1. Mu ukulu o mbolo yexile mulombolola ihi?

 O ATHU mu ukulu exile mudya dingi mbolo. (Dim. 14:18; Luk. 4:4) Mukidi mu ithangana yavulu o Bibidya itumbula o kudya kwoso-kwoso kala “mbolo”. (Mat. 6:11) Jezú wabhange madiwanu ni mbolo mu ithangana iyadi. (Mat. 16:​9, 10) Mu madiwanu enya, imoxi tu isanga mu divulu dya Nzwá kibatulu 6. Kyoso kituya ni kudilonga o maka enya, twanda mona madisá ututena kudilonga ni kyebhi kitutena kukumbidila mu izuwa yetu.

2. Athu avulu abhindamene kudya mu kithangana kyebhi?

² Kyoso o maxibulu a Jezú kyazubha o kuboka ene atohokele kyavulu. Kyenyiki ene ni Jezú asambela mu ulungu, ya ayi kwengi phala kunyoha. (Mál. 6:​7, 30-32; Luk. 9:10) Ene abhixila mu sanzala a ixana Betesayida, phala kukala ubheka wâ. Kyoso o athu kyejidile kwila Jezú wexile kyenyoko mu tu ithangana twofele athu avulu abhixila-ku. Jezú wa abhana matwi. Ni henda yoso Jezú wakatula kithangana phala kwalonga yalungu ni utuminu wa Nzambi ni ku saka o jihaxi. Kuma o dikumbi dyafwile kya, kwebhi kweji sanga o kúdya phala kudisa o mundu woso? Amoxi mudya exile ni kúdya, maji abhingile dingi kuya mu jisanzala phala kusumba kúdya. (Mat. 14:15; Nzw. 6:​4, 5) Ihi yeji bhanga Jezú?

JEZÚ WABHANGE MADIWANU PHALA KUDISA O MUNDU

3. Jezú watangela o maxibulu mê kubhanga ihi? (Tala we o foto yakapa.)

³ Jezú watangela o maxibulu mê: “Ene kabhingi kuya;  bhanenu-wu kima phala kúdya.” (Mat. 14:16) Ene amono kwila kejitena kubhanga kiki mukonda kwexile 5.000 ja mayala. Se tutanga o ahatu ni ana ndenge, nange kwexile 15.000 ja athu. (Mat. 14:21) Mandele wambe: “Bhabha bhwala kamunzangala wala ni mbolo jitanu ni mbiji jiyadi. O kwila jene janda soka phala o mundu woso yú?” (Nzw. 6:9) Athu avulu, kate mwene ni jingadyama, exile mudya o jimbolo jobhange ni sevada, nange ku jimbiji kwexile kya môngwa ni kwila jakukutile kya. Ne kiki, o jimbiji jexile naju o kamunzangala, ki jeji soka phala kudisa o mundu woso.

4. Ihi itutena kudilonga mu divulu dya Nzwá 6:​11-13? (Tala we o jifoto.)

⁴ Jezú wamesenene kulondekesa kwila mwene mukwa kuzalela, mukiki mwene watumu o athu oso kuxikama mu ibuka-ibuka, mu yangu ya wisu. (Mál. 6:​39, 40; tanga Nzwá 6:​11-13.) Twatange kwila Jezú wasakidila Tat’ê mukonda dya jimbolo ni jimbiji. Mwene wabhange kiki phala kulondekesa kwila Nzambi mwene o muthu wexile mubhana o kúdya. Kima kyambote kukayela o phangu ya Jezú ni kusamba kwa Jihova ande dya kúdya kikale se twala ubheka mba kana. Jezú wambe ku maxibulu mê phala kubhana kudya ku athu, enyoso adi, anga ekuta. Mwene wambela o maxibulu phala kubhongolola o ibhasu yasubhuka, phala ku idya mu kithangana kyengi. Jezú walondekesa unjimu mu kukalakala kyambote ni ima yexile nayu. Se eye utata utena kutanga o musoso yú ku twana twê mu kwalondekesa se mukonda dyahi kima kyambote o kusamba ande dya kúdya, kukala  mukwa kuzalela, mukwa kubhana, kala kyexile Jezú.

