O TATA ia Nzuá a mu batizala ku mivu ia 1950, mu mbanza ia Gujarat, mu ixi ia Índia. Maji Nzuá, ni kitanu kia jiphange jê ni manh’â, exile akua Katolika. Mukonda dia kiki, kioso kia batizala tat’â, ene ka sangulukile.

Sai kizuua o tata ia Nzuá, ua mu bhingi phala kuambata mukanda kua phange mu kilunga. Maji mu kamene, Nzuá ua di kuamene ku mulembu. Né kiki, Nzuá ua belesela o tata iê, mu kiki, muene ua vungina o mulembu ni ka mulele, anga uai mu bheka o mukanda.

Kioso Nzuá kia bhixila, muene ua bhana o mukanda ku muhatu ua phang’ietu, uexile ue Mbangi ia Jihova. O muhatu ua mono kuila, Nzuá ua kexile ni fidila ku mulembu. Mu kiki, muene ua mu kuatekesa. Ua katula o mbuenga iê ia milongo, phala kutumba o fidila ia Nzuá. Mu kusuluka, ua mu bhana xá. Kioso kiexile mu kuatekesa Nzuá, muene ua zuela-né ia lungu ni Bibidia, ni kubatâma kuoso.

Mukonda dia kumona o kubatâma kuê, Nzuá ua mono kuila, o Jimbangi ja Jihova, athu ambote. Mu kiki, Nzuá ua mu ibhuidisa ia lungu ni milongi ia Jimbangi ja Jihova. Muene ua mu ibhuidisa se Jezú muéne Nzambi, ua mu ibhuidisa ue se o Jikidistá a tokala kusamba kua Madiia. Kuma o muhatu uejidile o dimi dia Gujarat, o dimi dia uvualukilu ua Nzuá, ua mu londekesa o itambuijilu mu Bibidia, iu ua mu bhana o kamukanda “Estas Boas Novas do Reino.”

Kioso Nzuá kia mateka kutanga o kamukanda, muene ua mono kuila, ua sange o milongi ia kidi. Muene uai mu zuela ni padele, anga ua mu ibhuidisa ue ia lungu ni Jezú ni Madiia. O padele njinda ia mu kuatele, iú ua takula o Bibidia kua Nzuá, anga u dikola, uixi: “Eie ua bhiluka Satanaji! Ngi londekese o mbandu mu Bibidia iamba kuila, Jezú ki muéne Nzambi. Ngi londekese o mbandu iamba kuila, ki tu tokala kubheza Madiia. Ngi londekese!” Nzuá ua divuile kiaiibha mu kumona o ukexilu u ua tambuijila o padele. Muene uambela o padele, uixi: “Nuka dingi nga-nda kuíza mu ngeleja!” Nzuá ua kumbidila o kizuelu kiê!

Muene ua mateka kudilonga o Bibidia ni Jimbangi ja Jihova, ua xikina o kidi, iú ua kituka mubhezi ua Jihova. Mu ku bhita thembu, athu avulu ku muiji uê, a kituka ue Jimbangi ja Jihova. Kua bhiti kiá 60 a mivu, Nzuá uala hanji ni kitoto ku mulembu mukonda dia ku di kuama. Maji, kioso kia mona o mulembu uê, muene u lembalala o ukexilu uambote ua phange’ietu ia muhatu. O ukexilu uenhó ua mu kuatekesa kuijiia Jihova.​—2 Kolindo 6:4, 6