1. Kyoso kituxinganeka mu kixikanu kya Mbalahamu, kibhwidisu kyebhi nange kitena kumoneka?

 SUMBALA nzungule ya athu evu kya kima kyalungu ni Mbalahamu, maji athu ofele ngo amwijiya kyambote. Maji ki kyene kimoxi n’eye, mukonda eye wejiya ima yavulu yalungu ni Mbalahamu. Mu kifika, eye wejiya kwila o Bibidya ixana Mbalahamu kala “tata ya athu oso alondekesa kixikanu.” (Lom. 4:11) Maji ne kiki, nange utena kudibhwidisa, ‘O kwila ngitena we kukala ni kixikanu kyakolo kwa Nzambi kala kyakexile nakyu Mbalahamu?’ Kyene, eye utena.

2. Mukonda dyahi kima kyambote kudilonga o phangu ya Mbalahamu? (Tiyaku 2:​22, 23)

² Ukexilu umoxi ututena kukala ni kixikanu kala kya Mbalahamu, o kudilonga o phangu ye. Mbalahamu ithangana yoso wexile mubelesela o ima yexile mumubhinga Nzambi. Mwene waxikina kuya mu ixi ya makanga, watungu mu jibalaka mu mivu yavulu, yu wexile polondo phala kubhana mon’e wa kazola Izake kala sata. Mbalahamu watena kubhanga o ima yoso yiyi, mukonda wexile ni kixikanu kyakolo kwa Jihova. Mukonda dya kixikanu ni ibhangelu ye yambote, Mbalahamu wasangulukisa Jihova anga wakituka dikamba dye. (Tanga Tiyaku 2:​22, 23.) Jihova wamesena kwila etwenyoso, kate n’eye, tukala tu athu a axikina kwa mwene ni kukituka makamba me. Kiki kyene kyamubhangesa kukwatekesa poxolo Phawulu ni Tiyaku, kusoneka yalungu ni phangu ya Mbalahamu. Twandamona se ihi yazwela ene kala kyosoneke mu divulu dya Loma kibatulu 4 ni mu divulu dya Tiyaku kibatulu 2. O ibatulu iyadi yiyi, izwela ima yakatunda yalungu ni Mbalahamu.

3. Velusu yebhi ya Bibidya yatumbula Phawulu ni Tiyaku?

 ³ Phawulu ni Tiyaku atumbula o izwelu itusanga mu divulu dya Dimatekenu 15:​6, yamba: “[Mbalahamu] waxikana kwa Jihova, Mwene anga umumona kala muthu wayuka.” O muthu wayuka ulombolola yo amuxikina kwa Nzambi kala muthu wakambe kikuma. Kisangusangu kyadikota kwijiya kwila Jihova utena kumona o muthu mukwa ituxi kala muthu wayuka! Se phata eye wamesena kwila Nzambi ukumona we kala u muthu wayuka. Mu kidi, kiki kitena kubhita. Kindala twandadilonga se mukonda dyahi Jihova wexana Mbalahamu kala muthu wayuka, ni ihi itwatokala kubhanga phala atwixane we tu athu ayuka.

4. Ihi ifidisa o athu kukala athu ayuka?

⁴ Mu mukanda we ku akwa Loma, Phawulu wambe kwila athu oso akwa ituxi. (Lom. 3:23) Mu kyenyiki phe, kyebhi o muthu kyatena kumumona kala wayuka mba wakambe kikuma ku pholo ya Nzambi? Phala kukwatekesa o Jikidistá joso kutambwijila o kibhwidisu kiki, Phawulu wazwela yalungu ni phangu ya Mbalahamu.

5. Mukonda dyahi Jihova watenene kwixana Mbalahamu kala muthu wayuka? (Loma 4:​2-4)

⁵ Kyoso Mbalahamu kyatungile mu Mbanza ya Kanana, Jihova wamwixana muthu wayuka. Mukonda dyahi Jihova watenene kwixana Mbalahamu kala muthu wayuka? O kwila kiki kyabhiti mukonda Mbalahamu wabelesela o Kitumu kya Mozé ni kuyuka kwoso? Kana, ki kyene. (Lom. 4:13) Mukonda kyoso Jihova kyexana muthu wayuka kwa Mbalahamu, o Kitumu kya Mozé ka kibhanene luwa. Kyene akibhana ngo 400 ja mivu kupholo ndenge, ku kifuxi kya Izalayele. Mukonda dyahi phe Jihova wexana Mbalahamu kala muthu wayuka? Jihova walondekesa henda kwa Mbalahamu, yu wamwixana muthu wayuka mukonda dya kixikanu kye.—Tanga Loma 4:​2-4.

