1. Ihi yamesena o jitata phala o twana twâ?

 JITATA, sé phata enu mwamesena kwila o twana twenu ejiya Jihova ni kumuzola. Maji phe, séku muthu utena kumona Nzambi. Kyenyiki, kyebhi ki mutena kukwatekesa o twana twenu kumona kwila, Jihova muthu wa kidi mwene, ni kumuzukama?—Tiy. 4:8.

2. Kyebhi o jitata kyatena kulonga o twana twâ yalungu ni idifwa ya Jihova?

² Ukexilu umoxi wambote wa kukwatekesa o twana twenu kwijiya Jihova, o kudilonga nawu o Bibidya. (2 Ti. 3:14-17) Maji o Bibidya izwela we kima kyamukwa, kitena kukwatekesa o minzangala kudilonga yalungu ni Jihova. Mu divulu dya Jisabhu, sayi tata utendelesa mon’ê phala ka dijimbe o idifwa ya Jihova idimonekena bhukaxi ka Ibhangelu yê. (Jisa. 3:19-21) Twandamona kyebhi o jitata kyatena kukwatekesa o twana twâ, kudilonga yalungu ni idifwa ya Jihova, bhukaxi ka ibhangelu.

3. Kyebhi o jitata kyatena kukwatekesa o twana twâ kudilonga dingi yalungu ni idifwa ya Jihova?

³ O Bibidya yamba kuma o idifwa ya Nzambi “yakambe kumoneka ku mesu, tutena ku imona mu ibhangelu yê yala mu ngongo. Tu tena kwijiya o idifwa yê, mu kutokwesa o ima yabhange mwene.” (Lom. 1:20) O jitata, awabhela kubhita kithangana ni twana twâ bhukanga. Kyenyiki katula mbote mu ithangana yiyi, phala kukwatekesa o twana twé, kumona o idifwa yakatunda ya Jihova bhukaxi ka “ima yabhange mwene.” Kindala tumone kyebhi o jitata kyatena kukayela o phangu ya Jezú mu maka ya.

4. Kyebhi Jezú kyalongo o maxibulu mê bhukaxi ka ibhangelu? (Luka 12:24, 27-30)

⁴ Tala kyebhi Jezú kyalongo o maxibulu mê bhukaxi ka ibhangelu.  Sayi kizuwa, mwene wa abhingi phala kutala o ilombelombe ni itulu. (Tanga Luka 12:24, 27-30.) Jezú wejitena kuzwela yalungu ni kyama mba muthu wosowoso, maji mwene wasolo kuzwela yalungu ni jinjila ni itulu mukonda o maxibulu ejidile kyambote o ima yiyi. Nange kyoso Jezú kyexile muzwela, o maxibulu exile mumona o jinjila kubhita bhulu, ni itulu mu jimbandu jâ. Katé tutena kuxinganeka Jezú kulondekesa o jinjila ni itulu kyoso kyexile muzwela. Ihi yabhange mwene kyoso kyazubha kutumbula o ima yiyi? Mwene wa alongo disá dya katunda dyalungu ni ukexilu wakubhanga o mbote ni wakubhana wa Tata yetu yadyulu: Jihova wandadisa ni kuzwika o jiselevende jê ja fiyele, kala kyene mubhanga ni ilombelombe ni itulu.

5. Ibhangelu yebhi ya Jihova itena kulonga o jitata ku twana twâ?

⁵ Jitata, kyoso ki muya ni kulonga o twana twenu, kyebhi ki mutena kukayela o phangu ya Jezú? Eye utena kuzwela nawu yalungu ni ibhangelu ya Jihova iwawabhela dingi, kala kyama mba kitulu. Kyoso ki uya ni kubhanga kiki, jimbulula kyebhi o ima yiyi ilondekesa o idifwa ya Jihova. Mukusuluka utena kwibhwidisa kwa mon’ê se kyama mba kitulu kyebhi kya wabhela dingi. Se uzwela yalungu ni ibhangelu yawabhela kyá mwene, nange ki kyanda mubhonza ku kubhana matwí kyoso ki wandaya ni ku mujimbulwila kyebhi o ima yiyi ilondekesa o idifwa ya Jihova.

