1, 2. Kiebhi kiexile o Jijudé mu mbanza ia Jeluzaleme, kioso Zakadiia kia zubha kumona o kisuma kia kasambuadi?

KIOSO kia zubha kumona o kisuma kia kasambuadi, nange Zakadiia ua xinganeka mu ima iavulu. Nange muene ua divu kiambote mu kuívua o kikanenu kia Jihova kia lungu ni ku buikisa o mii. Maji né kiki, o ima ki i lungulukile. Mu kifika o athu akexile hanji mu bhanga ima iaiibha, ka zubhile luua kutunga o Tembulu ia Jeluzaleme. Mukonda diahi o Jijudé a xisa ni lusolo, o kikalakalu kia bhanene Jihova? O kuila ene a vutuka mu mbanza ia Jeluzaleme, phala kubhanga o ima iâ?

² Zakadiia uejidile kuila, o Jijudé a vutukile mu mbanza ia Jeluzaleme, exile abhezi a Jihova. Ene exile ió a “a tonesa o nzumbi moxi kuala Nzambi,” phala kuxa o jinzo ni mauenji mâ, mu ixi ia Babilonha. (Ejidala 1:2, 3, 5) Ene a xisa o ixi ia Babilonha iejidile kiambote, phala kuia kutunga ixi iengi ia kambele kuijiia. Ene a bhangele kiki, mukonda a bhanene  valolo iavulu ku kikalakalu kia kutunga dingi o thembulu ia Jihova. Mu kiki, ene exile polondo phala kuenda o 1.600 ia jikilómetulu, phala kubhixila mu mbanza ia Jeluzaleme, sumbala ejidile kuila, o njila ki ia kexile kiambote iezalele ni makungu, ni matadi.

3, 4. Ibhidi iebhi ia bhiti na-iu o Jijudé a vutuka mu Jeluzaleme?

³ Xinganeka o njila ia lebha ieji bhanga akua Izalaiele, tundé mu ixi ia Babilonha katé ku Jeluzaleme. O kifuxi kiexile ni kithangana kia soko, phala kuxinganeka ni kuzuela se kiebhi kieji kala o mienhu iâ, mu mbanza ia Jeluzaleme. O adiakimi a monene kiá o tembulu io’ukulu, ni mbanza, nange a tangela ku akuâ o kuiuka kua Jeluzaleme ni tembulu ia Jihova. (Ejidala 3:12) Se uexile mu bhanga o njila ni ene, kiebhi ki ueji divua mu kumona o mbanza ia Jeluzaleme mu veji ia dianga? O kuila ueji luuala mu ku mona o mbanza ia xala kiphulungunzu kia hatu? Eie uejiia kuila o mbanza a i fikidile kiambote, iexile ni masoladi mu ilumbu. mu kiki, kiebhi ki ueji divua mu kumona o ilumbu io buike, iezala ni makungu? Mu kumona o ilumbu io buikise, nange ueji xinganeka mu ilumbu ia makota ia Babilonha. Maji o Jijudé ka bhuidile kana. Mukonda diahi? Mukonda, mu njila ioso ia bhange, Jihova ua a lange ni ku a kuatekesa. Kia bhixila mu Jeluzaleme, sé ku laleka a tungu kalatódio bhua kexile o tembulu, anga a mateka kubhana jisata kua Jihova izuua ioso. (Ejidala 3:1, 2) Ene akexile polondo phala kubhanga o kikalakalu kia Nzambi ni kusuina kuoso. Tu tena kumona kuila, kieji bhonza ku a zozesa.

⁴ O Jijudé keji tunga ngó o thembulu, kana, maji a bhingile ue kutunga o mabhata mâ. A bhingile ue kudima phala kudikila o miji iâ. (Ejidala 2:70) Ene exile ni ikalakalu iavulu. Ki kua laleka kiavulu, o jinguma jeza, anga a mateka ku a zukutisa, phala ka suluke ni kikalakalu. O izukutisu ia laleka 15 kia mivu. Mukonda dia kiki, o Jijudé a mateka o kubhuila. (Ejidala 4:1-4) O kibhidi kia mukuá, kia bhiti ku muvu ua 522, kioso o Sobha ia utuminu ua Pelesa, ua kidika o athu kutunga o mbanza ia Jeluzaleme. O athu akexile mu banza kuila, o mbanza keji ku i tunga dingi.​—Ejidala 4:21-24.

