1. Ihi imona Jihova kumundu wê?

JIHOVA NZAMBI “usanzuka mba usanguluka ni mundu wê.” (Jisá. 149:4) Kiki kitusangulukisa kyavulu! Jihova utala o idifwa yetu yambote, utala onguzu itubhanga, utukwatekesa kukala tu makamba mê. Se tumukala jinga fiyele, mwene wandakala dikamba dyetu kate kuhádya ni hádya!—Nzwá 6:44.

2. Mukonda dyahi sayi ya kya abhonza kuxikina kwila Jihova wa azolo?

² Sayi ya atena kuzwela, ‘Ngejiya kwila Jihova wazolo omundu wê kala kibuka, maji kyebhi kingitena kwijiya kwila Jihova wangizolo?’ Ihi ibhangesa omuthu kudibhwidisa kiki? Oksana *, phange yamuhatu watale hadi yavulu mu undenge, wambe: “Eme ngasangulukile kyavulu kyoso kyangibatizala, ni kyoso kingakituka muboki wathembu yoso. Maji mukubhita 15 kya mivu, ngamateka kuxinganeka mu ima yayibha yabhiti neme mu undenge. Kyenyiki, ngamateka kuxinganeka kwila, Jihova katokala kungizola.” Hebu, phange yamuhatu, muboki wathembu yoso, wabhiti we ni maka avulu mu undenge, wambe: “Ngabhakula omwenyu wami kwa Jihova mukonda ngamesenene kumusangulukisa. Maji mukilunji kyami ngexile muxinganeka kwila, mwene nuka wandangizola.”

3. Ihi itwandamona mumilongi yiyi?

³ Kala ojiphange ja ahatu jiji, eye we wazolo kyavulu Jihova, maji utena we kukala ni phata, mukuxinganeka kwila mwene kakuzolo. Mukonda dyahi watokala kuxinganeka kwila Jihova ukusuwa? Ihi itena kukukwatekesa mu ithangana i uxinganeka kwila Jihova ka kuzolo? Tumone o itambwijilu ya ibhwidisu yiyi.

4. Mukonda dyahi kilwezu kubanza kwila Jihova katuzolo?

⁴ O henda ibhana nguzu. Se tuxikina kwila Jihova watuzolo,  twandamusidivila ni muxima wetu woso, ne mweme kyoso kitudibhana ni ibhidi. Maji se tukala ni phata, anga tumateka kuxinganeka kwila mwene katuzolo, ‘nguzu yetu yandatola.’ (Jisa. 24:10) Se tuzoza anga tuxinganeka kwila Nzambi katuzolo, kitwandakala ni nguzu phala kubhânga ni Satanaji.—Efe. 6:16.

5. Ihi yabhiti ni jiphange amatekene kubanza kwila Nzambi ka azolo?

⁵ Sayi jiphange jafiyele amateka kuxinganeka kwila Jihova ka azolo, okixikanu kya kyamateka kuzoza. Sayi kafunga amwixana Tiyaku wambe: “Sumbala ngasidivila ku Betele, ngasidivila mukilunga mwazwela dimi dyengi, eme ngexile hanji ni phata. Ngexile mudibhwidisa: Okwila Jihova wamuxikina mwene osidivisu ingibhanga mu kilunga kyê? Sayi kithangana, kate mwene ngadibhwidisa se Jihova wivwa omisambu yami.” Phange Eva, wexile we musidivisu yathembu yoso wambe: “Mudyami, kilwezu kuxinganeka kwila Jihova katuzolo, mukonda kubanza kiki kutena kufunyisa yoso itubhanga musidivisu ya Jihova. Kitwandakala ni hanji yakubhanga dingi musidivisu ya Jihova, kitwandakala we ni kisangusangu.” Michael, muboki wathembu yoso, wamusidivila kala kafunga, wambe: “Se ukamba kuxikina kwila Nzambi ukulanga, andakusandula kwa Jihova.”

