O kwila eye watange mwene kyambote o milongi yoso ya Mulangidi wa muvu yú? Se kyene, twakudyondo tala o itambwijilu ya ibhwidisu yakayela:

Kyebhi Jihova kyene mubhana phangu yambote yakutalatala o ahatu?

Mwene u atalatala kyambote sé katombo. Nzambi ubhana matwi ku ahatu, usuwa o ibhindamu yâ ni ibhidi yâ. Mwene wadyelela kwila o ahatu anda kumbidila o vondadi yê.—w24.01, maf. 15-16.

Kyebhi kitutena kukayela o kitendelesu kya Efezu 5:7 kyamba: “Kanenu kubhanga o ima yene mubhanga ene”?

Poxolo Phawulu wexile mutudimuna phala kitudilunge ni athu atena kutubhangesa kubhukumukina o itendelesu ya Nzambi. O athu yá, yó utwene mukala nawu pholo ni pholo ni yó utudizwelesa nawu mu internete.—w24.03, maf. 22-23.

Twatokala kudilanga ku jihundu jebhi?

Twatokala kudilanga ku jihundu jene mututangela o makamba metu, jinjimbu jene mututumikisa o athu twakambe kwa ejiya, ni henda ya makutu itukwatela o akwa kulungungukila o kidi.—w24.04, dif. 12.

Ihi i twejiya ni ihi i twakambe o kwijiya, yalungu ni kyebhi Jihova kyanda fundisa Sobha Solomá ni athu afu ku Sodoma ni Ngoloma ni ku Diluvyu?

Kitwejiya se Jihova kanda kwafukununa. Maji twejiya kwila mwene wejiya o ima yoso yalungu ni athu enyá ni kwila mwene mukwa kuloloka kyavulu.—w24.05, maf. 3-4.

O kwijiya kwila Nzambi o ‘Ndánji’ yetu, kutubhana kidyelelu kyahi? (Mate. 32:4)

Tutena kulengela kwa Jihova. Tutena kumudyelela mukonda, mu ithangana yoso mwene ukumbidila o ikanenu yê. Mwene we kene mu lunguluka.—w24.06, maf. 26-28.

Kyebhi ki utena kusanguluka kyoso ki uya mu sidivila mu kilunga kyengi?

Dyelela kwa Jihova. Mwene wakwatekesele kya o jiselevende jê ja mukwa. Kana kusokesa o kilunga kyé kyokulu ni kilunga kya ubhe. Kalakala ni kuswina kwoso mu kilunga kyé kya ubhe, bhanga we makamba a ubhe.—w24.07, maf. 26-28.

Madisá ebhi utudilonga mu ifika itatu yala mu Matesu kibatulu 25?

O kifika kya jimbudi ni jihombo jitulonga kwila twatokala kukala fiyele kwa Jihova. O kifika kya ilumba yadimuka ni ilumba yatobho itulonga kwila twabhingi kudilanga. O kifika kya jitalendu kilondekesa kwila twatokala kukalakala ni kuswina kwoso.—w24.09, maf. 20-24.

O kitala kya mbalanda mu tembulu ya Solomá, kyasokele kyebhi?

Mu divulu dya 2 Malunda 3:​4, sayi mikanda yokulu yamba kwila o mbalanda yexile ni “hama ni makwinyi ayadi ni kiyadi a jikóvadu,” kiki kilombolola kwila o kitala kyê kyexile 53 a jimétulu. Maji o mikanda yamukwa a idyelela dingi ku athu yamba kwila “makwinyi a jikóvadu,” kilombolola kwila o kitala kyê kyexile 9 dya jimétulu. Nange yá ene o kitala kyatokala, mukonda dya kutola kwa jiphalelu.—w24.10, dif. 31.

Ihi ilombolola o kizwelu kiki: “O akwatekexi a tufunga atokala kukala ngó ni muhatu umoxi”? (1 Ti. 3:12)

Kilombolola kwila mwene watokala kukazala ngó ni muhatu umoxi ni kwila katokala kutoka o dyesu ku ahatu amukwá.—w24.11, dif. 19.

Mukonda dyahi tutena kuzwela kwila o divulu dya Nzwá 6:53 kidyamuzwela yalungu ni Seyalu ya Ngana?

O divulu dya Nzwá 6:53 dizwela kwila twabhingi kudya o xitu ya Jezú ni kunwa o manyinga mê. Jezú wazwela o maka yá mu Ngalileya ku muvu wa 32 K.K., ku Jijudé atokalele hanji kukala ni kixikanu kwa mwene. Maji o Seyalu ya Ngana, a ibhange ku muvu ku pholo, mu mbanza ya Jeluzaleme. Kwenyoko Jezú wazwela ni athu anda tumina-nê ku dyulu.—w24.12, maf. 10-11.