1. Uebhi o ukexilu ua beta-o-kota ua henda? Jimbulula. (Tala o foto ia dianga.)

JIHOVA muéne Otho ia henda. (1 Nzuá 4: 7) O henda ia beta kota a i londekesa bhu kaxi ka itumu ia iuka. Mu Bibidia, o henda iii, a i lombolola ni kizuelu mu dimi dia Ngeleku, ágape. O henda iii ki i lombolola ngó ku uabhela muthu, kana. Maji ilombolola kuzola muthu ni muxima uoso. Mu kiki, phala ku i londekesa, o muthu ua bhingi kuta ku pholo o ibhindamu ia akuâ, ni kua bhangela o mbote. O henda ia difu kiki, i tu zediuisa ku muenhu.

2, 3. Kiebhi Jihova kia tu londekesa o henda iê?

² Jihova ua londekesa kiá henda ku athu, né muene ande dia kubhanga Adá ni Eva. Muene ua bhange o ixi phala ku bhana ioso i tua bhindamena phala kukala ku muenhu. Ua bhange ue o ixi kala inzo mu tueji kala ni kusanguluka ku muenhu. Jihova ka bhange ioso iii, phala o mbote iê kana, maji ua ki bhange phala etu. Mu kusuluka ua bhange o athu, iú ua a bhana o kidielelu kia kukala ku muenhu ua kalelaku mu palaízu mu ixi.

 ³ Mu kubhita kithangana, Jihova ua londekesa o henda iê mu ukexilu ua katunda. Sumbala Adá ni Eva a xibhakele, Jihova ua jikula o njila phala o tuana tua Adá ni Eva ku mu zola, anga bhu kaxi ka Mon’ê, ua bhana o sata ia kukula phala kubhulula o tuana tuoso tua Adá ni Eva. (Dimatekenu 3:15; 1 Nzuá 4:10) Kioso Jihova kia kanena o sata ia kukula, kiedile kála kia di kumbidile kiá. Mu kubhita 4.000 ja mivu, Jihova ua bhana o Mon’ê umoxi-élele phala kubhulula o athu. (Nzuá 3:16) Tu sakidila kiavulu o henda ia tu kuatela Jihova!

4. Kiebhi ki tuejiia kuila, o athu a tena kulondekesa o henda ia difu ni ia Jihova?

⁴ O kuila tu tena kulondekesa o henda ia kidi, né muene tu akuâ ituxi? Tu tena. Jihova ua tu bhange mu kidifuanganu kiê, kiki kilombolola kuila, tu tena kukaiela o idifua iê. Sai ithangana kibhonza muene kulondekesa o henda ia kidi, maji né kiki, tu tena ku i londekesa. Abele ua londekesa o henda iê kua Nzambi, kioso mu ima ia kexile na-iu ua katula ia betele o kota phala ku i satela Nzambi. (Dimatekenu 4:3, 4) Noué ua londekesa o henda ia kidi, mu kukolokota mu kuboka o njimbu ia Nzambi mu mivu iavulu, sumbala athu kexile ku mu bhana mátui. (2 Phetele 2:5) Mbalahamu ua londekesa kuila, o henda iê kua Nzambi iexile ni valolo ia dikota, ima ioso-ioso ndenge. Mukonda dia kiki, muene uexile polondo phala kubhana mon’ê Izake, kala sata. (Tiiaku 2:21) Kála o maiala iá a fiiele, tua mesena ue kulondekesa o henda ietu, né muene mu ithangana ia bhonzo.

5. Kiebhi ki tu tena kulondekesa o henda ia kidi?

⁵ O Bibidia i tu suinisa kulondekesa o henda ia kidi. Iene iamba: “O henda ietu i tu di zola na-iu, ki i kale ia maka ngó mu kuzuela mba izuelu ia hatu i tunga ngó bhu dimi. Maji ia fuama i kala henda ia kidi, i [di londekesa] jinga mu ima ioso i tu bhanga.” (1 Nzuá 3:18) O kuila kiki kilombolola kuma, ki tu tena kulondekesa o henda bhu kaxi ka izuelu ietu? Mu kidi, tu tena. (1 Tesalonika 4:18) Maji o kuzuela “nga ku zolo,” ki kia soko. Tua bhingi kulondekesa o henda mu ima i tu bhanga. Se tu mona kuila, phang’ietu ua kambe kúdia ni izuatu, ki tua tokala kuzuela ngó, tua mu zolo. (Tiiaku 2:15, 16) Kiene ue kimoxi, tu bhinga kua Nzambi phala kubhana dingi akalakadi mu sidivisu iê. Maji, mukonda dia henda ietu kua Muene ni ku jivizinhu jetu, tu kalakala ni kusuina mu sidivisu ia kuboka.​—Matesu 9:38.

