1-3. (a) Ihi i tua tokala kubandekesa mu ima i tu xikina? (b) Mukonda diahi o difukunukinu kima kiala ni valolo ia dikota? (Tala o foto ia dianga.)

SE MUTHU u kuibhuidisa: Ima iebhi i u xikina? Kiebhi ki ueji mu tambuijila? Mu kidi, eie ueji zuela kuila, u xikina kuma Jihova muéne o Mubhangi uetu, muéne ue ua tu bhana o muenhu. Nange ueji mu tangela kuila, u xikina Jezú Kristu ió uafu phala ku tu kula. Sé phata, ueji mu jimbuluila ue ia lungu ni Palaízu mu ixi mu tua-nda kala ku hádia ni hádia. Maji o kuila, ueji mu tangela ue ia lungu ni difukunukinu kala kima ki u dielela ni nguzu ioso?

² Né muene se tua mu kingila kubhuluka ku hadi ia dikota ni kutunga mu ixi ku hádia ni hádia, kima kiambote kuia ni kukolesa o kixikanu kietu ku difukunukinu. Poxolo Phaulu ua londekesa mukonda diahi o difukunukinu diala ni valolo ia dikota, kioso kiambe: “O ki kala ki kuene kufukunuka mu’alunga, ni Kristu ue ka fukunuka.” Se Jezu ka fukunuka, muene ka mu tumina ku diulu, mu kiki-phe, o kuboka kuetu ki kueji kala ni valolo. (Tanga 1 Kolindo 15:12-19.) Maji, etu  enioso tuejiia kuila, Jezú a mu fukununa. Kuma tu xikina o difukunukinu didi, ki tu difu ni Jijudé exile Jisaduseu, ka xikinine kuila, o athu afu a tena kuvutuka ku muenhu. Né muene kioso kia tu sebhulula, o kixikanu kietu kia kuila, Nzambi u tena kufukununa o athu afu ki kola dingi.—Marku 12:18; Ikalakalu 4:2, 3; 17:32; 23:6-8.

³ Phaulu uambe kuila, o milongi ia lungu ni “kufukunuka” kua madifundu i bhanga mbandu mu “maka ma Kristu.” (Jihebeleu 6:1, 2) Phaulu ua londekesa kuila, ua kexile ni kixikanu kia dikota ku difukunukinu. (Ikalakalu 24:10, 15, 24, 25) Sumbala o milongi íii i bhanga mbandu ku ima i tua diangele kudilonga mu Mak’â Nzambi, tua tokala kutokuesa kiambote o maka enhá. (Jihebeleu 5:12) Mukonda diahi?

4. Ihi i tua tokala ku dibhuidisa ia lungu ni difukunukinu?

⁴ Kioso o athu kia mateka kudilonga o Bibidia, a dilonga o misoso ia lungu ni difukunukinu, kala o musoso ua Lázalu. Ene a dilonga ue kuila, Mbalahamu, Jobe ni Daniiele a dielele kuila ku hádia o athu a ka fukunuka. Kienhiki, kiebhi ki ueji tambuijila se muthu u ku bhinga phala ku mu jimbuluila, se mukonda diahi tua tokala ku dielela mu kikanenu kia difukunukinu, kio bhange ku mivu iavulu ku dima? O difukunukinu dia-nda bhita thembu kuxi? O itambuijilu ia ibhuidisu íii, ia-nda kolesa o kixikanu kietu.

5. Ihi i tua-nda dilonga kindala?

⁵ Sai athu a a fukununa, mu kubhita ngó tu izuua mba ithangana tundé kia fuile. (Nzuá 11:11; Ikalakalu 20:9, 10) Maji o kuila tu tena kuxikina mu kikanenu kia bhange Nzambi m’ukulu kia kufukununa o athu? O Bibidia i zuela ia lungu ni kikanenu kia difukunukinu dia bhiti mivu iavulu phala kudikumbidila. Tuejiia kuila eie u xikina kuma o muthu a mu kanene ua fukunuka. Muthu uebhi ua fukunuka, ni kiebhi o difukunukinu didi di suinisa o kixikanu kié?

