O kwila eye watange mwene kyambote o milongi yoso ya Mulangidi wa muvu yú? Se kyene, twakudyondo tala o itambwijilu ya ibhwidisu yakayela:

O ‘kulungulula o ilunji yetu’ kwalungu ni ihi? (Lom. 12:2)

Kiki ki kyalungu ngo ni kubhanga ima yambote. Kiki kyalungu ni kuditonginina moxi dyetu ni kulungulula o ukexilu wa mwenyu wetu phala tudikwatenene mu itumu ya Nzambi.—w23.01, mafwe 8-9.

Kyebhi kitutena kudilanga kyoso kitumona o izulukutu ya mundu?

Etu twamesena kwijiya kyebhi o izulukutu ya mundu yamukumbidila o ikanenu ya Bibidya. O kuzwela kwila o izulukutu ya mundu ilondekesa kuma o dizubhilu dyandakwiza mu kizuwa kya nganji, kutena kutubhangesa kudimwangununa. Muveji dya kiki, kima kyambote kudikwatenena mu kuzwela yalungu ni milongi yene mutubhana o kilunga kya Jihova. (1 Ko. 1:10)—w23.02, difwe 16.

Kyebhi o batizu ya Jezú ki yadifu ni batizu ya akayedi’ê?

Jezú kabhingile kudibhakula kwa Jihova kala etu, mukonda mwene amuvwalele mu kifuxi kyadibhakwile kyá kwa Jihova. Jezú wexile muthu wayuka, kakexile ni ituxi. Mwene kabhingile kudyela o ituxi.—w23.03, difwe. 5.

Kyebhi kitutena kukwatekesa akwetu kutambwijila mu yonge?

Tutena kubhana itambwijilu yofele mba ki yalebha kyavulu, ni kwehela we akwetu kutambwijila. Tutena kudilanga phala ki tuzwele jipondo javulu. Mu kubhanga kiki kwandaxala hanji jipondo phala akwetu we kuzwela.—w23.04, difwe 23.

Yebhi o “Njila Ikôla” yotumbule mu divulu dya Izaya 35:8?

O kikoka kiki kya kifika, kyadyanga kilombolola o njila yende o Jijudé tunde ku ixi ya Babilonya kate mu Jeluzaleme. Ihi itwamba yalungu ni izuwa yetu? Hama ya mivu ande dya muvu wa 1919, o kikalakalu kya kusokejeka o njila akibhangele kya—kulungulula ni kubhanga jikopya ja Bibidya, ni ima yamukwa. O mundu wa Nzambi wene mukwendela mu “Njila Ikola” phala o palayizu mu nzumbi, yanda kwakwatekesa kutambula o mabesá a Utuminu wa Nzambi.—w23.05, mafwe 15-19.

O divulu dya Jisabhu kibatulu 9, dibhana itendelesu yalungu ni ahatu ebhi ayadi a kifika?

O divulu dya Jisabhu dizwela yalungu ni “muhatu wa dilaji,” ubhekela kalunga, ni muhatu wa unjimu, wixana o athu phala kwa endesa “mu njila ya kilunji” ni mwenyu. (Jisa. 9:​1, 6, 13, 18)—w23.06, mafwe 22-24.

Kyebhi Jihova kyalondekesa kulenduka ni kutetuluka mu kudibhana ni Lote?

Jihova wa tendelesa Lote kutunda mu mbanza ya Sodoma n’alengela ku milundu. Kyoso Lote kyadyondo phala kulengela ku mbanza ya Zowale muveji dya kuya ku milundu, Nzambi wamuxikina.—w23.07, difwe 21.

Ihi itena kubhanga o muhatu se mwadi we utala ufusa?

O muhatu watokala kulembalala kwila ki kikuma kye. Mwene watokala kudikwatenena mu ukamba we ni Nzambi. Watokala we kutanga ni kuxinganeka mu misoso ya Bibidya ya ahatu adibhanene ni ibhidi, ya a sange kiximbakatesu. Mwene utena kukwatekesa mwadi we kudilanga ku ilwezu yejimubhangesa kutala ufusa.— w23.08, mafwe 14-17.

Kyoso kyatwibhwidisa yalungu ni kixikanu kyetu, kyebhi o kutetuluka kutena kutukwatekesa kubatama?

Muveji dya kumona o kibhwidisu kala kizukutisu phala etu, twatokala kukimona kala kithangana phala kwijiya ihi yala ku muxima wa muthu. Mu kubhanga kiki, twandakala dingi polondo phala kutambwijila ni kutululuka kwoso.—w23.09, difwe 17.

Yalungu ni kutambula nguzu, ihi itutena kudilonga ku phangu ya Madiya?

Mu kwijiya kwila wejikituka mama ya Mexiya, Madiya watambula nguzu bhukaxi ka akwa. O anju Ngabidiyele ni Nzebele aswinisa Madiya bhukaxi ka Mak’a Nzambi. Etu we tutena kutambula nguzu bhukaxi ka jiphange jetu.—w23.10, difwe 5.

Kyebhi Jihova kyatena kutambwijila o misambu yetu?

Mwene ukanena kwivwa o misambu yetu ni kumona kyebhi yene yalungu ni vondadi ye. (Jel. 29:12) Jihova utena kutambwijila misambu yadifwangana mu maukexilu kadifu, maji mwene wanda tukwatekesa ithangana yoso.—w23.11, mafwe 21-22.

O divulu dya Loma 5:​2, dilondekesa kwila o Jikidistá exile kya ni kidyelelu, mukonda dyahi mu velusu 4 a atendelesa dingi kukala ni kidyelelu?

Mu kwivwa o njimbu yambote, o muthu utena kusanguluka ni kidyelelu kya kukala ni mwenyu mu palayizu mu ixi. Maji mu kukolokota mu jiphaxi javulu, ni kumona kwila Jihova wasanguluka ni yoso yamubhanga, o kidyelelu kye kikola dingi.—w23.12, mafwe 12-13.