Angivwala kumuvu wa 1983. Kudimatekenu ngexile ni sawidi yambote, maji kyoso kingatenesa dikwinyi dya mivu, ngamateka kwiwwa jindolo kumukutu woso. Mukubhita mivu iyadi, mukamene kingatenene dingi kudizambesa. Ne mwene ni nguzu ingabange kingatenene dingi kuzambesa oinama yami, kiyakexile dingi ni nguzu. Tunde okizuwokyo, kingatenene dingi kwenda. Ouhaxi wami wangifidisa kukula. Lelu, ngala ngo mukitala kyamonandenge.

Kwabhitile kya jimbeji sekutunda kukanga, kyoso o Jimbangi jiyadi ja Jihova kyangisange kubhata. Kyoso kikwexile mukwiza muthu phala kungikunda, eme ngexile mudisweka, maji mukizuwa kyokyo, eme ngaxikina kuzwela ni athu ayadi yo. Ene mateka kuzwela yalungu ni palayizu, ngamateka kulembalala oima ingevwile kyoso kingexile ni mivu itanu. Mukithangana kyenyokyo, sayi mukunji wakwa jixi jengi amwixana Jethro, watundile ku Suriname, wexile muya kumbanza yetu phala kulonga Bibidya kwa tata yami. Jethro wexile mungitalatala ni henda yoso. Eme ngawabhelele kyavulu oukexelu we. Ojikuku jami exile kungambata muyonge ya Jimbangi ja Jihova yexile mubhanga mumbanza yetu. Mukiki kyoso Florence Ombangi ya Jihova wangikundile mukizuwa okyo, kyangibhwidisa se eme ngamesena kwijiya dingi, eme ngaxikina.

Florence wavutuka ni mwadiwe, Justus, ene amateka kungilonga o Bibidya. Ene amono kwila eme kingejidile kutanga, kyenyiki, ene angikwatekesa phala kwijiya kutanga. Mukubhita thembu eme ngejidile kya kutanga ubheka wami. Sayi kizuwa, Florence ni Justus, angitangela kwila ene a abhingi phala kuya kusidivila ku Suriname. Phala okuluwala kwami, kikwexile dingi muthu mu mbanza yetu ya Orealla phala kungilonga o Bibidya. Maji phala okusanguluka kwami, Jihova kangijimbi.

Kikwalaleka kyavulu kwabhixila muboki amwixana Floyd kumbanza yetu ku Orealla, mukuboka nzo ni inzo mwene wangisange. Kyoso mwene kyangibhingi phala kudilonga o Bibidya eme ngamateka ni kwolela. Mwene wangibhwidisa: “Wamukwolela mukonda dyahi?” Eme ngamujimbulula kwila eme ngexile kudilonga kya mukadivulu Ihi ia Mesena Nzambi Kokuetu? Etu twamateka ni kudilonga okadivulu Kuijiia Kuambata ku Muenhu ua Kalelaku. * Ngamutangela se mukonda dyahi ngeha kudilonga. Floyd wasuluka ni kungilonga mukadivulu Kuijiia. Maji mukusuluka Floyd amutumikisa phala kusidivila mukididi kyamukwa.  Lwamukwa dingi kingexile ni muthu phala kusuluka ni kungilonga o Bibidya.

Maji kumuvu wa 2004, aboki ayadi akatunda a exana Granville ni Joshua eza phala kuboka mumbanza ya Orealla. Ene mukuboka nzo ni inzo, angisange. Angibhwidisa se ngamesenene kudilnga o Bibidya, eme ngolela dingi. Ngabhingi phala kumateka dingi kudilonga okadivulu Kuijiia, tunde kudimatekenu. Eme ngamesenene kwijiya se ene ejingilonga oima ingadilongo kya ni alongexi ami okulu. Granville wangitangela kwila oyonge exile kuibhanga kyá mumbanza yetu. Kwabhitile kyá dikwinyi dyamivu se kutunda kubata, maji ngamesenene kyavulu kuya muyonge. Kyenyiki Granville weza kungitakana kubata dyami, wangite mukyalu kyamalalola yuwangambata katé mu Kididi kya Ubhezelu.

