Ku dyulu, Jezú wadilongo idifwa yamubhangesa kukala phangu yambote mu kukalakala ni akwa, kyoso kyexile mu ixi. Kyebhi kitutena kukatula mbote mu phangu ya Jezú? Mu kudilonga o phangu ya Jezú, tutena kusanga itendelesu itatu itena kutukwatekesa kukalakala kyambote ni akwetu. O itendelesu yiyi yandatukwatekesa kudibhana dingi kyambote ni jiphange jetu.

O mukalakadi wambote ulenduka. Mwene ubhana valolo ku akalakadi ni akwa, kasota kudifumanesa. Jezú wadilongo o ukexilu wakulenduka ni Tat’ê. Sumbala Jihova mwene watokala kumwixana ngó Mubhangi, mwene wamesenene kwila o athu akamukwa ejiye yalungu ni kikalakalu kyakatunda kyabhangele Mon’ê. Tutendela o kidi kiki kyoso Nzambi kyambe : “Tu bhangyenu muthu mu kidifwanganu kyetu.” (Dim. 1:26) Kyoso Jihova kyambe o izwelu yiyi, Jezú wejidile kwila Jihova walenduka kyavulu.—Jisá. 18:35.

Kyoso kyexile we mu ixi walondekesa o kulenduka kuku. Kyoso o athu kyexile ku muximana mukonda kya ima yabhangele, mwene wexile mulungila o kijingu kwa Nzambi. (Mál. 10:17, 18; Nzwá 7:15, 16) Jezú wabhange yoso phala kukale paze mba kutululuka ni maxibulu mê ni kwa talatala kala makama kana kala abhika. (Nzwá 15:15) Mwene katé wa asukula o inama yâ phala kwa alonga o disa dya kulenduka. (Nzwá 13:5, 12-14)  Etu tubhana valolo ku akalakadi ni akwetu mukuta o ibhindamu yâ kupholo dya ibhindamu yetu. Kyoso ‘kala muthu kya xila mukwâ’ kitwanda thandaganya mukutambula fuma mba kijingu mu ima itutena kubhanga.—Loma 12:10.

O muthu walenduka we utendela kwila “bhwala o nzungule ya jindongixi, ndunge joso ji tunda ni kubhanduluka.” (Jisa. 15:22) Kabasa o uhete mba o kwijiya kwala naku o muthu, twatokala kulembalala kwila seku muthu wejiya o ima yoso. Kate mwene Jezú waxikinine kwila sayi ima mwene ka ijidile. (Mat. 24:36) Sumbala o maxibulu mê exile akwa ituxi maji Jezú wexile we mu bhana valolo mu ima yejidile ni mu ixinganeku yâ. (Mat. 16:13-16) Mukonda dya kiki, o maxibulu exile mudivwa kyambote mu kukalakalanê kumoxi! Kyene kimoxi we, kyoso kitulenduka ni kulembalala kwila etu kitwejiya o ima yoso ni kyoso kitwivwa o ixinganeku ya akwetu, kiki kyandabhangesa kwila tukala ni kutululuka ni “kubhanduluka” mukaxi ketu.

Bengebenge o tufunga atokala kukayela o kulenduka wa Jezú kyoso kyakalakala ni akwâ. Ene atokala kulembalala kwila o nzumbi ikôla itena kufunyisa kafunga kosokoso kuzwela kima kyandakwatekesa o kibuka kyoso kya tufunga kubatula maka ni unjimu. Se mu kyônge kya tufunga enoso adivwa kyambote phala kuzwela o ixinganeku yâ, kyanda kwatekesa dingi kubatula o maka ni unjimu, mu kiki o kilunga kyoso kyene kikatula o mbote.

O mukalakadi wambote kabhonzo kudibhana ni akwâ. Mwene utendela, kajiza mukumesena kuma o ima yoso yende kala kya mesena mwene. Mu kidi Jezú wakatula mbote mukutala o phangu yakulenduka ya Tat’ê. Mukifika mwene wamono o henda ya Jihova ya kumutumikisa phala kubhulula o mundu watokalele kufwa mukonda dya kikuma kya kituxi.—Nzwá 3:16.

Jezú wexile mutendela akwâ se kyabhanene. Lembalala kyebhi mwene kya kwatekesa o muhatu mukwa Kanana, sumbala amutumikisele phala kukwatekesa o mundu wa akwa Izalayele. (Mat. 15:22-28) Mwene na, kakexile mukingila ima yavulu kumaxibulumê. Kyoso kamba dyê Phetele kyamuditunu ku pholo dya athu avulu, mwene wexile polondo phala kumuloloka. Ku pholo, mwene wabhana kikalakalu kya dikota kwa Phetele. (Luka 22:32; Nzwá 21:17; Ika. 2:14; 8:14-17; 10:44, 45) O phangu ya Jezú itulonga kwila kitutokala kukala tu athu abhonzo, maji ‘tukalyenu tu athu a tetuluka, athu oso a twijiye nakyu.’—Fil. 4:5.

