1. Ihi yatokala kubhanga o mayala Jikidistá phala kuditunda kyambote mu kukayela o phangu ya Jezú?

 SOBHA Davidi watendelesa Solomá: “Swina, kala u kindanda.” (1 Jis. 2:​1-3) Kiki kitendelesu kyambote phala o mayala oso amesena kukayela o phangu ya Jezú lelu. Phala kubhanga kiki, ene atokala kudilonga kubelesela o ijila ya Nzambi ni kukumbidila o itumu ya Bibidya mu maukexilu oso a myenyu ya. (Luk. 2:52) Mukonda dyahi kima kyambote o minzangala ya mala kukala mayala akulu mu nzumbi?

2-3. Mukonda dyahi kima kyambote o phange yadiyala munzangala kukala muthu wakulu mu nzumbi?

² O jiphange ja mala ala ni ikalakalu yavulu ku mwiji ni mu kilunga. Enu mu jiphange ja mala, sé phala mwene muxinganeka mu ikalakalu imwandakala nayu ku pholo. Eye nange wamesena kukala muboki wathembu yoso, mukwatekexi wa tufunga, anga kupholo dya kwenda, kukala kafunga. Nange wamesena we kukazala ni kukala ni twana. (Efe. 6:4; 1Ti. 3:1) Phala kukumbidila o jimbambe jiji ni kuditunda kyambote, eye wabhingi kukula mu nzumbi. b

³ Ihi itena ku kukwatekesa kukala u diyala wakulu mu nzumbi? Sayi mauhete uwabhingi kukala nawu. Ihi phe i utena kubhanga kindala phala kudipelepalala ni kuditunda kyambote mu kukumbidila kabasa ikalakalu iwandakala nayu ku pholo?

4. Kwebhi ku utena kusanga jiphangu jambote phala kujikayela? (Tala we ofoto.)

⁴ Sola jiphangu jambote phala kujikayela. Mu Bibidya mwala jiphangu  javulu jambote phala o minzangala ya mala kujikayela. O mayala ya otumbule mu Bibidya, azolele Jihova. Ene akwatekesele we o mundu wa Nzambi mu maukexilu avulu. Utena we kusanga jiphangu jambote ja mayala akulu mu nzumbi, kikale ku mwiji we mba mu kilunga kye. (Jih. 13:7) Ku mbandu yamukwa, eye wala ni phangu yayuka ya Jezú Kidistu. (1 Ph. 2:21) Kyoso ki uya ni kudilonga o jiphangu jiji, xinganeka mu idifwa yá yambote. (Jih. 12:​1, 2) Mu kusuluka, tala kyebhi ki utena kukayela o phangu ya.

5. Kyebhi ki utena kukala ni kilunji kyambote, ni mukonda dyahi o kidifwa kiki kyala ni valolo? (Jisálamu 119:9)

⁵ Kala “ni kilunji kyambote.” (Jisa. 3:21) O diyala wala ni kilunji kyambote, kabhange o ima ni lusolo, maji mwene udyanga kuxinganeka kyambote ande dya kusola yandabhanga. Kyenyiki, bhanga nguzu phala kukala ni kidifwa kiki. Mukonda dyahi? Mukonda o mundu wezala ni minzangala akayela o ixinganeku ya. (Jisa. 7:7; 29:11) Ku mbandu yamukwa, o mitelembe ya izunzumbya, jifilime, ni ima imoneka mu iternete, itena kufwinyisa o ukexilu we wakuxinganeka ni wakubhanga o ima. Maji kyebhi ki utena kukala ni kilunji kyambote? Kyadyanga, dilonge o itumu ya Bibidya ni uxinganeke mu mbote ijila mu kayela o itumu yiyi. Mu kusuluka, ehela kwila o itumu yiyi ikukwatekesa kubhanga o ima isangulukisa Jihova. (Tanga Jisálamu 119:9.) Se udilonga kuxinganeka mu ukexilu yu, kiki kyandakukwatekesa kyavulu kukituka diyala wakulu mu nzumbi. (Jisa. 2:​11, 12; Jih. 5:14) Tala kyebhi o kukala ni kilunji kyambote kutena ku kukwatekesa mu maukexilu ayadi: (1) mu kudibhana ni jiphange ja ahatu (2) mu maka alungu ni kuzwata ni ukexilu we wakudiyudika.

6. Kyebhi o kukala ni kilunji kyambote kwandakwatekesa o munzangala wadiyala kuxila o jiphange ja ahatu?

⁶ O kukala ni kilunji kyambote kwandakukwatekesa kuxila o ahatu. Mu kifika, phange ya diyala munzagala nange umesena kwijiya dingi kyambote phange ya muhatu. Ki kima kyayibha kubhanga kiki. Maji, o munzangala wadiyala wala ni kilunji kyambote, kandazwela, kusoneka, mba kubhanga kima kyosokyoso kyejilondekesa kwila wawabhela o phange ya muhatu, se ka mesena kukazala ne. (1 Ti. 5:​1, 2) Se o phange yadiyala wamutangesa phange ya  muhatu, phala kulondekesa kwila wamumuxila, mwene nuka wandaxikina kukala ne ubheka, se bhu mbandu ya ki bhwala muthu wengi.—1 Ko. 6:18.

