1-2. Se kiwala hanji polondo phala ku kubatizala, mukonda dyahi ki watokala kuluwala? (Tala ofoto yakapa.)

 O KWILA eye wamesena ku kubatizala? Se kyene, wasolo mbambe yambote. O kwila ufika kuma wala kya polondo phala ku kubatizala kindala? Se wamudivwa kwila wala kya polondo, anga o tufunga a xikina we, twakubhingi twakudyondo, bhanga yoso n’a kubatizele mu kyônge kya ilunga mba mu kyônge kyadikota kya kayela. Se ubhanga kiki, wanda tambula mabesá avulu mu kusidivila Jihova.

² O kwila sayi muthu wakutangela kwila kwala ima iwatokala o kubhanga hanji ande dya ku kubatizala? Inga eye mwene wamono kwila sayi hanji ima iwatokala o kubhanga ande dya ku kubatizala? Se kyene, kana kuluwala. Kikale se u munzangala mba umwadyakime, utena kubhanga o ima yanda kukwatekesa kukala polondo phala ku kubatizala.

3. O diyala mukwa Etiyopya webhwidisa ihi kwa Filipe? Ni kibhwidisu kyebhi ki moneka? (Ikalakalu 8:36, 38)

³ Tanga Ikalakalu 8:36, 38. Sayi diyala mukwa Etiyopya webhwidisa kwa Filipe, o mukunji: “Kima kyahi ki ngi fidisa ku ngi batizala?” O diyala mukwa Etiyopya wamesenene kuma a mu batizala, maji o kwila wexile mwene polondo phala kubhanga kiki?

4. Kyebhi o diyala mukwa Etiyopya kyalondekesa kwila mwene wexile polondo phala kusuluka mu kudilonga yalungu ni Jihova?

⁴ O diyala mukwa Etiyopya, wayile mu ‘Jeluzaleme phala kubheza Nzambi.’ (Ika. 8:27) Nange mwene waxikinine o ubhezelu wa Jijudé, yu wexile mu kayela o ijila ya Mozé. Sé phata, mwene wadilongo yalungu ni Jihova mukutanga o Mikanda  ya Hebalayiku. Né kiki mwene wamesenene kudilonga dingi. Mu kidi, kyoso Filipe kyasange o diyala mukwa Etiyopya mu njila, o dyala wexile mutanga o mukanda wa polofeta Izaya. (Ika. 8:28) Yoyó yexile milongi ya zongo ya Mikanda Ikôla. O diyala mukwa Etiyopya ka sangulukile ni milongi ya dyanga yalungu ni Jihova; mwene wamesenene kudilonga dingi.

5. Ihi yabhange o diyala mukwa Etiyopya phala kulondekesa kwila wexile mu kumbidila o ima yexile mudilonga?

⁵ Mwene wexile mukalakadi wa mvwale mukwa Etiyopya amwixanene Kandase, mwéne “wexile we mutambula konda ya jimbongo joso” ja mvwale. (Ika. 8:27) Sé phata wexile ni ikalakalu yavulu. Né kiki, mwene wexile mukatula kithangana phala kubheza Jihova. Mwene ka sangulukile ngó ni kudilonga o kidi, maji wasangulukile ni ima yexile mubhanga. Mu kiki watundu ku Etiyopya yu wayi mu Jeluzaleme phala kubheza Jihova mu tembulu. Yoyó yexile njila yalebha. Nange phala kutunda ku Etiyopya phala kuya ku Jeluzaleme, kwabhingile kwenda kyavulu, ni kungastala kitadi kyavulu. Maji o diyala dyódyo wamesenene kubheza Jihova kabasa kidi, mba kitadi kyeji ngastala mu njila.

6-7. Kyebhi o henda ya diyala mukwa Etiyopya ya suluka mu kudibandekesa?

