MBANDU YAKUDILONGA 51
MWIMBU 3 Jihova Nguzu Yami, Kidyelelu Kyami
Jihova Utusuwa Kyoso Ki Tudila
“O masoxi mami moso, eye wa a bhake mu kisudi kyé; manyi, ni mu divulu dyé, kwa a soneka-mu?”—JISÁ. 56:8.
ITWANDADILONGA
Twanda dilonga kwila Jihova wejiya o malamba metu ni kwila wanda tukwatekesa.
1-2. Mukonda dyahi twene mudila?
ETU enyoso twadidi kya. Sayi bhabha etu tudila mukonda twasanguluka. Nange eye wadidi kyoso ki wavwala mon’é, mba wadidi kyoso ki wadilembalala mu kima kyambote kyabhiti ku mwenyu we mba kyoso ki wadisange ni Kamba dyê dya kazola nunka dingi wamumwene.
2 Maji muveji javulu tudila dingi kyoso ki tuluwala mba twamutala hadi. Mu kifika etu tudila kyoso muthu twamudyelela utubhanga kyayibha. Ku mbandu yamukwa tudila kyoso ki twala ni uhaxi wabhonzo mba kyoso ki tufunda ndandu etu mba kamba dya kazola. Mu ithangana yiyi tutena kudivwa kala kyadivwile polofeta Jelemiya kyoso akwa Babilonya kya bwikisa o mbanza ya Jeluzaleme. Mwene wambe: “Mesu mami ma lundulula mikungwiji ya menya . . . Mesu’ami, a dile a tona, mukonda bhu nhohena muthu ki bhya moneka.”—Kud. 3:48, 49.
3. Kyebhi kyadivwa Jihova kyoso kyamona jiselevende jê kutala hadi? (Izaya 63:9)
3 Jihova wejiya o ithangana itwadidi mukonda dya kutata. O Bibidya yamba kwila Jihova wejiya o ibhidi yoso itwene mudibhana nayu ni kwila mwene utwivwa kyoso kitumubhinga kikwatekesu bhukaxi ka musambu. (Jisá. 34:15) Kala o tata ya henda Jihova katwivu ngo mba katumona ngo, mwene wivwa we o ndolo yetu yu wala polondo phala kutukwatekesa.—Tanga Izaya 63:9.
4. Phangu yebhi ya Bibidya itwanda dilonga? Ni ihi itwanda dilonga yalungu ni Jihova?
4 Mu Bibidya Jihova walondekesa kyebhi kyatalatala o jiselevende jê adidi ni kyebhi kya akwatekesa. Twanda dilonga yalungu ni ima yabhiti ni Ana, sobha Davidi ni Sobha Hezekiya. Ihi ya abhangesa kudila? Kyebhi Jihova kya akwatekesa? Ni kyebhi o phangu yâ itukwatekesa kyoso ki tudila mukonda dya hadi, kyoso kya tulungulukila ni kyoso ki tufunda ndandu mba kamba dya kazola?
JIHOVA UTUSUWA KYOSO KI TUDILA MUKUFUNDA NDANDU MBA KAMBA DYA KAZOLA
5. Kyebhi kyexile mudivwa Ana?
5 Ana wadibhanene ni ibhidi yavulu, mukonda dya kiki wexile mudila. Kibhidi kimoxi o mwadi wê wakexile ni muhatu wamukwa dijina dyê Penina. Ana kexile ni mona, maji Penina wakexile ni twana twavulu, mukonda dya kiki Penina wexile mu muxongwena kyavulu. (1 Sam. 1:1, 2) Penina wakexile mubhanga kiki muveji javulu. Kyebhi kiweji divwa se wexile mu kididi kya Ana? Ana waluwalele kyavulu mukonda dya kiki “mwene wexile ngó mudila, kexile mudya,” anga “wexile ni kikote ku muxima.”—1 Sam. 1:6, 7, 10.
6. Ihi yabhange Ana phala kudivwa kyambote?
6 Ihi yabhange Ana phala kudivwa kyambote? Kima kimoxi kyabhange Ana o kuya mu balaka ya kubheza-mu Jihova. Nange mwene wexile mu kithadi kya balaka, “anga umateka kusamba kwa Jihova ni kudila kyavulu.” Mwene wadyondela Jihova: “Eye u Jihova dya ifuxi, tala o hadi yoso ingene mutala eme.” (1 Sam. 1:10b, 11) Yoso yakexile ku muxima wê, Ana wa izwela kwa Jihova. Kyoso Jihova kyamono Ana kudila, mwene we wevu ndolo!
