1. Mukonda dyahi Mbalahamu wejitena kusuluka kukingila kukala ni mona?

 JIHOVA wakanene kwa kamba dye Mbalahamu kwila o ifuxi yoso mu ngongo eji tambula mabesá bhukaxi ka mbutu yé. (Dim. 15:5; 22:18) Kuma Mbalahamu wexile ni kixikanu kya kolo kwa Nzambi, mwene kexile ni phata kwila o kikanenu kya Nzambi kyeji dikumbidila. Maji ne kiki, kyoso Mbalahamu kyexile ni 100 ya mivu, o muhatu we ni 90 a mivu, o dikaza didi dya fiyele ka vwalele luwa mona. (Dim. 21:​1-7) Ne kiki, o Bibidya yamba: “Bhukaxi ka kidyelelu kyê, Mbalahamu walondekesa kixikanu kwila weji kala tata ya ifuxi yavulu, kala kya kanene Nzambi.” (Lom. 4:18) Eye wejiya kwila o kidyelelu kya Mbalahamu kyadikumbidila. Mwene wakituka tata ya Izake, o mona exile mu mukingila mu mivu yavulu. Mukonda dyahi Mbalahamu wadyelele kwila Jihova wejikumbidila o kikanenu kye?

2. Mukonda dyahi Mbalahamu wadyelele kwila o kikanenu kya Jihova kyejidikumbidila?

² Kuma Mbalahamu wejidile kyambote Jihova, mwene “waxikinine ni kidi kyoso kwila, Nzambi weji kumbidila o kima kya kanena.” (Lom. 4:21) Jihova wasanguluka ni Mbalahamu, yu wamwixana muthu wayuka mukonda dya kixikanu kye. (Tiy. 2:23) Kala kilondekesa o divulu dya Loma 4:​18, Mbalahamu wexile ni kixikanu ni kidyelelu. Kindala tumone ihi yazwela poxolo Phawulu yalungu ni kidyelelu, kala kyosoneke mu kibatulu 5 kya divulu dya Loma.

3. Ihi yajimbulula Phawulu yalungu ni kidyelelu?

³ Phawulu wajimbulula se mukonda dyahi tutena kuxikina ni  kidi kyoso kwila “o kidyelelu kyetu ki kitubhekela jisonyi.” (Lom. 5:5) Mwene we watukwatekesa kutendela kyebhi o kidyelelu kyetu kitena kudibandekesa dingi. Kyoso kituya ni kuzwela yalungu ni ima yasoneka Phawulu mu divulu dya Loma 5:​1-5, xinganeka kyebhi o kidyelelu kye kyalungu ni hadya kyene muya ni kudibandekesa kithangana ni kithangana. O kudilonga we yalungu ni maka ya, kwandakukwatekesa kumona ihi i utena kubhanga phala o kidyelelu kye kikole dingi, o kiwala nakyu kindala ndenge. Maji kyadyanga, tuzwele hanji yalungu ni kidyelelu kyakatunda kyambe Phawulu kwila ki kitubhekela jisonyi.

4. Maka ebhi azwela mu divulu dya Loma 5:​1, 2?

⁴ Tanga Loma 5:​1, 2. Phawulu wasoneka o izwelu yiyi phala o kilunga ku Loma. O jiphange kwenyoko adilongele yalungu ni Jihova ni Jezú, alondekesele kixikanu, ya akitukile Jikidistá. Kyenyiki, Nzambi ‘wa amono kala athu ayuka mukonda dya kixikanu,’ yu wa undu ni nzumbi ikola. Ene ejitena kukingila ni hanji yoso phala kutambula o mabesá, ni kudyelela ni kidi kyoso kwila eji kwatambula mwene.

5. Kidyelelu kyahi kyala nakyu o Jikidistá a undu?

⁵ Ku pholo dya kwenda, Phawulu wasonekena o Jikidistá ku Mbanza ya Efezu yalungu ni kidyelelu kya abhanene Nzambi. O kidyelelu kiki kyalungile ni kutambula o “mabesá akatunda anda bhana ku athu’ê akôla.” (Efe. 1:18) Phawulu wajimbulula we ku akwa Kolose se kwebhi kweji tambula o mbote ya. Mwene wexana o mbote yiyi kala, “kidyelelu kya mibhakela Nzambi ku dyulu.” (Kol. 1:​4, 5) Kyenyiki, o kidyelelu kya Jikidistá a undu, o kutambula o mwenyu wakalelaku ku dyulu ni kutumina kumoxi ni Kidistu. —1 Te. 4:​13-17; Dij. 20:6.