Kupholo dya kwenda Granville wangiswinisa phala kubhanga mbandu mu Escola do Ministério Teocrático. Mwene wangitangela: “Eye kutena kwenda, maji utena kuzwela. Sayi kizuwa eye wandabhanga diskulusu dyakatunda. Eye wandatena.” Oizwelu yiyi yangiswinisa kyavulu.

Ngamateka kuboka kumoxi ni Granville. Maji oikoka kiyexile kyambote, kwabhonzele phala kwenda ni kyalu kyamalola. Mukiki, ngabhingi kwa Granville phala kungita mudikalu dya maku (carro de mão) ni kungambata kwoso kutwexile kuya kuboka. Twaditundu kyambote. Kumbeji ya Kasamanu wa 2005, angibatizala. Mukubhita tuithangana ojiphange angilongo kulanga madivulu ni kukalakala mu iselekete ya kilunga.

Kumuvu wa 2007 tata yami wafu mukilwezu kya baluku. Mwiji wami waluwalele kyavulu. Granville wasambe kumoxi netu, yu watuximbakatesa ni jivelusu ja Bibidya. Mukubhita mivu iyadi twadibhana dingi ni kilwezu kyakamukwa—Granville wafu mukilwezu kyabaluku.

Ojiphange joso jaluwalele mukonda kitwexile dingi ni kafunga, twaxalele ngo ni mukwatekexi umoxi wa tufunga. Okufwa kwa Granville kwangibhekela ndolo yavulu mukonda mwene wexile kamba dyami dyakazola. Mwene wexile dikamba dya fiyele, wangilange kikale mu nzumbi mba muxitu. Mukyonge kyadyanga kyoso kitwamufundu, angibhe oujitu wakutanga o Mulangidi Wakudilonga. Ngatange ngo okaxi kadyanga ni kaxi kakayadi, ngamateka kudila kyavulu, maji kudila mwene. Katé kingatena dingi kuzubha kutanga o Mulangidi.

Ngamateka kudivwa ngo kyambote kyoso ojiphange jakilunga kyengi kyabhixila mumbanza yetu ya Orealla phala kutukwatekesa. Mukusuluka oBetele yatumikisa muboki wakatunda amwixana Kojo phala kusidivila mumbanza yetu. Phala okusanguluka kwami, mametu ni ndeng’iami amateka kudilonga o Bibidya ya abatizala. Mumbeji ya Katanu wa 2015, ngatambula ujitu wakukala mukwatekexi watufunga. Mukubhita thembu ngabhange odiskulusu dyami dyakatunda. Mukizuwa kyenyokyo ngalembalala oizwelu ya Granville yangitangele mivu kudima: “Sayi kizuwa eye wandabhanga diskulusu dya katunda. Eye wandatena.” Eme golela ngadidi kyoso kingalembalala oizwelu yiyi ya phange Granville.

Mukumona ojividyu ja JW Broadcasting^® ngadilongo ni misoso ya jiphange adibhana ni ibhidi ingidibhana nawu. Sumbala ene inema, ala ni mwenyu wambote, asanguluka. Sayi ima eme ngitena kuibhanga. Eme ngamesenene kubhanga dingi musidivisu ya Jihova, ngakituka muboki wathembu yoso. Mumbeji ya Katutu wa 2019 ngatambula ujitu wangisangulukisa kyavulu! Ngatambula ujitu wakukala kafunga mukilunga kyetu mwexile 40 a aboki.

Ngisakidila ojiphgange angilongo o Bibidya ni jiphange angikwatekesa kubhanga dingi musidivisu ya Jihova. Maji mu ima yoso yiyi ngisakidila Jihova, mukonda mwene kangijimbi.