1. Valolo yebhi yala nayu o mwenyu wetu phala Jihova?

 XINGANEKA kwila kamba dyé wakubhana quadro ayibhange ni uhete woso —yene yala ni valolo yadikota. Maji yene yala ni misula, ni ixaka. Né kiki o quadro yiyi, yala hanji ni valolo yavulu. Phala kuyisumba, ibhinga kitadi kyavulu. Mu kidi, eye wejibhanga yoso ni yoso phala kulanga kyambote o quadro yiyi y’obhange ni uhete woso. Kyene we kimoxi, Jihova watubhana ujitu wala ni valolo yadikota, o mwenyu. Mu kidi, Jihova walondekesa kwila ubhana valolo yavulu ku mwenyu wetu, mukutubhana mon’ê phala kutubhulula.—Nzw. 3:16.

2. Kala kilondekesa 2 Kolindu 7:1, Ihi i kingila Jihova kokwetu?

² Jihova mwène o Fixi ya mwenyu. (Jisá. 36:9) Poxolo Phawulu wejidile o kidi kiki kyoso kyambe: “Mukonda dya mwene twala ku mwenyu, twene mukwenda, etu twalaku.” (Ika. 17:25, 28) Mukonda dya kiki, tutena kuzwela kwila o mwenyu wetu ujitu watubhana Nzambi. Jihova mu henda yé utubhana yoso itwabhindamena phala tukale ku mwenyu. (Ika. 14:15-17) Maji lelu Jihova k’ene mubhanga madiwanu phala ni tukala ku mwenyu. Muveji dya kiki, mwene ukingila kwila, kala muthu mudyetu ubhanga nguzu phala kulanga o sawidi yê mu nzumbi ni muxitu. (Tanga 2 Kolindu 7:1.) Mukonda dyahi twatokala kulanga o mwenyu wetu ni sawidi yetu, ni kyebhi ki tutena kubhanga kiki?

3. Kima kyebhi kimoxi ki tubhangesa kulanga o sawidi yetu?

³ Kima kimoxi ki tubhangesa kusota kukala ni sawidi yambote o kwijiya kwila kiki ki tukwatekesa kusidivila Jihova ni  nguzu yoso. (Mál. 12:30) Etu twamensena ‘kubhakula o mikutu yetu kala sata ikôla, yanda xikina Nzambi.’ Mu kiki, kitwatokala kubhanga kima kitena kuta o sawidi yetu mu kilwezu. (Lom. 12:1) Kidi kwila, né mwene se tubhanga yoso phala kulanga o sawidi yetu, twandakata hanji. Maji tubhanga yoso itutena, mukonda twamesena kulondekesa kwa Jihova kwila tubhana valolo ku mwenyu.

4. Sobha Davidi wamesenene kubhanga ihi?

⁴ Sobha Davidi wajimbulula se mukonda dyahi mwene wexile mumona o mwenyu kala ujitu wa Nzambi, mwene wasoneka: “Eye, ngana, u katula-ku ihi se eme nga fu, o mwenyu wami ni u di boto mu dikungu? Manyi, o mavu, a tena dingi ku ku ximana? Mavu a tena dingi kutanga o kukumbidila kwé?” (Jisá. 30:9) Nange Davidi wasoneka o izwelu yiyi ku disukilu dya mwenyu wê. Maji né kiki mwene wexile polondo phala kukala ni sawidi yambote n’atene kusidivila Jihova. Sé phata, etu enyoso twamesena kubhanga kiki.

5. Ihi itwatokala kubhanga né mwene se twakate kyavulu mba twa kuka kya?

⁵ Nange mukonda dya uhaxi mba kitala, kitutena dingi kubhanga o ima kala ki twexile mubhanga m’ukulu. O ima yiyi, itena kutuluwalesa kyavulu. Maji né kiki, kitwatokala kweha kulanga o sawidi yetu. Mukonda dyahi? Mukonda né mwene ni mauhaxi mba kukuka, etwenyoso tutena kubhana kijingu kwa Jihova, kala kya bhangele Sobha Davidi. Kima kyambote kwijiya kwila, twala ni valolo ku pholo ya Nzambi sumbala tu akwa ituxi! (Mat. 10:29-31) Né mwene se tu fwa, Jihova wandamesena kyavulu ku tufukununa. (Jobe 14:14, 15) Kuma twala hanji ku mwenyu, twamesena kubhanga yoso itutena phala kulanga o sawidi ni mwenyu wetu.

