1. Mukonda diahi o batizu kima kiala ni valolo? (Tala o foto ia dianga.)

MIVU ioso mazunda a maxibulu a Bibidia ene mua batizala. Avulu mudiâ minzangala iala mu kitala kia kikumbi, a mukuá ala hanji mu undenge uâ. Sai iá a a vuala ku jitata Jimbangi ja Jihova. O kuila eie ue uala bhu kaxi ka minzangala iii? Se ua tambuijila kiene, mu kibhuidisu kiki, ua mu bhanga kiambote. O muthu phala kukala Kidistá, a tokala ku mu batizala. Muene ua bhingi ku mu batizala phala kubhuluka ni ku tambula o muenhu ua kalelaku.—Matesu 28:19, 20; 1 Phetele 3:21.

2. Mukonda diahi ku bhingi kukala ni uôma ua kudibhakula kua Jihova?

² Kioso kia ku batizala, Jihova u ku besoala mu maukexilu avulu. Maji kua bhingi u kumbidila o mbandu ié. Mu ukexilu uebhi? Mu kizuua kia ku batizala, o phange ua bhange o diskursu dia batizu uebhuidisa: “Mu sata ia Jezú Kristu, ua diela o ituxi iê, eie ua di bhakula kua Jihova, phala ku bhanga o vondadi iê?” Eie ua tambuijila: Xiê. Mu kizuo’kio, eie ua  kanena kuzola Jihova, ni ku ta o sidivisu iê ku pholo dia ima ioso ku muenhu uê. O kuila ua bhingi ku diela mu ku bhanga o kikanenu kiki? Kana! Eie nuka ua-nda diela mu kuehela Jihova kuendesa o muenhu uê. Oso a kambe kuijiia Jihova, ala ku mbandu ia mundu ua Satanaji. Diabhu kejiia ku langa oso ala ku mbandu iê. Mu kidi, muene ueji sanguluka kiavulu, se u texi o kidielelu kié kia muenhu ua kalela-ku, mu ku dituna Jihova ni ku mu xikina.

3. Kiebhi Jihova kiene mu kubesoala mukonda dia kudibhakula kué?

³ Xinganeka kiebhi Jihova kia kubesoala mukonda dia ku di bhakula kué ni batizu. Kuma eie ua bhakula o muenhu ué kua Jihova, u tena kuzuela ni kidielelu kioso: ‘Jihova uala bhu mbandu iami, ki ngi kala dingi ni uôma; Muthu u tena ku ngi bhanga kima kiahi?’ (Jisálamu 118:6) Ujitu ua dikota kukala dikamba dia Nzambi, ni kuijiia kuila muene ua sanguluka n’eie.

4, 5. (a) Mukonda diahi kala muthu ua tokala ku kumbidila o kudibhakula kuê kua Jihova? (b) Ibhidi iebhi iene mu dibhana na-iu o Jikidistá?

⁴ O ukamba ué ni Jihova, ku tokala ku u mona kala undundu ua lundula ku jitata jé. Né muene se uala hanji ku dibhata dia jitata jê, eie ua tokala ku langa o ukamba ué ni Jihova. Mukonda diahi ua tokala ku lembalala o maka iá? Sé-ku muthu uejiia se kiebhi kia-nda lola kixikanu kiê ku hádia. Mu kifika, nange a ku batizala ande dia kubhixila mu kitala kia kikumbi. Kuma kindala uala kiá mu kitala, eie uala ni ibanzelu iengi, uene mu dibhana ue ni ibhidi iengi. Sai munzangala uala mu kitala kia kikumbi uambe: “O mon’a ndenge ka tena kueha ku kala Mbangi ia Jihova, mukonda dia ku kamba kudia o bolo ia fesa ia kizuua kia uvualukilu ku xikola. Maji kioso kia kula, o ji hânji ja xitu ji dibandekesa, mukonda dia kiki, muene ua tokala ku xikina ni nguzu ioso kuila kubelesela Jihova kiene o kima kia beta-o-kota.”

⁵ Maji ki minzangala ngó a bhita mu ibhidi, etu enioso tu dibhana ni ji tendasá. Katé muene o adiakimi kia a batizala, o kixikanu kiâ a tena ku ki lola mu maukexilu avulu. Nange o kixikanu kié a tena ku ki lola mu ukaza, ku salu mba mu mauhaxi. Ki kale se tu minzangala mba tu adiakime, etu enioso tua-nda bhita mu ibhidi i tena ku lola o ufiiele uetu kua Jihova.—Tiiaku 1:12-14.

6. (a) Ihi ilombolola o kudibhakula kuetu kua Jihova? (b) Ihi i tu longa o mukanda ua 2 Kolindo 4:7?