7. Kyoso Ana kya zubha kuzwela ni Jihova, kyebhi kyakexile mu divwa?
7 Kyoso Ana kya zubha kuzwela kwa Jihova kyebhi kyakexile mu divwa, o mukunji wadikota Eli wamwambela kwila Jihova wevu o musambu wê. O Bibidya yamba: “O muhatu wayi, anga ukala mukudya kya. Mwene kaluwalele dingi.” (1 Sam. 1:17, 18) Sumbala o ibhidi ya Ana ki yabhitile hanji, maji mwene wexile kya mudivwa kyambote. Jihova wevu o musambu wê, ku pholo dya kwenda wamukwatekesa kukala ni twana.—1 Sam. 1:19, 20; 2:21.
8-9. Kala kyamba Jihebelewu 10:24, 25, mukonda dyahi twatokala kuya mu yônge yoso? (Tala we ofoto.)
8 Ihi itwadilongo? Nange mu kithangana kiki eye wamubhita ni ibhidi yamu kuluwalesa kyavulu. Nange wala ni kikote ku muxima mukonda wafundu ndandu mba kamba dya kazola. Kyoso o ima yiyi ibhita ki kituxi kumesena kukala ubheka. Maji lembalala kwila Ana wayi ku balaka ya kubheza Jihova, Jihova wamukondo o malamba kwenyoko. Eye we utena kuya mu yônge phala kukuswinisa ne mwene se ki wamudivwa kyambote. (Tanga Jihebelewu 10:24, 25.) Mukonda o jiphange atanga jivelesu ja Bibidya jituswinisa kyavulu. Kiki kitukwatekesa kudivwa kyambote ne mwene se o ibhidi yetu ki yabhiti luwa.
9 Mu yônge o jiphange jetu a tuswinisa mukonda atuzolo kyavulu, etu tudivwa kyambote mukukala kumoxi ni jiphange jetu. (1 Te. 5:11, 14) Tala o musoso wa phangyetu muboki wa katunda, muhatu we wafu. Mwene wambe: “Sayi ithangana ngikala ubheka wami anga ngidila. Maji angiswinisa kyavulu kyoso ki ngiya mu yônge. O izwelu ya jiphange ni itambwijilu yá ingiswinisa kyavulu. Ande dya kuya mu kyônge sayi ithangana ngiluwala maji kyoso kibhwa o kyônge ngisanguluka.” Mu yônge yetu Jihova utukwatekesa bhukaxi ka jiphange jetu.
O jiphange jetu atena kutukonda o malamba metu (Tala ojikaxi 8-9)
10. Kyebhi kitutena kukayela o phangu ya Ana kyoso ki tuluwala kyavulu?
10 Ana wadivu kyambote kyoso kyasambe kwa Jihova. Eye we utena ‘kuxila o hele ye yoso kwa Nzambi’ mwene wanda kukwatekesa. (1 Ph. 5:7) Phangyetu mwadi wê amujibha ku jibandi wambe: “Ngaluwalele kyavulu ngafikile kwila nuka dingi ngeji sanguluka ku mwenyu wami. Maji kyoso kingisamba kwa Tatetu Jihova, ngidivwa kyambote. Sayi bhabha kingejidile yoso ingizwela maji mwene wexile mungikwatekesa. Kyoso kingexile mu tandanganya ngexile mu samba kwa Jihova phala ku ngitululukisa. ngexile mudivwa kyambote ni kusuluka ni ikalakalu yami.” Kyoso ki udila anga utangela kwa Jihova se ima yahi ya mukudidisa, Jihova uluwala we anga wivwa o ndolo i wamukwivwa. Nemwene se o ibhidi ye kiyabhiti luwa, Jihova wanda kuswinisa ni kukukwatekesa kutululuka. (Jisá. 94:19; Fil. 4:6, 7) Mwene wanda kubesowala mukonda dya kukolokota kwe.—Jih. 11:6.