6. Ihi itutena kudilonga ku phangu ya man’yâ Christopher?

⁶ O kwila o jitata abhingi kubhita ithangana yavulu mukutokwesa yalungu ni kyama mba muxi, ande dyakuzwela ni twana twâ se ihi itulonga o ibhangelu yiyi yalungu ni Jihova? Kana. Jezú ka jimbulula o ima yoso yalungu ni kyebhi o ilombelombe kyene mudya mba kyebhi kyene mukula o itulu. Kidi kwila sayi ithangana o twana twê a mesena kwijiya dingi ima yamukwá yalungu ni ibhangelu ya Jihova, maji sayi bhabha o kutumbula ngó ima yofele mba kubhanga kibhwidisu kitena kukwatekesa kyá mon’ê kutendela ihi iwamesena kumulonga. Sayi phange ya diyala amwixana Christopher, mukulembalala mu undenge wê, wambe: “Mam’etu wexile mutumbula imbamba yofele, phala kungikukwatekesa eme ni jiphange jami kubhana dingi valolo ku ibhangelu. Mukifika, kyoso ki twexile mubhita bhu mbandu ya milundu, mwene wexile muzwela: ‘Talenu ngó o milundu yiyi yamakota, yene yafwama kyavulu! Jihova muthu wonene, kikyene?’ Mba phe kyoso ki twexile bhu mbandu ya musanza wa kalunga, mwene wexile muzwela: ‘Talenu ngó o nguzu ya mabhuku a kalunga! Jihova wala ni kutena kwavulu, kikyene?’ “O ima yexile muzwela mam’etu sumbala yexile yofele, maji yexile mutubhangesa kuxinganeka.”

7. Kyebhi ki utena kulonga o twana twê kuxinganeka mu ibhangelu ya Jihova?

⁷ Kyoso o an’ê kyaya ni kukula, walonga kutonginina o ibhangelu ubheka wâ, ni kumona ihi ilonga o ibhangelu yiyi yalungu ni idifwa ya Jihova. Mukifika, eye utena kuzwela nawu yalungu ni kibhangelu kimoxi kya Jihova, ni kwibhwidisa ku twana twê: “O kibhangelu kiki ki kulonga ihi yalungu ni Jihova?” Eye nange wanda diwana ni kusanguluka kyavulu mu kwívwa o ima yanda zwela.—Mat. 21:16.

8. Ihi yexile mubhanga o jitata akwa Izalayele kyoso kyexile mukwenda njila ni twana twâ?

⁸ O jitata akwa Izalayele atokalele kulonga o twana twâ yalungu ni itumu ya Jihova, kyoso kyexile ‘mukwenda njila.’ (Mate. 11:19) Mu ixi ya Izalayele mwexile ikoka yavulu. Mu ikoka yiyi, ki mwabhonzele kusanga yama, jinjila ni itulu yavulu. Kyoso o jitata akwa Izalayele kyexile mukwenda ni miji yâ mu ikoka yiyi, ene  exile ni kithangana kyakulonga o twana twâ yalungu ni ibhangelu ya Jihova. Enu we mu jitata, mutena kukatula mbote mu kithangana ki mutunda ni twana twenu, kala kyexile mubhanga akwa Izalayele, phala kwalonga yalungu ni ibhangelu ya jihova. Tala kyebhi sayi jitata kyatena kubhanga kiki.

9. Ihi iwadilongo mu ima yazwela phange Punitha ni Katya?

⁹ Sayi mama amwixana Punitha, watungu mu mbanza yadikota mu ixi ya Índia, wambe: “Sayi jindandu jetu atungu mu jisanzala, kyenyiki kyoso ki tuya mwakunda, tusota kukatula mbote mu kithangana kyókyo phala kulonga o twana twetu yalungu ni ibhangelu ya Jihova. Ngamono kwila o twana twami abhana dingi valolo ku ibhangelu ya Jihova, kyoso kyakala dikanga dya mbanza yetu yadikota yezala ni jinzo ni makalu.” O ana nange nuka anda dijimba o ithangana yabhiti ni jitata jâ, mu ididi yafwama yezala ni ibhangelu ya Jihova. Phange Katya, watokala mu ixi ya Moldávia wambe: “O ima yakatunda i ngidilembalala dingi yalungu ni undenge wami, o ithangana ingabhiti ni jitata jami, dikanga dya mbanza yetu yadikota . Eme ngisakidila kyavulu o jitata jami, mu kungilonga tunde undenge kutonginina o ima yabhange Jihova, ni kumwijiya dingi kyambote bhukaxi ka ibhangelu yê.”

10. Ihi itena kubhanga o jitata se kya mwabhonza kutunda mu jimbanza jâ phala kuya mu jisanzala jengi? (Tala o kaxa “ Kikwatekesu Phala o Jitata.”)