6. Ihi ikingila Jihova kokwetu yalungu ni ima itwandadya ni itwandanwa?

⁶ Sumbala o Bibidya ki divulu dya itendelesu ya lungu ni kyebhi ki tutena kulanga o sawidi yetu mba ihi itwatokala o kudya, yene ilondekesa o ixinganeku ya Jihova mu maka yá. Mu kifika, mwene wambe kuma “o xitu yé kuyehele kubhanga kyayibha,” mukonda kiki kyejitubhekela ibhidi. (Ndo. 11:10) O Bibidya yamba kuma kitutokala kudya kyavulu mba kunwa uhôlwa wavulu. O ima yiyi itena kuzanga o sawidi yetu, katé mwene ni kutubhekela kalunga. (Jisa. 23:20) Jihova ukinga kuma etwenyoso tutena kusola o ima itwandadya ni itwandanwa.—1 Ko. 6:12; 9:25.

7. Kyebhi o divulu Jisabhu 2:11, ditukwatekesa kusola kyambote o ima yalungu ni sawidi yetu?

⁷ Etu tutena kusola ima ilondekesa kwila tubhana valolo ku mwenyu watubhana Nzambi, mu kubanza yalungu ni kitongolwelu kyetu. (Jisá. 119:99, 100; Tanga Jisabhu 2:11.) Mu kifika, tutena kuxinganeka kyambote se ihi itwandadya. Se sayi kudya twakuwabhela kyavulu maji twejiya kwila o kudya kuku kwene mutubhanga kyayibha, kitwandaxikina kukudya. Tulondekesa we kwila twala ni kilunji kyambote kyoso ki tusola kuzeka kyasoko, kutungutisa o mukutu mu veji javulu, ni kuzelesa o mukutu wetu ni inzo yetu we.

8. Kala kizwela o Bibidya ihi ibanza Nzambi yalungu ni kudilanga ku ilwezu?

⁸ Jihova wabhanene itumu ku akwa Izalayele yalungu ni kyebhi kyeji dilanga ku ilwezu, kikale ku mabhata mâ mba mu ikalakalu yâ. (Mak. 21:28, 29; Mate. 22:8) Né mwene se  muthu wajibhile mukwa sé kukimesena, wejidibhana ni maka a dikota. (Mate. 19:4, 5) O kitumu kyambele kwila se muthu, né mwene sé kukimesena uta o mwenyu wa mona wala mumala mu kilwezu, amufundisa. (Mak. 21:22, 23) O Bibidya yamba ni kidi kyoso kwila Nzambi wamesena kuma tudilanga ku ilwezu.

9. Ihi itwatokala kubhanga phala kitudite mu ilwezu? (Tala we o jifoto.)

⁹ Etu tulondekesa kwila tubhana valolo ku mwenyu watubhana Nzambi, mukusota kudilanga ku ilwezu kikale ku salu mba kubhata. Mu kifika, kitwatokala kubhaka o ima kala o milongo, o ima ikwama, ni nvwenenu bhwazukama o twana. Se twamesena kutexa o ima yiyi, kituyitexe bhu kididi kyoso kyoso, tuyitexa bhu kididi kya kondama. Twatokala kudilanga kyoso ki tukalakala ni tubhya, menya a tema mba jimakina ji kalakala ni mukengeji. Se twanu uhôlwa mba twala ni kilu, kitwatokala kwendesa dikalu, kitutena we kuzwela mu mutelembe wakafwetele kyoso ki twamukwendesa.