 Se tukala tu athu atetuluka twandatena kukalakala kyambote ni athu oso oso. Jezú wexile mutalatala kyambote o athu oso, kate mwene ni jinguma jê exile mumutatela kwila wexile “kamba dya akwa kutambula lubhaku ni akua ituxi.” (Mat. 11:19) O kwila etu tutena kukalakala kyambote ni athu kadifu netu mu kukayela o phangu ya Jezú? Phange Louis, wakalakala mivu yavulu ni athu kadifu kala kafunga ka ilunga ni ku Betele wambe: “Eme ngene musokesa o kibuka kya athu kingikalakala nawu ni jiboloko kijisokela phala kutunga o phalelu. Kitena kubhonza kutunga kyambote o phalelu ni jiboloko kijisokela, maji tutena kubhanga kiki mukusokejeka kala boloko mu kididi kyé. Eme ngisota kubhanga yoso phala kudibhana kyambote mukukalakala ni akwetu phala o kikalakalu kyende kyambote.” Yú ukexilu wambote!

Kithangana kyebhi kitwala nakyu phala kulondekesa o kutetuluka mukilunga kyetu? Etu tutena kubhanga kiki kyoso kitutunda ni akwetu mu sidivisu ya kuboka. Tutena kukalakala ni jiphange kijatokala ku mwiji umoxi, abhanga ikalakalu ki ifdifu ni yetu, mba kasokela mukitala. O kwila tutena kubhanga nguzu phala kutendela o athu oso utubhoka nawu mba kukala polondo kate phala kuboka mu ukexilu wa wabhela dingi ene o kuboka?

O mukalakadi wambote wala polondo phala “kubhana.” (1 Tim. 6:18) Kyoso kyexile mu kalakala kumbandu ya Tat’ê, Jezú watena kumona kwila Jihova kexile kumuswekela kima. Kyoso Jihova kya kexile mu “polondala maúlu,” Jezú wakexile “bhobho” yu wadilongo ni mwene. (Jisa. 8:27) Ku pholo, Jezú wasangulukile mukulonga o maxibulu mê o“ ima yoso yevu mwene’ kwa Tat’ê. (Nzwá 15:15) Ni phangu yiyi, etu we twatokala kukala polondo phala kulonga o ima itwejiya ku akwetu utwamukalakala nawu. Mukidi o mukalakadi wambote kandasota kwijiya yamubhanga akwâ ola joso mukwatangela yabhingi kwijiya mba ihi itena kwa akwatekesa. Mwene usanguluka mukulonga akwa o ima yejiya.

Etu we tutena kuswinisa o akalakadi ni akwetu ni izwelu yambote. O kwila eye kiweji sanguluka se kukala muthu ukuximana mukonda dya nguzu i ubhanga phala kubhanga kima? Jezú wakatula kithangana phala kuximana yó akexile mukalakalanê mu ima yambote yexile mu mona kwa ene. (Sokesa ni Matesu 25:19-23; Luka 10:17-20) Mwene wa atangela kwila ene eji “bhanga [ikalakalu] . . . ya tundu” o ikalakalu ya Jezú ndenge. (Nzwá 14:12) M’usuku andi dya kufwa, mwene waximana o maxibulu mê mu kwa ambela: “En’wenu mwa xala ni eme mu kuxikamena o jiphaxi jami.” (Luka 22:28) Xinganeka kyebhi o izwelu yiyi kiya aswinisa ni kyebhi kiya afunyisa! Se tukatula kithangana phala kuximana yó utukalakala nawu kumoxi, se phata ene andasanguluka kyavulu nange atena kubhanga dingi.

Phange amwixana Kayode wambe kwila “o mukalakadi wambote kabhingi kukala muthu wayuka. Maji mwene ubhangesa akwa kusanguluka ni kwabhangesa kukalakala kyambote.” O kwila eye umukalakadi wakidifwa kiki? Nange eye utena kwibhwidisa kwa akwenu phala kwijiya se ihi ibanza ene yalungu ni ukexilu wé wakukalakala ni akwenu? Se ene asanguluka mu kukalakala neye, kala o maxibulu a Jezú kyasangulukile mukukalakala ni mwene, eye utena kuzwela kala kyambe poxolo Phawulu: “Twala tu akwatekexi a ngalasa yenu.”—2 Kol. 1:24.