¹⁰ Abha phe, se kya mubhonza phala eye ni mwiji wê kutunda mu mbanza phala kuya mu jisanzala jengi? Sayi phange yadiyala amwixana Amol, watungu mu ixi ya Índia, wambe: “Mu kididi mu ngatungu, o jitata atokala kukalakala kyavulu, o kutunda we mu mbanza phala kuya mu jisanzala jengi, kyate kalu yavulu. Né kiki, etu tutena kumona o ibhangelu ya Jihova ni idifwa yê, kyoso ki tukala bhu kididi bhwala njaludim mba kyoso ki tukala kuthandu dya sabhalalu.” Nange ku mbandu ya inzo yê kwala kididi kyafwama, kwala ibhangelu ya Jihova i utena kulondekesa ku twana twê. (Jisá. 104:24) Nange eye wandasangaku jinjila, tuyibamba, mixi, ni ima yamukwá. Karina, watungu  mu ixi ya Alemanha, wambe: “Mam’etu wawabhela kyavulu o itulu, kyenyiki kyoso ki twexile mukwenda kumoxi, wexile mungilondekesa o itulu yawabhela dingi.” Enu mu jitata, mutena we kulonga o twana twenu yalungu ni ibhangelu, bhukaxi ka jividyu ni madivulu ene mubhanga o kilunga kya Jihova. Kabasa kididi bhu watungu, eye utena kukwatekesa o twana twê kutonginina o ibhangelu ya Jihova. Kindala tumone o idifwa ya Jihova i utena kulonga ku twana twê, mu kutala o ibhangelu.

11. Kyebhi o jitata kyatena kukwatekesa o twana twâ kwijiya o henda ya Jihova kokwetu?

¹¹ Phala kukwatekesa o twana twê kutendela o henda ya Jihova, eye utena kwalondekesa kyebhi o yama ilanga o twana twâ. (Mat. 23:37) Eye utena kwalondekesa o ima yavulu kiyadifu yabhange Jihova phala kutusangulukisa. Phange Karina, twamutumbula kudima, wambe: “Kyoso ki ngexile mukwenda ni mam’etu, ithangana yoso mwene wexile mu ngibhinga phala kwimana ni kutonginina kyebhi kala kitulu, ki kyadifu ni kyamukwá, ni kyebhi o kuwabha kwa itulu yiyi kulondekesa o henda ya Jihova kokwetu. Katé lelu, ngene mutonginina hanji o nzungule dya itulu ki idifu ni jikolo jê. Kiki kingilembalesa o henda yadikota yala nayu Jihova kokwetu.”

12. Kyebhi o jitata kyatena kukwatekesa o twana twâ kutendela kwila Jihova Nzambi ya unjimu? (Jisálamu 139:14) (Tala we ofoto.)

¹² Kwatekesa o twana twê kutendela o unjimu wa Jihova. Jihova wabeta kota mu kwijiya muthu wosowoso ndenge. (Lom. 11:33) Mu kifika, eye utena kuzwela kyebhi o menya a banda bhulu, anga adibhanga matuta, o matuta yà atunda kididi aya mu ididi yamukwá. (Jobe 38:36, 37) Eye utena we kuzwela yalungu ni ukexilu wakatunda wabhange o mukutu wetu. (Tanga Jisálamu 139:14.) Tala yazwela tata amwixana Vladimir: “Sayi kizuwa, mon’etu wadiyala wadibhale ni bixi, yú wadikwama. Mukubhita tuyizuwa, o fidila yeluka. Bhenyobho eme ni muhatu wami twamujimbulwila kwila, Jihova wabhange o mukutu wetu ni kutena kwa kudiyudika mudyé kyoso kibhita kithangana. Twamutangela kwila ki kyene kibhita ni ima ibhanga o athu. Mu kifika, o dikalu se dyazanganya kiditena kudiyuduka ubheka wê. Kiki kyakwatekesa mon’etu kutendela o unjimu wa Jihova, mukubhanga o mwenyu.”

13. Kyebhi o jitata kyatena kukwatekesa o twana twâ kutendela o kutena kwala naku Jihova? (Izaya 40:26)

 ¹³ Mu Izaya 40:26, Jihova utubhinga phala kutala kudyulu, ni kuxinganeka mu kutena kwa bhindamena o jithéthembwa phala jikale bhu ididi yê. Eye we utena kuswinisa o twana twê phala kutala kudyulu, ni kukatula kithangana kya kuxinganeka mu ima yamumona. Tala yazwela phange yamuhatu amwixana Tingting, watokala mu ixi ya Taiwan, mu kulembalala mu unzangala wê: “Sayi kizuwa mam’etu wangambata phala kuya kuzeka ku mukawu. Kuma twexile dikanga dya mbanza yezalele ni mukengeji, twatenene kutala o jithéthembwa kudyulu mu usuku. Kiki kyabhiti mu kithangana ki ngexile mu dibhana ni ibhidi yavulu ku xikola, kingejidile se ngeji tena kusuluka mu kusidivila Jihova ni ufiyele wami woso. Mam’etu wangiswinisa kuxingeneka mu kutena kwoso kwabhingi phala Jihova kubhanga o jithéthembwa joso, yú wa ngilembalesa kwila, Jihova weji ngikwatekesa we kudibhana ni kibhidi kyosokyoso bhukaxi ka kutena kwabhange naku o jithéthembwa. O kutala o ibhangelu ya Jihova mu kizuwa kyenyókyo, kyangibhangesa kuvutuka kubhata ni vondadi ya kukolesa o ukamba wami ni Jihova, ni kumusidivila katé ku hádya ni hádya.”