⁶ Filipe walongo ima yakatunda kwa mukwa Etiyopya, kala o kidi kyalungu ni Mexiya. (Ika. 8:34, 35) O diyala dyódyo wasangulukile kyavulu mu kudilonga yalungu ni sata ya Jezú, ni mbote yabhekela o sata yiyi phala mwene. Ihi yabhange mwene kyoso kya dilongo o kidi kiki? Mwene wexile kya ni mawujitu avulu mu ngeleja ya Jijudé, hinu weji suluka kyenyiki. Muveji dya kiki, o henda yé kwa Jihova ni kwa Jezú yadibandekesa dingi. Mwene wexile polondo phala kulungulula o mwenyu wé, phala kumubatizala ni kukituka mukayedi wa Jezú. Filipe wamono kwila o diyala mukwa Etiyopya wexile kya polondo, kyenyiki wa mu batizala.

⁷ Se eye ukayela o phangu ya diyala mukwa Etiyopya, wandakala we polondo phala ku kubatizala. Wanda divwa we kala kyadivu mwene ni kudibhwidisa, “kima kyahi ki ngi fidisa ku ngi batizala?” Tumone kyebhi ki utena kubhanga o ima yabhange o diyala mukwa Etiyopya: Kusuluka mukudilonga, kusuluka mu kukumbidila o ima iwamudilonga ni kubandekesa o henda yé kwa Nzambi.

8. Kyebhi o divulu dya Nzwá 17:3 dya lungu we n’etu?

⁸ Tanga Nzwá 17:3. O kwila o izwelu yiyi ya Jezú, yakukwatekesa kusola kudilonga o Bibidya? Kyene we kyabhiti ni amoxi mudyetu. Maji o kwila o izwelu yiyi itukwatekesa we kusuluka mukudilonga? Kyene mwene.  Etu twanda suluka mukudilonga yalungu ni “Nzambi yakidi imoxèlele . . . Katé ku hádya ni hádya.” (Ndo. 3:11) Kyoso ki tuya ni kudilonga yalungu ni Jihova, twanda mu zukama dingi.—Jisá. 73:28.

9. Ihi itwatokala o kubhanga kyoso kituzubha kudilonga o milongi yadyanga ya Bibidya?

⁹ Mu kidi, kyoso kitumateka kudilonga yalungu ni Jihova, tudilonga hanji o milongi yadyanga ya Bibidya. Mu mukanda wasonekena akwa Jihebelewu, o poxolo Phawulu wexana o milongi yiyi kala “maulongelu adyanga.” Mwene kexile muzwela kuma o ima yóyo ki yexile ni valolo, kana. Maji mwene wexile mulondekesa kwila, o milongi yoyo yexile kala o lete yene mubhana ku tubwetele. (Jih. 5:12; 6:1) Mukonda dyakiki, mwene waswinisa o Jikidistá joso phala asuluke mukudilonga o ima yazongo yalungu ni Mak’â Nzambi. O kwila eye wexile ni hanji yavulu yakudilonga o milongi yazongo ya Bibidya? O kwila wala hanji polondo phala kukula mu nzumbi, ni kusuluka mukudilonga yalungu ni Jihova ni vondadi yé?

10. Mukonda dyahi sayi athu ki abhonza kudilonga?

¹⁰ Phala avulu mu dyetu, kutubhonza kudilonga. Maji abha eye? Mu xikola, eye wa dilongo kutanga ni kudilonga kyambote. O kwila eye wamono o kudilonga kala kima kyambote, kitena kukubhekela mbote yavulu? Inga wadivu kwila ki wala ni uhete wakudilonga? Se kyene, kiki ki kyamubhita ngó n’eye. Maji phe Jihova utena ku kukwatekesa. Jihova muthu wayuka, mwéne o Mulongexi wa beta kota mu ngongo yoso.