10. Ihi itwatokala kubhanga ande dya kwiza o divuwa ni kyoso ki dimoneka?

¹⁰ Sayi ithangana, kitutena kufidisa mba kulenga o ima ita o mwenyu wetu mu kilwezu. Tumona o kidi kiki bengebenge kyoso ki kumoneka mavuwa, uhaxi wabhonzo udimwanga ni izulukutu yamukwa. Maji né kiki, kyoso ki kubhita o ima yiyi, etu tutena hanji kubhanga kima phala tutene kudilanga, kala o kubelesela o jinguvulu phala kuxisa o ididi yala mu ilwezu, ni kubelesela o itendelesu yamukwa. (Lom. 13:1, 5-7) Nange mu ithangana yamukwa, tutena kwijiya se kwandabhita divuwa. Mu ima kala yiyi, twatokala kubelesela o itendelesu itubhana o jinguvulu phala kudilanga ku mavuwa. Mu kifika, kima kyambote kukala ni mbwenga mukala o menya, kudya, ni milongo.

11. Ihi itwatokala kubhanga kyoso ki kumoneka dibhebhu mba uhaxi wabhonzo?

¹¹ Abha se mu dyembu dyetu mumoneka dibhebhu mba uhaxi wabhonzo? Twatokala kubelesela o itendelesu ya jinguvulu, kala o kusukula o maku, kudisandula bhukaxi k’akwetu ni kuta o máscara mba kukala bhu kididi kimoxi ubheka. Mu kubhanga kiki, tulondekesa kwila tubhana valolo ku ujitu wa mwenyu watubhana Nzambi.

12. Kyebhi o kitendedelesu ki tusanga mu Jisabhu 14:15 ki tukwatekesa kwijiya se ihi itwatokala kubhanga kyoso ki kumoneka mavuwa?

¹² Kyoso ki kumoneka dibhebhu mba divuwa, nange tutena kwivwa jingolokela jamakutu bhukaxi ka makamba, jivizinhu, mu mitelembe mba mu internete. Muveji dya kuxikina mu “maka oso” utwivwa, twatokala kukayela o itendelesu ya athu ejiya o kidi kyalungu ni maka enyá. (Tanga Jisabhu 14:15.) O Kibuka kya Utuminu ni jibetele joso ku mundu, abhanga yoso phala kusanga itendelesu yakidi ande dya kuzwela kima kyalungu ni kubhanga o yônge yetu ni kubhanga o kikalakalu kya kuboka. (Jih. 13:17) Mu kubelsela o itendelesu yiyi, tudilanga mudyetu ni kulanga we akwetu. Tukwatekesa we o athu kukala ni ibanzelu yambote yalungu ni Jimbangi ja Jihova.—1 Ph. 2:12.

13. Kyebhi o kubelesela o kitumu kyalungu ni manyinga, kilondekesa kwila tubhana valolo ku ujitu wa mwenyu watubhana Nzambi?

¹³ Athu avulu ejiya kwila o Jimbangi ja Jihova a xikina kwila o manyinga kima kikôla. Etu tubelesela o kitumu kya Jihova kyalungu ni manyinga, kyoso ki tudituna kututa manyinga né mwene kyoso ki tukala mu kilwezu. (Ika. 15:28, 29) Maji kiki, kikilombolola kwila twamesena kufwa. Muveji dya kiki, etu tubhana valolo ku ujitu wa mwenyu watubhana Nzambi. Etu tusota o kikwatekesu kya asaki ala polondo phala kutusaka sé manyinga.

14. Kyebhi ki tutena kudilanga ku kilwezu kya kutubhanga pelasá mba kutusaka mu ukexilu wabhonzo dingi?

¹⁴ Se tulanga kyambote o sawidi yetu, twandasosolola o kilwezu kya kutubhanga pelasá mba kutusaka mu ukexilu wabhonzo dingi. Mu kiki, se tulanga kyambote o sawidi yetu twandatena kudisanza ni lusolo né mwene se atubhanga pelasá. Tutena we kulenga o kilwezu kya kutubhanga pelasá ni lusolo lwoso, mukulanga kyambote o inzo yetu ni ikalakalu yetu, ni kukayela we o itumu yalungu ni kwendesa makalu.