5. Ihi yandalele kubhanga o mundu kyoso kyamono Jezú kubhanga madiwanu, maji ihi yabhage Jezú?

⁵ O athu exile mu diwana mu ukexilu wa alongo Jezú ni madiwanu exile mubhanga. Ene ejidile kwila Mozé wambele kwila Jihova weji tumikisa polofeta yakatunda, kyenyiki ene abanze kwila Jezú o polofeta yiyi. (Mate. 18:​15-18) Nange ene abanzele kwila Jezú weji kala sobha, weji bhana kúdya kwavulu ku akwa Izalayele. Kyenyiki o mundu wamesenene ku “mubhanga sobha.” (Nzw. 6:​14, 15) Se Jezú waxikinine, mwene weji dita mu maka a jinguvulu. Maji Jezú kadite mu maka enya, ihi yabhange mwene? O Bibidya yamba kwila Jezú wadisandula yu wabande ubheka wê ku mulundu phala kusamba. Didi disá dya dikota phala etu!

6. Kyebhi kitutena kulondekesa kwila twamesena kukayela o phangu ya Jezú? (Tala we ofoto.)

⁶ Kidi kwila o athu nuka anda tubhinga phala kubhanga madiwanu, né kusaka o uhaxi mba kukala Sobha yâ. Maji ene atena kutufunyisa phala kudita mu maka a jinguvulu mu kubanza kwila ene anda bhanga ima yambote. Maji Jezú phangu yambote phala etu. Mwene waditunu kubhanga mbandu ya jinguvulu. Mwene wambe: “O Utuminu wami ki utokala mu ngongo mumu.” (Nzwá 17:14;  18:36) Kuma tujikidista twatokala kuxinganeka mu ima yabhange Jezú ni kukayela o phangu yê. Etu tuboka, tusamba phala o Utuminu wa Nzambi wize. (Mat. 6:10) Tumone dingi o madiwanu abhangele Jezú yalungu ni kudisa o mundu, ni ihi itutena o kudilonga.

“O DILOMBOLWELU DYA JIMBOLO”

7. Ihi yabhange Jezú ni kyebhi kyadivu o jipoxolo? (Nzwá 6:​16-20)

⁷ Kyoso kyazubha o kudisa o mundu, Jezú watendelesa o jipoxolo jê kuvutuka mu Kafalanawú mu ulungu. O athu akexile mukwiza phala ku mubhanga sobha, mwene watundu-bhu, yu wayi ubheka wê ku mulundu. (Tanga Nzwá 6:​16-20.) Kyoso kyexile mubhanga njila, mu kalunga mukala mabhuku a makota mukonda dya kitembu kya nguzu. Amono Jezú kwenda kuthandu a menya ni kuzukama kwa ene. Jezú wazwela kwa poxolo Phetele phala kwendela we kuthandu a menya. (Mat. 14:​22-31) Kyoso Jezú kyabhixila mu ulungu o kitembu kya tululuka. O maxibulu adiwana anga amwambela, exi: “Mu kidi, eye u Mon’a Nzambi mwene.” a (Mat. 14:33) Kima kyambote kulembalala kwila o maxibulu kamwambele kiki kyoso mwene kyadisa o mundu, maji kyoso mwene kyendele kuthandu a menya. Máluku wambe dingi: “[O jipoxolo] adiwana kyavulu, mukonda kakexile mu tendela luwa o dilombolwelu dya jimbolo, o mixima yâ yakolele hanji mu kutongoloka.” (Mál. 6:​50-52) O maxibulu afikile kwila Jihova wabhele ngo o kutena kwa Jezú kwa kwabhana jimbolo. Mukusuluka Jezú wazwela dingi yalungu ni madiwanu alungu ni jimbolo, yu watulongo disá dyengi.

8-9. Mukonda dyahi o mundu wasoto Jezú? (Nzwá 6:​26, 27)

⁸ O athu a adisa kwa Jezú, atandanganyele ngo ni nzala yâ ni ima yabhindamene. Kyebhi? Mukizuwa kyakayela ene amono kwila Jezú ni jipoxolo jê ayile mukididi kyengi. O athu abandele mu mawulungu atundile ku Tibeliyade, ya ayile musota Jezú ku Kafalanawú. (Nzw. 6:​22-24) O kwila ene abhange kiki benge-benge phala kwivwa o njimbu ya Utuminu? Kana. Ene atandanganyele dingi ni kudya. Kyebhi kitwejiya o kidi kiki?