11. Kyebhi Jihova kyalondekesa kuma mwene o ‘Mulongexi Wonene’?

¹¹ Jihova mu Bibidya udixana kala, ‘Mulongexi Wonene.’ (Iza. 30:20, 21) Mwene mulongexi mukwa mwanyu, walenduka, mukwa henda. Utendela o ibhindamu ya adilongi’ê, usota we o mbote yâ. (Jisá. 130:3) Mwene nuka wanda kingila kuma tubhanga nguzu mu ima yatundu o nguzu yetu. Lembalala kwila, mwéne wabhange o wongo wetu, o ujitu wadikota. (Jisá. 139:14) Mu kidi, atuvwala kya ni hanji yakudilonga. O mubhangi wetu wamesena kwila, tusuluka mukudilonga katé ku hádya ni hádya, ni kukatula mbote kyoso ki tuya mukubhanga kiki. Mu konda dya kiki, kima kyambote kukala ni “hânji yavulu” ya kudilonga o kidi kya Bibidya kindala. (1 Ph. 2:2) Xinda jimbambe ji utena kukumbidila, anga udisokejeka phala kutanga ni kudilonga o Bibidya izuwa yoso. (Josu. 1:8) Ni mabesá a Jihova, eye wanda wabhela kutanga ni kudilonga dingi yalungu ni mwene.

12. Mukonda dyahi twatokala kudilonga yalungu ni mwenyu ni ukunji wa Jezú?

¹² Katula kithangana phala kuxinganeka jinga ku mwenyu ni ukunji wa Jezú. Se twamesena kusidivila Jihova mu ukexilu watokala, twabhingi kukayela o phangu ya Jezú, bengebenge mu ithangana ya ibhidi. (1 Ph. 2:21) Jezú wazwela kuma, o maxibulu mê eji dibhana ni ibhidi. (Luk. 14:27, 28) Né kiki, mwene wa dyelele kwila o akayedi’ê, eji kolokota fiyele kwa Nzambi kala kyabhangele mwene. (Nzw. 16:33) Dilonge kyambote yalungu ni mwenyu wa Jezú, anga sota mawukexilu a kukayela o phangu yê mu kizuwa ni kizuwa.

13. Ihi itwatokala kubhinga kwa Jihova, ni mukonda dyahi?

¹³ O kwijiya kwala ni valolo, maji ki kusoko. O kwijiya ku kukwatekesa kukala ni henda ni kixikanu kwa Jihova. (1 Ko. 8:1-3) Kyoso ki uya ni kudilonga dingi yalungu ni Jihova, mu bhinge phala ku kukwatekesa kukala dingi ni kixikanu. (Luk. 17:5) Misambu kala yiyi, mwene u itambwijila. Se ukala ni kixikanu kya kidi mu ima iwadilongo yalungu ni Jihova, wanda tena ku ikumbidila ku mwenyu wé.—Tiy. 2:26.

14. Kyebhi poxolo Phetele kyalondekesa kwila kima kyambote ku kumbidila o ima itudilonga? (Tala we ofoto.)

¹⁴ Poxolo Phetele watumbula o phangu ya Nowé phala kulondekesa o valolo ya ku kumbidila o ima itudilonga. Jihova wa tangela Nowé kwila, weji bheka dilúvyu phala kubwikisa o athu ayibha mu izuwa yenyóyo. O kwijiya ngó kuma kweji kwiza dilúviu, ki kweji soka phala kubhulula Nowé ni mwiji wê. Tala kwila Phetele watumbula o izwelu “kyoso kyakexile mutunga o alaka,” phala kuzwela yalungu ni kithangana ande dya kwiza o dilúviu. (1 Ph. 3:20) Kiki kilondekesa kwila, Nowé ni mwiji wê abhange kala kya tendelesa Nzambi, yà atungu o álaka. (Jih. 11:7) Phetele wexile musokesa yabhange Nowé ni batizu, mwene wasoneka: “Tutena kusokesa o kizulukutu kiki ni batizu ya mu mibhulula kindala.” (1 Ph. 3:21) Mu kiki, tutena kusokesa o nguzu iwamubhanga phala ku kubatizala, kala o nguzu yabhange Nowé ni mwiji wê mu mivu yavulu phala kutunga o alaka. Nguzu yahi iwatokala kubhanga phala ukale polondo n’a kubatizale?

