1-2. Okukula ihi, ni mukonda dyahi abhingile kutukula?

KYOSO Adá kyate okituxi mwene watexi o ujitu wakukala ni mwenyu wakalelaku, kana ngó phala mwene maji phala we otwana twê. Adá katokalele kubhanga kiki, mwene wasolo mulwelu kuta okituxi. Abha ihi itwamba yalungu ni twana twê? Ene kabhangele kima kyayibha, ene kexilebhu kyoso Adá kyate okituxi. (Loma 5:12, 14) Okwila sayi kima kyeji bhanga phala kwabhulula kukalunga? Sayi mwene! Mukubhita kithangana kyoso Adá kyate okituxi, Jihova wayi ni kujimbulula bhofelebhofele ondunge yê, phala kubhulula mazunda ni mazunda a ana Adá, kukalunga ni kukituxi. (Dim. 3:15) Mukithangana kyê kyatokala, Jihova wejitumikisa Mon’ê mungongo phala “kubhana o mwenyu wê mu ku kula o mundu.”—Mál. 10:45; Nzwá 6:51.

² Okukula ihi? Mumikanda ya Ngeleku, okizwelu kukula kilombolola ofutu yabhana Jezú phala kusumba o ujitu watexi Adá. (1 Kol. 15:22) Mukonda dyahi abhingile kutukula? Mukonda dya Itumu yayuka ya Jihova. Mukitumu kyabhele kwa akwa Izalayele mwene wambele kwila, abhingile kubhana mwenyu mumwenyu. (Mak. 21:23, 24) Adá watexa o ujitu wê wakukala ni mwenyu wayuka. Phala kukumbidila o ijila yayuka ya Nzambi, Jezú wabhana we omwenyu wê wayuka. (Loma 5:17) Mukubhanga kiki mwene wakituka “Tata Inangenena” ya athu oso axikina musata yê yakukula.—Iza. 9:6; Loma 3:23, 24.

3. Kala kilondekesa Nzwá 14:31 ni 15:13, mukonda dyahi Jezú waxikina kubhana omwenyu wê wayuka kala sata?

³ Jezú waxikina kubhana omwenyu wê kala sata, mukonda wazolo kyavulu Tat’ê, watuzolo we kyavulu. (Tanga Nzwá  14:31; 15:13.) Mukonda dya henda yiyi, waxikina kulondekesa o ufiyele wê kate kudisukilu phala kukumbidila ovondadi ya Tat’ê. Jezú wabhange kiki mukukala fiyele kate ku ufwilu wê. Mukonda dya ima yabhange Jezú, ovondandi ya Jihova phala o athu ni ixi, hadya yandadikumbila. Mumilongi yiyi, twandamona se mukonda dyahi Nzambi wehela Jezú kutala hadi yavulu ande dyakufwa. Okudisukilu twandazwela kyebhi kitutena kulondekesa okisakidilu kyetu musata yakukula ni kyebhi kitutena kubandekesa okisakidilu kyetu musata yatubhana Jihova ni mon’ê Jezú.

4. Jimbulula kyebhi kyafu Jezú?

⁴ Xinganeka ngó yabhiti ni Jezú ande dyakufwa. Sumbala mwene wejitena kwixana mazunda ni mazunda ajyanju phala kumulangidila, maji mwene wehela omasoladi a Loma kumukuta, kumubeta se henda. (Mat. 26:52-54; Nzwá 18:3; 19:1) Omasoladi akexile kumubeta ni xikote yoyudike, phala kuxuwa oxitu yamukutu wê. Sumbala ni jifidila javulu kumukutu ene amujijidika kwambata kimuxi kyaneme mu isuxi. Jezú wamateka kukoka otaka yê phala kuyambata kate bhukididi bhweji kumujibhila, maji mukubhita tu ithangana omasoladi atumina diyala dyengi kwambata otaka ya Jezú. (Mat. 27:32) Kyoso Jezú kyabhixila bhukididi bhwejimujibhila, omasoladi aphaphela o inama ni maku kutaka. Ojipheleku jakexile muxuwa oxitu ya Jezú mukonda dyakunema kwamukutu wê. Omakamba mê amateka kuditenda, mam’ê wamateka kudila, maji ojijudé exile musebhulula Jezú. (Luka 23:32-38; Nzwá 19:25) Jezú watale hadi muji ola javulu. Ophumbulu ni izavu ya Jezú ki yexile mukalakala dingi kyambote, kyamubhonzele kuhemena. Ande dyakutula omwenyu, mwene wabhange omusambu wê wasukina. Mukusuluka wabhetama omutwe, yu wafu. (Mál. 15:37; Luka 23:46; Nzwá 10:17, 18; 19:30) Jezú wafu bhofelebhofele, wevu ndolo yavulu, wafu ni lusebhu!