6. Ihi ibhangesa Jihova kwixana o muthu mukwa ituxi kala muthu wayuka?

⁶ Phawulu wambe kwila kyoso muthu kyalondekesa kixikanu kwa Nzambi, Mwene “u mumona kala muthu wayuka.” (Lom. 4:5) Phawulu wambe dingi: “Kiki kyene kyazwela Davidi yalungu ni kuzediwa kukala na-ku o muthu a mumono kwa Nzambi kwila wayuka, sumbala ki kyabhiti mukonda dya ibhangelu yê. Mwene wambe: ‘Azediwa yó o ibhangelu yâ yayibha a ijimbi, o ituxi yâ yololoke. Wazediwa o muthu ituxi yê, Jihova kanda i lembalala.’” (Lom. 4:​6-8; Jisá. 32:​1, 2) Nzambi uloloka o ituxi ya athu alondekesa kixikanu kwa mwene. Kyoso Jihova kyaloloka o ituxi ya muthu, mwene ka ilembalala dingi. Jihova umumona kya kala muthu wayuka mukonda dya kixikanu kye kwa Mwene.

7. Mu ukexilu webhi o abhezi afiyele a Jihova m’ukulu exile athu ayuka?

⁷ Sumbala Nzambi wexile mumona Mbalahamu, Davidi, ni abhezi amukwa afiyele kala athu ayuka, ne kiki ene exile hanji akwa ituxi. Maji mukonda dya kixikanu kya, Nzambi wexile mu amona kala athu akambe kikuma, bengebenge se twa asokesa ni yo kexile mubheza Nzambi. (Efe. 2:12) Mu mukanda we kwa akwa Loma, Phawulu wajimbulula kwila twatokala kukala ni kixikanu phala tukale tumakamba a Nzambi. Kiki kyene kyabhangele Mbalahamu ni David. Kyene we kitwatokala kubhanga.

8-9. Ixinganeku yebhi yayibha yene mukala nayu amoxi mu ima yasoneka Phawulu ni Tiyaku, ni mukonda dyahi?

⁸ Mu jihama ja mivu, o atwameni a jingeleja ene muzoka yalungu ni valolo ya kixikanu ni ya ibhangelu. Sayi atwameni a jingeleja alonga kwila, phala kubhuluka eye watokala ngo kuxikina Ngana Jezú Kidistu. Eye nange wevwile kya muthu kuzwela kiki: “Xikina Jezú ni ubhuluke.” Amoxi azwela kwila kiki kyene kyalongo Phawulu mukonda mwene wambe: “O muthu a  mumono kwa Nzambi kwila wayuka, sumbala ki kyabhiti mukonda dya ibhangelu yê.” (Lom. 4:6) Maji, amukwa amba kwila eye utena kubhuluka, mu kuya mu ididi a imona ku ngeleja kala ididi ikola ni mu kubhanga imbamba yambote. Phala kulondekesa kwila amuzwela o kidi, ene nange atumbula o izwelu yala mu divulu dya Tiyaku 2:24: “O muthu anda mumona kala muthu wayuka bhukaxi ka ikalakalu yê, kana ngó bhukaxi ka kixikanu kyê.”

⁹ Mukonda dya kiki, sayi atokwexi a Bibidya abanza kwila Phawulu ni Tiyaku kexile ni kixinganeku kimoxi mu maka alungu ni kixikanu ni ibhangelu ya muthu. Amoxi ku jimesene ja jingeleja alonga kwila, Phawulu waxikinine kwila, phala kusangulukisa Nzambi o muthu watokala ngo kukala ni kixikanu, maji Tiyaku waxikinine kwila o muthu watokalele ngo kubhanga imbamba yambote. Sayi mulongexi wa ngeleja wajimbulula o maka enya mu ukexilu yu: “Tiyaku kexile mutendela se mukonda dyahi Phawulu wajijile mu kuzwela kwila [o muthu a mumona kala muthu wayuka] mukonda dya kixikanu kye ngo, kana bhukaxi ka ibhangelu.” Maji twejiya kwila Jihova mwene wabhangesa Phawulu ni Tiyaku kusoneka o maka ya. (2 Ti. 3:16) Kyenyiki, tutena kuxikina kwila sayiku ukexilu wabhebhuluka wa kutendela se ihi yamesenene kuzwela kikale Phawulu mba Tiyaku. Phala kubhanga kiki twatokala kudilonga ihi dingi yasoneka ene mu mikanda ya, yalungu ni maka enya.

