JIPHANGA javulu ja mala ni ja ahatu axisa o jixi jâ ja uvwalukilu m’ukulu, phala kuya musota o kitadi mu ixi yengi, kindala amuvutuka kya mu ixi ya yauvwalukilu. O henda yâ kwa Jihova ni ku athu, yene ya abhangesa kuya mu ididi mwa bhindamenena dingi aboki. (Mat. 22:37-39) Mukonda dya ima yaxisa kudima, mabesa ebhi atambula ene? Phala kwijiya okitambwijilu, twandadikwatenena mu ixi ya Camarões yala kuthunda ya Africa.

Kumuvu wa 1998 phange amwixana Onésime, amuvwalela ku Camarões waxisa o ixi ye yauvwalukilu yu wayi mutunga mu ixi yengi. Kwenyoko watungumu mu 14 kya mivu. Sayi kizuwa mu kyonge, mwene wevu okifika kyalungu ni kikalakalu kya kuboka. Ophange wexile mubhanga odiskulusu wambe, “Xinganeka makamba ayadi aimutamba jimbiji mu ididi kiyadivu. Umoxi wamukwata dingi jimbiji omukwa kana. Okwila omukwa katokala kuya mukididi bhwala odikamba wamukwata ojimbiji?”

Okifika kiki kyabhangesa phange Onésime kuxinganeka kuvutka ku Camarões, Mu ididi mwabhindamena aboki phala kukala mutambi wa jimbiji mu nzumbi. Maji mwene watandanganyele. Kuma mwene watungile mivu yavulu mu ixi yengi, okwila mukuvutuka mu ixi yê yauvwalukilu mwene wejitena kwijidila dingi o ukexilu wamwenyu ni ijila ya ixi yê? Phala kwijiya, phange Onésime wayi mubhita mbeji jisamanu ku Camarões. Kumuvu wa 2012, mwene walongela yu wavutuka mu ixi yê yauvwalukilu.

Phange Onésime wajimbulula: “Eme ngabhingele kudibhana ni kutema kwa ixi ni ukexilu wamwenyu. Mukididi kya ubhezelu oibaka kiyafwamene kala yoyo ingejidile kya. Maji kyoso kingedile matwi tekenge mumilongi ya kyônge, bofelebofele ngamateka kujimba oima yoso yexile mungilandukisa.”

Kumuvu wa 2013, Onésime wakazala ni Géraldine, watungile divwa dya mivu ku França, maji kindala wavutuka we ku Camarões. Kyebhi Jihova kyabesowala odikaza didi mukonda dya kubhanga o kikalakalu kya kilunga kala okima kyabetakota ku mwenyu wa? Onésime wambe: “Kala dikaza, atwixana phala kubhanga o Xikola ya Akunji a Utuminu ni kusidivila ku Betele. Mukubhita muvu, makwinyi ayadi amaxibulu a Bibidya mu kilunga adibatizala. Kindala twejiya kwila twala mu kididi kyatokala phala ‘kutamba’ ojimbiji.” (Mál. 1:17, 18) Géraldine wabandekesaku: “Eme ngene mutambula mabesa avulu king’axinganekene.”

Judith waile mu tunga mu ixi ya Estados Unidos, maji wamesenene kubandekesa oukunji we. Mwene wambe, “Kyoso kingexile mukunda omwiji wami ku Camarões, mu ola yakuvutuka ngexile mudila mukonda dyakuxisa omaxibulu mami ungamatekene kulonga o Bibidya.” Mukidi, Judith ka xinganeka luyadi, mwene walongela yu  wavutuka ku Camarões. Mwene wexile ni salu yexile mumufuta kyambote, yexile mumukwatekesa kufuta omilongo ya tatê wakatele ku Camarões. Maji Judith wadyelele kwa Jihova, mukiki walongela yu wavutuka ku Camarões. Mwene waxikinine ni kidi kyoso kwila, wexile ni ngunzu ya ima yambote yexile mumusangulukisa ku Estados Unidos. Mwene wasambe kwa Jihova phala kumukwatekesa kudibhana ni ukexilu wa ubhe wamwenyu. Mwene watambula o kikwatekesu kiki bhukaxi ka kafunga ka ilunga ni muhatu we mu kumuswinisa.