15. Kyebhi ki utena kulondekesa kwila wa dyela o ituxi yé ni muxima woso?

¹⁵ Kima kimoxi ki twatokala o kubhanga ni muxima woso, o kudyela o ituxi yetu. (Ika. 2:37, 38) Tutena ngó kulungulula o ima ku mwenyu wetu, se tu dyela ni muxima woso. O kwila eye waxisa kya o ima iluwalesa Jihova, kala o undumbu, kubwakula, kuzwela ima yabolo mba o jindaka? (1 Ko. 6:9, 10; 2 Ko. 7:1; Efe. 4:29) Se ki watena hanji kuxisa o ima yiyi, kana kubhwila, kolokota mukubhanga nguzu. Zwela ni mulongexi wé wa Bibidya, mba bhinga kikwatekesu ku tufunga mu kilunga kyé. Se eye umunzangala watungu ni jitata jê, bhinga kikwatekesu kwa ene, phala utene kuxisa ukexilu wosowoso wa mukufdisa ku kubatizala.

16. O kukala ni kifwa kyakubhanga o ima mu nzumbi, kyalungu ni ihi?

¹⁶ Kima kya mukwa kyala we ni valolo ya dikota, o kukala ni kifwa kya kubhanga o ima mu nzumbi. Kiki kyalungu ni kuya mu yônge, ni kubhangamu mbandu. (Jih. 10:24, 25) Kyoso ki wanda mateka o kuboka, bhanga kiki mu ithangana yoso. Kyoso ki uya ni kubhanga o  kikalakalu kiki kibhulula myenyu, wanda kiwabhela dingi. (2 Ti. 4:5) Se eye umunzangala watungu hanji ni jitata jê, dibhwidise: ‘O kwila o jitata jami abhingi ithangana yoso kungilembalesa yalungu ni yônge ni kuboka? Inga éme mwene ngene mubhanga o ima yiyi sé kungilembalesa?’ Kyoso ki ubhanga kiki mu vondadi yé, kilondekesa kwila eye wala ni kixikinu wa zolo Jihova ni kwila umusakidila mu yoso yene mu kubhana. Kala kizwela o Bibidya, yiyi “ima iximanesa Nzambi,” mu izwelu ya mukwa, kyedi kala eye wamubhana ujitu kwa Jihova. (2 Ph. 3:11; Jih. 13:15) Yoso itubhana kwa Jihova ni muxima woso, sé kutujijidika, isangulukisa o Nzambi yetu. (Sokesa ni 2 Ko. 9:7.) Kisangusangu kyadikota phala etu, kubhana kwa Jihova yoso itutena.

17-18. Kima kyebhi kyakatunda kyanda kukwatekesa kukala polondo phala ku kubatizala? Ni mukonda dyahi? (Jisabhu 3:3-6)

¹⁷ Kyoso ki uya ni kudisokejeka phala o batizu, wanda dibhana ni ibhidi. Sayi athu atena ku kusebhulula mukonda dya kixikanu kyé, katé mwene atena ku kuzukutisa. (2 Ti. 3:12) Kumbandu yamukwá, kyoso ki uya ni kubhanga nguzu phala kutolola kifwa kyayibha, sayi ithangana nange eye utena kuzoza. Mba phe utena kuluwala ni kuthandanganya mukonda kiwamutena kukumbidila o mbambe iwaxindi. Ihi yanda kukwatekesa kukolokota? O henda yé kwa Jihova.

¹⁸ O henda yé kwa Jihova kidifwa kyakatunda, kyene o kima kyabeta kota ki wala nakyu. (Tanga Jisabhu 3:3-6.) Se wazolo mwene Jihova ni kidi kyoso, ki wanda kweha kumubheza né mwene se udibhana ni ibhidi. Muveji javulu o Bibidya izwela yalungu ni henda ya fiyele yala nayu Jihova ku jiselevende jê, kiki kilombolola kuma Jihova nuka wanda xisa o jiselevende jê mba kweha ku azola. (Jisá. 100:5) Lembalala kwila eye akubhange mu kidifwanganu kya Nzambi. (Dim. 1:26) Mu kiki, kyebhi ki utena kulondekesa o henda yé yakidi?

