1, 2. Mukonda diahi sai jitata a thandanganha kioso o tuana, a mesena kudibhakula kua Jihova?

MIVU ioso, mazunda a maxibulu a Bibidia ene mu di bhakula kua Jihova, ni ku a batizala. Avulu mudiâ, minzangala ala ni jitata Jimbangi ja Jihova, ia a solo o ukexilu ua muenhu ua beta-o-kota. (Jisálamu 1:1-3) Se u tata u Mbangi ia Jihova, nange u kingila ni hanji ioso o kizuua kia-nda batizala mon’é.—Sokesa ni 3 Nzuá 4.

² Maji né kiki, nange u thandanganha. Nange eie uene mu mona minzangala iavulu ene mu a batizala, maji mu ku bhita thembu a mateka kukala ni jiphata se a bhingile muene ku kaiela o itumu ia Nzambi mba kana. A ka mukuá a xisa muene o kilunga kia Nzambi. Mu kiki, nange u kala ni hele ia kuila, o mon’é u mateka kusidivila Jihova, maji mu kubhita kithangana, u bhuila mu nzumbi. Muene nange u kala kála o Jikidistá akua Efezo ku hama ia dianga. Jezú uambe ia lungu  ni ene, uixi: “O henda ié i uandekele na-iu ua i xi.” (Dijingunuinu 2:4) Kiebhi ki u tena ku kuatekesa o tuana kukolesa o henda iâ, ni a ‘kole muenhu, n’a kule?’ (1 Phetele 2:2) Tu tena ku katula mbote iavulu mu phangu ia Timote.

3. (a) Kiebhi Timote kia kituka Kidistá? Ihi ia bhange ni ima ia dilongo? (b) Ima iebhi itatu iambe Phaulu ia lungu ni Timote?

³ Poxolo Phaulu ua dianga ku kunda o mbonge ia Listra mu muvu ua 47. Nange Timote uexile mu kitala kia kikumbi. Mu kitala kiki, muene ua kexile kiá mu dilonga o milongi ia Jezú. Timote ua kaiela ioso ia dilongo, mu ku bhita mivu iiadi ua mateka kuboka ni poxolo Phaulu. Mu ku bhita 16 dia mivu, Phaulu ua mu sonekena uixi: ‘Xikana mu ima ioso i ua di longa jinga, i ua mono ia kidi. Kuma ene uâ, o jimesene jé mu kuxikana, a ku longoio, ua a tongolola. Mukonda eie-muène tundé undenge uejiia Mikanda Ikôla [Mikanda ia Hebalaiku] i tena ku ku ijidisa o kubhuluka, mu kuxikan’oko kuene mua Kristu Jezú.’ (2 Timote 3:14, 15) Phaulu uambe kuila, Timote (1) uejidile o mikanda Ikola, (2) ioso ia dilongo muene ua i mono kuila iexile o kidi, ni (3) uexile ni unjimu u bhekela o kubhuluka bhu kaxi ka kuxikina Jezú Kristu.

4. Kiebhi ki uene mu longa o tuana tué? (Tala o foto ia dianga.)

⁴ Se u Mbangi ia Jihova, uala ni tuana, eie ua mesena kuila ene ejiia o mikanda ikola, kifua o mikanda ia Hebalaiku ni ia Ngeleku. Né muene an’a ndenge, ene a tena ku dilonga ia lungu ni misoso ia Bibidia. O kilunga kia Jihova kibhana madivulu avulu, ni jividiu ji kuatekesa o jitata kulonga o tuana tuâ. O kuila o ji falamenda jiji, jala kiá mu dimi diê? O tuana a bhingi kuijiia o Bibidia n’a kale ni ukamba uambote ni Jihova.

5. Kiebhi Timote kia mono kuila, o njimbu iambote ia lungu ni Kristu iexile kidi?

⁵ Ki ku bhingi ngó kulonga o tuana ia lungu ni athu ni izulukutu io soneke mu Bibidia. Lembalala kuila, Timote ua mono ue kuma, o ima iexile mu dilonga iexile ia kidi. Timote ua dilongele o Mikanda ia Hebalaiku, “tundé undenge.” Mu kubhita mivu, muene ua mono ni kidi kioso kuila, Jezú uexile muene o Mexiia. Timote uexile ni kixikanu kia kolo, mukonda dia kiki, a mu batizala, anga u mateka kukalakala kumoxi ni poxolo Phaulu kala aboki a jixi jengi.