6. Yalungu ni kidyelelu kye, ihi yazwela phange imoxi am’undu?

⁶ O Jikidistá a undu abhana valolo yavulu ku kidyelelu kiki. Umoxi mudya, Phange Frederick Franz, wazwela kyebhi kyexile mudivwa yalungu ni kidyelelu kiki, mwene wambe: “O kidyelelu kyetu kya kidi, kyanda dikumbidila mwene, enyoso atokala ku kakilunga kofele ka  144.000, andatambula yoso yakanena Nzambi.” O futu itwandatambula yanda beta dingi kota, kima kyosokyoso kitwala nakyu ndenge. Mu kubhita mivu yavulu mu kusidivila Jihova ni ufiyele woso, mu muvu wa 1991 Phange Franz wambe: O kidyelelu kyetu kyala hanji ni valolo yavulu. . . . Kyoso kituya ni kukingila o kidyelelu kiki, o kisakidilu kyetu kidibandekesa dingi. Etu twala polondo phala kukingila, ne mwene se kubhita mazunda a mivu. Kindala ngibhana dingi valolo ku kidyelelu kyetu m’ukulu ndenge.”

7-8. Kidyelelu kyahi kyala nakyu jiselevende javulu ja Jihova? (Loma 8:​20, 21)

⁷ Abhezi avulu a Jihova lelu, ala ni kidyelelu kyengi. O kidyelelu kyexile nakyu Mbalahamu—kutambula o mwenyu wakalelaku mu ixi, kyoso kyandakwiza o Utuminu wa Nzambi. (Jih. 11:​8-10, 13) Phawulu wasoneka yalungu ni kidyelelu kiki kya katunda. (Tanga Loma 8:​20, 21.) Kyoso kiwadilongo o kikanenu kya Bibidya kyalungu ni hadya mu veji yadyanga, ihi iwawabhela dingi? O kwila o kwijiya kuma sayi kizuwa eye k’wandakala dingi mukwa ituxi? Inga wasangulukile mu kudilonga kwila o jindandu je ja kazola jandavutuka dingi ku mwenyu ni kutunga mu palayizu mu ixi? Mukonda dya kidyelelu kyatubhana Nzambi, eye wala ni ima yavulu phala kukingila ni hanji yoso.

⁸ Kikale se twamukingila kutambula mwenyu wakalelaku ku dyulu mba mu ixi, etwenyoso twala ni kidyelelu kitusangulukisa. O kidyelelu kyetu phe kitena kukola dingi. Phawulu wajimbulula se kiki kibhita kyebhi. Tudilonge ihi yasoneka Phawulu yalungu ni kidyelelu kyetu. O izwelu ye itukwatekesa kudyelela ni kidi kyoso kwila, o ima itwamukingila yandadikumbidila mwene.

9-10. Kala kyolondekese bhukaxi ka Phawulu, ihi itena kukingila o Jikidistá? (Loma 5:3) (Tala we o jifoto.)

⁹ Tanga Loma 5:3. Phawulu wambe kwila kyoso kitubhita mu jiphaxi, o kidyelelu kyetu kikola dingi. Nange tutena kuxinganeka kwila,  o izwelu yiyi yedi kala kitondalu. Mu kidi, o akayedi oso a Kidistu atena kukingila kubhita mu jiphaxi. Tala o phangu ya Phawulu. Mwene wambe ku akwa Tesalonika: ‘Kyoso ki twakexile kumoxi ni enu, twexile mu midimuna kwila, tweji bhita mu jiphaxi, kiki kyene kyá kya mubhita.’ (1Te. 3:4) Mwene wasoneka kiki ku akwa Kolindu: “Jiphange jami, ki nga mesena kwila mu kamba kwijiya o ibhidi i twa bhitile nayu . . . Ki twejidile se tweji fwa mba tweji bhuluka.”—2 Ko. 1:8; 11:​23-27.

¹⁰ O Jikidistá lelu atena we kukingila kubhita mu jiphaxi. (2 Ti. 3:12) O kwila eye wene mudibhana ni izukutisu mukonda dya kukala ni kixikanu kwa Jezú ni kumukayela? O jindandu ni makamba nange akulokalala. Ene kate mwene nange akutalatala kyayibha. O kwila o kukala umuthu wa kidi mu ima yoso kwakubhekela kya ibhidi ku salu? (Jih. 13:18) O kwila o jinguvulu asotele kya kukufidisa kuboka yalungu ni kidyelelu kye ku akwenu? Maji kabasa kibhidi kitudibhana nakyu, Phawulu wambe kwila twatokala kusanguluka. Mukonda dyahi?