6, 7. (a) Ihi ilombolola o kizuelu ‘o henda ki i kale ia makutu?’ (b) Athu ebhi a londekesa o henda ia makutu?

⁶ O poxolo Nzuá uambe kuila, o henda ietu ia tokala “i kala henda ia kidi, i [di londekesa] jinga mu ima ioso i tu bhanga.” Mu kiki, o Bibidia iamba kuila, “o henda ki i kale ia kádia mba ia makutu.” (Loma 12:9; 2 Kolindo 6:6) Sai bhabha, o muthu u mesena kulondekesa o henda. Maji o kuila, o henda ié ia kidi muene? Ima iahi i mu bhangesa kulondekesa o henda? O henda se a i londekesa mu mangonha, ki henda, kana. O henda ia makutu ki iala ni valolo.

⁷ Tu mone o phangu ia athu a londekesa o henda ia makutu. Kioso Satanaji kia zuela ni Eva mu jaludim ia Edene, o ima ia zuela iedile kala ua mesenene o mbote ia Eva. Maji, o ibhangelu ia Satanaji ia londekesa kuila, muene ka mesenene o mbote ia  Eva. (Dimatekenu 3:4, 5) Kioso Davidi kiexile sobha, muene ua kexile ni dikamba a mu ixanene Ahitofele. Maji, Ahitofele ua bhange ufe kua Davidi phala o mbote iê. O ibhangelu iê ia londekesa kuila, muene kexile dikamba dia kidi. (2 Samuuele 15:31) Mu izuua ietu, o alunguludi a kidi ni ió a bheka jimvunda mu kilunga, “ene mu kubhomba mixima ia athu,” bhu kaxi ka kuzuela kuâ. (Loma 16:17, 18) Ene a tena ku di londekesa kala a suua o jiphange, maji mu kidi, a di banza ngó ene.

8. Ia lungu ni henda, ihi i tua tokala kudibhuidisa?

⁸ O henda ia makutu i bhekesa jisonhi mukonda, athu a i londekesa phala ku nganala akuâ. Tu tena ku nganala o athu, maji Jihova kana. Jezú uambe kuila, akua mangonha a-nda kua balakala o kufua. (Matesu 24:51) Kála jiselevende ja Jihova, ki tu mesena kulondekesa henda ia makutu. Mu kiki, kima kiambote kudibhuidisa: ‘O kuila o henda iami ia kidi, inga ngi mukua luímbi ni mukua makutu?’ Tu mone divua dia maukexilu u tu tena kulondekesa kuila, ‘o henda ietu ki ia kadia mba ia makutu.’

9. O henda ia kidi ia-nda tu suinisa kubhanga-hi?

⁹ Sanguluka mu kusidivila akuenu, né muene se athu ka mu ku mona. Tua tokala kukala ni ukexilu ua kubhanga o mbote ku athu, né muene se akuetu ka-nda kuijiia o kima ki tua bhange. (Tanga Matesu 6:1-4.) Ananiia ni Safídia ka londekesa ukexilu uambote. Kioso ene kia sangela kima, a mesenene kuila, o athu ejiia o kitadi kia bhanene. Ene a tange makutu ia lungu ni kitadi kia sangela. Mukonda dia kulondekesa o mangonha, Jihova ua a buikisa. (Ikalakalu 5:1-10) Maji se tu zola o jiphange jetu ni muxima uoso, tua-nda sanguluka mu kua bhangela o mbote sé ku ki tangela akuetu. Tu tena kukaiela o phangu ia jiphange ene mu kuatekesa o Kibuka Kia Utuminu ku sokejeka o kudia mu nzumbi. Ene kene mu sota kijingu mba kiximanu, ka xikina kuzuela ku athu o ikalakalu ia bhanga.

10. Kiebhi ki tu tena kuxila akuetu?

¹⁰ Sota kuxila akuenu. (Tanga Loma 12:10.) Jezú ua xila o jipoxolo jê mu ku a sukula o inama. (Nzuá 13:3-5, 12-15) Tua tokala kubhanga nguzu, phala kukala athu a lenduka kála kiexile Jezú, ni kusidivila akuetu. Kioso Jezú kia a sukula o inama, o jipoxolo ka tendela kiambote se mukonda diahi. Ene a mateka ngó kutendela kiambote kioso kia tambula o nzumbi ikola. (Nzuá 13:7) Tu xila akuetu, kioso ki tu kamba kubanza kuila tua beta-o-kota, mukonda tua dilongo kiavulu, tuala ni kitadi kiavulu, mba mukonda dia kukala ni maujitu mu kilunga. (Loma 12:3) Kioso akuetu kia a ximana, ki tu tokala kukala ni difuba, mu veji dia kiki, tu sanguluka, né muene se tu mona kuila, tua fuamene ue ku tu ximana.