10. “Ikalakalu” yebhi yexile muzwela Phawulu? (Loma 3:​21, 28) (Tala we ofoto.)

¹⁰ “Ikalakalu” yebhi yexile muzwela Phawulu mu divulu dya Loma kibatulu 3 ni 4? Mwene wexile muzwela bengebenge yalungu ni “ima ituma o Kijila,” kifwa o kijila kya Mozé kyabhanene ku akwa Izalayele ku Mulundu wa Sinayi. (Tanga Loma 3:​21, 28.) Kiki nange kilondekesa kwila, mu izuwa ya Phawulu sayi Jikidistá exile Jijudé, kya abhonzele kuxikina kwila kabhingile  dingi kukayela o Kijila kya Mozé ni kubhanga o ima yoso yexile mutendelesa o Kijila kyenyokyo. Kyenyiki, Phawulu watumbula o phangu ya Mbalahamu phala kulondekesa kwila o muthu ka bhingi kukayela o Kijila kya Mozé phala kumumona kwa Nzambi kala muthu wayuka. Mu veji dya kiki, Phawulu wajimbulula kwila twabhingi kukala ni kixikanu. Kiki kituswinisa kyavulu, mukonda kitulonga kwila se tukala ni kixikanu kwa Nzambi ni kwa Jezú, Jihova wanda tumona kala tu athu ayuka.

11. “Ikalakalu” yebhi yexile muzwela Tiyaku?

¹¹ Ku mbandu yamukwa, o “ikalakalu” yazwela Tiyaku mu kibatulu kya 2, ki ilungu ni “ikalakalu ya Kijila” yatumbula Phawulu. Tiyaku wexile muzwela yalungu ni ikalakalu mba ima yene mubhanga o Jikidistá mu kizuwa ni kizuwa. O ikalakalu yiyi yene ilondekesa se o Kidisitá wala mwene ni kixikanu kya kidi kwa Nzambi mba kana. Tumone ifika iyadi yazwela Tiyaku.

12. Kyebhi Tiyaku kyajimbulula kwila o kixikanu ni ibhangelu yenda kumoxi? (Tala we ofoto.)

¹² Mu kifika kyadyanga, Tiyaku wambe kwila o Jikidistá atokala kutalatala athu oso sé katombo. Phala kujimbulula o maka enya, mwene wate kifika kyalungu ni diyala ubhanga o mbote ku muthu wala mvwama, maji ka bhange mbote ku ngadyama. Tiyaku walondekesa kwila, o diyala didi ne mwene se uzwela kwila wala ni kixikanu, o ibhangelu ye ilondekesa kwila wamuzwela makutu. (Tiy. 2:​1-5, 9) Mu kifika kyakayadi, Tiyaku wazwela yalungu ni muthu wamono ‘phange ya diyala mba ya muhatu wabhindamena izwatu mba kudya,’ maji ka bhange kima phala kumukwatekesa. Sumbala o muthu yu uzwela kwila wala ni kixikanu, mwene ka mukilondekesa bhukaxi ka ibhangelu; mu kidi, o kixikanu kye ki kyala ni valolo. Kala kyasoneka Tiyaku, “se kitubhange ima yambote, o kixikanu kyetu kyafu.”—Tiy. 2:​14-17.

13. Phangu yebhi yatumbula Tiyaku phala kujimbulula o maka alungu ni kulondekesa o kixikanu bhukaxi ka ibhangelu? (Tiyaku 2:​25, 26)

 ¹³ Tiyaku watumbula Lahaba kala phangu yambote ya muthu walondekesa o kixikanu kye bhukaxi ka ibhangelu. (Tanga Tiyaku 2:​25, 26.) Mwene wevu yalungu ni Jihova, yu watongolola kwila Jihova wexile mukwatekesa akwa Izalayele. (Josu. 2:​9-11) Lahaba walondekesa o kixikanu kye bhukaxi ka ibhangelu—mwene walange o alondi ayadi akwa Izalayele exile mu kilwezu. Mukonda dya kiki, Lahaba sumbala wexile mukwa ituxi, ni kwila kexile we mukayela o Kijila kya Mozé, maji amumono kwa Nzambi kala muthu wayuka, kala kyabhitile ni Mbalahamu. O phangu ya Lahaba itulonga kwila twatokala kulondekesa kwila twala ni kixikanu bhukaxi ka ibhangelu.