5. Phala Jezú, kima kyebhi kyamu ibhila dingi o ukexilu wamujibha ndenge?

⁵ Phala Jezú o ukexilu wamujibha kiwexile kima kyadikota, okima kyamuluwalesa okituxi kyamutatela phala kumujibha. Mwene amutatela omakutu akwila wexile muxongwedi. Muxongwedi, omuthu waxongwena mba wakambe okuxila Nzambi mba odijina dya Nzambi. (Mat. 26:64-66) Kuxinganeka kwila o athu ejimutatela omakutu akukamba kuxila Nzambi, kwaluwalesa kyavulu Jezú, mwene wabhingi phala Tat’ê kamwehele kubhita mulusebhu lulu. (Mat. 26:38, 39, 42) Mukonda dyahi Jihova wehela Mon’ê wakazola kutala ohadi yoso yiyi ni kufwa? Tumone ima itatu.

6. Mukonda dyahi Jezú abhingile kumuphaphela kutaka?

⁶ Kyadyanga, Jezú wabhingile kufwa kutaka phala kubhulula o Jijudé kukibhubhidilu. (Nga. 3:10, 13) O Jijudé abhubhidila mukonda kakumbidila okikanenu kyawu kyakubelesela o ijila ya Nzambi. Kyenyiki, ene exile ni kituxi kyakwabhubhidila, maji kwaditele dingi okikuma kyakufwa mukonda dyakukala ana Adá. (Loma 5:12) Mu Kijila kyabhele Nzambi ku akwa Izalayele odiyala wate okituxi kyatokala kumujibha, atokalele mwene kumujibha. Mukusuluka, sayi ithangana okimbi kyê, akexile mukinyenga kutaka. * (Mate. 21:22, 23; 27:26) Mukonda dya Jezú kumujibha kutaka, o Jijudé ajituka kukibhubhidilu, kate yó aditunine Jezú ejitena we kukatula mbote kusata yê.

7. Kyebhi okima kyakayadi kyabhangesa Nzambi kwehela Mon’ê kutala hadi yavulu?

 ⁷ Tumone okima kyakayadi, kyabhangesa Nzambi kwehela Mon’ê kutala hadi. Jihova wexile mulonga mon’ê phala okikalakalu kya Mukunji Wadikota kyejitambula kuhadya. Jezú wamono kwila kibhonza kyavulu kubelesela Nzambi kyoso kitubhita mujipolova javulu. Jezú wathandanganyele kyavulu kate wabhingi kikwatekesu mumusambu kwa Nzambi “u dyonda ni kudila masoxi.” Kuma Jezú watale hadi yavulu mwene wandatena kutendela kyoso kitubhindamena okikwatekesu, mwene “wa sokobho [kwiza] ku [tu] kudila” kyoso kya tu “tendala.” Tusakidila kyavulu Jihova mukusola Mukunji Wadikota wahenda, “utena kwivwa omalamba metu”!—Jihe. 2:17, 18; 4:14-16; 5:7-10.

8. Kyebhi okima kyakatatu kyabhangesa Nzambi kwehela Jezú kubhita mujipolova javulu?

⁸ Okyakatatu, Jihova wehele mon’ê kutala hadi yavulu phala kutambwijila okibhwidisu kiki kyakatunda: Okwila athu muxitu atena kukala fiyele kwa Jihova ne mwene se abhita mujipolova javulu? Satanaji wambe kuma o athu katena! Mwene wambe kwila o athu amusidivila ngó Nzambi mukonda amesena kima. Mwene uxikina kwila kala o tata yâ, Adá, o athu kazolo Jihova. (Jobe 1:9-11; 2:4, 5) Mukudyelela mu ufiyele wa Mon’ê, Jihova wehela Jezú kubhita mujipolova javulu. Mukukolokota mu ufiyele wê, Jezú walondekesa kwila Satanaji mukwa makutu.