7. Kyebhi o kukala ni kilunji kyambote kwandakwatekesa o munzangala kusola kyambote o izwatu ye ni kyebhi kyandayudika o ndemba?

⁷ O munzangala wa diyala ulondekesa we kwila wala ni kilunji kyambote, bhukaxi ka uzwatelu we ni mu ukexilu wa kuyudika o ndemba. Athu avulu ene mubhanga o izwatu ni kubheka maukexilu a ubhe a kuzwata, kene muxila Jihova. Ene nange we abhanga ima ya ufusa. Kyenyiki o izwatu ibhanga ene, itena kudikwatenena kyavulu ku mukutu, mba ibhangesa o mayala a izwata kudifwangana kala ahatu. Mu kiki kyoso kyasola o izwatu, o munzangala wamukula mu nzumbi wandakayela o itumu ya Bibidya, ni phangu ya jiphange mu kilunga ala ni ukexilu wakuzwata kyambote. Mwene utena kudibhwidisa: ‘O kwila o ima ingisola ilondekesa kwila ngala ni kilunji kyambote, ni kwila ngene mu xila akwetu? O kwila o uzwatelu wami ubhangesa akwetu kuxikina kwila ngi selevende ya Nzambi?’ (1 Ko. 10:​31-33; Tit. 2:6) O munzangala wadiyala wala ni kilunji kyambote, andamuxila, kana ngo ku jiphange mu kilunga maji we ni kwa Tata yetu ya dyulu.

8. Kyebhi o munzagala kyatena kudilonga kukala muthu atokala kumudyelela?

⁸ Kala u muthu atokala kukudyelela. O munzangala wala ni kidifwa kiki, ubhanga nguzu phala kukumbidila o ikalakalu ye yoso. (Luk. 16:10) Tala o phangu yayuka ya Jezú. Mwene nuka waxisa o ikalakalu ye kudima. Muveji dya kiki, mwene wakumbidila o ikalakalu yoso yamubhanene Jihova ne mwene se kyamubhonzele ku ibhanga. Mwene wazolele o athu—bengebenge o maxibulu me. Mukonda dya kiki, mu vondadi ye wabhana o mwenyu bhu kididi kya. (Nzw. 13:1) Mu kukayela o phangu ya Jezú, bhanga nguzu phala kukumbidila kabasa kikalakalu kyakubhana. Se k’wejiya kyebhi ki utena kubhanga o kikalakalu, londekesa kulenduka mu kubhinga kikwatekesu ku jiphange ja mala ja kulu mu nzumbi. Kana kusanguluka mu kukalakala ngo bhofele. (Lom. 12:11) Muveji dya kiki, se ubhanga o kikalakalu phala ‘Jihova kana phala o athu,’ wandasota kukibhanga kyambote ni kuzubha yoso yakutendelesa. (Kol. 3:23) Kidi kwila eye k’u muthu wayuka, kyenyiki londekesa o kulenduka mu kuxikina o itondalu ye.—Jisa. 11:2.

9. Mukonda dyahi o munzangala wadiyala watokala kukala ni mauhete?

⁹ Phala kukituka diyala dyakulu mu nzumbi, eye watokala kukala ni mauhete. O mauhete ya andakukwatekesa kuxikina ni kubhanga ikalakalu mu kilunga, kusanga salu phala kulanga o ibhindamu ye mba ya mwiji we, ni kukala ni ukamba wambote ni akwenu. Tuzwele dingi bhofele yalungu ni mauhete enya.

10-11. Mbote yahi yandakatula o munzangala wadiyala ni kilunga, mu kudilonga kutanga ni kusoneka kyambote? (Jisálamu 1:​1-3) (Tala we ofoto.)

¹⁰ Dilonge kutanga ni kusoneka kyambote. O  Bibidya izwela kwila wazediwa o muthu ukatula kithangana izuwa yoso phala kutanga ni kuxinganeka mu Mak’a Nzambi. (Tanga Jisálamu 1:​1-3.) Mu kutanga o Bibidya izuwa yoso, mwene wandakwijiya o ukexilu wa Jihova wa kuxinganeka. Kiki kyandamukwatekesa kuxinganeka kyambote ni kudilonga kukumbidila o itumu ya Nzambi. (Jisa. 1:​3, 4) O mayala ala ni ukexilu yu a abhindamena kyavulu mu kilunga. Mukonda dyahi?