JIHOVA UTUSUWA KYOSO KI TUDILA MUKONDA ATULUNGULUKILA
11. Kyebhi kyadivu Davidi kyoso o athu kya mutalatala kyayibha?
11 Kumwenyu we woso Davidi wadibhanene ni ibhidi yamubhangesa kudila. Athu avulu amuzembele, kate mwene o makamba mê ni amoxi ku jindandu je amulungulukila. (1 Sam. 19:10, 11; 2 Sam. 15:10-14, 30) Sayi kizuwa mwene wambe: “Nga bhwila kyá mukonda dya kukema kwami! Usuku ni usuku hama yami ngi i betesa; ila mwene kyololo ni masoxi!” Mukonda dyahi Davidi wexile mu divwa kiki? Mwene wambe: “Mukonda dya jinguma ku ngi tatesa.” (Jisá. 6:6, 7) Kyoso o athu kyatalatala kyayibha Davidi mwene wadidi kyavulu.
12. Kala kyamba o divulu dya Jisálamu 56:8, ihi yejidile Davidi?
12 Sumbala ni ibhidi ya dibhanene nayu Davidi, mwene wadyelele kwila Jihova wa muzolele kyavulu. Mwene wasoneka: “Jihova wa ng’ivu kyá dízwi dyami dya kudila.” (Jisá. 6:8) Mukithangana kyengi Davidi wasoneka o izwelu ya fwama itusanga mu Jisálamu 56:8. (Tanga.) O izwelu yiyi ilondekesa kwila Jihova watuzolo kyavulu. Davidi wambe kwila kyedile kala Jihova wexile mu bhongolola o masoxi me ni kwabhaka mu mbinda mba kusoneka divulu dyalungu ni masoxi me. Davidi wadyelele kwila Jihova wexile mu mona o hadi ye yoso. Davidi wejidile kwila Jihova wexile mu mona kyebhi mwene kyexile mudivwa mukonda dya ibhidi yexile mudibhana nayu.
13. Kyoso kya tuxisa twatokala kulembalala ihi? (Tala we ofoto.)
13 Ihi itwadilongo? O kwila wala ni kikote ku muxima mukonda o muthu wa mudyelele ka londekesa ufiyele ko kwe? Nange o muthu wexile phala kukazalane wakuxisa mba o mwadi we mba o muhatu we wakuxisa mba o muthu wamuzolo weha kusidivila Jihova. Sayi phange, o muhatu we wate phanda, yu wa muxisa, wambe: “Ngaluwalele kyavulu kingexile muxikina kwila o ima yiyi yexile mubhita neme. Ngaluwalele ngexile ni njinda ngexile mudivwa kala kingexile ni valolo.” O phange wambe dingi: “O ukamba ni athu utena kubhwa maji Jihova ndanji yetu. Kiza kikize Jihova wanda suluka mu kutukwatekesa. Mwene nuka wanda tubwazeka.” (Jisá. 37:28) Ejiyakyu kwila Jihova wakuzolo kyavulu muthu woso-woso ndenge. Kutuxixima kyavulu kyoso o muthu twamuzolo utulungulukila. Maji nemwene se o ima yiyi ibhita, ejiyakyu kwila Jihova wa kuzolo kyavulu.—Lom. 8:38, 39.
O divulu dya Jisálamu dituxikinisa kwila Jihova wazukama kwa yó atoloka mixima (Tala okaxi 13)
14. O Sálamu 34:18 itubhana kidyelelu kyebhi?
14 Se akuxisa o izwelu ya Davidi mudivulu dya Jisálamu 34:18 itena kukuswinisa. (Tanga.) Sayi divulu dyamba kwila o izwelu “yá a toloka mixima” yalungu ni athu “kala ni kidyelelu ku mwenyu.” Ihi ibhanga Jihova phala kukwatekesa o athu adivwa kiki? Jihova uzukama kokwâ. Mwene wedi kala tata mba mama uta bhu jihata jê o mona wamudila. Kyoso kitwamutala hadi mukonda atulungulukila mba atubwazeka, Jihova wivwa o ndolo yetu, utukwatekesa we ni lusolo. Mwene wala polondo phala kutukonda o malamba metu né mwene se twamudivwa kwila kitwala ni valolo. Mu maka mê, utubhana milongi itukwatekesa kudibhana ni ibhidi yetu.—Iza. 65:17.