5. Kiebhi Jihova kia kuatekesa o mundu uê?

⁵ Jihova uejidile kuila, o mundu uê ua bhingile kusuina. Mukonda dia kiki, muene ua bhana kua Zakadiia kisuma phala ku dielelesa o mundu kuila ua a zolo, ni kuila ua uabhela o nguzu ia kexile mu bhanga phala ku mu bheza. Jihova ua a kanena kuila, se a vutukile ku kikalakalu kiâ, ueji kua langa. Ia lungu ni kutunga dingi o tembulu, Jihova uambe uixi: “Kienhi kia kà bhita, se enu muividila muene kiambote o dízui dia Nzambi ienu.”​—Zakadiia 6:15.

6. (a) Kiebhi kia mateka o kisuma kia sukina kia mono Zakadiia? (Tala o foto ia dianga.) (b) Mukonda diahi o kolo ia jikabalu ki ja difuile?

⁶ O kisuma kia sukina kia mono Zakadiia, nange kiene kia suinisa dingi akua Izalaiele. (Tanga Zakadiia 6:1-3.) Ihi ia mono Zakadiia? O Bibidia izuela kuila, muene ua mono “makalu a uana, a tundu bhu kaxi ka milundu i iadi,” ia tundu mu milundu ia ngondo, ni jikabalu ja mu sunga o makalu auana. O jikabalu jexile ni jikolo javulu. Kuma o kolo ia jikabalu ki ja difuile, ki tu kuatekesa kuijiia ió a mu kuendesa o jikabalu. Zakadiia uebhuidisa: “Kima kiahi kienhiki?” (Zakadiia 6:4) Etu ue, tua mesena ku kijiia, mukonda, o kisuma kiki kia lungu ue n’etu.

7, 8. (a) Ihi ilombolola o milundu iiadi? (b) Mukonda diahi o milundu, ia ngóndo?

⁷ Mu Bibidia, o milundu ilombolola unguvulu  mba Utuminu. O milundu ia mono Zakadiia, ia difu ni milundu i tu sanga mu divulu dia Daniiele. O mulundu ua dianga u lombolola o unguvulu ua kalela-ku, ua Jihova, mu ngongo ioso. O mulundu ua mukuá u lombolola o Utuminu ua mon’ê Jezú. (Daniiele 2:35, 45) Tundé ku muvu ua 1914, kioso Jezú kia mu tumbika ku ungana, o Mautuminu aiiadi iá, a mateka ku kalakala kumoxi. O Mautuminu iá, a-nda kuatekesa kiavulu phala o vondadi ia Nzambi i di kumbidile mu ixi.

⁸ Mukonda diahi o milundu iii ia ngondo? O ngondo, iala ni valolo iavulu, i bhenha ue kiavulu. Mu kidi, Jihova ua tangela akua izalaiele ku bhanga o balaka ni ngondo. Mu kutunga o tembulu a kalakala ue ni ngondo phala ku i iudika. (Makatukilu 27:1-3; 1 Jisobha 7:13-16) O milundu iii ia ngondo, ilombolola o ungana ua Jihova mu ngongo ioso, ni Utuminu ua Mon’ê, ua tundu o maungana oso, ua-nda zubha o kuiibha kuoso mu ngongo, ni kubheka mabesá avulu.

9. A nanhi a mu kuendesa o makalu, ni kiebhi o kikalakalu kiâ?

⁹ O makalu ni ió a mua endesa a lombolola ihi? A mu kuendesa o makalu, a lombolola ibuka ia ji anju. (Tanga Zakadiia 6:5-8.) Jene ja mu tunda “bhu pholo ia Jihova uávu ixi ioso” ni kikalakalu kia katunda. O ji anju a ji tumikisa phala kulanga o mundu ua Nzambi, phala akua Babilonha o “ixi ia thunda,” ka a bhange kiaiibha. Ni kisuma kiki, Jihova ua londekesa ku mundu uê kuila, nuka dingi eji kituka abhika mu Babilonha. Sé phata, kiki kia kuatekesa kiavulu ió a kexile mu tunga o tembulu, mu izuua ia Zakadiia! A mono kuila, jinguma jâ keji tena kua fidisa kutunga o tembulu.

10. Kiebhi o kisuma kia Zakadiia kia lungu ni makalu ni ió a mua endesa, kia tu kuatekesa?

¹⁰ Lelu, Jihova uene mu tumina hanji o ji anju jê phala kulanga ni kusuinisa o mundu uê. (Malakiia 3:6; Jihebeleu 1: 7, 14) O mundu ua Jihova ua tundu ku ubhika ua Babilonha ia dikota mu muvu ua 1919. Tundé o muvu uenhó, o jinguma ja mundu ua Nzambi, jene mu bhanga ioso, phala o ubhezelu ua kidi ki u bhixile mu ngongo ioso. (Dijingunuinu 18:4) Maji ene a lémbua. Kuma o ji anju ja mu langa o kilunga kia Jihova, ki tu bhingi dingi kukala ni hele, kuila mungu tu vutuka dingi ku ubhika ua ubhezelu ua makutu. (Jisálamu 34:7) Mu veji dia kukala ni uôma, tua-nda suluka mu kubhanga o kikalakalu kia tu bhana Jihova ni kisangu-sangu kioso. O kikanenu kia Zakadiia, ki tu kuatekesa kuijiia kuila, kuala milundu iiadi ia mu tu langa.

