka mu maka enya.”

Kyebhi kitutena kusola ni unjimu mu maka alungu ni uholwa, ni kulenga o ibhidi ijila mu kunwa kyavulu? Twatokala kwehela o ibanzelu ya Nzambi kutwendesa.

Tumone ihi izwela o Bibidya yalungu ni uholwa, ni mukonda dyahi amoxi ene munwa.

O Mak’a Nzambi kafidisa kunwa uholwa mu ukexilu watokala. Mu kidi, o Bibidya yamba kwila o kunwa vinyu kutena kusangulukisa o muthu. Yene yamba: “Kala kiki-phe ndé kà dye o kudya kwé ni kusanguluka, o vinyu yé nwá-yu mwene ni muxima wambote.” (Ndo. 9:7) Sayi kithangana Jezú wanwine vinyu, kyene kimoxi we ni jiselevende jamukwa ja fiyele ja Jihova.—Mat. 26:​27-29; Luk. 7:34; 1 Ti. 5:23.

Sumbala o Bibidya ki ifidisa kunwa bhofele o uholwa, maji yene ifidisa o kunwa uholwa wavulu. Yene itutendelesa: “Kanenu kukodiwa ni vinyu.” (Efe. 5:18) Yene kate mwene yamba kwila “o jihôlwa . . . kanda lundula o Utuminu wa Nzamb.” (1 Ko. 6:10) Kyene mwene Jihova ufidisa o kunwa uholwa wavuvu ni kukodiwa. Muveji dya kukayela o ixinganeku ya athu ku mundu yalungu ni kunwa uholwa, etu tukayela o ukexilu wa kuxinganeka wa Nzambi.

Amoxi abanza kwila atena kunwa uholwa wavulu sé kukodiwa. Maji o kiki kilwezu kyadikota. O Bibidya ilondekesa ni kidi kyoso kwila o kukala “mu ubhika wa kunwa vinyu yavulu,” kutena kubhangesa o muthu kuta itondalu yamakota ni kuzanga o ukamba we ni Jihova. (Tit. 2:3; Jisa. 20:1) Jezú kate mwene wadimuna kwila o “kunwa kyavulu” kutena kufidisa o muthu kutambula o mabesá a utuminu wa Nzambi ku mundu wa ubhe. (Luk. 21:​34-36) Ihi phe itena kukwatekesa o Kidistá kulenga  o ibhidi itena kumoneka mukonda dya kunwa uholwa?

Kilwezu kyadikota o muthu kwehela kwila o ibanzelu ya athu mu ixi ye, ifwinyisa o ixinganeku ye yalungu ni uholwa. Mu maka alungu ni kudya ni kunwa, o Jikidistá ni unjimu woso asota kubhanga o ima isangulukisa Jihova. O Bibidya itutendelesa: “Kikale mu kudya, mba mu kunwa, mba mu kubhanga kima kyoso-kyoso, ima yoso mu ibhanga phala kuximanesa Nzambi.” (1 Ko. 10:31). Kindala tumone ibhwidisu ni itumu ya Bibidya itwatokala kuxinganeka:

O kwila ngene munwa uholwa phala kukayela ngo yamubhanga akwetu? O divulu dya Makatukilu 23:​2, dyamba: “Kana kukayela o mundu.” Jihova wexile mudimuna akwa Izalayele phala kakayela o athu kexile mubhanga o vondadi ye. O kidimwinu kiki kyatutokala etu we lelu. Se twehela kwila athu amukwa afwinyisa o ixinganeku yetu yalungu ni kunwa uholwa, bhofelebhofele tutena kweha kukayela o itumu ya Jihova ni kuzanga o ukamba wetu ni mwene.—Lom. 12:2.

O kwila ngene munwa uholwa phala kulondekesa ku akwetu kwila ngi muthu waswina? Sayi jixi, o kunwa kyavulu mu ithangana yoso, akumona kala ki kima kyayibha. (1 Ph. 4:3) Tala ihi ituswinisa o Bibidya kubhanga mu divulu dya 1 Kolindu 16:13: “Dilangyenu, mu kolokote mu kixikanu, swinenu, mukale ni nguzu.” O kwila o kunwa uholwa kutena mwene kubhangesa o muthu kukala mukwa nguzu? Kana, mu kidi o uholwa ubhanga kima kyengi. Wene utena kuzozesa o uhete wa muthu wa kuxinganeka kyambote ni kusola ni unjimu. Kyenyiki, o kunwa uholwa wavulu ki kulondekesa kwila o muthu waswina. Mu kidi, wene utobhesa o muthu. O divulu dya Izaya 28:​7, dijimbulula yo ulweza o njila mukonda dya uholwa, kala muthu wenda ni kubhendujuka anga udibhala.

O nguzu itwabhindamena phala tutene kubhanga o kima kyatokala, itunda kwa Jihova. Phala kukala ni nguzu yiyi, twabhingi kukala ku mesu azele ni kuswina mu kixikanu. (Jisá. 18:32) Tutena kubhanga kiki, mu kudilanga ku ilwezu ni mu kubhanga yoso phala ki tuzange o ukamba wetu ni Jihova. Jezú wexile ni ukamba wambote ni Jihova, athu avulu exile mu muxila mukonda waswinine mu kubhanga o kima kyatokala.