6. Kiebhi o divulu dia Jisálamu 118 dia dikumbidila mua Jezú?

⁶ Tua-nda zuela ia lungu ni difukunukinu dimoxi a di kanene mu mivu iavulu kudima. Mu divulu dia Jisálamu 118, tu sanga mu o izuelu íii: “Jihova, tua ku diondo, tu bhane kiá o kubhanduluka, . . . A tane-ku ió uoso uiza mu dijina dia Jihova.” Nange Davidi muéne ua soneka o izuelu iii. Kioso Jezú kia bhixila mu Jeluzaleme mu kizuua kia 9 mu mbeji ia Nisã, o athu a tumbula o kikanenu kiki kia lungu ni Mexiia. (Jisálamu 118:25, 26; Matesu 21:7-9) Maji kiebhi o Jisálamu 118 ia tumbula o difukunukinu dieji bhita ku mivu iavulu ku pholo? O divulu dia Jisalamu di zuela ue: ‘O ditadi dia ditunu jimesene ja kutunga, dia di bhange diene o ditadi dia beta kota.’—Jisálamu 118:22.

7. Kiebhi o Jijudé kia ditunu Jezú?

⁷ O “jimesene ja kutunga” a ditunu o Mexiia, o atuameni a Jijudé. Ene ka ditunu ngó kuila Jezú muéne uexile Kristu. Ene ue a tumina Pilatu ku mu jibha. (Luka 23:18-23) Ene muene a bhingi phala kujibha Jezú.

8. Kiebhi Jezú kia di bhange ‘ditadi dia beta-o-kota dia kuatesa bhu thungi?’

 ⁸ Se Jezú ka mu xikinine, a mu jibha, kiebhi kia kituka ‘o mútue mba ditadi dia beta-o-kota di kuatesa bhu thungi?’ Kiki kieji bhita ngó se muene a mu fukunuine. Jezú ua zuela ia lungu ni maka iá, kioso kia te o kifika kia ngana ia díbhia ua tumikisa o abhika exile mu kalakala né. O idimakaji ia talatala kiaiibha o abhika a ngana. Mu ku bhita thembu, o ngana ia díbhia ua tumikisa mon’ê, phala kumona se o idimakaji a muivua. Maji ene a jibha o mon’a ngana. Kioso kia zubha ku zuela o kifika, Jezú ua tumbula o kikanenu kiala mu divulu dia Jisálamu 118:22. (Luka 20:9-17) O poxolo Phetele ua tumbula o velusu iii, kioso kia zuela ku akua Judá ‘afundixi, ni adiakime ku mundu, ni jimesene ja kexile mu longa o Kitumu.’ Muene ua zuela ia lungu ni ‘Jezú Kristu dia Nazalé, a mu jibhile ku taka, Nzambi anga u mu fukununa ku’alunga.’ Muene uambe ue: ‘Muen’ió Jezú, a mu tange kuala o Madivulu ma Ngana, kuila: Muène o ditadi dia beta-o-kota mua tende enu mu jimesene, diene di kuatesa bhu thungi.’—Ikalakalu 3:15; 4:5-11; 1 Phetele 2:5-7.

9. Kala kia kanena o divulu dia Jisálamu 118:22, ihi ieji bhita ni Mexiia?

⁹ Mu kidi, o kizuelu kiala mu divulu dia Jisálamu 118:22 kia kanene difukunukinu dieji bhita mivu iavulu ku pholo. O Mexiia keji mu xikina, eji mu jibha. Maji ueji fukunuka, iú ueji kituka o ditadi dia kuatesa bhu thungi. Mu kiki, o Bibidia iamba: ‘Bhu’axaxe k’athu, kana-bhu, dingi dijina diéngi dia bhana-bhu, dia tokala di kala dijina dia ku tu bhulula.’ Kiki kia bhiti kioso Jezú kia fukunuka.—Ikalakalu 4:12; Efezo 1:20.

10. (a) Ihi ia kanena o divulu dia Jisálamu 16:10? (b) Kiebhi ki tuejiia kuila, o divulu dia Jisálamu 16:10 ki dia di kumbidila kua Davidi?