⁶ O kima ki tena ku kukuatekesa ku kala fiiele, o ku di lembalala o ki kanenu ki ua bhange kua Jihova. Kiki kilombolola kuila, eie ua kanena kua Suke-ku ku mu sidivila né muene se dikamba mba o jitata jê, eha ku mu bheza. (Jisálamu 27:10) Mu ima ioso bhinga kua Jihova phala n’a ku kuatekese ku kumbidila o kikanenu ki ua mu bhange.—Tanga 2 Kolindo 4:7.

7. Ihi ilombolola ku kalakela o kubhuluka kué “ni ujitu uoso ni uôma?”

⁷ Jihova ua mesena kuila u kala kamba diê. Maji kiki, kibhinga kusuluka mu kukolesa o ukamba ni kubhanga ioso phala kubhuluka. O divulu dia Filipe 2:12 di zuela: “Tutumbenu ni ujitu uoso ni uôma, phala mu mone o kubhuluka.” Kiki kilombolola kuila, tua tokala ku xinganeka se kiebhi kia-nda kala o ukamba uetu ni Jihova, né muene ni ibhidi. Etu ki tu tokala ku banza kuila,  ki ki bhonzo ku kala fiiele. Dilembalale kuila avulu a sidivila Nzambi mu mivu iavulu, a lembua ku kala fiiele. Ima iebhi i u tena kubhanga phala o ubhulukilu uê?

8. O kudilonga ubheka kua lungu ni ihi? Mukonda diahi kima kiambote kubhanga kiki?

⁸ Phala kukala tu makamba a Jihova, tua bhingi ku mu ívua, ni kuzuela ni muene. Kudilonga o Bibidia, uene o ukexilu ua beta-o-kota ua kuívua Jihova. Kiki kilombolola kutanga ni kuxinganeka mu Mak’â Nzambi, ni madivulu ene mu tu tumikisa o kimbadi kia fiiele. O kudilonga o Bibidia, ki ku difu ni kudilonga phala kubhanga jipolova ku xikola. Kiki, kia soko ni kuenda njila phala ku tungununa ima ia ubhe ia lungu ni Jihova. Se u bhanga kiki, ua-nda zukama dingi kua Nzambi, ni kuila, muene u ku zukama ue.—Tiiaku 4:8.

9. Falamenda jebhi ji tena ku kukuatekesa kioso ki u dilonga ubheka?

⁹ O kilunga kia Jihova ki bhana jifalamenda javulu, ji tena ku tu kuatekesa kioso ki tua mu dilonga ubheka. Mu kifika, mu kijimbuete kietu jw.org, mu mbandu “Exercícios Bíblicos” mu kibatulu “Adolescentes,” tu sanga-mu jindunge ji tena ku tu kuatekesa kukumbidila o ima i tuene mu dilonga mu misoso ia Bibidia. Tu sanga-mu ue, o ndunge i tu kuatekesa kulonga o athu ni divulu “Mu Kidi Ihi i Longa o Bibidia?” O jifalamenda jiji, ji tena ku kukuatekesa kukolesa o kixikanu kié, kutangela akuenu ia  lungu ni Bibidia. U tena kusanga jindunge ja mukuá, mu Mulangidi ua dianga ua muvu ua 2017, ni diambu “Kiebhi ki u Tena Kukatula Mbote mu Kitangelu Kia Bibidia?” Se ua mesena kusuluka mu kubhanga ioso phala kubhuluka, ua bhingi kudilonga o Bibidia ni kuxinganeka.—Tanga Jisálamu 119:105.

10. Mukonda diahi o muthu a mu batizala ua bhingi kusamba?

¹⁰ O kutanga o Bibidia, kua difu ni kuívua o dízui dia Jihova, maji kioso ki tu samba etu tu zuela ni muene. Ki tu tokala kubanza kuila, o musambu kima ngó ki tuejidila kiá, mba kima ki tu kuatekesa kuditunda kiambote ku muenhu. Mu kidi, o kusamba kuzuela ni Mubhangi uetu. Xinganeka mu maka iá: Jihova ua mesena kuívua o ibhidi ié! (Tanga Filipe 4:6.) Mu kiki, o Bibidia i tu tangela o kima ki tua tokala o kubhanga kioso ki tu kala ni hele ia kima kioso-kioso. Iene iamba: “Se uevu kimbamba kia ku xina, iza na-kiu kua Jihova.” (Jisálamu 55:22) Jiphange javulu ku mundu uoso, a mono kiá o valolo ia ku kaiela o ndunge iii. O kusamba ku tena ue ku kukuatekesa!

