1-2. Kyebhi o jitata kyatena kukwatekesa o twana twâ kyoso kyabhanga ibhwidisu yalungu ni kixikanu kyetu?

 ATHU avulu axikina kwila o kukala jitata kikalakalu yatembu yoso. Se eye utata, twejiya kwila wene mukalakala kyavulu phala kukolesa o kixikanu kya twana twê anga Jihova usanguluka kyavulu ni kikalakalu kyê. (Mate. 6:​6, 7) Kyoso kyaya ni kukula, o moné utena ku kubhanga kibhwidisu kyalungu ni kixikanu kyetu kala yiyi. Mukonda dyahi sayi ima o Bibidya yamba kwila kituxi kukibhanga?

² Nange eye utena kuxinganeka kwila o twana twê amubhanga o ibhwidisu yiyi mukonda ene kala ni kixikanu kya kolo kwa Jihova ni mu Bibidya. (1 Ko. 13:11) Kikubhingi kukala ni woma. Kyoso ene kyaya ni kwibhula enu mujitata mwatokala kwalonga o milongi ya zongo ni kukolesa o kixikanu kyâ kwa Nzambi ni mu Bibidya.

3. Ihi itwanda dilonga mu milongi yiyi?

³ Mu milongi yiyi twanda mona kyebhi o jitata kyatena kukwatekesa o twana twa (1) Kukolesa o kixikanu kye kwa Nzambi, ni mu Bibidya (2) Ni kutendela se mukonda dyahi kima kyambote phala ene o kubelesela o itendelesu ya Bibidya yalungu ni kyawabha ni kyayibha (3) Ni kudilonga se mukonda dyahi kima kyambote kujimbulula o kixikanu kya ku akwetu. Twanda mona ibhwidisu yene mubhanga o twana ni ikalakalu yene mubhanga o miji, atena kukwatekesa o jitata kuzwela yalungu ni kixikanu kyâ.

KWATEKESA O TWANA TWE KUKOLESA O KIXIKANU KYA KWA NZAMBI NI KU MAKA MÊ

4. Ibhwidisu yebhi itena o kubhanga o twana ni mukonda dyahi?

⁴ Enu mu jitata mwala Jikidista kimutokala kubanza kwila, se enu mwala ni ukamba wambote ni Jihova, o twana twenu anda kala we.  Kyoso kyamivwala kimwexile luwa ni kixikanu. Kyene we kimoxi ni twana twenu. Nange o twana twenu adibhwidisa: ‘Kyebhi kingejiya kwila kwene Nzambi? Kyebhi kingitena kuxikina mu ima izwela o Bibidya?’ Mukidi o Bibidya ituswinisa kukalakala “ni kilunji kyoso” ni ‘kutongolola o ima yoso.’ (Lom. 12:1; 1 Te. 5:21) Kyenyiki, kyebhi o jitata kyatena kukolesa o kixikanu kya twana twâ?

5. Kyebhi o jitata kyatena kukwatekesa o twana twâ kukolesa o kixikanu kya mu Bibidya? (Loma 12:2)

⁵ Swinisenu o twana twenu phala a tongolole kwila yoso yamudilonga mu Bibidya ya kidi mwene. (Tanga Loma 12:2.) Kyoso o twana twenu kya mibhanga o ibhwidisu, kiki kyene o kithangana kya kwalondekesa se kyebhi kyatena kusanga o itambwijilu mu kukalakala ni jifalamenda jetu ja kutokwesa kala o Índice das Publicações da Torre de Vigia ni Kadivulu ka Kutokwesa Phala o Jimbangi ja Jihova. Ku mbandu ya “Bibidya” mwene wanda sota o kizwelu a “ibhusu kwa Nzambi,” mukubhanga kiki mwene kanda mona ngo kwila o Bibidya divulu dyambote dyosoneke ku athu, maji ene o “mak’â Nzambi.” (1 Te. 2:13) Mukifika, mwene utena kutokwesa mu madivulu metu phala kudilonga yalungu ni akwa Asídya ku mbanza ya Ninive. Mu mivu yavulu sayi akwa kutokwesa exile mu zwela kwila o mbanza ya Ninive nuka yakexileku. Maji kumuvu wa 1850, ene asange o mbanza ya Ninive ya xala ngundu, o ima yiyi yalondekesa kwila yoso izwela o Bibidya yakidi mwene. (Sof. 2:​13-15) Phala kwijiya se kyebhi o kibwikilu kya Ninive kya kumbidila o kikanenu kya Bibidya mwene utena kutanga o milongi “Eye Wakijidile?” mu Mulangidi wa Kamoxi wa 2021. Mukusokesa o milongi yene mudilonga mu madivulu metu ni mu enciclopédias, moné wanda kala ni ima yavulu yanda mukwatekesa kukolesa o kixikanu kye mu ima izwela o Bibidya.