6. Ihi itwatokala kubhanga se tumateka kubanza kwila Nzambi ka tuzolo?

⁶ O yabhiti ni jiphange jiji ilondekesa kwila, okixikanu kyetu kikala mu kilwezu se tuxinganeka kwila Jihova katuzolo. Maji ihi itwatokala kubhanga se tumateka kuxinganeka kwila Nzambi katuzolo? Twatokala kudituna okibanzelu kiki ni lusolo lwoso! Bhinga kikwatekesu kwa Jihova, phala ukatule ‘o hele’ yoso yala kumuxima, ni utambule ‘okutululuka kwa Nzambi kwa somboka okilunji kyoso kya muthu, kwanda kukubateka muxima ni kilunji.’ (Jisá. 139:23; Fil. 4:6, 7) Lembalala kwila, kiwala ubheka wé. Jiphange jamukwa jafiyele ene mudibhana ni ixinganeku yayibha. Kate mwene ojiselevende ja Jihova m’ukulu, adibhanene we ni ibhidi kala yiyi. Tudilonge ngo yabhiti ni poxolo Phawulu.

7. Ibhidi yebhi yadibhananayu Phawulu?

⁷ Okwila sayi ithangana kyene mukubhonza kukumbidila o ikalakalu yoso iwatokala kubhanga? Se kyene, wandatendela kyebhi kyadivu Phawulu. Mwene watandanganyele ni jiphange  “mu ilunga yoso,” kana ngo mukilunga kimoxi. (2 Kol. 11:23-28) Okwila wamudibhana ni uhaxi kiwivu milongi, wamukukatula okisangusangu? Phawulu wadibhana ni maka exile kumutalesa hadi yavulu. Omaka ya nange “uhaxi wonéne,” mwene wamesenene kwila, wene ubhita. (2 Kol. 12:7-10) Okwila o itondalu yé yene mukuluwalesa? Sayi ithangana Phawulu wadivu we kiki. Mukuxinganeka mu ibhidi yexile mudibhana nayu, Phawulu wasoneka: “Kokolo dyami dya kuxixima kiki.” Mwene wambe kiki, mukonda mu ithangana yoso kyamubhonzele kubhanga okima kyatokala.—Loma 7:21-24.

8. Ihi yakwatekesa Phawulu kudibhana ni ibhidi yê?

⁸ Sumbala wadibhana ni jipolova ni ibhidi yavulu, Phawulu wasuluka ni kusidivila Jihova. Ihi yamubhana nguzu phala kukolokota? Sumbala mwene katenene kutolola okukamba okuyuka, Phawulu wabhangele yoso mukonda dya kuxikina musata ya kukula. Mwene wejidile we okikanenu kya Jezú, kyambe kwila, “woso umuxikina [Jezú] . . . akale ni mwenyu kiwabhwa.” (Nzwá 3:16; Loma 6:23) Se phata, Phawulu wexile ni kixikanu musata ya kukula. Mwene wejidile kwila, Jihova wamesenene kuloloka yó ate o ituxi, kate mwene yó ate o ituxi yonene, kabasa adyela ni muxima woso.—Jisá. 86:5.

9. Ihi itudilonga mu izwelu ya Phawulu mumukanda kwa akwa Ngalásya 2:20?

⁹ Phawulu wejidile kwila Nzambi wamuzolo kyavulu, mukonda watumikisa mon’ê phala kumubhulula. (Tanga Ngalásya 2:20.) Tala yambe Phawulu kudisukilu dya velusu yiyi: “Mona Nzambi . . . watenene kungizola ni kudibhakula mukonda dyami.” Phawulu kadivwile kwila, mwene wexile muthu wayibha, katokalele kumuzola kwala Nzambi. Mwene kaxinganeka kiki: ‘Eme ngejiya se mukonda dyahi Jihova wazolo ojiphange jami. Maji mwene katena kungizola.’ Phawulu walembalesa akwa Loma: “Kyoso ki twakexile hanji twa akwa ituxi, kyene kya tu fwila Kidistu mu kididi.” (Loma 5:8) Ohenda ya Nzambi kiyala ni mbambe!

10. Ihi itudilonga mu izwelu itusanga mumukanda kwa akwa Loma 8:38, 39?

¹⁰ Tanga Loma 8:38, 39. Phawulu wejidile ni kidi kyoso kwila, ohenda ya Nzambi yala ni kutena kwavulu. Mwene wasoneka: “Kanaku kima kitena kutubatukisa kuhenda ya Nzambi.” Phawulu wejidile kyambote kwila, Jihova walondekesa mwanyu mukudibhana ni kifuxi kya akwa Izalayele. Mwene wejidile we kwila, Jihova wamulondekesa henda yavulu. Tutena kujimbulula o ixinganeku ya Phawulu mu ukexilu yu: ‘Se Jihova watena kutumikisa Mon’ê  umoxi’elele phala kungibhulula, okwila ngatokala mwene kukala ni phata ya henda yê kokwami?’—Loma 8:32.