⁹ Tala yabhiti kyoso o mundu kyadisange ni Jezú mu Kafalanawú. Ni kuxila kwoso Jezú wambe kwila ene exile musuwa ngo o ibhindamu yâ mu xitu. Sumbala ene ‘adi o jimbolo, ya ekuta,’ Jezú wambe kwila koko kwexile “kudya kubola.” Mwene wa atangela kwila ene atokalele kukalakela o “kudya kunangenena, kubhana o mwenyu wakalelaku.” (Tanga Nzwá 6:​26, 27.) Jezú wambe kwila Tat’ê mwene ubhana o kudya kuku. Kyoso o athu kyevu kwila sayi kudya kubhana o mwenyu wakalelaku ene adiwana! Kudya kwebhi ni kyebhi kyeji tena kusanga?

10. Ihi yatokalele kubhanga o athu phala kutambula o “mwenyu wakalelaku”?

¹⁰ Mu kidi o Jijude a mesenene kwijiya ihi yatokalele o kubhanga phala kutambula o kudya kuku. Nange ene exile mubanza mu ima yexile mu Kitumu kya Mozé. Jezú wa atambwijila, wixi: “O kima kyandala Nzambi kyenyiki: Kalenu ni kixikanu kwa yó wa mutumu.” (Nzw. 6:​28, 29) Ene atokalele kukala ni kixikanu kwa Jezú phala kutambula o “mwenyu wakalelaku.” Jezú wazwelele kya yalungu ni maka enyá. (Nzw. 3:​16-18, 36) Mukusuluka mwene wazwela dingi yalungu ni ihi i twatokala kubhanga phala kutambula o mwenyu wakalelaku.—Nzw. 17:3.

11. Ihi ilondekesa kwila o Jijudé exile ngo mu dikwatenena mu ibhindamu yâ mu xitu? (Jisálamu 78:​24, 25)

 ¹¹ O Jijudé jojo kaxikinine mu ilongesu ya Jezú yalungu ni “mwenyu wakalelaku.” Kyenyiki ene amubhwidisa: “Madiwanu ahi u wanda bhanga phala tu amone ni tu kuxikine?” (Nzw. 6:30) Ene azwela kwila mu izuwa ya Mozé o athu atambwile o maná yexile o kudya kwexile mudya izuwa yoso. (Neh. 9:15; tanga Jisálamu 78:​24, 25.) Mukidi ene exile mubanza ngó mu kudya. Kyoso Jezú kyazwela yalungu ni mbolo ya dyulu kwila ki yadifwile ni maná, mukonda yeji kwa bhana o mwenyu wakalelaku ene ka mubhwidisa dingi kima. (Nzw. 6:32) Ene exile mu dikwatenena ngo mu ibhindamu yâ mu xitu, ene kexile mu bhana matwi mu ima exile mu longa Jezú phala ene kutambula o mwenyu wakalelaku. Ihi itutena kudilonga ku musoso yu?

O KIMA KYA BETA O KOTA PHALA ETU

12. Kyebhi Jezú kyalondekesa o kima kyabeta kota?

¹² Mu divulu dya Nzwá kibatulu 6 tusangamu disá dya katunda. O kubelesela Jihova ni kukala ni ukamba wambote ni mwene kyene o kima kyabeta kota phala etu. Jezú watulongo we disá dya katunda kyoso kyamutendala kwa Dyabhu, mwene wambe: “O mwenyu wa muthu ki wijila ngó ku mbolo, maji mu maka moso matunda mu dikanu dya Jihova.” (Mat. 4:​3, 4) Mu diskulusu dyabhange ku Mulundu, mwene walondekesa o valolo ya kudidikila mu nzumbi. (Mat. 5:3) Kyenyiki tutena kudibhwidisa: ‘O kwila kumwenyu wami ngene mulondekesa kwila ngibhana dingi valolo mu ukamba wami ni Jihova, o jihanji jami ndenge?’