6. Kyebhi o jitata kyatena kukwatekesa o twana twa kumona kwila o ima izwela o Bibidya ya kidi mwene? Bhana kifika. (Tala we ofoto.)

⁶ Kwatekesa moné kumona kwila o Bibidya divulu dya kidi mwene. O jitata ala ni mawukexilu avulu a kuzwela ni twana twâ yalungu ni Bibidya mba ni kixikanu kya kwa Nzambi. Eye utena kuzwela yalungu ni ima yiyi kyoso ki mwamutonoka, mwamutala vidyu, kutanga madivulu mba kyoso kimuya mukunda o Betele. Mukifika, eye utena kulondekesa ku twana twé misoso yotumbule mu Bibidya.  Kiki kitena kukwatekesa o twana twé kumona kwila yamuzwela o Bibidya kidi mwene. Mukifika eye utena kulonga o twana twé yalungu ni Ditadi dya Mowabhe. O ditadi didi dyala ni 3.000 ya mivu tusangamu o dijina dya Jihova. Lelu o Ditadi dya Mowabhe tudisanga ku muzewu wa Louvre ku Paris, mu ixi ya França. Eye ni twana twé mutena kumona jifoto jalungu ni ima yokulu kala o Ditadi dya Mowabhe ku mutelembe mba ku madivulu metu. Tusanga we kopya ya Ditadi dya Mowabhe mu mbonge yetu ku Warwick, Nova Iorque. O Ditadi dya Mowabhe dyalondekesa kwila o sobha ya Meza ya Mowabhe wa bilukila o mundu wa Izalayele. Yiyi yalungu we ni ima izwela o Bibidya. (2 Jis. 3:​4, 5) Kyoso o moné kyanda mona kwila o ima izwela o Bibidya yakidi mwene, o kixikanu kyê kyanda kola dingi.—Sokesa ni 2 Malunda 9:6.

7-8. (a) Ihi itutena kudilonga ni ibhangelu? Bhana kifika. (Tala we ofoto.) (b) Ibhwidisu yebhi itena kukwatekesa o twana kukolesa o kixikanu ku Mubhangi?

⁷ Swinisa o twana twé kuxinganeka mu ima yabhange Jihova. Kwatekesa o twana twé kutonginina kyambote o ibhangelu ya Jihova. Mukonda dyahi? O ibhangelu ilondekesa o unjimu wa Jihova. Kala kibhangelu kyala ni ukexilu we. Mukifika o jingijiye ene mudilonga o ukexilu wala nawu o hwelendende. Sayi ngijiye amwixana Nicola Fameli wajimbulula kwila kyoso ki ukondala o ukexilu wala nawu o hwelendende, utena kusanga dingi ima yengi. Sayi ibuka ya jithéthembwa ni mafwe ala ni ukexilu wa jiwelendende. a

⁸ O moné utena kudilonga dingi ima yavulu mu xikola. Mukifika, xinganeka kyene mubhita ni mixi yavulu. Mu muxi mwala jitangu, mabhanda ni mafwe. Maji nanyi wabhange o mixi mu ukexilu yu? Kyoso moné kyaya ni kuxinganeka mu ibhangelu, o kixikanu kyê kwa Jihova kyanda kola dingi. (Jih. 3:4) Kyenyiki eye utena kumubhwidisa: “Se Nzambi wa tubhange, o kwila uxinganeka kuma mwene wejiya ihi itwatokala o kubhanga phala kusanguluka?” Mu kiki utena kujimbulula kwila Nzambi watubhana o Bibidya phala kutulondekesa kwila tutena kusanguluka ku mwenyu.

 KWATEKESENU O TWANA TWENU KUZOLA O ITUMU YA BIBIDYA

9. Mukonda dyahi o twana twé atena kubhanga ibhwidisu yalungu ni itumu ya Bibidya?

⁹ Sayi ithangana mon’é wanda ku bhanga ibhwidisu yalungu ni itumu ya Bibidya. O kwila kwala maka se mwene kaxikina mu ilongesu ya Bibidya, mba se mwene katena kujimbulula o maka a Nzambi ku akwa? Eye utena kukwatekesa o moné ku tendela se mukonda dyahi kima kyambote kubelesela o itendelesu ya Jihova. Eye utena kubhanga kiki mu kudilonga ne kumoxi ni divulu Sanguluka Katé Kuhádya ni Hádya! b