11. Sumbala Phawulu watele ituxi kala yotumbule mu mukanda wa 1 Timote 1:12-15, mukonda dyahi tutena kuxikina kwila Nzambi wamuzolele kyavulu?

¹¹ Tanga 1 Timote 1:12-15. Nange Phawulu waxinganeka mu ima yayibha yabhangele, ande dya kukituka Kidistá. Kitudiwana kyoso mwene kyambe kwila, “eme ngala kota” mukuta o ituxi! Ande dya kwijiya okidi, Phawulu wexile muzukutisa o Jikidistá mujimbanza joso, wexile mu ata mukaleya ni kukwatekesa yo exile mujibha o Jikidistá. (Ika. 26:10, 11) Xinganeka ngo. Kyebhi Phawulu kyeji divwa mukudisanga ni phange mukyônge, wexile ndandu ya Kidistá amujibha ni kikwatekesu kyê? Phawulu wadyela o ituxi yatele, maji wejidile kwila, katena kulungulula o ima yabhangele m’ukulu. Mwene waxikinine ni muxima woso kwila, Jezú wafu phala kumubhulula. Ni kidyelelu kyoso, mwene wasoneka: “Dyoso oditala dingeza, ngadibhixila mu kyadi kya Nzambi.” (1 Kol. 15:3, 10) Ihi itudilonga? Xikina kwila, Kidistu wafu phala kukubhulula, wajikula onjila phala utene kukala ni ukamba ni Jihova. (Ika. 3:19) Okima kyabetakota phala Nzambi, o ima itwamubhanga kindala, ni ima itwandabhanga kuhádya. O itondalu yetu yokulu, kikale se twexile kya Jimbangi ja Jihova mba kana, kiyala dingi ni valolo.—Iza. 1:18.

12. O Izwelu mumukanda wa 1 Nzwá 3:19, 20, itukwatekesa kyebhi se tudivwa kwila kitwala ni valolo, katokala kutuzola?

¹² Yalungu ni ufwilu wa Jezú phala kukubhulula ku ituxi, eye utena kuxinganeka: ‘Eme kingi muthu wambote, kingitokala kutambula o ujitu yú wakatunda.’ Mukonda dyahi utena kudivwa kiki? Mukonda dya kukamb’o kuyuka, omuxima wetu utena kutubhangesa kudivwa kwila, etu kitwala ni valolo. (Tanga 1 Nzwá 3:19, 20.) Mu ithangana itudivwa kiki, twatokala  kulembalala kwila, “Nzambi wala kota, omuxima wetu ndenge.” Dyelela ni muxima we woso kwila, Nzambi wakuzolo. Omuloloki wa Tat’etu yadyulu wala dingi ni nguzu o ixinganeku yayibha iza ku muxima wetu ndenge. Twabhingi kutala o ima kala kitala Jihova. Phala kubhanga kiki, twatokala kudilonga o Bibidya, kusamba mu ithangana yoso ni kudilunga ni jiphange jetu. Mukonda dyahi kima kyambote kubhanga kiki?

13. Okudilonga o Mak’a Nzambi kutena kutukwatekesa kyebhi? (Tala we okaxa “ Kyebhi o Maka a Nzambi Kyâ Akwatekesa.”)

¹³ Dilonge Omak’a Nzambi izuwa yoso. Mukubhanga kiki, wandatendela dingi kyambote o idifwa ya Jihova Nzambi. Wandatonginina kwila, Jihova wakuzolo mwene kyavulu. Kuxinganeka mu Mak’a Nzambi izuwa yoso, kwandakukwatekesa kukala ni ixinganeku yambote, “kwanda yukisa yabhengalala” mu kilunji ni mumuxima wé. (2 Tim. 3:16) Sayi kafunga amwixana Xavitu, wexile mudivwa kwila kala ni valolo, wambe kiki: “Kutanga ni kuxinganeka mu Sálamu 103 kwangikwatekesa kulungulula o ixinganeku yami yayibha, ni kutendela kyambote kyebhi Jihova kyangitala.” Phange Eva, twamutumbula kudimatekenu wambe: “Kudisukilu dya kizuwa, eme ngawabhela kukatula kithangana phala kuxinganeka mu ima yabetakota phala Jihova. Mukubhanga kiki, muxima wami utululuka, okixikanu kyami kidibandekesa dingi.”