11. Mukonda diahi ki tua bhingi kukala ni uôma mu kubanza mu izukutisu ia-nda bhita na-iu o mundu ua Nzambi?

¹¹ Kua kambe ngó, o  jinguvulu ja mundu iú ua Diabhu, a-nda di bunda, phala kubuikisa o mundu ua Jihova. (Izekiiele 38:2, 10-12; Daniiele 11:40, 44, 45; Dijingunuinu 19:19) O kikanenu kia Izekiiele, kiambe kuila o jinguvulu jiji, jeji kuiza kala matuta ku diulu. Jene ja mu kaba-kaba ni njinda, phala kubuikisa o mundu ua Nzambi. (Izekiiele 38:15, 16) * (Tala ku luiji.) O kuila tua bhingi kukala ni uôma uâ? Kana! Etu tuala ni kifuxi kia Jihova ku mbandu ietu. Mu hadi ia dikota, o ji anju ja-nda kondeka o mundu ua Jihova, ni kubuikisa oso a fidisa o abhezi a Jihova. (2 Tesalonika 1:7, 8) Kio-kio, kia-nda kala kizuua kionene! Maji, nanhi muene ua-nda kuendesa o kifuxi kia Jihova?

12, 13. (a) Ihi dingi ia zuela Jihova kua Zakadiia? (b) Kiebhi ki tuejiia kuila, o diiala a mu ixana Luthangu, muéne Jezú Kristu?

¹² Zakadiia muéne ngó ua mono o nake dia isuma íii. Mu kubhita thembu, muene ua bhange kima phala kusuinisa o athu akexile mu tunga o tembulu ia Nzambi. (Tanga Zakadiia 6:9-12.) Kuexile maiala atatu  a exanene Heledai, Tobiia, ni Jedaia a tundu mu ixi ia Babilonha. Jihova ua tangela Zakadiia phala kutambula ulu ni phalata ku maiala iá, phala kubhanga na-iu ‘kitundu.’ (Zakadiia 6:11) O kuila o kitundu kiokio kiexile phala o Nguvulu Zolobabele, mukua muiji ua Juda, ua tokalele ue ku mbutu ia Davidi? Kana. Jihova ua tangela Zakadiia, phala ku ki tula kua Josuué, o Mukunji ua Dikota. O athu a mono o ima iii a diuana kiavulu.

¹³ O kuila o kukala ni kitundu kia bhangesa o Mukunji ua Dikota kukituka Sobha? Kana. Josuué ka tundu mu muiji ua Davidi, mu kiki muene ka tokalele kukala sobha. O kitundu kiê kiexile kidimbu kia ima ieji bhita ni sobha ieji kuíza ku hádia, ueji kala ué mukunji. Muene a muixana Luthangu. O Bibidia ijimbulula kuila o Luthangu, Jezú Kristu.​—Izaia 11:1; Matesu 2:23, Tanga mu luji.

14. Kuma Jezú muene Sobha ni Mukunji ua Dikota, ihi ia-nda bhanga?

¹⁴ Jezú ua mu kalakala kala Sobha ni Mukunji ua Dikota. Muéne o mutuameni ua kifuxi kia ji-anju ja Jihova, iú ua mu kalakala kiavulu phala kulanga o mundu ua Nzambi ku mundu iú. (Jelemiia 23:5, 6) Kua kambe ngó bhofele, Kristu mu kuzokela o unguvulu ua Nzambi ua-nda tolola o jinguma jê joso, ni kubhângela o mundu ua Jihova. (Dijingunuinu 17:12-14; 19:11, 14, 15) Maji, ande dia kubhixila o kizuua, Jezú, mba Luthangu, uala hanji ni kikalakalu kia dikota.

15, 16. (a) Kiebhi o mundu ua Nzambi kia a zelesa? (b) Kiebhi kia-nda kala o ixi ku disukilu dia Midi ia Mivu?