¹⁰ Tu mone velusu iengi i zuela ia lungu ni difukunukinu. O izuelu íii ia di kumbidila kioso kia bhiti midi ia mivu ndenge. O kizulukutu kiki, ki tena ku tu bhana kidielelu kia kuila, o difukunukinu di tena kubhita mivu iavulu tundé kia di kanene. Mu divulu dia Jisálamu 16, Davidi uambe: “Kuma eie ku xikina kuehela muenhu uami ku’alunga; muthu ué ua mu solo kà kala mu sekumuka.” (Jisálamu 16:10) Davidi kexile mu zuela kuila, muene keji fua. O Mak’â Nzambi amba kuila, Davidi  ua kuka, uafu ni kuila, a ‘mu funda mu mbonge iê.’ (1 Jisobha 2:1, 10) Mu kiki, nanhi a mu tumbula mu velusu íii?

11. Thembu kuxi ia jimbulula Phetele o divulu dia Jisálamu 16:10?

¹¹ Kioso kia bhiti midi ia mivu ndenge, tundé Davidi kia soneka o izuelu íii, Phetele ua jimbulula se o izuelu ia Jisálamu 16:10 ia di kumbidila kua nanhi. Kioso kia bhiti tu semana tundé Jezú kia fukunuka, Phetele ua zuela ni Jijudé ni athu a jixi jengi. (Tanga Ikalakalu 2:29-32.) Muene ua a lembalesa kuila, Davidi uafu, ia a mu fundu. O Bibidia i londekesa kuila, athu oso a xikinine Phetele kioso kia zuela kuila, Davidi ua “mono m’okulu munhá, ua tange o kufukunuka kua” Mexiia.

12. Kiebhi o divulu dia Jisálamu 16:10 kia dikumbidila? Kiebhi o kikumbidilu kiki ki kolesa dingi o kikanenu kia difukunukinu?

¹² Phetele ua tumbula o izuelu ia Davidi iala mu divulu dia Jisálamu 110:1, phala kukuatekesa o jingivuidi jê kutendela o maka a lungu ni difukunukinu dia Jezú. (Tanga Ikalakalu 2:33-36.) Muene ua bhange kiki mu kutongolola ni athu bhu kaxi ka Mikanda Ikola, phala kukuatekesa o mundu kuijiia kuila, Jezú “muène Ngana, muène Kristu.” O athu a mono kuila, o divulu dia Jisálamu 16:10, dia di kumbidila kioso Jezú kia fukunuka mu’alunga. Mu kubhita mivu, o poxolo Phaulu ua zuela ue o maka iá kioso kia zuela ni Jijudé mu mbanza ia Andiioka, mu ixi ia Pizidia. O izuelu ia Phaulu ia a bhangesa kuxikina, iá a mesenene kuijiia dingi. (Tanga Ikalakalu 13:32-37, 42.) O ikanenu íii i londekesa kuila, kioso Nzambi kia kanena kufukununa o madifundu, muene u bhanga kiki, né muene se kubhita mivu iavulu.

13. Ihi i tu tena kudibhuidisa ia lungu ni difukunukinu?

¹³ Ki tululukisa muxima kuijiia kuila o muthu a tena ku mu fukununa né muene se ku bhita mivu iavulu. Né kiki, sai athu ebhuidisa: ‘Nga bhingi kukingila hanji thembu iavulu phala kumona dingi o jindandu jami jafú kiá? O difukunukinu dia-nda bhita thembu kuxi?’ Jezú uambela maxibulu mê kuila, sai ima keji tena ku i tendela. Muene uambe dingi: “Enu ka mi bhana-kiu, o kuijiia jithembu ni kizuua kia xindi Tata mu kutena kuê-muène.” (Ikalakalu 1:6, 7; Nzuá 16:12) Maji, sai ima i tuejiia kiá ia lungu ni kithangana kia-nda bhita o difukunukinu.