6. Kiebhi ki mu tena ku kuatekesa o tuana tuenu kuxikina o Mak’â Nzambi?

⁶ Kiebhi ki u tena kulonga o tuana tué kukala ni kixikanu kia difu ni kia Timote, phala a tene kumona kuila, o ima ia mu dilonga ia kidi? Kia dianga, kala ni muanhu. Kubhinga kithangana kiavulu phala kukala ni kixikanu kia kolo. Kuma eie u xikina kima, ki kilombolola kuila, o tuana a-nda xikina ue. Kala mon’a ua bhingi kuijiia o ‘kutungula jinga o ima ioso’ phala kuxikina o milongi ia Bibidia. (Tanga 1 Tesalonika 5:21.) Kuma u tata, ua bhingi kubhanga ioso i u tena  phala kukuatekesa o tuana tué kukolesa o kixikanu kiâ, benge-benge kioso kia kala ni ibhuidisu. Tu mone ihi i tu tena kudilonga ku phangu ia phang’ietu.

7, 8. (a) Kiebhi phange Tomaji kiene mu londekesa muanhu kioso kia longa mon’ê? (b) Kithangana kiahi ki ua tokala kulondekesa muanhu kua mon’é?

⁷ Tomaji, uala ni mon’a muhatu uala ni 11 kia mivu, uambe: “Sai bhabha, mon’ami u ng’ibhuidisa, ‘O kuila Jihova ua bhangesa o ima kumoneka ngó?’ Mba ‘mukonda diahi ki tuene mu di ta mu maka a jinguvulu, phala ku iudika o ima mu ngongo?’ Ngi bhanga ioso phala ku mu kuatekesa bhu kaxi ka Mak’â Nzambi. Maji ngi lembalala kuila, phala o mona kukala ni kixikanu kia kolo, ki ngi tokala ku mu tangela ima iavulu mu kithangana kimoxi. Mu veji dia kiki, nga tokala ku mu longa o ima bhofele-bhofele.”

⁸ Tomaji uejiia ue kuila, muene ua bhingi kukala ni muanhu phala kulonga mon’ê. Mu kidi, Jikidistá joso, a bhingi kukala ni muanhu. (Kolose 3:12) Tomaji ua mono kuila, kubhinga kithangana kiavulu ni kudizuelesa kiambote, phala kukuatekesa mon’ê kuxikina o ima ia Bibidia ubheka. Muene ua bhingi kutongolola kiambote ni mon’ê ia lungu ni ima iene mu dilonga mu Bibidia. Tomaji uambe: “Benge-benge mu ima ia beta-o-kota, eme ni muhatu’ami, tu bhanga ioso phala kuijiia se mon’etu u xikina o ima iene mu dilonga. Tu bhanga ioso phala kuijiia ue se muene u mona kuila, kukumbidila o itumu ia Bibidia kua-nda mu kuatekesa kukala ni muenhu uambote. Se muene uala ni ibhuidisu, kima kiambote. Mu kidi, se o mon’a u xikina ngó sé kubhanga kibhuidisu, eme ngi thandanganha.”

9. Kiebhi ki u tena kukuatekesa mon’é kukolesa o kixikinu kiê ku Mak’â Nzambi?

⁹ Kioso o jitata kia longa o tuana ni muanhu, mu kubhita kithangana, o tuana tua-nda mateka kutendela o “kukula, ni kulébha, ni kuzonga,” kua Mak’â Nzambi. (Efezo 3:18) Sota ku a longa milongi ia bhebhuluka phala o tuana tua kitala kiâ, n’a tendela kiambote. Kioso ene kiaia ni kudilonga, ni kukala ni kixikanu kia kolo, ki kua-nda ku a bhonza kuzokela o kixikanu kiâ mu xikola. (1 Phetele 3:15) Mu kifika, o kuila o tuana tué a tena kujimbulula bhu kaxi ka Bibidia, se ihi i bhita kioso muthu kia fua? O kuila ene a xikina mu milongi ia Bibidia ia lungu ni maka enhá? * (Tala ku luiji.) Lembalala kuila, phala ku kuatekesa mon’é kuxikina mu milongi ia Bibidia, eie ua tokala kukala ni muanhu. Kubhanga kiki, kua-nda kubhekela mabesá avulu.—Matendelelu 6:6, 7.