¹¹ O jiphange jetu abhindamena mayala atena kulonga ni kubhana itendelesu bhukaxi ka Bibidya. (Tit. 1:9) Se wijiya kutanga ni kusoneka kyambote, wandatena kupelepalala madiskulusu ni itambwijilu ibhekela mbote ku akwenu ni kuswinisa o kixikanu kya. Wandatena we kusoneka o mbote i ukatula mu kudilonga ni mu kwivwa madiskulusu mu yonge mu kilunga, mu yonge ya makota ni mu yonge ya ilunga. O ima i usoneka yandakukwatekesa kukolesa o kixikanu kye ni kuswinisa akwenu.

12. Ihi yandakukwatekesa kudizwelesa kyambote?

¹² Dilonge kudizwelesa kyambote ni athu. O phange ya diyala watokala kudilonga kudizwelesa kyambote. Kiki kilombolola kwila mwene wabhingi kwivwa ni kutendela o ixinganeku ni kyebhi kidivwa akwa. (Jisa. 20:5) Mwene utena kwijiya kyebhi kyamudivwa o muthu, mu kwivwa o dizwi dye, kumona o pholo ye, ni bhukaxi ka ijimbwete ibhanga o muthu. Eye k’wandatena kubhanga kiki se k’ubhiti kithangana ni athu. Se eye ubhita ithangana yavulu mu kudizwelesa bhukaxi ka jinjimbu mu mitelembe, kyandakubhonza dingi kudizwelesa ni athu pholo ni pholo. Mu kiki, sota kudizwelesa ni akwenu pholo ni pholo.—2 Nz. 12.

13. Ihi dingi yatokala kudilonga o munzangala? (1 Timote 5:8) (Tala we ofoto.)

¹³ Dilonge kulanga o ibhindamu ye mwene. O diyala wakulu mu nzumbi watokala utena kulanga o ibhindamu ye ni ya mwiji we. (Tanga 1 Timote 5:8.) Sayi jixi, o minzangala ya mala atena kudilonga mauhete ni jitata ja mba ni jindandu. Mu jixi jamukwa, o minzangala atena kudilonga ufunu mba mauhete amukwa, kyoso kyakala mu xikola ya kaxi. Kikale se kyene kibhita mu ixi ye mba kana, kima kyambote kudilonga uhete wandakukwatekesa kusanga salu. (Ika. 18:​2, 3; 20:34; Efe. 4:28) Bhanga yoso phala akwenu ejiye kwila eye umukalakadi waswina, wawabhela kuzubha o ikalakalu ye. Se ubhanga kiki, nange ki kyandakubhonza kusanga salu ni kunagenena ku. O idifwa ni mauhete utwazwela kate bhabha, atena we kukwatekesa o mayala kukala polondo phala o ikalakalu yandakala nayu ku hadya. Kindala tuzweleku mauhete amoxi.

14. Kyebhi o munzangala wadiyala kyatena kudipelepalala phala kubokona mu sidivisu ya thembu yoso?

¹⁴ O sidivisu ya thembu yoso. Jiphange javulu ja mala jakulu mu nzumbi, amateka o sidivisu ya thembu yoso kyoso kyexile hanji minzangala. O kukala muboki wathembu yoso kukwatekesa o minzangala ya mala kudibhana kyambote ni athu amaukexilu oso. Kiki kya akwatekesa we kungastala ni unjimu o kitadi kyanganyala ni kudilanga phala kate makongo. (Fil. 4:​11-13) Ukexilu umoxi wambote wakumateka o sidivisu ya thembu yoso, o kusidivila kala muboki wa ithangana ni ithangana. Avulu asidivila kala aboki a ithangana ni ithangana, kiki kya akwatekesa kukala polondo phala kumateka kala aboki a thembu yoso. O kukala muboki wa thembu yoso kujikula o njila phala maukexilu amukwa a thembu yoso, kala o kudibhakula mu sidivisu ya kutunga, mba kukalakala ku Betele.

15-16. Kyebhi o phange ya diyala munzangala kyatena kudipelepalala phala kusidivila o kilunga?

¹⁵ Kukala mukwatekexi wa tufunga mba kafunga. O mayala atokala kusuwa o mbambe ya kusidivila o jiphange, kala tufunga mu kilunga. O Bibidya yamba kwila o mayala asota kukumbidila o mbambe yiyi, a “musota kikalakalu kyambote.” (1 Ti. 3:1) Ande dya kukala kafunga, o phange ya diyala watokala ukala hanji ni idifwa imukwatekesa kusidivila kala mukwatekexi wa tufunga. O akwatekexi a tufunga, akwatekesa o tufunga mu maukexilu avulu. Kikale o tufunga mba o akwatekexi a tufunga, ni kulenduka kwoso asidivila o jiphange, anga akalakala ni kuswina kwoso mu ukunji. O minzangala ya mala atena kusidivila kala akwatekexi a tufunga, ne mwene se ala hanji mu kitala kya kikumbi. O akwatekexi a tufunga akulu mu nzumbi, atena ku asola kala tufunga mu kitala kya 20 a mivu.