11. Mukonda diahi ua bhingi kusakidila jinga Jihova?

¹¹ Maji ki tu tokala kusamba ngó kioso ki tu bhindamena o kikuatekesu kia Jihova, kana. O Bibidia i tu tangela: “Muila ue ni kusakidila.” (Kolose 3:15) Sai bhabha tu thandanganha kiavulu ni mak’etu, katé tu jimba o ima iambote i tuala na-iu. Mu kiki-phe, sota ku kaiela o jindunge jiji: Izuua ioso, xinganeka mu ima itatu i ua mesena kusakidila Nzambi. Mu kiki, mu kithangana kia kusamba bhanga kienhiki. Sai munzangala a mu ixana Abingaíle, a mu batizala kioso kiexile ni 12 kia mivu, uambe: “Ngi mona kuila, Jihova muene ua fuama dingi ku mu sakidila, muthu uoso-uoso ndenge. Mu ithangana ioso tu tena ku mu sakidila, ku ima ioso iene mu tu bhangela. Sai bhabha ngene mu banza mu kibhuidisu ki ng’evuile m’ukulu: ‘Ima iahi i ueji kala na-iu, se mu ku balumuka mu kamene u mona ngó o ima i ua sakidila kua Jihova mu usuku?’” * (Tala ku luiji.)

12, 13. Kiebhi ki ua mono kuila, Jihova Nzambi ia henda? Mukonda diahi kima kiambote kuxinganeka kiebhi Jihova kiene mu ku kuatekesa?

¹² Jihova ua kuatekesa Sobha Davidi kukolokota mu ibhidi. Mukonda dia kiki, muene ua zuela ia lungu ni ima ia bhiti ni muene. Muene uambe: “Lolenu, mu mone kuma Jihova uene ni mbote; muthu ió u lunga uoso ua mu dielela muene.” (Jisálamu 34:8) O velusu iii, ilondekesa kuila, tua tokala kusota kumona kiebhi Jihova kia tu kuatekesa. Kioso ki u tanga o Bibidia, o madivulu metu, mba kioso ki uia mu iônge, eie u dilonga kiebhi Nzambi kia kuatekesa akuetu ku kolokota mu ufiiele uâ. Maji phala ku kolesa dingi o ukamba ué ni Jihova,  eie ua bhingi kumona kiebhi Jihova kia ku kuatekesa ku muenhu. O kuila eie ua mono kiá o kikuatekesu kia Jihova ku muenhu ué?

¹³ Jihova ua londekesa kiá o henda ié ku Jikidistá joso mu ukexilu ua katunda. Muene ua tu zukamesa kokué, ni kua Mon’ê. Mukonda dia kiki, Jezú uambe: “Kana muthu u tena kuiza ko-kuami, se Tata ua ngi tumu u kamba ku mu sunga.” (Nzuá 6:44) O kuila eie u xikina kuma Jihova ua ku solo phala ku mu sidivila? O munzangala uala ni jitata Jimbangi ja Jihova, nange u tena kuxinganeka kiki: ‘Jihova ua solo o jitata jami, eme nga mu a kaiela ngó.’ Lembalala kuila, kioso ki ua di bhakula kua Jihova, anga a ku batizala, eie ua mateka ue o ukamba ué ni muene. O Bibidia izuela: “Muthu-phe se u zola Nzambi, ió a mu ijiia kuala muène.” (1 Kolindo 8:3) Mu kiki-phe, enda ni kubhana valolo ku kididi kia ku bhana Jihova mu kilunga kiê.

14, 15. Kiebhi o sidivisu ia kuboka i tena ku kukuatekesa kukala ni kixikanu kia kolo?

¹⁴ Eie u mona ue o henda ia Jihova kioso kia kubhana o kusuina kua kuzuela ia lungu ni kixikanu kiê ku akuenu, kikale mu sidivisu ia ku boka mba ku xikola. Nange kibhonza ku bokela o jikoleka jê. U tena ku thandanganha, mukonda ki uejiia kiebhi kia-nda tambula o njimbu. Kibhonza dingi ku jimbuluila o kixikanu kiê bhue zala o mundu. Ihi i tena ku kukuatekesa?

¹⁵ Xinganeka se mukonda diahi, eie u xikina mu milongi ia Bibidia. Se o milongi i tu sanga mu jw.org, iala kia mu dimi diê, ue-nda jinga ni kua tanga. Iene i tena ku kukuatekesa kuijiia ihi i u xikina, mukonda diahi u i xikana, ni kiebhi ki utena kujimbuluila kua akuenu o milongi ia Bibidia. Kioso ki ua-nda kala ni kixikanu kia kolo, ni kuila ua di pelepalala kiambote, ua-nda kala ni vondadi ia kulonga ia lungu ni Jihova.—Jelemiia 20:8, 9.