15. (a) Mukonda dyahi kima kyambote kusoneka o mukanda wetu wa manyinga ni kukala nawu? (Tala we o foto.) (b) Kala ki twamono mu video, kyebhi ki tutena kusola kutusaka sé kutambula manyinga?

¹⁵ Kuma twazolo kyavulu o mwenyu, etu tusoneka o mukanda mba dukumendu dya lungu ni manyinga (Diretiva Antecipada e  Procuração para Tratamentos de Saúde) anga twenda nadyu kabasa kididi. b Bhukaxi ka dukumendu didi, tusoneka o kixinganeku mba vondadi yetu yakutusaka sé manyinga, ni ima yamukwa dingi yalungu ni sawidi yetu. O kwila o mukanda wé wa lungu ni manyinga, wala mwene kyambote? Waubhe? Se kiwala ni kamukanda kaka mba kakadukala, soneka kengi ni lusolo. O kusoneka kyambote o kamukanda kaka kyandatukwatekesa kutusaka ni lusolo, mukonda kitwanda ngastala kithangana kyavulu phala kujimbulula o maka a kutusaka ku jidotolo. Se tubhanga kiki, twandatena kulenga kuta o sawidi yetu mu kilwezu. c

16. Se twala ni phata yalungu ni kusoneka o kamukanda ka manyinga ihi itutena kubhanga?

¹⁶ Kikale se tuminzangala hanji mba twala hanji ni sawidi yambote, etwenyoso tutena kubhita mu kilwezu mba kukwata uhaxi wabhonzo. (Ndo. 9:11) Mukonda dya kiki, kima kyambote etwenyoso kusoneka o kamukanda ka manyinga. Se wala ni phata yalungu ni kusoneka o kamukanda kaka, bhinga kikwatekesu ku tufunga mu kilunga kyé.  Ene abhanga yoso phala kwijiya kyebhi kyatokala kusoneka o kamukanda kaka, maji ene kanda kukusolela bhu kididi kyé yalungu ni kyebhi kyatokala kukusaka. Éye mwene watokala kusola. (Nga. 6:4, 5) Maji ene atena ku kukwatekesa kutendela ihi iwatokala kusoneka.

17. Kyebhi ki tulondekesa kwila tu athu a tetuluka mu maka alungu ni sawidi?

¹⁷ Etu tusola ima yavulu yalungu ni sawidi yetu ni ukexilu wakutusaka mu kukayela o kitongolwelu kyetu kyolonge bhukaxi ka Bibidya. (Ika. 24:16; 1 Ti. 3:9) Kyoso ki tusola o ukexilu wakutusaka anga tuzwela ni akwetu yalungu ni maka enya, twatokala kulembalala yamba o divulu dya Filipe 4:5: “Londekesenu o kutetuluka kwenu ku athu oso.” Se tu kala tu athu a tetuluka, kitwanda thandanganya kyavulu yalungu ni sawidi yetu, kitwanda jijidika we akwetu phala n’abanze mba n’abhange o ima kala ki twabhange etu. Etu twazolo o jiphange jetu, twene mwaxila we, né mwene se kabanze kala ki twamubanza etu.—Lom. 14:10-12.

18. Kyebhi ki tutena kulondekesa o kisakidilu kyetu ku ujitu wa mwenyu?

¹⁸ Tulondekesa o kisakidilu kyetu kwa Jihova, o Fixi ya mwenyu, mukubhanga yoso itutena phala kumusidivila, ni mu kulanga o ujitu wa mwenyu. (Dij. 4:11) Mu kithangana kiki, twanda dibhana hanji ni mauhaxi ni mavuwa. Maji o Mubhangi wetu kamesenene kwila tukala ni mwenyu yú. Kwakambe ngó bhofele, wanda tubhana o mwenyu wakalelaku sé ndolo né kufwa. (Dij. 21:4) Katé kyandabhixila o kithangana kiki, twanda suluka mukusidivila ni kubhana valolo ku mwenyu watubhana o Tata yetu ya dyulu, Jihova!