10. Kyebhi ki utena kukwatekesa mon’é kuxinganeka mu ukamba we ni Jihova?

¹⁰ Kwatekesa mon’é kumesena kukala ni ukamba wambote ni Jihova. Kyoso ki udilonga o Bibidya ni mon’é, bhanga ibhwidisu ni ifika yala mu divulu Sanguluka Katé Kuhádya ni Hádya! Mu kudilonga mwene wanda tendela ima yavulu. (Jisa. 20:5) O disá 8 disokesa Jihova ni dikamba dyambote utulanga ni kutukwatekesa. Kyoso ki muzubha o kudilonga o divulu dya 1 Nzwá 5:​3, eye utena ku mubhwidisa: “Mu kumona kwila Jihova muthu wambote kyebhi kitutena kumona o ima itubhinga phala kwibhanga?” O kibhwidisu kiki kikyabhonzo, maji kitena kukwatekesa mon’é kumona o henda ya Jihova mu itumu yê.—Iza. 48:​17, 18.

11. Kyebhi ki utena kukwatekesa mon’é kubhana valolo ku milongi ya Bibidya? (Jisabhu 2:​10, 11)

¹¹ Dizwelesenu se mbote yebhi i mukatula kyoso ki mubelesela o milongi ya Bibidya. Kyoso kimutanga o Bibidya mba o kibatulu kya kizuwa ni kizuwa, dizwelesyenu kyebhi o itumu ya Bibidya yene mu kwatekesa o mwiji wenu. Mukifika, o kwila mon’é wene mumona o mbote ijila mukukala mukwa mwanyu ni mukwa kidi? (Jih. 13:18) Eye we utena kujimbulula kyebhi o kukayela o itumu ya Bibidya kutukwatekesa kukala ni sawidi yambote ni kusanguluka dingi kumwenyu. (Jisa. 14:​29, 30) Se mon’é utendela o mbote ijila mukubelesela o itumu ya Bibidya, mwene wanda ikumbidila ku mwenyu wê.—Tanga Jisabhu 2:​10, 11.

12. Kyebhi o jitata kyene mukwatekesa mon’â kubhana valolo ku itumu ya Bibidya?

¹² Sayi tata mu ixi ya França amwixana Steve, wajimbulula kyebhi mwene ni muhatu wê kyene mukwatekesa mon’â wa diyala, amwixana Ethan, kumona o henda ya Jihova bhukaxi ka itumu yê: “Twene mu mubhanga ibhwidisu kala yiyi, ‘mukonda dyahi Jihova wamesena kwila tuxila o kitumu kiki? Kyebhi o kitumu kiki kilondekesa kwila mwene watuzolo? Ihi yeji bhita se kitubelesela o kitumu kiki?’” O ibhwidisu yiyi yene mukwatekesa Ethan kumona kwila izwela Jihova yakidi mwene. Manu Steve wambe dingi: “Twamesena kukwatekesa Ethan kumona kwila mu Bibidya tusanga-mu o unjimu wabeta-kota, o unjimu wa athu ndenge.”

13. Kyebhi o tata kyatena kukwatekesa mon’ê kubelesela o itumu ya Bibidya? Bhana phangu.

¹³ Kwatekesa mon’é kukumbidila o itumu ya Bibidya. Eye utena kubhanga kiki kyoso mon’é wamutanga o divulu dya xikola. Mu divulu dya mutanga mwene, nange mwala ima yazembe Jihova. Nange mwala milongi yalungu ni undumbu ni usweya. O divulu dyosoneke mu ukexilu ubhangesa o muthu wamutanga kukituka kala ene. Utena kubhinga kwa mon’é phala ku kutangela se kyebhi kidivwa Jihova kyoso o athu kyabhanga o ima yiyi. (Jisa. 22:​24, 25; 1 Ko. 15:33; Fil. 4:8) Se o mulongexi wê mba o jikoleka jê amubhinga phala kuzwela yalungu ni divulu didi, mwene wanda tena kuzokela o kixikanu kyê.

KWATEKESA O TWANA TWÉ KUZOKELA O KIXIKANU KYÂ

14. Milongi yebhi itena kukwatesa woma ku Jikidistá ni mukonda dyahi?

¹⁴ Sayi ithangana o minzangala atena kukala ni woma wakujimbulula o kixikanu kyâ. Mukifika ene atena kukala ni woma kyoso kikumoneka kithangana kya kujimbulula se mukonda dyahi ene kaxikina kwila o ima yamoneke ngo. Mukonda dyahi? O alongexi’â axikina kwila o milongi itanga kuma o ima yamoneke ngó  yakidi. Ihi itena kukwatekesa mon’é kuxikina kwila o ima yamudilonga ya kidi mwene?