16. Ihi i tena ku kukuatekesa kuzuela ni akuenu ia lungu ni Bibidia?

¹⁶ Né muene se ua dipelepalala kiambote, u tena hanji ku teketa bhofele, se kubhinga kujimbulula o kixikanu kiê. Sai phange ia muhatu, uala mu kitala kia 18 dia mivu, a mu batizala kioso kiexile ni 13 kia mivu, uambe: “Ngejiia kiambote o milongi i ngi xikina, maji sai bhabha, kibhonza kujimbulula ioso i ngi xinganeka.” Mu kiki, muene ua fikisa kuzuela ia lungu ni kixikanu kiê, sé kuthandanganha. Muene uambe: “O jikoleka jami a zuela sé hele ia lungu ni ibhangelu iâ. Eme ue ngi tena kubhanga kiki. Mu kifika ngi zuela kima kala nga mu tonoka. Ngi mateka: ‘Sai kizuua nga kexile mu longa o Bibidia ku muthu, . . . ’ Kioso ene kia kala mu ngívua, eme ngi suluka ni milongi ia Bibidia. Sumbala ngi mateka kuzuela maka ka lungu ni Bibidia, ene a kala ni vondadi ia kuijiia dingi ia lungu ni milongi ia Bibidia. Sai ithangana ene ebhudisa ia lungu ni Bibidia. Kioso ki ngi bhanga kiki, o kubhana umbangi ku bhebhuluka dingi. Mu ku suluka, ngi divua dingi kiambote!”

17. Ihi dingi i tena ku kukuatekesa kuzuela ni athu ia lungu ni Bibidia?

 ¹⁷ Kioso ki tu xila muthu ni ku mu londekesa o henda, ki kua-nda mu bhonza kuxikina o ilongesu ietu. Sai phange ia muhatu, a mu ixana, Olivia, uala ni 17 dia mivu, a mu batizala kioso kiexile mon’a-ndenge. Muene uambe: “Ngexile ni hele ia kuila, se ngi zuela ni athu ia lungu ni Bibidia, ene a-nda banza kuila, nga saluka.” Maji mu kubhita thembu, muene kexile dingi ni kibanzelu kiki. Mu veji dia kubanza kiavulu mu hele iê, muene uixi: “Minzangala iavulu kejiia ima ia lungu ni Jimbangi ja Jihova. Ene êne mu di sanga ngó n’etu. Mu kiki, o ibhangelu ietu i tena kulondekesa se ene a-nda tu bhana mátui, mba kana. Abha se tu kala ni jisonhi ja kuzuela ia lungu ni kixikanu kietu, mba uôma ua kuzuela nau? Nange ene a-nda mona kuila, ki tua sanguluka kukala tu Jimbangi ja Jihova. Nange ka-nda tu bhana mátui mukonda dia kukamba kidielelu ku ima i tu longa. Maji, se tu zuela nau ia lungu ni Bibidia ni kidielelu kioso ni mu ukexilu ua bhebhuluka, kala tua mu zuela kima kioso-kioso, nange ene a-nda tu xila ni ku tu bhana mátui.”

18. Ihi i ua tokala kubhanga phala ku kalakela o kubhuluka kué?

¹⁸ Etu tuejiia kuila tua tokala ku bhanga ioso phala o kubhuluka kuetu. Kienhiki, eie ua tokala kutanga ni ku xinganeka mu Mak’â Nzambi, kusamba kua Jihova, ni kubanza kiebhi Jihova kiene mu kukuatekesa. Kubhanga o ima iii, kua-nda kukuatekesa kuijiia ni kidi kioso kuila, Jihova Kamba dié. Kiki, kia-nda kukolesa kioso ki u kala mu longa akuenu ia lungu ni ima i ua dielela.—Tanga Jisálamu 73:28.

19. Mukonda diahi ioso i tu bhanga phala o kubhuluka kuetu, iala ni valolo?

¹⁹ Jezú uambe: ‘Se muthu ua mesena ku ngi kaiela eme, a di fule o ku di banza muène-muene, a zangule o taka iê, a ngi kaiele.’ (Matesu 16:24) Mu kidi, phala kukaiela Jezú, o Jikidistá a tokala kudibhakula kua Jihova ni ku a batizala. Maji kubhanga kiki, dimatekenu ngó dia muenhu ua iuka kindala, kia-nda tu kuatekesa ku kala ni muenhu ua kalelaku ku hádia ku mundu uobhe ua Nzambi. Mu kiki, kolokota mu kubhanga ioso phala o ubhulukilu ué!