10. Ihi i ua tokala o kubhanga phala ku kuatekesa o tuana kukala ni kixikanu kia kolo?

¹⁰ Maji phala ku kuatekesa o tuana tué kukala ni kixikanu kia kolo, o kima kia  beta-o-kota, o kubhana phangu iambote. Stephanie, uala ni tuana tu tatu tua ahatu, uambe: “Kuma o tuana tuami ka kulu luua, ngene mu dibhuidisa: ‘O kuila ngene mu zuela ni tuana tuami, se mukonda diahi ngi xikina kuila, kuene Jihova? Ngene mu a tangela kuila Jihova ua tu zolo, ni kuila o itumu iê phala o mbote ietu? O kuila an’ami a xikina muene kuma eme nga zolo Jihova ni muxima uami uoso?’ Se ki ngi kala ni kixikanu kia kolo, an’ami ka-nda kala uâ ni kixikanu kia kolo.”

11, 12. O unjimu ulombolola ihi? Kiebhi muthu kia tena kulondekesa kuila ua kulu kiá?

¹¹ Tua mono kiá ima iiadi ia lungu ni Timote, (1) muene uejidile kiambote o Mikanda Ikôla, (2) o ima ia dilongele, ua i xikina kuila iexile ia kidi. Maji ihi ia mesenene kuzuela Phaulu kioso kiambe kuila, o mikanda ikôla ieji kuatekesa Timote kukala ‘njimu phala kubhuluka?’

¹² O divulu Estudo Perspicaz das Escrituras, Volume 3 di zuela kuila, o unjimu ulombolola “kukumbidila kiambote o ima i tuene mu dilonga. O kukalakala ni kuijiia ku tuala na-ku phala ku tu kuatekesa kubatula maka, ni kusola ima ia tokala ku muenhu uetu. O unjimu ki u difu ni uôua.” O Bibidia iamba kuila, “uôua ua nhenganana ku muxima ua mona-ndenge.” (Jisabhu 22:15) Kioso muthu kia kala njimu, u londekesa kuila, muene ua kulu kiá. Mu kiki, u kala ni uôma ua kuluualesa Jihova. Muene u kala ue ni vondadi ia ku mu belesela, mukonda ua mu zolo.—Tanga Jisálamu 111:10.

13. Kiebhi o minzangala kia tena kulondekesa unjimu phala kubhuluka?

¹³ Minzangala a kulu mu nzumbi, ala ni kilunji. Mu kiki, ka xikina dingi kua ‘takujula ku mabhuku, ni ku a xinjika kuala o kitembu kia ulongelu uengi,’ mukonda dia jihânji jâ mba ijijidiku ia minzangala ni akuâ. (Efezo 4:14) Mu veji dia kiki, “kilunji” kiâ a ki sungu kiá phala “kutungula kioso kiauabha, mu kiki kiaiibha.” (Jihebeleu 5:14) Mu kiki, ene a sola ima ia tokala, né muene kioso kiala ubheka. (Filipe 2:12) Kubhinga kukala ni unjimu iú phala kubhuluka. (Tanga Jisabhu 24:14.) Kiebhi ki u tena kukuatekesa o tuana tué kukala ni unjimu iú? Eie ua tokala kua londekesa kiambote se ima iahi i u xikina. Bhu kaxi ka ima i u zuela ni i u bhanga, ene a-nda mona kuila, eie ua mu bhanga ioso phala kukumbidila o itumu ia Bibidia ku muenhu ué.—Loma 2:21-23.

14, 15. (a) Ibhuidisu iebhi ia tokala kubhanga o munzangala ua mesena o ku mu batizala? (b) Kiebhi ki u tena kukuatekesa mon’é kuxinganeka mu mabesá ejila mu kubelesela o itumu ia Nzambi?

¹⁴ Phala ku kuatekesa o mon’a, ku kala ni kixikanu kia kolo, ku mu tangela ngó kia uabha ni kiaiibha, ki ki soko. Kua bhingi ue u mu kuatesa ku xinganeka mu ibhuidisu kala iii: ‘Mukonda diahi o Bibidia i fidisa  ima i tu mona kala ima iambote? Kiebhi ki ngi tena kuijiia kuila o ijila ia Bibidia, mu ithangana ioso, phala o mbote iami?’—Izaia 48:17, 18.