14. Kiebhi o difukunukinu dia Jezú ki di difu ni madifukunukinu a mukuá?

¹⁴ O difukunukinu dia beta kota dio soneke mu Bibidia, o difukunukinu dia Jezú. Se muene ka mu fukunuine, ki tueji kala ni kidielelu kia kumona dingi o jindandu jetu ja kazola jafú kiá. O athu a a fukununa ande dia Jezú, kala io a a fukunuine kuala Elija ni Ilizeu ka tambuile muenhu ua kalelaku kana. Ene afu dingi, ia a kituka mavu mu mbila. Maji ‘Kristu kia zubha kufukunuka mu’alunga, kanda kufua dingi. Mukonda kalunga ki ka tena dingi ku mu tolola muène.’—Loma 6:9; Dijingunuinu 1:5, 18; Kolose 1:18; 1 Phetele 3:18.

15. Mukonda diahi Jezú a mu ixana “ngunji?”

¹⁵ Jezú muéne a tuamenene ku mu fukununa phala ku kala muthu mu nzumbi ku  diulu. Mukonda dia kiki, a mu ixana “ngunji.” (Ikalakalu 26:23) Maji, ki muene ngó a mu fukununa phala kuia ku diulu. Jezú ua kanene ku maxibulu mê a fiiele kuila eji tumina né kudiulu. (Luka 22:28-30) Maji ene eji tambula ngó o kikóue kiki, kioso kia-nda kuila afu. Kioso kia fua, ene a ka fukunuka kiá ni mukutu mu nzumbi, kala kia bhiti ni Jezú. Phaulu ua soneka kuila, “Kristu ua fukunuka muene mu’alunga ni kidi, iú ua di bange ngunji ia tu dielelesa kuila athu oso afu kiá hadia ue a kà fukunuka.” Phaulu uambe kuila kuexile dingi athu engi eji kua fukununa ue phala kuia ku diulu. Muene uambe: “Ene oso mu umoxi-umoxi: Kristu muene ua diangela kua ene oso, hé kukaiela oso akua Kristu, muène hinu kià kèza.”—1 Kolindo 15:20, 23.

16. Ihi i tu londekesa se thembu kuxi ieji mateka o difukunukinu dia athu a-nda ia ku diulu?

¹⁶ O izuelu ia Phaulu i tu kuatekesa kuijiia o thembu ieji mateka o difukunukinu phala kuia ku diulu. Kiki, kieji bhita mu kithangana kia ku tukuluka kua Kristu. Mu mivu iavulu, bhu kaxi ka Bibidia o Jimbangi ja Jihova ene mu londekesa ku athu kuila, o ku tukuluka kua Kristu kua mateka mu muvu ua 1914. Etu tuala hanji mu kithangana kia ku tukuluka kuê, ni kuila o dizubhilu dia mundu iú uaiibha dia zukama.

17, 18. Ihi ia-nda bhita ni Jikidistá a undu a-nda kala ku muenhu mu kithangana kia hadi ia dikota?

¹⁷ O Bibidia i jimbulula dingi ia lungu ni difukunukinu phala kuia ku diulu: ‘Ki mu kambe kuijiia kikexilu kia ió oso aia ku kilu . . . Kuma etu tua xikana kuila Jezú ua fuile iú ua fukunuka. Kiene ue kimoxi oso afu . . . Etu oso tuala ku muenhu, oso tua xala-ku katé bhu kizuua bhua kejila Ngana, ki tu di fike kuila tua kà tuamenena akuetu aia ku kilu. Kuma Ngana muene ua kà tuluka ku diulu, ni kutesa nzongo, . . . Bheniobho o madifundu a fila mu kuxikana Kristu, ene a kà dianga kufukunuka. O kia kà zubha o kufukunuka, ni etu tuala ku muenhu, tua xala-ku, tua kà zangumuka kumoxi ni ène ku matuta, phala kutakana ni Ngana mu dimbiza. Kieniókio tuà kalela-ku kiá kumoxi ni Ngana.’—1 Tesalonika 4:13-17.