13. (a) Mukonda dyahi twatokala kusanguluka ni kudya? (b) Mukonda dyahi twatokala kubhana matwi ku itendelesu yabhana Phawulu? (1 Kolindu 10:​6, 7, 11)

¹³ Ki kituxi kusamba phala kukala ni ima itwabhindamena muxitu ni kusanguluka ni ima yiyi. (Luk. 11:3) O Bibidya yamba kwila kima kyambote o muthu “kúdya ni kúnwa” ni ku kemba mu mbote ya kikalakalu kyê “ki tunda ku lukwaku lwa Nzambi.” (Ndo. 2:24; 8:15; Tiy. 1:17) Maji, twatokala kudilanga phala kitute ku pholo o ima muxitu. Tutena kudilonga dingi o ima yazwela poxolo Phawulu ku Jikidistá. Mwene wexile muzwela yalungu ni phangu yayibha ya akwa Izalayele mu ima yabhangele ene ku Mulundu wa Sinayi. Mwene wadimuna o Jikidistá phala kakale “ni jihânji ja kumesena ima yayibha kala [o akwa Izalayele].” (Tanga 1 Kolindu 10:​6, 7, 11.) Jihova wabhangele madiwanu mukubhana kudya ku akwa Izalayele. Maji mukonda dya jihanji ja kudya, ene exile mubhanga ima “yayibha.” (Dya. 11:​4-6, 31-34) Mukubheza o kiteka kya kangombe, o akwa Izalayele alondekesa kwila exile mu bhana dingi valolo mu kudya, mu kunwa ni mu kithangana kyexile mubhita ni kiteka, o kubelesela Jihova ndenge. (Mak. 32:​4-6) Phawulu wate o kifika kiki phala kudimuna o Jijudé atungile ande dya kubwika Jeluzaleme ni tembulu ku muvu wa 70 K.K. Etu we twatungu kudisukilu dya mundu yu, kyenyiki twatokala kubhana matwi ku itendelesu yabhana Phawulu.

14. Ihi izwela o Bibidya yalungu ni kudya?

¹⁴ Kyoso kyazwela “o mbolo yetu ya kizuwa kya lelu,” Jezú watulongo kusamba phala o vondadi ya Nzambi a “ibhange we mu ixi kala kyene mu ibhanga ku dyulu.” (Mat. 6:​9-11) Ihi i uxinganeka yalungu ni hádya? O Bibidya ilondekesa kwila Nzambi wamesena kuma athu oso mu ixi akala ni kudya kwambote. Izaya 25:​6-8 izwela kwila kwanda kala kudya kwambote phala o athu oso. Jisálamu 72:16 yamba: “Mu ngongo mu kale nzungule  ya masa katé ni ku thandu dya milundu.” O kwila eye wala ni hanji ya kulamba o kudya ku wawabhela dingi mba kulamba kudya nuka wa kulambele? Eye we utena kukala ni hanji ya kukuna idima ni kudya o ibundu yê. (Iza. 65:​21, 22) Athu oso mu ixi anda sanguluka mu ima yiyi yambote.

15. Ihi yanda dilonga o athu anda kwa fukununa? (Nzwá 6:35)

¹⁵ Tanga Nzwá 6:35. Xinganeka dingi yalungu ni athu adi o mbolo ni mbinji ku madiwanu abhange Jezú. Sumbala athu avulu mudya kalondekesa kixikanu kwa Jezú, nange atena kwa fukununa ni kwila eye utena kudisanga nawu. (Nzw. 5:​28, 29) Maji ene anda tena kudilonga o kilombolwelu kya izwelu ya Jezú: “Éme ngi mbolo ya mwenyu, woso wiza kokwami, kanda kala dingi ni nzala.” Ene anda tena kulondekesa kixikanu ku sata ya kukula ya Jezú. Mu kithangana kyenyokyo o athu anda kwa fukununa ni twana anda kwa vwala ku mundu wobhe, anda dilonga o kidi kyalungu ni Jihova ni ikanenu ye. Twanda sanguluka kyavulu mu kwalonga o kidi kiki! Kukwatekesa o athu kukala ni ukamba wambote ni Jihova, kwanda tusangulukisa dingi, o kudya kwoso-kwoso kutwanda dya ku mundu wobhe ndenge.

16. Ihi itwanda dilonga mu milongi yakayela?

¹⁶ Twadilongo mbandu ya misoso mu divulu dya Nzwá kibatulu 6, maji Jezú wexile hanji ni ima yavulu phala kulonga yalungu ni “mwenyu wa kalelaku.” O Jijudé atokalele kubhana matwi mu ima yexile muzwela Jezú, etu we twatokala kubhanga kiki. Mu milongi yakayela twanda suluka mu kudilonga o divulu dya Nzwá kibatulu 6.