¹⁵ Mu ku kala Sobha ni Mukunji ua dikota, Jezú uala ni kikalakalu kia ku tunga dingi o “Tembulu ia Jihova”. (Tanga Zakadiia 6:13.) Mu muvu ua 1919, muene ua mateka ku tunga o tembulu ia Jihova, mu ku katula o mundu ua Nzambi mu ubhezelu ua makutu, Babilonha ia Dikota. Jezú ua zelesa dingi o kilunga, iú ua solo o ‘Kimbadi kia Fiiele.’ O kibuka kiki kiofele kia Jikidistá a undu, kiene mu kuendesa o kikalakalu kia kuboka ku mundu uoso. (Matesu 24:45) Jezú ua zelesa ue o mundu ua Nzambi, phala na tene ku bheza Nzambi mu ukexilu ua mu uabhela.​—Malakiia 3:1-3.

¹⁶ Jezú ni 144.000 a jisobha ni akunji, a-nda tumina mu midi ia mivu. Mu kithangana kia-nda tumina, a-nda kuatekesa o mundu ua Nzambi kukala athu a iuka. Kioso ene kia-nda zubha o kikalakalu kiki, mu ngongo mua-nda subhuka ngó o abhezi a Jihova. Ku disukilu, o ubhezelu ua kidi ua-nda kala-ku dingi, mu ngongo ioso!

17. Ihi ia kanena Jihova kua Jijudé, ni kiebhi o kikanenu kiki kia a suinisa?

¹⁷ Kiebhi o Jijudé kia tambula o njimbu ia Zakadiia mu thembu ienioió? Jihova ua kanene ku a kuatekesa phala na tene ku zubha o kutunga o tembulu. O kikanenu kiki, kia bhana kidielelu. Maji nange ene a kexile mu dibhuidisa: Tua-nda bhanga kiebhi o kikalakalu kiki kiavulu? Kienhiki-phe, Zakadiia ua a tangela kima kia katula o uôma ni hele. Kumoxi ni athu kala Heledai, Tobiia, ni Jedaia, ejile phala kua kuatekesa, Jihova ua tangela kuila avulu eji kuiza “mu ku kuatekesa kutunga tembulu ia Jihova.” (Tanga Zakadiia 6:15.) Kienhiki, o Jijudé kexile dingi ni phata ia kuila Jihova ua kexile mua kuatekesa mu kikalakalu kiâ. Ni nguzu ioso, ene a vutuka phala ku tunga dingi o tembulu, né muene ni kifidisu kia Sobha ia Pelesa. O kifidisu kiki, kiexile kala mulundu mu njila iâ, maji Jihova ua u katula. Mu kubhita mivu, o tembulu a zubha ku i tunga, mu muvu ua 515 Ande Dia Kithangana Kietu. (Ejidala 6:22; Zakadiia 4:6, 7) Maji, o izuelu ia Jihova ia jimbulula ue kima kiene mu bhita mu izuua ietu.

18. Kiebhi o divulu dia Zakadiia 6:14 kia mu dikumbidila mu izuua ietu?

¹⁸ Lelu, mazunda ni mazunda a athu a mu bheza Jihova. Ene a sanguluka mu ku bhana o ‘ima ioso iala na-iu,’ kala o kithangana kiâ, nguzu ni jimbote jâ. Mu ku bhanga kiki, ene a mu kuatekesa o thembulu ia Jihova. (Jisabhu 3:9) Jihova u bhana valolo kioso ki tu kuatekesa ni ufiiele uoso. Heledai, Tobiia, ni Jedaia a bhanene phalata ni ulu, Zakadiia anga ua bhange naiu o kitundu. O kitundu kiexile “dilembalesu” dia kikuatekesu kiâ, phala o ubhezelu ua kidi. (Zakadiia 6:14) Mu kiki, tu tena kuzuela ni kidi kioso kuila, Jihova ka-nda jimba ioso i tu bhanga, ni henda i tu londekesa kua muene.​—Jihebeleu 6:10.

19. Kiebhi o isuma ia mono Zakadiia kia tu suinisa?

¹⁹ Mu izuua iii ia sukidila, o mundu ua Jihova uene mu bhanga kikalakalu kia dikota. Kiki kiene mu bhita mukonda dia dibesá dia Jihova ni kiendesu kia Jezú. Tu sanguluka mu kubhanga mbandu ia kilunga kiki kia nguzu, kia-nda nangenena-ku katé ku hádia ni hádia. Tuejiia kuila, o vondadi ia Jihova ia ku langa o ubhezelu, ia-nda dikumbidila sé phata. Mu kiki, bhana valolo ku kididi kiê mu kilunga kia Jihova. Enda ni ‘kuividila muene kiambote o dízui dia Nzambi’ iê. Se u bhanga kiki, Jezú o Sobha ni Mukunji ua Dikota, ni ji anju a-nda tena ku ku langa. Bhanga ioso i u tena phala ku kuatekesa o ubhezelu ua kidi. Jihova ua-nda ku langa mu ibhidi ia izuua iii sukidila-ku, katé ku hádia-ni-hádia!