Mukuyala kudima Judith wambe “Mu mivu itatu yiyi ngasanguluka kyavulu mukukwatekesa maxibulu awana kudibatizala.” Judith wamateka kusidivila kala muboki wakatunda. Lelu, mwene wamusidila kumoxi ni mwadi we, Sam-Castel, kafunga ka ilunga. Maji ihi yabhiti ni tata ya Judith? Mwene ni mwiji we asange inzo ya kusaka mu ixi yengi, yexile polondo phala kufuta okitadi kya pelasa ya tata ye. Phala okusaguluka kwa opelasa yatundu kyambote.

Sayi phange amwixana Victor watungile ku Canada. Kyoso mwene kya tange o milongi ya mulangidi yalungu ni xikola yakatunda, mwene waxinganeka kyambote yalungu ni xikola ye. Mwene waxisa o xikola ya katunda, yu wamateka kudilonga ufunu umubhana dingi kithangana. Mwene wambe: “Kiki kyangibhana dingi kithangana kyakusanga salu ya kaxi ka kizuwa, phala kubhanga oima ingamesenene okubhnga kala okukala muboki wa thembu yoso.” Mukusuluka Victor wakazala ni Caroline, kala dikaza ayi mukunda o ixi ya Camarões. Kyoso kyexile mukunda o Filiyale, sayi jiphange a aswinisa kuxinganeka kusidivila ku Camarões. Victor wambe: “Kuma twexile kyamukwambata mwenyu wabhebhuluka, kitwasange kima kyeji tufidisa kuxikina okixanu kiki.” Sumbala Caroline kexile ni sawidi yambote, maji ene asolo kuya musidila ku Camarões.

Victor ni Caroline amateka kusidivila kala aboki a thembu yoso phala kukwatekesa o athu avulu amesenene kudilonga o Bibidya mu ididi mwexile ibhindamu. Kyoso ene exile ku Canada, ene akalakala tu mbeji phala kuphopheka kitadi kya akwatekesa kuvutaka ku Camarões phala kusuluka ni kikalakalu kyawu kala aboki athembu yoso. Kuma ene abhakele kitadi kyasoko, kabhingile salu mu jimbeji jadyanga. Mabesa ebhi atambula ene? Ene a exa phala kubhanga o Xikola ya Akunji a Utuminu, asidivila kala aboki akatunda, kindala amusidiva mu kibuka kya kutunga oididi ya ubhezelu. Victor wambe, “Kuma twaxisa oukexilu wa mwenyu wetu, twabhingile kudyelela kwa Jihova ni kumona okilangidilu kye.”

Kumuvu wa 2002, Alain, wexile mubhanga o xikola yakatunda mu ixi ya Alemanha, watange okamukanga kexile ni dyambu: Jovens—Como Usarão Sua Vida? Onjimbu yiyi yamubhangesa kusola jimbambe ja ubhe. Kumuvu wa 2006, amwixana phala kubhanga o Xikola ya Akunji wa Nzambi ya amutumikisa ku Camarões o ixi ye yauvwalukilu.

Ku Camarões Alain wasange salu ya kaxi ka kizuwa. Mukusuluka, wasange salu yengi yeji mu futa kyambote, maji watandanganyele mukonda kiyeji mubhana kithangana kyasoko phala kuboka. Kyenyiki kyoso kya mwixana phala kusidivila kala muboki wa katunda, mwene kaxinganeka luyadi, waxikina ni lusolo. Patala ye wamukanena kubandekesa o kitadi kyexile mumufuta phala kaxise o salu, maji Alain waditunu mukonda dya mbambe yê yakukala muboki wakatunda. Kupholo, Alain wakazala ni Stéphanie, watungile mivu yavulu ku França. Ibhidi yebhi yadibhana nayu Stéphanie kyoso kyayi mutunga mu ixi ya Camarões?