¹⁸ Kioso kia mateka o ku tukuluka kua Kristu, mu muvu ua 1914, ki kua bhiti ithangana iavulu, o difukunukinu dia ió a-nda ia ku diulu dia mateka. O Jikidistá a undu a-nda kala ku muenhu mu kithangana kia hadi ia dikota, a ‘kà a zangumuna ku matuta.’ (Matesu 24:31) Ihi i lombolola o izuelu iii? Oso a ka a zangumuna, ‘ka ka fua’ dingi. Kiki ki lombolola kuila, ene kanda kala ithangana iavulu mua lunga. Mu veji dia kiki, kioso kia fua, ‘ene a kituka kiengi, mu kithangana kia kuila o diesu pote, kioso hádia ki xika o koloneta ia sukidila-ku.’—1 Kolindo 15:51, 52.

19. Diebhi o difukunukinu dia beta-o-kota?

¹⁹ Mu izuua ia lelu, Jikidistá javulu dingi, ka a solo phala ku ia ku diulu, phala ku tumina ni Kristu. Mu veji dia kiki, ene a kingila “o Kizuua kia Ngana” kioso kia-nda buika o mundu iú uaiibha. Sé-ku muthu uejiia o kithangana kia-nda kuiza o dizubhilu didi, maji o izulukutu ia mu londekesa kuila dia zukama muene. (1 Tesalonika 5:1-3) Kioso o mundu ua ubhe  ua Nzambi ki ua-nda kuila ua bhixila, kua-nda bhita difukunukinu dia mukuá. Mu thembu ienioió, o athu a ka fukunuka phala kutunga mu ixi. Ene a-nda kala ni kidielelu kia ku kala ku muenhu sé dingi ku fua. O difukunukinu didi, dia beta-o-kota, mukonda iá, ka-nda fua dingi kala kiafu ió a a fukunuine mu ukulu.—Jihebeleu 11:35.

20. Mukonda diahi tu tena kudielela kuila, o difukunukinu dia-nda bhita sé kavuanza?

²⁰ O Bibidia iamba kuila, oso a-nda ia ku diulu a a fukununa “ene oso mu umoxi-umoxi.” (1 Kolindo 15:23) Mu kiki-phe, tu tena ku dielela kuila, o difukunukinu mu ixi ki dia-nda bhita ni kavuanza kana. Kiki ki tena ku tu bhangesa kuibhuidisa: O kuila oso a mu fua mu izuua ia lelu, ene a-nda dianga kua fukununa, ku dimatekenu dia Midi ia Mivu dia Utuminu ua Kristu? O kuila ene a-nda kua tambulula ku jindandu jâ? O kuila o jiselevende ja Jihova, exile ni mauhete avulu, ene a-nda dianga kua fukununa phala kukuatekesa o mundu ua Nzambi? Ihi ia-nda bhita ni athu a kambe ku sidivila Jihova? Kuebhi ni kithangana kiebhi kia-nda kua fukununa? Ibhuidisu iavulu i tena kumoneka ia lungu ni difukunukinu. Maji ki tu tokala ku lalamana ni ibhuidisu iii kindala kiki. Sembele tua kingila ni tu ki mone ni mesu’etu. Tu tena ku dielela kuila, kia-nda kala kisangusangu kia dikota kumona kiebhi Jihova kia-nda bhanga o ima.

21. Kiebhi o kidielelu kié?

²¹ Katé ku mundu uobhe, tua bhingi ku kolesa o kixikanu kietu kua Jihova. Muene ua kanena bhu kaxi ka Jezú kuila, o athu afu ala mu kixinganeku kia Nzambi. (Nzuá 5:28, 29; 11:23) O kima kia mukuá kilondekesa kuila Jihova ua-nda fukununa o athu afu, o izuelu ia Jezú. Sai kizuua muene uambe kuila, Mbalahamu, Izake ni Jakobo, “ene oso muene, ku mesu ma Nzambi, iá-uâ ni muenhu.” (Luka 20:37, 38) Mu kidi, tuala ni ima iavulu i tu bhangesa kuzuela ue ia zuela Phaulu: “Ngala ue ni kudielela kua Nzambi . . . kuma hádia kukala difukunukinu.”—Ikalakalu 24:15.