 O kwila ngene munwa uholwa phala kujimba o maka mami? O mukwa Jisálamu wasoneka: “Hele jivula jandekele ku ngi kwata mu muxima, maji mu ukamba wé, muxima wami wa batama dingi.” (Jisá. 94:19) Se o ibhidi yamukuxina kyavulu, sota kikwatekesu kwa Jihova, kana ku uholwa. Ukexilu umoxi wambote wakubhanga kiki, o kusamba kyavulu kwa Jihova. Avulu we ene mumona o mbote ijila mu kusota kikwateksu kya makamba akulu mu nzumbi mu kilunga. Mu kidi o kunwa uholwa phala kudibhana ni ibhidi, kutena kubhangesa o muthu kukamba unjimu wa kubatula o maka. (Hoz. 4:11) Phange Daniyele, twamutumbula kudima, wambe: “Eme ngexile mudibhana ni hele yavulu ni kuditatela. Ngexile munwa phala kujimba o ibhidi, maji o maka exile ngo mudibandekesa. Ngazange o ukamba wami ni akwetu, ngexile mudivwa sé valolo.” Ihi yakwatekesa phange Daniyele? Mwene wixi: “Eme ngabhindamene o kikwatekesu kya Jihova kana kya uholwa. Ni kikwatekesu kya Jihova, ngatena kudibhana kyambote ni ibhidi, kate mwene ni ku itolola. Mu kidi, Jihova wala polondo phala kutukwatekesa, ne mwene kyoso kitudivwa kwila kitwandatena kutolola o ibhidi.—Fil. 4:​6, 7; 1 Ph. 5:7.

Se sayi ithangana wene munwa uholwa, utena kuditonginina se wabhingi kulungulula kima ku kifwa kye kya kunwa. Dibhwidise: ‘O kwila sayi ndandu mba kamba dyami dya kazola dyathandanganya ni ukexilu wami wa kunwa o uholwa?’ Se kyene, nange kitena kulombolola kwila o uholwa wamukubhekela maka sé eye kukijiya. ‘O kwila kindala ngamunwa dingi kyavulu izuwa kudima ndenge?’ Kiki nange kyene kibhita ni muthu sumbala ki holwa luwa maji wamumateka kya kuditela mu njila yiyi. ‘O kwila kyene mungibhonza kubhita izuwa yofele mba yavulu sé kunwa uholwa?’ Se kyene, nange o kunwa o uholwa kwamukituka kya kifwa kye. Kiki kitena kulombolola kwila eye wabhindamena kikwatekesu kya asaki phala kutolola o kibhidi kiki.

Mukonda dya ibhidi yavulu ijila mu kunwa uholwa, sayi Jikidistá kaxikina kunwa ne ngo bhofele. Amukwa asola kudituna kunwa mukonda kawabhela o dizumba, o kutowala, o kulula, mba o kungangama kwa uholwa. Se sayi dikamba dye dyasolo  kudituna o uholwa, utena kulondekesa kwila wamumusuwa mu kuxila o ibanzelu ye sé kumufundisa.

Nange umona kwila unjimu kuxinda mbambe phala kwijiya se watokala kunwa kate bhebhi. Mba o muthu utena kuxinda mbambe yalungu ni jiveji jandanwa, nange lumoxi ku semana mba kunwa ngo bhofele mu ola ya kudya. Amukwa asola se uholwa webhi wandanwa, kala vinyu mba jisele, maji ni kilunji. Ene kaxikina kunwa mauholwa wala ni nguzu yavulu ya kukodiwisa, ni uholwa wene mufunga ni mauholwa amukwa. Se muthu uxinda jimbambe jambote mu maka alungu ni kunwa uholwa, ki kyandamubhonza kujikumbidila. O Kidistá wakulu mu nzumbi, katokala kuthandanganya ni ihi yandaxinganeka akwa yalungu ni mwene, mukonda dya mbambe yaxindi, ni nguzu yamubhanga phala ku ikumbidila.

Mu maka alungu ni kunwa uholwa, twatokala we kuxinganeka kyebhi kidivwa akwetu. O divulu dya Loma 14:​21, dyamba: “Kima kyambote kukamba kudya xitu mba kunwa vinyu, mba kubhanga kima kyoso-kyoso, kibhalesa phang’yé.” Kyebhi ki utena kukayela o kitendelesu kiki? Londekesa henda ku jiphange. Se umona kwila o kunwa uholwa kwandabhangesa phange kudivwa kyayibha, o henda yandakukwatekesa kukamba kunwa mu kithangana kyenyokyo. Mu kubhanga kiki eye ulondekesa kwila uxila akwenu, ni kwila wa azolo. Kiki kyandalondekesa we kwila wamuta o vondadi ya akwenu ku pholo, kana o vondadi ye.—1 Ko. 10:24.

Ku mbandu yamukwa, o jinguvulu ala we ni itumu yalungu ni uholwa. O Jikidistá a belesela o itumu yiyi. O itumu nange izwela se athu a kitala kyahi atokala ngo o kunwa uholwa. Mba nange yene yamba kwila se o muthu wanu uholwa, katokala kwendesa dikalu mba makina.—Lom. 13:​1-5.

Jihova watubhana maujitu avulu akatunda, umoxi o ufolo wakudisolela mudyetu kyebhi kitwanda kalakala ni maujitu ya. Kiki kyalungu ni kusola se ihi itwanda dya ni ihi itwanda nwa. Kyenyiki, tubhangyenu yoso phala o ima itusola ilondekesa kwila tubhana valolo yavulu mu ufolo wakusola watubhana Tata yetu ya dyulu.