14. Omusambu utena kutukwatekesa kyebhi?

¹⁴ Samba se kufula. (1 Tes. 5:17) Se wamesena kubhanga ukamba ni muthu wengi, eye watokala kuzwelane muveji javulu ni kumutangela we kyebhi ki wamudivwa. Kyene we kibhita ni ukamba wetu ni Jihova. Kyoso kitumutangela bhukaxi ka musambu kyebhi kitwamudivwa, o ima itwamuxinganeka ni ima yamututhandanganyesa, tulondekesa kwila twamudyelela, twejiya kwila mwene watuzolo. (Jisá. 94:17-19; 1 Nzwá 5:14, 15) Phange Yua, twamutumbula kudimatekenu wambe: “Eme kingitangela ngo kwa Jihova o ima yangibhiti mu kizuwa, maji ngijikula mwene omuxima wami, ngimutangela kyebhi kingamudivwa. Bhofelebhofele, ngamateka kumona Jihova kala Tata ya henda, muveji dya kumutala kala phatala yami muditenda.”—Tala okaxa “ Okwila Waditange Kyá?”

15. Kyebhi Jihova kyalondekesa kwila watute muxima?

¹⁵ Dilunge ni makamba afiyele; ene ujitu watubhana Jihova. (Tiya. 1:17) Tata yetu yadyulu, Jihova, ulondekesa kwila watute muxima, watusuwu, mukutubhana mwiji munzumbi, jiphange “atuzola muthembu joso.” (Jisa. 17:17) Mumukanda wasonekena okilunga mumbanza ya Kolose, Phawulu watumbula  Jikidistá ja mukwatekesele. Wambe kwila, ene “exile athu amungikonda o malamba.” (Kol. 4:10, 11) Kate mwene Jezú Kidistu, wabhindamene we okikwatekesu kya makambamê, wasakidila kyoso kyamukwatekesa kikale ku ji anju, kikale ku athu muxitu.—Luka 22:28, 43.

16. Omakamba afiyele atukwatekesa kyebhi kuzukama dingi kwa Jihova?

¹⁶ Okwila wene mukatula mwene mbote ku ujitu watubhana Jihova, omakamba afiyele? Kuzwela omaka amututhandanganyesa ni dikamba dyakulu munzumbi, kikilombolola kwila kitwala ni kixikanu kyakolo. Kitena kutulanga. Tala yambe phange Tiyaku, twamutumbula kudimatekenu: “Kubhanga ukamba wambote ni Jikidistá akulu munzumbi, kwangikwatekesa kyavulu. Kyoso kingexile mukala ni ixinganeku yayibha, ene exile mungivwa ni mwanyu woso, ni kungilembalesa kwila, ene angizolo kyavulu. Ni kikwatekesu kyâ, ngatena kutonginina kwila, Jihova wangizolo, wangite muxima.” Kyenyikiphe, kima kyambote kubhanga ukamba ni Jikidistá akulu munzumbi!

17-18. Nanyi twatokala kumubhan’o matwi ni mukonda dyahi?

¹⁷ Satanaji wamesena kwila, tubhwila mukubhanga nguzu phala kubhanga o ima yambote. Mwene wamesena kutuxikinisa kwila, Jihova katuzolo, ni kwila, etu kitwala ni valolo. Maji kala kitwamono mumbandu yiyi, yá makutu.

¹⁸ Jihova wakuzolo kyavulu. Eye wala ni valolo kumesu mê. Se umubelesela, wanda “kala mu henda yê” kate kuhádya ni hádya, kala kyabhange Jezú. (Nzwá 15:10) Kyenyikiphe, kana kubhana matwi kumakutu a Satanaji, mba kuxinganeka kwila eye kiwala ni valolo. Muveji dya kiki, bhana matwi kwa Jihova. Mwene usota kumona ombote ku muthu ni muthu. Xikina ni muxima woso kwila, mwene “usanguluka ni mundu wê”, usanguluka n’eye!