¹⁵ Se mon’é ua mesena ku mu batizala, mu kuatekese ku xinganeka kuila, ku kala Mbangi ia Jihova ki kima kia ku tonoka. Kiebhi kia divua ia lungu ni ujitu iú? Mbote iahi i bhekela? Ibhidi iebhi i bhekela? Mukonda diahi o mabesá a kukala Kidistá a mu batizala, a tundu o ibhidi? (Marku 10:29, 30) Kima kiambote kuxinganeka mu ibhuidisu iii ande dia ku mu batizala. Kuatekesa mon’é kuxinganeka mu mabesá ejila mukonda dia kubelesela, ni mu ibhidi ejila mukonda dia kubhukumuka. Mu suluka, muene ua-nda tena kuxikina kuila, o ku kaiela o milongi ia Bibidia ithangana ioso, kua-nda beta kota ku mu sangulukisa.—Matendelelu 30:19, 20.

16. Ihi ia tokala kubhanga o jitata se o tuana tuâ, a mateka kuzoza mu nzumbi?

¹⁶ Abha se mon’é a mu batizala, mu ku bhita thembu u mateka kukala ni jiphata ja lungu ni kidi kia Bibidia? Mu kifika, nange u mateka kuzola o ima ia mundu. Mba nange u kala ni phata se ua bhingi muene  kukaiela o ilongesu ia Bibidia ku muenhu uê mba kana. (Jisálamu 73:1-3, 12, 13) Kuma u tata, o ukexilu ué ua kudibhana ni maka iá, u tena kubhangesa mon’ê kusuluka mu kusidivila Jihova mba kana. Ki kale se muene mon’a ndenge hanji mba ua kulu kiá, kana kuzoka né. Mu veji dia kiki, mu londekese kuila, eie ua mu zolo, ni kuila ua mesena ku mu kuatekesa.

17, 18. Kiebhi o jitata kia tena kukuatekesa munzangala uala ni ji phata?

¹⁷ O munzangala a mu batizala, ua dibhakula kua Jihova. Kioso kia dibhakula, ua kanena kuzola ni ku sidivila ngó Nzambi. (Tanga Marku 12:30.) Jihova u bhana valolo ia dikota mu kudibhakula kuetu. Etu tua tokala ue kumona o kudibhakula kuetu kala muene. (Ndongixi 5:4, 5) Lembalesa o ima iii kua mon’é. Kia dianga, dilonge kiambote o milongi ioso i bhana o kilunga kia Jihova phala o jitata. Mu kusuluka, sota o kithangana kia tokala, phala ni henda ioso ku mu jimbuluila kuila, o ku dibhakula kuê kua Jihova, ni batizu, kima kia dikota, kua-nda mu bhekela mabesá avulu.

¹⁸ Mu kifika, eie u tena kusanga milongi iambote mu kibandekesu kiala mu divulu Os Jovens Perguntam​—Respostas Práticas, Volume 1, ni diambu “Os pais perguntam.” O mbandu iii, i tena ku kuatekesa o jitata phala ka banze kuila, o tuana tuâ a mu dituna o kidi kia Bibidia, maji kusota kuijiia se maka-hi a mu dibhana nau. Nange muene uala kiki mukonda dia kijijidiku kia jikoleka jê mba mukonda dia kudivua ubheka. Mba nange mon’ê ua mu divua kuila, o minzangala ia mukuá, a mu bhanga dingi mu sidivisu ia Jihova muene ndenge. O mbandu ienioió ia divulu, i jimbulula ue kuila o maka a mu bhita nau mon’ê, ka lombolola kuila, muene ka xikina dingi mu ima i mua mu longo. Mu kidi, ene a bhita ni ibhidi ku muenhu, ia bhonzesa kukolokota mu kixikanu kiâ. Mu kusuluka o divulu di bhana jindunge ji kuatekesa o jitata, ala ni mon’a uala ni jiphata ja lungu ni kixikanu kiê.

19. Kiebhi o jitata kia tena kukuatekesa o tuana tuâ ku kala ‘jinjimu n’a bhuluke?’

¹⁹ Jitata, enu muala ni kikalakalu ni ujitu ua dikota ua ku sasa an’enu, mu ‘ku a longa kioso kia tumu Jihova.’ (Efezo 6:4) Kala ki tua dilongo kiá, kiki kilombolola kuila, eie ua tokala ku longa tuana tuê o milongi ia Jihova, ni ku a kuatekesa ku xikina mu milongi ia dilonga. Kioso o kixikanu kiâ ki kiia ni ku kola dingi, ene a-nda dibhakula kua Jihova, ni ku bhanga ioso ia tena. Ehela o Maka a Nzambi, o nzumbi ikola, ni nguzu i u bhanga, ku kuatekesa o tuana tuê ku kala ni ‘unjimu u bhekela o kubhuluka.’