15. Ihi itena kukwatekesa o munzangala kudyelela dingi mu ima yaxikina?

¹⁵ Kwatekesa mon’é kudyelela dingi mu ima yaxikina. Mon’é kabhingi kukala ni woma mukonda mwene wejiya o kidi kyalungu ni ibhangelu. (2 Ti. 1:8) Mukonda dyahi? Jingijiye javulu axikina kwila o mwenyu a ubhange. O jingijiye amono kwila sayi ima a ibhange ni unjimu wavulu phala kukala ni mwenyu. Kyenyiki ene kaxikina mu milongi yene mulonga mu jixikola ku mundu woso yakwila o ima yamoneke ngo. Mon’é utena kukolesa o kixikanu kyê mu kuxinganeka mu ima yaxikina o jiphange kwila o mwenyu a ubhange. c

16. Kyebhi o tata kyatena kukwatekesa mon’é kuzokela o kixikanu kyê kwila kwene Mubhangi? (1 Ph. 3:15) (Tala we ofoto.)

¹⁶ Kwatekesa moné kuzokela o kixikanu kye ku Mubhangi. (Tanga 1 Phetele 3:15.) Eye utena kudilonga ni mon’é milongi yalungu ni ibhangelu mu sayte jw.org. Kyenyiki mon’é utena kusola o maka anda zwela phala kukwatekesa akwa kutendela kwila kwene Mubhangi. Lembalesa mon’é kwila mwene kabhingi kuzoka ni jikoleka jê. U mu swinisa kuzwela mu ukexilu wabhebhuluka se kumoneka muthu wandala kwijiya dingi. Mu kifika sayi koleka utena kuzwela: “Ngixikina ngo ku ima ingene mu mona, eme nuka nga mwene Nzambi.” Mon’é utena ku mutambwijila: “Xinganeka kwila eye wa mukwenda ubheka mu muxitu, eye usanga-mu inzo. Ihi weji banza? Weji banza kwila sayi muthu wa ibhange. Kyene kimoxi ni ixi yetu ni ima yoso yala-mu. Sayi muthu wa ibhange!”

17. Kyebhi o tata kyatena kukwatekesa mon’ê kusanga maukexilu a kuzwela o kidi kya Bibidya ku akwâ? Bhana phangu.

¹⁷ Kwatekesa mon’é kusanga mawukexilu ya kuzwela o kidi kya Bibidya ku akwetu. (Lom. 10:10) Eye utena kusokesa o milongi ya Bibidya kala o kudilonga kuxika o iselekete ya kwimba o mimbu. Kudimatekenu o muthu wamudilonga o kuxika, umateka kuxika o mimbu ya bhebhuluka. Ku pholo dya kwenda, o kuxika o mimbu ki kwanda mubhonza dingi. Kyene we  kimoxi, o Kidistá utena kumateka kuboka mu ukexilu wabhebhuluka. Mukifika, eye utena kwibhwidisa koleka yé ya xikola: “Eye wejidile kwila o jingijiye ene mukayela o ibhangelu? Nganda kulondekesa vidyu i wanda wabhela kyavulu.” Kyoso ki uzubha kumulondekesa o vidyu mu mbandu O Kwila a Ibhange? mwene utena kuzwela: “Se o ngijiye utambula o kijingu kya kima kyabhange mu kukayela o ibhangelu, mukidi nanyi watokala kutambula o kijingu kyoso?” O kibhwidisu kya bhebhuluka kitena kukwatekesa o muzangala kumesena kudilonga dingi yalungu ni Jihova.

SULUKA MUKUKWATEKESA O TWANA TWÉ KUKOLESA O KIXIKANU KYÂ

18. Kyebhi o jitata kyatena kusuluka mu kukwatekesa o twana twâ kukolesa o kixikanu kyâ kwa Nzambi?

¹⁸ Etu twatungu ku mundu wayibha o athu akambe kixikanu. (2 Ph. 3:3) Jitata kyoso ki mwamudilonga ni twana twenu mwaswinisa kusota jindunge janda kwakwatekesa kuxila o maka a Nzambi ni itumu yê. Mu akwatekesa kuxinganeka dingi ni kukolesa o kixikanu kyâ kwa Jihova ni ibhangelu yê. Mu akwatekesa kumona o ikanenu ya Jihova yadikumbidila kya. Samba-nawu kumoxi ni kwatumbula ku misambu yenu. Mukubhanga kiki, dyelelenu kwila Jihova wanda besowala o nguzu i mwene mubhanga phala kukwatekesa o twana twenu phala kukolesa o kixikanu kyâ.—2 Mal. 15:7.