14. Mukonda dyahi tutena kuzwela kwila Phawulu ni Tiyaku kexile muzoka mu ima yasoneka?

¹⁴ Kyenyiki, tutena kumona kwila Phawulu ni Tiyaku exile mujimbulula o maka alungu ni kixikanu ni ibhangelu mu maukexilu ayadi k’adifu. Phawulu wexile mutangela o Jikidistá Jijudé kwila, ene nuka ejitena kwaxikina kwa Jihova mu kukayela ngo o Kijila kya Mozé. Ku mbandu yamukwa, Tiyaku wexile mujimbulula kwila, o Jikidistá joso jabhingi kulondekesa o kixikanu kya mu kubhanga o mbote ku akwa.

15. Tutena kulondekesa o kixikanu kyetu bhukaxi ka ibhangelu yebhi? (Tala we o jifoto.)

¹⁵ Jihova ka mututangela kwila phala kutumona kala tu athu ayuka, twatokala kuya ku ixi ya makanga, kutunga mu jibalaka, ni kubhana mon’etu kala sata, kala kyabhangele Mbalahamu. Mu kidi, kwala maukexilu avulu akulondekesa bhukaxi ka ibhangelu yetu kwila twala ni kixikanu. Tutena kusangesa o athu a ubhe mu kilunga, kukwatekesa o jiphange jabhindama, ni kubhanga o mbote ku jindandu jetu. Se tubhanga kiki, Jihova wandasanguluka, wandatubesowala we.  (Lom. 15:7; 1 Ti. 5:​4, 8; 1 Nz. 3:18) Ukexilu umoxi wakatunda utwala nawu wakulondekesa o kixikanu kyetu, o kuboka o njimbu yambote ni kuswina kwoso. (1 Ti. 4:16) Etwenyoso tutena kulondekesa bhukaxi ka ibhangelu yetu kwila twaxikina kuma o ikanenu ya Jihova yandadikumbidila, ni kwila, o ukexilu we wakubhanga o ima wene wabeta kota. Se kyene kitubhanga, tutena kudyelela kwila Nzambi wandatumona kala tu athu ayuka ni kutuxikina kala tu makamba me.

16. Kikanenu kyebhi kyabhangele kwa Mbalahamu, ni kixikanu kyebhi kyexile nakyu?

¹⁶ O kibatulu 4 kya divulu dya Loma, kijimbulula disá dyamukwa dyakatunda ditutena kudilonga ku phangu ya Mbalahamu: O valolo ya kukala ni kidyelelu. Jihova wakanene kwila, bhukaxi ka Mbalahamu “ifuxi yavulu” eji kwabesowala. Xinganeka mu kidyelelu kyakatunda kyexile nakyu Mbalahamu! (Dim. 12:3; 15:5; 17:4; Lom. 4:17) Maji phe, kate kyoso Mbalahamu kyexile ni 100 ya mivu, o Sala 90 a mivu, o mona amukanene ka muvwalele luwa. Phala o athu, Mbalahamu ni Sala kejitena dingi kuvwala mona mukonda dya kitala kya. Kiki kyexile kibhidi kyadikota phala Mbalahamu. “Maji bhukaxi ka kidyelelu kyê, Mbalahamu walondekesa kixikanu kwila weji kala tata ya ifuxi yavulu.” (Lom. 4:​18, 19) Ku pholo dya kwenda, o yexile mukingila Mbalahamu yadikumbidila. Mwene wakituka tata ya Izake, o mona exile mu mukingila.—Lom. 4:​20-22.

17. Kyebhi kitwejiya kwila tutena kukala tu makamba a Nzambi, ni kutumona kala tu athu ayuka kwa mwene?

¹⁷ Tutena kukala tu makamba a Nzambi, ni kutumona kala tu athu ayuka kwa mwene kala kyexile Mbalahamu. Mu kidi, kiki kyene kyexile muzwela Phawulu kyoso kyasoneka: “O izwelu ‘a mumono’ ka isoneka ngó mukonda dya [Mbalahamu]. Yene yósoneke we phala etu. Kuma etu anda tumona we kala tu athu ayuka, mukonda tuxikina Yó wafukununa Ngana yetu Jezú.” (Lom. 4:​23, 24) Kala Mbalahamu, twabhingi kukala ni kixikanu kwa Jihova, kubhanga imbamba yambote, ni kudyelela ni kidi kyoso kwila o ikanenu ya Jihova yandadikumbidila. Mu kibatulu 5 kya divulu dya Loma, Phawulu wasuluka mu kuzwela yalungu ni kidyelelu kyetu. Ya ene o maka utwandazwela mu milongi ya kayela.