JIHOVA UTUSUWA KYOSO KI TUDILA MUKONDA DYA UHAXI WABHONZO
15. Mukonda dyahi sobha Hezekiya wadidi kyavulu?
15 O Sobha Hezekiya kyoso kyexile ni 39 a mivu, wakatele kyavulu. Jihova watangela polofeta Izaya phala kwambela Hezekiya kwila weji fwa mukonda dya uhaxi wê. (2 Jis. 20:1) Sobha Hezekiya wadidi kyavulu mukonda dya njimbu yiyi, wafikile kwila kikwexile dingi kidyelelu. Hezekiya wadyondele Jihova phala kumukwatekesa.—2 Jis. 20:2, 3.
16. Kyebhi Jihova kyaswinisa sobha Hezekiya?
16 Kyoso Jihova kyevu o musambu wa Hezekiya, yu wamumono kudila, anga umwambela: “Ngevu o musambu wé, ngamono o masoxi mé. Mukonda dyakiki nganda kusaka.” Bhukaxi ka polofeta Izaya, Jihova wamutangela kwila weji bandekesa o mwenyu wê, ni kubhulula o akwa Izalayele bhumaku a akwa Asídya.—2 Jis. 20:4-6.
17. Kyebhi Jihova kyatukwatekesa kyoso kitwamukata? (Sálamu 41:3) (Tala we ofoto.)
17 Ihi itwadilongo? O kwila wala ni uhaxi wedi kala kiwivu milongo? Né mwene ni kudila, tangela kwa Jihova kyebhi ki wamudivwa. O Bibidya itutangela kwila o “Tata ya jihenda . . . o Nzambi mukwa kukonda o malamba a athu,” wanda tukolokotesa. (2 Ko. 1:3, 4) Lelu kitutokala kukingila Jihova kutukatula o ibhidi yetu yoso, maji twejiya kwila mwene wanda tukwatekesa jinga. (Tanga Sálamu 41:3.) Bhukaxi ka nzumbi yê ikola, Jihova utubhana nguzu, unjimu ni kutululuka phala kudibhana ni uhaxi. (Jisa. 18:14; Fil. 4:13) Mu maka mê, mwene utukanena kwila kwakambe ngó bhofele, seku muthu wanda zwela kuma ngakate.—Iza. 33:24.
Jihova wanda tambwijila o misambu yetu mu kutubhana nguzu, unjimu ni kutululuka (Tala okaxi 17)
18. Kyoso ki umona kwila o maka mé kanda batuka dingi, yebhi o vélusu ya Bibidya yene mu kuswinisa kyavulu? (Tala o kaxa “ Izwelu Itena Kutukonda o Malamba Metu.”)
18 O yazwela Jihova kwa Hezekiya, yamuswinisa. O Mak’â Nzambi atuswinisa we. Kyoso kitwala ni hele yavulu, o Bibidya itutululukisa. (Lom. 15:4) Phange yamuhatu mu África amutangela kwila wala ni uhaxi kiwivu milongo. Mwene wambe: “O divulu dya Izaya 26:3 dingikwatekesa kyavulu. Mu ithangana yavulu kitutena kubhwisa o ibhidi yetu, né kiki o vélusu yiyi itutangela kwila Jihova utena kutukwatekesa mu ibhidi yetu.” Kyoso ki umona kwila o maka mé kanda batuka dingi, o kwila wala ni vélusu ya Bibidya yene mu kuswinisa?
19. Ihi yanda bhita ku hádya?
19 Etu twala kyá ku disukilu dya izuwa isukidila-ku, twejiya kwila twanda bhita mu ibhidi yanda tubhangesa kudila. Kala kitwadilongo mu phangu ya Ana, Davidi ni Sobha Hezekiya, Jihova utumona kyoso kitwamudila, mwene uluwala we. Né mwene kyoso kitudila, Jihova utuzola kyavulu. Kyenyiki kyoso kitwamudibhana ni ibhidi, twatokala kusamba kwa Jihova ni muxima woso. Kana kudisandula ku jiphange jê. Jihova utuswinisa kyoso kitutanga o Bibidya. Tutena kudyelela kwila se tukolokota, Jihova wanda tubesowala. O mabesá yá alungu ni kikanenu kya kukondona o masoxi moso a ndolo ijila mu kufunda muthu twamuzolo, mu ku tulungulukila ni ndolo ya kutata. (Dij. 21:4) Anga twanda dila ngó mukonda dya kusanguluka.
MWIMBU 4 “Jihova Mubhidi Wami”