9. Phangu yahi yatuxila poxolo Nzwá?

⁹ Omilongi yasata yakukula, yakwatekesa Jikidistá javulu kukala ni kixikanu. Kumwenyu wâ woso ene aboko sumbala ni izukutisu, akolokota we mu ibhidi yavulu. Tala yabhiti ni poxolo Nzwá. Mwene waboko ni ufiyele woso okidi kyalungu ni Kidistu ni sata yakukula, nange mu 60 amivu ndenge. Sumbala wakukile kyá wakambele ngó phala kutenesa 100 yamivu, o Utuminu wa Loma wakexile mumutala kala kilwezu, kyenyiki amubalakala mukikolo kya Pátamo. Kituxi kyahi kyatele? “Mukonda dya kutanga maka ma Nzambi ni umbangi walungu ni Jezú.” (Dij. 1:9) Poxolo Nzwá watuxila phangu yambote yalungu ni kulondekesa okixikanu ni kukolokota!

10. Omadivulu asoneka Nzwá alondekesa kyebhi kwila, mwene wexile mubhana valolo musata yakukula?

¹⁰ Poxolo Nzwá walondekesa ohenda yê yakwatele kwa Jezú ni kisakidilu kusata yakukula mumikanda yasoneka, bhukaxi ka nzumbi ikôla. Mumikanda yê mwene watumbula 100 yajiveji ndenge kikale okizwelu osata yakukula mba ombote itukatula musata yakukula. Mukifika poxolo Nzwá wasoneka: “Se bhu kala muthu-phe u ta kituxi, sayi Mubhângedi wetu kwa Tata, Jezú Kidistu, Muthu wa kuyuka.” (1 Nzwá 2:1, 2) Mumadivulu asoneka Nzwá wajimbulula kyavulu ombote ya “umbangi wakidi kya Jezú.” (Dij. 19:10) Se phata Nzwá wexile mubhana valolo yavulu musata yakukula. Kyebhi etu we kitutena kubhanga kiki?

11. Ihi itena kutukwatekesa phala kitudibhale mujitendasa?

¹¹ Lenga ojitendesa phala ki ute kituxi. Se tubhana valolo musata yakukula kitwandaxinganeka kiki: ‘Eme ngitena kuta kituxi kupholo ngandabhinga muloloki.’ Muveji dya kiki, kyoso kitubhita mujitendasá, etu twandazwela: ‘Kana! Kyebhi kingeji ta okituxi kiki, muyoso yabhange Jihova ni Jezú phala ombote yami?’ Ni kixinganeku kiki, eye utena kubhinga nguzu kwa Jihova mukumudyondela: ‘Kana kungehela kudibhala mutendasa.’—Mat. 6:13.

12. Kyebhi kitutena kukumbidila okitendelesu kitusanga mudivulu dya 1 Nzwá 3:16-18?

 ¹² Zola ojiphange jé. Okuzola ojiphange jetu mukilunga, ukexilu wakulondekesa we kisakidilu musata yakukula. Mukonda dyahi tuzwela kiki? Mukonda Jezú kabhana ngó omwenyu wê phala etu, wabhana we phala ojiphange jetu. Se mwene wexile polondo phala kufwa mukonda dyawu, ene we ala ni valolo mumesu mê. (Tanga 1 Nzwá 3:16-18.) Etu tulondekesa ohenda yetu kujiphange mu ukexilu utwatalatala. (Efe. 4:29, 31–5:2) Mukifika, etu twakwatekesa kyoso kyakata, kyoso kyadibhana ni ibhidi, kala omavwa. Maji ihi itwatokala okubhanga se phange uzwela mba ubhanga kima kituluwalesa?

13. Mukonda dyahi twatokala kuloloka?

¹³ Okwila kyene mukubhonza okuloloka phang’é mukilunga? (Iji. 19:18) Se kyene, kayela okitendelesu kiki: “Mu di lendukile ni kudikwatekesa mudyenu, mu di loloka, se bhwala muthu wa di kwata ni mukwá. Kala muthu a loloke mukwá kala kyoso Nzambi kya mi loloka enu, kyene we ki mu bhanga jinga.” (Kol. 3:13) Ithangana yoso ituloloka phange, twamulondekesa kwa Tatâ yetu yadyulu kwila, ni kidi kyoso etu tubhana valolo musata yakukula. Kyebhi kitutena kubandekesa okisakidilu kyetu ku ujitu yú watubhana Nzambi?