11. Mukonda dyahi twatokala kukolokota kabasa kibhidi kitudibhana nakyu?

¹¹ Tutena kusanguluka kyoso kitubhita mu jiphaxi mukonda dya mbote itwandakala nayu. Kala kizwela o divulu dya Loma 5:​3, “o jiphaxi jetu jibhekela kukolokota.” Jikidistá joso jandabhita mu jiphaxi. Mu kiki, etwenyoso twatokala kukolokota kabasa kibhidi kimoneka ku mwenyu wetu. Twandatambula ngo o mbote itwamukingila, se tukolokota anga tusuluka mu kusidivila Jihova. Etu ki twamesena kukala kala o athu a asokesa ni jimbutu jasonokena bhu matadi bhwala ngó mavu ofele, mu kifika kyatele Jezú. Ku dimatekenu, ene axikina o maka ni kisangusangu, maji ‘kyoso kyamoneka o ibhidi mba izukutisu,’ adibhale ni lusolo. (Mat. 13:​5, 6, 20, 21) Kidi kwila, o kudibhana ni izukutisu mba ibhidi ki kima kitusangulukisa, maji kyoso kitukolokota anga tusuluka mu kusidivila Jihova, tukatula mbote yavulu. Mu ukexilu webhi?

12. Mbote yebhi itukala kyoso kitukolota mu ibhidi?

¹² O dixibulu Tiyaku watumbula o mbote ijila mu kukolokota mu ibhidi. Mwene wasoneka: “Ehelenu o kukolokota kuzubha o kikalakalu kyê, phala mu ima yoso mutenene mukale sé kikuma, sé ku mi kamba kima.” (Tiy. 1:​2-4) Tiyaku wambe kwila o kukolokota kwala ni kikalakalu phala kubhanga, mbambe phala ku ikumbidila. Kikalakalu kyahi? O kukolokota kutena ku kukwatekesa kukala dingi ni mwanyu, kixikanu, ni kudyelela dingi kwa Nzambi. Maji kyoso kitukolokota mu ibhidi, tukala dingi ni mbote mu ukexilu wengi.

13-14. O kukolokota kutubhekela ihi, ni ihi ibhita ni kidyelelu kyetu kyoso kitukolokota? (Loma 5:4)

¹³ Tanga Loma 5:4. Phawulu wambe kwila o kukolokota kubhangesa “Nzambi kutuxikina.” O kukolokota kwe kubhangesa kukuxikina kwa Jihova. Kiki ki kilombolola kwila Jihova usanguluka kyoso ki ubhita mu jiphaxi mba ibhidi. Muveji dya kiki, mwene usanguluka mukonda eye ukolokota ni ufiyele woso. Kituswinisa kyavulu kwijiya kwila kyoso kitukolokota, Jihova usanguluka n’etu!—Jisá. 5:12.

¹⁴ Lembalala kwila Mbalahamu wadibhanene ni ibhidi. Maji kyoso kya kolokota ni ufiyele woso, wasangulukisa Jihova. Jihova wamumono kala kamba Dye, yu wamwixana muthu wayuka. (Dim. 15:6; Lom. 4:​13, 22) Kiki kitena we kubhita n’etu. Jihova ka sanguluka n’etu mukonda dya ikalakalu yavulu itubhanga mba mukonda dya kididi kutwala kumusidivila. Jihova usanguluka n’etu kyoso kitulondekesa o ufiyele wetu sumbala ni ibhidi. Kabasa o kitala kyetu, o ima yamubhita ku mwenyu wetu, mba o uhete utwala nawu, etwenyoso tutena kukolokota. O kwila kindala eye wamudibhana ni  kibhidi, maji wamukolokota ni ufiyele woso? Se kyene, lembalala kwila wamusangulukisa Jihova. Kyoso kitumona kwila Nzambi wasanguluka n’etu, o kidyelelu kyetu ku mabesá atukanena mwene, kikola dingi.

15. Ihi yazwela Phawulu mu divulu dya Loma 5:​4, 5, ni kibhwidisu kyebhi kitena kumoneka?

¹⁵ Jihova usanguluka n’etu kyoso kitusuluka mu kumukala fiyele anga tukolokota mu ibhidi. Tala kyebhi Phawulu kyasuluka mu kujimbulula o maka enya. Mwene wambe: “O kutuxikina kubhekela kidyelelu, o kidyelelu kyetu ki kitubhekela jisonyi.” (Lom. 5:​4, 5) Amoxi nange kya abhonza kutendela o maka enya. Mukonda dyahi? Mukonda ithangana kudima, kala kyosoneke mu divulu dya Loma 5:​2, Phawulu wambele kya kwila o Jikidistá mu mbanza ya Loma exile kya ni kidyelelu, o “kidyelelu kya kutambula o fuma ya Nzambi.” Kyenyiki, muthu nange utena kwibhwidisa: ‘Se o Jikidistá exile kya ni kidyelelu, mukonda dyahi ku pholo Phawulu wa atendelesa dingi kukala ni kidyelelu?’