11. Mukonda diahi tua bhingi kuximana akuetu ni muxima uoso?

¹¹ Ximana akuenu ni muxima uoso.  Sota kuximana akuenu mu ima ia bhanga. Tuejiia kuila o kiximanu ki ‘bhanga mbote’ ku athu oso. (Efezo 4:29) Maji tua mesena kuximana akuetu mu kidi. Ki tu tokala ku ki bhanga ni mangonha. Mu kifika, kioso mukuetu kia lueza, mu veji dia mu kuximana mu mangonha, kima kiambote ku mu kuatekesa. (Jisabhu 29:5) Se tu ximana muthu, anga tu mu longolola kioso kia tu bhana dikunda, tua mu londekesa kuila tu akuâ mangonha. Poxolo Phaulu ua londekesa o henda ia kidi. Kioso kia sonekena o Jikidistá mu mbanza ia Kolindo, muene ua a ximana mu ima ioso iambote iexile mu bhanga. (1 Kolindo 11:2) Maji kioso kia bhingile ku a bazela, ni henda ioso muene ua bhana itendelesu mu ukexilu ua tokala.​—1 Kolindo 11:20-22.

12. Kiebhi ki tu tena kulondekesa o henda ia kidi kioso ki tu zalela akuetu?

¹² Kala ni ukexilu ua kuzalela akuenu. Jihova ua mesena kuila tu kala ni ukexilu ua kubhana, ni ku kuatekesa o jiphange jetu. (Tanga 1 Nzuá 3:17.) Maji tua tokala ku bhanga kiki, sé kumesena kuila akuetu a tu vutuila o mbote i tu bhanga. Tu tena ku dibhuidisa: ‘O kuila ngene mu kuixana ngó m’onzo iami o makamba ni ió ala ni maujitu mu kilunga? O kuila ng’ixana ngó athu u ngejiia kuila, mungu a-nda ng’ixana ue? Inga ngene mu kuixana ue o athu ka tena ku ngi bhana kima?’ (Luka 14:12-14) Sai bhabha, phange u batula kiaiibha o maka, anga u tu bhinga kikuatekesu, mba phange u tuene mu kuixana ku bhata dietu, kene mu londekesa kisakidilu. Ihi i tueji bhanga? Jihova u tu ambela:“D’idikizienu usonhi mudienu, kala muthu a tambulule mukuâ mu bhata diê sé kuditata.” (1 Phetele 4:9) Tu sanguluka dingi se tu bhanga o mbote ku akuetu ni muxima uoso.​—Ikalakalu 20:35.

13. (a) Thembu kuxi tua bhingi kulondekesa muanhu? (b) Ihi i tua tokala kubhanga phala kukuatekesa o athu a zoza mu nzumbi?

¹³ Kuatekesa ió a zoza mu nzumbi. O Bibidia iamba: “Kuatekesenu oso a bhuila mu kuxikana, athu a lendukidienu ene oso.” (1 Tesalonika 5:14) Phange javulu a zozele mu nzumbi, a kituka athu a kulu mu nzumbi. Maji, sai iá a bhingi hanji kua kuatekesa ni henda. Kiebhi-phe ki tu a kuatekesa? Tu tena ku a kuatekesa bhu kaxi ka Bibidia,  mu ku boka nau, mba mu kua evua. Ki tu tokala kubanza ngó kuila phang’etu ua “suina” mu nzumbi, mba ua “bhuila”. Mu veji dia kiki, tua tokala kulembalala kuila, etu enioso tu akua ituxi. Sumbala tu bhanga ioso phala kubhanga o kima kia tokala, maji né kiki tu tondala. Katé muene poxolo Phaulu ua xikina kuila uexile ni itondalu. (2 Kolindo 12:9, 10) Etu enioso tua bhingi ku di kuatekesa.