14. Kyebhi o jitata kyatena kukwatekesa o twana twâ kumona kwila Jihova Nzambi ya sanguluka, bhukaxi ka ibhangelu?

¹⁴ O ibhangelu ya Jihova ilondekesa kwila mwene Nzambi ya sanguluka, ni kwila wamesena we kuma tusanguluka. O jingijiye a tonginina kwila, yama yavulu ya wabhela kutonoka kala o jinjila ni jimbiji. (Jobe 40:20) O kwila eye wamwene kyá mon’é kwolela kyoso kyamono kyama kyamutonoka? Nange mwene wamono makolombolo exile mubhânga, mba phe twana twa imbwa exile mu dinumata ku matwí. Mu veji yamukwá kyoso ki umona mon’ê wamukwolela mukumona kyama kyamutonoka, mu lembalese kuma, kiki kilondekesa kwila Jihova, Nzambi ya sanguluka.—1 Ti. 1:11.

15. Ihi itena kukwatekesa o jitata kwijiya o ixinganeku ya twana twâ? (Jisabhu 20:5) (Tala we ofoto.)

¹⁵ Sayi ithangana, nange kibhonza ku jitata kubhangesa kwila o twana twâ, a atangela kyebhi  kya mudivwa. Nange eye wabhingi kubhanga kima phala kwijiya ihi yamuxinganeka. (Tanga Jisabhu 20:5.) Sayi jitata amona kwila, o kukala ni twana twâ, bhu kididi bhwala o ibhangelu yavulu ya Jihova, ki akwatekesa kyavulu mu maka yà. Mukonda dyahi? Mukonda mu ithangana yiyi, kikale o jitata mba o twana, kakala ni ima yavulu ya atandanganyesa. Sayi tata mu ixi ya Taiwan, amwixana Masahiko, wambe kiki: “Kyoso eme ni muhatu wami ki tuya muzunga ni an’etu, ku milundu mba ku mbandu’a kalunga, twene mumona kwila o an’etu a divwa dingi kyambote, a tululuka. Bhenyobho, ki kitubhonzo dingi kuzwela nawu ni kwijiya ihi yamuxinganeka.” Phange Katya, twamutumbula kudima, wambe: “Kyoso ki ngexile mutunda ku xikola, mam’etu wexile mu ngambata ku njaludim yafwamene kyavulu. Mu ithangana yiyi, ngexile mudivwa kyambote, mu kiki, ki kyangibhonzele kumutangela ihi yabhiti ku xikola mba ihi yexile mu ngi tandanganyesa.”

16. Kyebhi o miji kyatena kukatula mbote mu ibhangelu ya Jihova?

¹⁶ Kyoso o mwiji akatula kithangana phala kutonginina o ibhangelu ya Jihova, enyoso adivwa kyambote, asanguluka, kiki kikolesa dingi o ukamba wâ ku mwiji. Kala kizwela o Bibidya, “kwala thembu ya kwolela” ni “thembu ya kutuka-tuka.” (Ndo. 3:1, 4.) Jihova wabhange ima yambote mu ixi, phala ni tutene kutukatuka, kwolela, kuzowa, kutonoka ni kubhanga ima yamukwá itwawabhela dingi. Miji yavulu awabhela kubhita kithangana kumoxi ku jisanzala, ku milundu mba kumbandu a musanza wa kalunga. Sayi ana ndenge, awabhela kutonoka mu njaludim, kutala o yama, kuzowa mu ngiji, mu kizanga mba mu musanza wakalunga. Etu twala ni ujitu wakukatula mbote ni kusanguluka ni ibhangelu ya Jihova!

17. Mukonda dyahi o jitata atokala kukwatekesa o twana twâ kuzola, ni kusanguluka ni ibhangelu ya Jihova?

¹⁷ Ku mundu wa ubhe, kikale o jitata mba o twana, anda katula mbote mu ibhangelu ya Jihova mu ukexilu wakatunda o wa lelu ndenge. Mu kithangana kyenyókyo, etu ki twandakala ni wôma wa yama, yene we ki yandakala ni wôma wa athu. (Iza. 11:6-9) Twandakala ni kithangana kya soko phala kutonginina ni kukemba ni ibhangelu ya Jihova. (Jisá. 22:26) Maji kima kyambote o jitata kulonga kya o twana twâ phala kutonginina ni kusanguluka ni ibhangelu ya Jihova kindala. Mu kulonga o twana twenu yalungu ni Jihova bhukaxi ka ibhangelu, ene nange anda divwa kala kyadivwile Sobha Davidi kyoso kyambe: “Kana-ku ikalakalu kala o ikalakalu yé.”—Jisá. 86:8.