16. Kyebhi o kidyelelu kya muthu kimateka kukula? (Tala we o jifoto.)

¹⁶ Kuma o kidyelelu kima kikula mba kidibandekesa, kyenyiki tutena kutendela ihi yamesenene kuzwela Phawulu. Mu kifika: O kwila wamudilembalala o kithangana kyoso kiwevu mu veji yadyanga o kidyelelu kyakatunda kitusanga mu Mak’a Nzambi? Mu kithangana kyenyokyo, eye nange wawabhelele kyavulu o kixinganeku kya kutunga mu palayizu mu ixi kate ku hadya ni hadya, maji k’wejidile ni kidi kyoso se kyejidikumbidila mwene. Maji kyoso kiwayi ni kudilonga dingi yalungu ni Jihova ni ikanenu ya Bibidya, eye waxikina ni kidi kyoso kwila o kidyelelu kiki kyandadikumbidila mwene.

17. Kyebhi o kidyelelu kye kisuluka ni kukula kyoso kyakubatizala?

¹⁷ Ne mwene kyoso kyakubatizala, eye wasuluka mu kudilonga yalungu ni Jihova ni kumuzola dingi. Kiki, kyakuxikinisa dingi kwila o  ima iwamukingila se phata yandadikumbidila. (Jih. 5:13–6:1) Eye nange wamono o kidi kitusanga mu divulu dya Loma 5:​2-4 kudikumbidila ku mwenyu we. Eye wabhiti mu jiphaxi javulu, maji wakolokota, anga Jihova walondekesa kwila wasanguluka n’eye. Mukonda dya kwijiya kwila Jihova wakuzolo anga wasanguluka n’eye, kindala ki wala dingi ni phata kwila wandatambula o ima yakanena mwene. O kidyelelu kye kindala kyakolo dingi o kiwexile nakyu kudimatekenu ndenge. Wala mwene ni kidyelelu kya kidi. Kyene kibhanga mbandu ku mwenyu we. O kidyelelu kiki kifwinyisa o ukexilu woso wa mwenyu we, kilungulula o ukexilu u utalatala o mwiji we, o ukexilu u usola o ima, kate mwene kyebhi ki ukalakala ni kithangana kye.

18. Kidyelelu kyahi kibhana Jihova?

¹⁸ O poxolo Phawulu watumbula dingi kima kyamukwa kyakatunda ki ukala nakyu kyoso kya kuxikina kwa Nzambi. Nzambi ukuxikinisa kwila o ima iwamukingila yandadikumbidila. Mukonda dyahi utena kukala ni kidyelelu kiki? Phawulu wajimbulula o kidyelelu kyabhana Nzambi ku Jikidistá, mu kwamba: “O kidyelelu kyetu ki ki tubhekela jisonyi. Kyenyiki bhukaxi ka nzumbi ikôla ya tubhana Nzambi, o mixima yetu yezala ni henda yê.” (Lom. 5:5) Eye utena kuxikina ni muxima woso mu kidyelelu kyakubhana Jihova.

19. Ihi i utena kudyelela ni kidi kyoso?

¹⁹ Xinganeka mu kikanenu kya Jihova kwa Mbalahamu, kyebhi Nzambi kyamuxikina, yu wamumono kala kamba Dye. Mbalahamu ka dyelele mu kingoho. O Bibidya yamba: “Mbalahamu kyazubha kulondekesa mwanyu, watambula o kikanenu kiki.” (Jih. 6:15; 11:​9, 18; Lom. 4:​20-22) Se phata Mbalahamu ka dyela mu kukingila. Eye utena kudyelela ni kidi kyoso kwila, se usuluka mu kukala fiyele, wandatambula we o ima iwamukingila. Kiki kidyelelu kya kidi; kisangulukisa, ki kibhekela jisonyi kana! (Lom. 12:12) Phawulu wasoneka: “Kyenyiki o Nzambi mukwa kubhana o kidyelelu, a mibhane kusanguluka kwavulu ni kutululuka, bhukaxi ka kidyelelu ki mwala nakyu kwa mwene. Phala mu kutena kwa nzumbi ikôla, o kidyelelu kyenu kivule dingi.”—Lom. 15:13.