¹⁶ Kyebhi ki utena kudisokejeka phala kukala ni idifwa yandakukwatekesa kusidivila kala mukwatekexi wa tufunga mba kafunga? Ki kwala ijila phala kubhanga kiki. Maji lembalala kwila phala kutambula o maujitu ya, eye watokala kukayela o itumu ya Bibidya, kuzola Jihova, o mwiji, ni kilunga. (1 Ti. 3:​1-13; Tit. 1:​6-9; 1 Ph. 5:​2, 3) Bhanga nguzu phala kutendela o idifwa yoso iwabhingi kukala nayu. Samba kwa Jihova phala ku kukwatekesa kulondekesa o idifwa yiyi ku mwenyu we. c

17. Kyebhi o munzangala wa diyala kyatena kudipelepalala phala kukala munumi ni mutwameni wa mwiji? (Tala we ofoto.)

¹⁷ Munumi ni mutwameni wa mwiji. Kala kyalondekesa Jezú, sayi mayala akulu mu nzumbi, asuluka mu kukala makudi. (Mat. 19:12) Maji se  usola kukazala, eye wandakala dingi ni ikalakalu yamukwa kala munumi ni mutwameni wa mwiji. (1 Ko. 11:3) Jihova ukingila kwila o munumi uzola o muhatu we, anga ulanga o ibhindamu ye, ukala dikamba dye dya kazola, ni kumukwatekesa kukala ni ukamba wambote ni Jihova. (Efe. 5:​28, 29) O idifwa ni mauhete utwazwela mu milongi yiyi, kala o kukala ni kilunji kyambote, kuxila o ahatu, ni kukala u muthu atokala kukudyelela, yandakukwatekesa kukala u munumi wambote. Kiki kyandakukwatekesa kukala polondo phala kukumbidila o ikalakalu ye kala munumi ni mutwameni wa mwiji.

18. Kyebhi o munzangala wa diyala kyatena kudipelepalala phala kukala tata yambote ?

¹⁸ Tata. Kyoso ki wandakazala, nange utena kukituka tata. Ihi i utena kudilonga ku phangu ya Jihova yalungu ni kukala tata yambote? Kwala madisá avulu. (Efe. 6:4) Ni muxima woso, Jihova wazwela kwa Mon’e, Jezú, kwila wamuzolele ni wamuxikinine. (Mat. 3:17) Se ukituka tata, bhanga nguzu ithangana yoso phala kulondekesa kwa mon’e kwila wamuzolo. Mu ximane jinga mu ima yoso yambote yabhanga. O jitata jikayela o phangu ya Jihova, jikwatekesa o twana twa kukituka mayala ni ahatu akulu mu nzumbi. Utena kudipelepalala kindala phala kukala tata yambote, mu kulondekesa henda ku mwiji we, ku jiphange mu kilunga, ni kwalanga kyambote. Dilonge kwatangela kwila wa azolo, ni kwila ene ala ni valolo yavulu phala eye. (Nzw. 15:9) Kiki kyandakukwatekesa kukituka munumi ni tata yambote ku hadya. Mu kithangana kiki, kalakala ni nguzu yoso phala Jihova, kwatekesa o mwiji we ni kilunga.

19-20. Ihi yandamikwatekesa enu mu minzangala ya mala kukala mu athu mwakulu mu nzumbi? (Tala ofoto yakapa.)

¹⁹ Enu mu jiphange ja mayala minzangala, ejiyenu kyu kwila kwabhingi kubhanga nguzu phala kukituka diyala wakulu mu nzumbi. Eye wabhingi kusola phangu jambote phala kujikayela, kukala ni kilunji kyambote, kukala u muthu atokala kukudyelela, kudilonga mauhete andakukwatekesa ku mwenyu, ni kudipelepalala phala o mwenyu we ku pholo.

²⁰ Eye nange utena kukala ni hele kyoso ki uxinganeka mu ikalakalu yavulu iwala nayu ku pholo. Maji eye utena kuditunda kyambote. Lembalala kwila Jihova wamesena kyavulu ku kukwatekesa. (Iza. 41:​10, 13) Se phata kwila o jiphange mu kilunga jandakukwatekesa we. Kyoso kiwandakituka u diyala wakulu mu nzumbi kala kyamesena Jihova, wandasanguluka kyavulu ku mwenyu. Twamizolo kyavulu enu mu minzangala yetu ya mala! Jihova abesowale o nguzu imwamubhanga kindala phala kukituka mu mayala mwakulu mu nzumbi.—Jisa. 22:4.