14. Ihi i tua tokala kubhanga phala kukala ku paze ni jiphange jetu?

¹⁴ Kala ku paze ni athu oso. Kima kiambote kukala ku paze ni jiphange jetu. Né muene se tu divua kuila, a tu talatala kiaiibha, tua tokala kubhanga ioso, phala kukala ku paze ni mukuetu. (Tanga Loma 12:17, 18.) Se tua luualesa muthu, tua bhingi kubhanga ioso phala ku mu bhinga o muloloki. Maji tu ki bhanga ni muxima uoso. Mu kifika, mu veji dia kuzuela: “Kiaiibha o kudivua kiki.” Tua tokala kuxikina kuila tua tondala, ni ku mu tangela: ‘Ngi loloke mu kuzuela kima kia ku luualesa.” Kima kiambote ue kukala ku paze mu ukaza. Kima kiaiibha o makaza ku di londekesa ku athu kuila, a di zolo, maji kubhata ka di zuelesa kiambote, a di xinga, mba a di beta.

15. Kiebhi ki tu tena kulondekesa kuila, tua loloka akuetu ni muxima uoso?

¹⁵ Loloka akuenu ni muxima uoso. Se muthu ua tu zuela kiaiibha, tu mu loloka, ki tu mu bhake o phonzo. Tu bhanga kiki né muene se o muthu kejiia kuila, ua tu xingi. Tua bhingi ku di loloka ni muxima uoso. O Bibidia i zuela: “Mu londekesa jinga henda ienu mu ku di kuatekesa kala muthu ni mukuâ. Mu kuata muanu ua kubhanga kioso ki mua tena mu ku di bhaka mu usoko ua kuongama kua mi bhana o [nzumbi], mu dijikita diê dia paze.” (Efezo 4:2, 3) Phala kuloloka ni muxima uoso, ki tu tokala ue kubanza kiavulu mu ima ia tu bhange mukuetu. O Bibidia iamba kuila, o henda “ki  iene kufika ima iaiibha.” (1 Kolindo 13:4, 5) Mu kidi, se tu bhaka phonzo, tua-nda zanga o ukamba uetu ni jiphange jetu, ni ukamba uetu ni Jihova. (Matesu 6:14, 15) Tu londekesa kuila, tua loloka mu kidi, kioso ki tu sambela o muthu ua tu luualesa.​—Luka 6:27, 28.

16. Kiebhi ki tu tena kuta ku pholo o ibhindamu ia akuetu?

¹⁶ Ta ku pholo o ibhindamu ia akuenu. Kioso kia tu bhana kikalakalu mu kilunga kia Jihova, tu londekesa kuila o henda ietu ia kidi, mu ku kamba kusota o ‘kubhanduluka kuetu maji o kubhanduluka kua akuetu.’ (1 Kolindo 10:24) Mu kifika, mu iônge ietu ia makota, o alondekexi ene a bhixila selu ku kididi kia kiônge, maji ka sola o ididi ku pholo phala ene ni miji iâ. Mu veji dia kiki, ene a xisa o ididi ku pholo phala akuâ, anga a xikama mu ididi mua-nda kalakala. Mu kubhanga kiki, ka sota o mbote iâ, maji a londekesa o henda ia kidi. Kiebhi ki tu tena kukaiela o phangu ia jiphange jiji?

17. Se phange ua te kituxi kia dikota, o henda ia kidi ia-nda mu suinisa kubhanga-hi?

¹⁷ Fisala ni kueha o ituxi. Sai athu a tele kituxi kia dikota, a ki sueka. Nange a bhange kiki mukonda dia jisonhi, mba ka mesenene kuluualesa akuâ. (Jisabhu 28:13) Maji, kima kiaiibha kusueka o kituxi mukonda, kubhanga kiki, kubhekela malamba ku muthu ua tele o kituxi ni ku akuâ. Mukonda diahi? Mukonda Jihova ka-nda besoala dingi o kilunga ni nzumbi iê ikola. Mukonda dia kiki, mu kilunga ki mua-nda kala kutululuka. (Efezo 4:30) Se phange ua te kituxi kia dikota, o henda ia kidi ia-nda mu suinisa kuzuela ni tufunga, phala kutambula o kikuatekesu kia tokala.​—Tiiaku 5:14, 15.

18. Mukonda diahi o henda ia kidi iala ni valolo ia dikota?

¹⁸ O henda ia beta-o-kota, o idifua ia mukuá ndenge. (1 Kolindo 13:13) I kuatekesa o athu kumona se a nanhi o akaiedi a kidi a Kristu, ni kumona kuila, se a nanhi a mu kaiela Jihova, o Otho ia henda. (Efezo 5:1, 2) Phaulu uambe kuila, se kexidié ni henda, keji kala kima. (1 Kolindo 13:2) Mukonda dia kiki, kala muthu mudietu a ‘londekese o henda ia kidi mu ibhangelu ié.’