14. Ukexilu webhi dingi ututena kulondekesa okisakidilu kyetu musata yakukula?

¹⁴ Sakidila Jihova mukutubhana osata yakukula. Phange Joana wala ni 83 amivu watungu ku ixi ya Índia wambe: “Mudyami kima kyambote kutumbula osata yakukula izuwa yoso, ni kusakidila we Jihova mukutubhanayu.” Izuwa yoso kyoso ki usamba ubheka wé, tangela kwa Jihova o ituxi yoso iwate, ni umubhinge muloloki. Mukidi se wate kituxi kyadikota watokala kubhinga kikwatekesa kutufunga. Ene andakwivwa, andakubhana we itendelesu yahenda bhukaxi ka Mak’a Nzambi. Ene anda samba kumoxi neye, andabhinga we kwa Jihova phala kukuloloka bhukaxi kasata yakukula ya Jezú, phala ‘akusake phala udisanze [munzumbi].’—Tiya. 5:14-16.

15. Mukonda dyahi twabhingi kukatula kithangana phala kutanga ni kuxinganeka mumaka alungu ni sata yakukula?

¹⁵ Xinganeka musata yakukula. Ophange yamuhatu amwixana Rajamani, wala 73 amivu, mwene wambe kwila, “ithangana yoso kingitanga mu Bibidya, ohadi yatale Jezú, ngimateka  kudila.” Eye we utena kudivwa kiki, mukuxinganeka muhadi yabhitinayu Omona Nzambi. Kyoso ki uxinganeka musata yakukula, ohenda yê kwa Jezú ni kwa Tat’ê, yandadibandekesa dingi. Phala kukukwatekesa kuxinganeka musata yakukula, mukudilonga ubheka wé, okwila utena kutokwesa milongi izwela yalungu ni sata yakukula?

16. Mukonda dyahi okulonga akwetu yalungu ni sata yakukula kima kyambote phala etu? (Tala ofoto ya kapa.)

¹⁶ Longa akwenu yalungu ni sata yakukula. Ithangana yoso ki utangela akwenu maka alungu ni kukula, okisakidilu kyé kusata yiyi kyandadibandekesa dingi. Etu twala ni jifalamenda javulu jitukwatekesa kulonga akwetu se mukonda dyahi Jezú wabhingile kufwa phala kutubhulula. Mukifika tutena kulonga akwetu mudisá 4 yakadivulu, Njimbu Yambote ya Nzambi! Odyambu dyadisá, dyenyidi: “Jezú Kidistu Nanyi?” Mba se twamesena, tutena kutumbula okibatulu 5 kyadivulu, Ihi Itulonga o Bibidya? Dyambu dyakibatulu kiki dyenyidi, “O Kukúla—Ujitu Wonene wa Nzambi.” Mivu yoso okisakidilu kyetu kusata, kyene mudibandekesa dingi kyoso kituya Mulembalasa ni kwixana we akwetu phala kwiza Mulembalasa yakufwa kwa Jezú. Jihova watubhana o ujitu wadikota wakulonga akwetu yalungu ni Mon’ê!

17. Mukonda dyahi osata yakukula, wene o ujitu wabetakota wabhana Nzambi ku athu?

¹⁷ Se phata, kwala ima yavulu itubhangesa kukala ni kisakidilu kusata yakukula. Mukonda dya sata yakukula etu tutena kukala ni ukamba wambote ni Jihova sumbala tu akwa ituxi. Mukonda dya sata yakukula o ikalakalu ya Dyabhu hadya anda imwanga. (1 Nzwá 3:8) Mukonda we dya sata yakukula, ovondadi ya Jihova yalungu ni ixi hadya yandadikumbidila. O ixi yoso yandakituka dingi palayizu. O athu oso uwandakwijiya kumundu wa ubhe andazola Jihova, andamusidivila. Kyeniyikiphe izuwa yoso tusote mawukexilu akulondekesa okisakidilu kyetu musata yakukula. O ujitu wabetakota wabhana Nzambi ku athu!