19. Kyebhi ki utena kulondekesa o kisakidilu kyé kwa Jihova mu yoso yene mubhanga phala o mbote yé? (Ngalásya 2:20)

¹⁹ Mateka mu kukala umukwa kusakidila. (1 Te. 5:18) Izuwa yoso dibhwidise, ‘kyebhi Jihova kyene mulondekesa kwila wangizolo?’ Mu kusuluka, kyoso ki wanda samba, tumbula o ima yabhange Jihova phala eye. Jihova wakuzolo kyavulu, mwene wene mubhanga ima yavulu phala eye. Mu kiki, bhanga nguzu phala  kumona o ima yiyi, kala kyabhange poxolo Phawulu. (Tanga Ngalásya 2:20.) Dibhwidise, ‘O kwila ngamesena we kulondekesa kwa Jihova kwila ngamuzolo?’ O henda yé kwa Jihova, yene yanda kukwatekesa kutolola o jitendasá ni kudibhana kyambote ni ibhidi. O henda yiyi, yene yanda kukwatekesa kudikwatenena mu ima mu nzumbi, ni kulondekesa kwa Jihova izuwa yoso, kwila wa mu zolo.

20. O kubhakula o mwenyu wé kwa Jihova, kwalungu ni ihi? O kwila o kubhanga kiki kwala ni valolo?

²⁰ Kupholo dya kwenda, mukonda dya henda yé kwa Jihova, wanda mesena kubhanga musambu wakatunda kwa mwene. Mu musambu yu, eye wanda dibhakula kwa Mwene. Kala selevende ya Jihova wadibhakula, eye wala ni kidyelelu kyakatunda: Kya kumusidivila katé ku hádya ni hádya. Kyoso ki udibhakula kwa Jihova, eye umukanena kumusidivila kikale mu ithangana yabhonzo mba mu ithangana yambote. O kudibhakula kima kimoxi ki wandabhanga ku mwenyu wé. Ni kwila, kiki o kima kyabeta dingi kota ki wandabhanga. Xinganeka ngó: Mu ima yoso i wandasola ku mwenyu wé, kiki kyene o kima kyabeta dingi kota. (Jisá. 50:14) Satanaji wanda sota kuzozesa o henda yé kwa Jihova, mwene wamesena kwila eye weha kumubheza. Maji kana kumwehela ku kutolola! (Jobe 27:5) Se o henda yé kwa Jihova ikola mwene, wanda tena kukumbidila o kikanenu kiwamubhange, kyoso ki wadibhakula ni kumuzukama dingi.

21. Mukonda dyahi tutena kuzwela kwila o batizu ki dyene o disukilu, maji o dimatekenu ngó?

²¹ Kyoso ki wanda dibhakula kwa Jihova, mukusuluka zwela ni tufunga twa kilunga kyé phala kubhanga o kima kya kayela. Maji lembalala kwila o batizu ki dyene o disukilu, maji o dimatekenu ngó. Tunde mu kithangana kiki, eye wanda mateka kusidivila Jihova katé ku hádya ni hádya. Kyenyiki, kolesa kya o henda yé kwa Jihova. Xinda jimbambe janda kukwatekesa kubandekesa o henda yé kwa Jihova mu kizuwa ni kizuwa. O kubhanga kiki, kyanda kukwatekesa kubhixila katé ku batizu—o kizuwa kyakatunda kya mwenyu wé. Maji phe didi o dimatekenu ngó. Twamesena kwila o henda yé kwa Jihova ni kwa Mon’ê, isuluka ni kudibandekesa katé ku hádya ni hádya!