 Stéphanie wambe: “Ngexile mukata lwavulu mukonda dya ukexilu wa ubhe wa kudya, maji ngi sakidila Jihova ni kilunga kyê mukungibhana o ujitu wakungibhana milongo ni kungiximbakatesa.” Mukongda dya kukoloka kwa, ene atambula mabesa avulu. Alain wambe: “Kyoso kitwayi muboka mumbonge yadikexidila a exana Katé, twasange athu avulu amesenene kudilonga o Bibidya. Kupholo, twatena kulonga o athu bhukaxi kamutelembe. Kumaxibulu oso, kiyadi adibatizala, etu twabhange kibuka kya aboki.” Stéphanie wabandekesaku dingi: “Twasanguluka mukukwatekesa o athu kubhakula o myenyu ya kwa Jihova. Mukonda dya kusidivila bhabha, etu twene musanguluka ithangana yoso.” Lelu, Alain wamusidivila kala kafunga ka ilunga kumoxi ni muhatwe Stéphanie.

Gisèle amubatizala kyoso mwene kyexile mubhanga o xikola ya asaki ku Italia. Mwene sasumukine mu kumona o mwenyu wabhebhuluka wexile mukwambata odikaza dya aboki athembu yoso exile mumulonga o Bibidya, ni kwila mwene wamesenene we kubhanga dingi mu ukunji. Mukiki Gisèle wamateka kusidivila kala muboki wathembu yoso, kyoso mwene kyexile muzubha o xikola ye.

Gisèle wamesenene kubhanga dingi musidivisu ya Jihova kyoso kyeji vutuka ku Camarões, maji mwene watandanganyele. Mwene wambe, “Ngeji texa o ufolo wami wakutunga mu Italia, ngexi disondolola ku makamba ni mwiji wama ungazolele kyavulu.” Mikiki, mumbeji ya kasambwadi ka muvu wa 2016, Gisèle walongela yu wavutuka ku Camarões o ixi yê yauvwalukilu. Kupholo dya kwenda mwene wakazala ni Léonce. O Filiayele ya Camarões yatumikisa odikaza didi phala kusidivila mu mbanza ya Ayos, mwa bhindamene dingi aboki.

Kyebhi kyexile omyenyu yawu ku Ayos? Gisèle wambe: “Mujisemana javulu kitwexile ni mukengeji kubhata, kitwatenene kukala ni karga mumutelembe. Muveji javulu omutelembe kiwexile mukalakale. Ngadilongo kulambela mu jihwinyi, phala kuteka omenya twexile mukwenda dikwinyi ni kitanu kya ithangana.” Ihi yakwatekesa Gisèle ni mwadi we kukolokota? Gisèle wambe: “Jihova bhukaxi ka nzumbi ye ikôla watukwatekesa kukolokota, eme ni mwadi wami twadikwatekesa we mudyetu, o mwiji ni makamba metu exile mu tu swinisa, sayi ithangana exile mutubhana kitadi.”

Okwila Gisèle wasangulukile mukuvutuka mu ixi ye ya uvwalukilu? Mwene wambe: “Xe! Se phata ngasangulukile. Kudimatekenu kwexile ibhidi yavulu, ngadivwile kala kingejitena, maji ngatolola oibhidi yoso. Eme ni mwadiwami twadivu kwila, se phata twabhange okima kitwabhingile okubhanga. Twadyelela kwa Jihova anga twadivu kwila twamuzukama dingi.” Léonce ni Gisèle atambula okixanu phala kubhanga o Xikola ya Akunji a Utuminu. Kindala amusidivila kala aboki akatunda.

Kala oatambi amala alondekesa okuswina sumbala ni ibhidi phala kukwata jimbiji javulu, oyo avutuka mu jixi jawu jauvwalukilu ala polondo phala kuxisa yoso kudima na kukwatekesa yo amesena kwivwa onjimbu yambote ya Utuminu. Se phata, Jihova ulembalala oaboki yâ akalakala ni nguzu yoso mukulondekesa ohenda yawu mu dijina dyê. (Neh. 5:19; Jihe. 6:10) Abha se watungu mu ixi yengi, maji mu ixi mwa kuvwalela abhindamena aboki, okwila kiweji vutuka? Se uvutuka, wandatambula mabesa avulu.—Jisa. 10:22.