1, 2. (a) Mbote iebhi i tu tena kukatula mu phangu ia kukolokota kua Ngidiione ni 300 ja masoladi mê? (Tala o foto ia dianga.) (b) Kala kilondekesa o divulu dia Luka 21:19, mukonda diahi o kukolokota kuala ni valolo?

XINGANEKA o ita ia dikota ia bhangele akua Izalaiele ni jinguma jâ, kioso o Mufundixi Ngidiione kiexile ku pholo dia kibuka kia masoladi. Mu usuku, Ngidiione kumoxi ni masoladi mê, endele 32 a ji kilómetulu, mu kuzoka ni akua Midiiana ni jinguma ja mukuá! O Bibidia i tu tangela o izulukutu ia bhitile. Iene izuela: “Ngidiione anga u tula ku Njolodá hé u zaúka, ni muene ni hâma jitatu ja mala ala-nê kumoxi, a bhuila.” Maji ene ka tolele luua o jinguma jâ, ene a tokalele kubhânga hanji ni 15.000 a masoladi. Ku mivu iavulu, o jinguma jiji ja zukutisile akua Izalaiele. Mukonda dia kiki, ene ka tokalele kubhuila mba ku lembua. Mu kiki, Ngidiione ni masoladi mê, a kolokota mu kuzoka ni jinguma jâ. Mu kusuka-ku, ene a tolola o jinguma!​—Afundixi 7:22; 8:4, 10, 28.

² Etu ué tua mu luua ita ia dikota. O jinguma jetu: Satanaji, o mundu iú ua iibha, ni ukexilu uetu ua ituxi. Athu avulu mudietu, a mu bhânga kiá ni jinguma jiji mu mivu iavulu. Ni  kikuatekesu kia Jihova, tuene mu tolola jinguma javulu. Maji o ita ki ibhu luua, tuene mu luua hanji. Saí ithangana, nange tu bhuila. Mba nange tu bhuila mu kukingila o dizubhilu dia mundu iú ua iibha. Jezú ua bhana o kitendelesu kia kuila, mu izuua i sukidila-ku, eji tu zukutisa kiavulu. Maji muéne uambe ué kuila, se tu kolokota, tu tena kutolola o izukutisu ioso. (Tanga Luka 21:19.) O kukolokota ihi? Ihi ia-nda tu kuatekesa o kukolokota? Ihi i tu tena ku di longa mu phangu ia athu a kolokota? Ni kiebhi ki tu tena kuehela kuila ‘o kukolokota kutenese o kikalakalu kiê?’—Tiiaku 1:4.

3. O kukolokota ihi?

³ Mu Bibidia, o kizuelu kukolokota, ki kilombolola ngó kuehela kima kioso kioso kubhita, mba kusuína mu ithangana ia ibhidi. O kizuelu kiki, kia lungu ni ukexilu ua kubanza, ni kiebhi ki tu divua kioso ki tu dibhana ni izukutisu. O kukala ni ukexilu ua kukolokota, ku tu kuatekesa kusuína, kukala fiiele, ni kulondekesa muanhu. Saí divulu dizuela kuila, o kukolokota ku tu kuatekesa kusuína mu ithangana ia izukutisu, ku tu kuatekesa ué kukala ni kidielelu kia dikota. Né muéne mu izukutisu ia bhonzo, o kídifua kiki, ki tu kuatekesa kusuína. O kukolokota, ku tu kuatekesa kutolola o izukutisu ietu, ni kuxinganeka mu ukamba uetu ni Nzambi, mu veji dia kubanza ngó mu ibhidi ietu.

4. Mukonda diahi tu zuela kuila, o henda i tu bhangesa kukolokota?

⁴ O henda, i tu kuatekesa kukolokota. (Tanga 1 Kolindo 13:4, 7.) O henda i tu kuatekesa mu maukexilu ebhi? O henda ietu kua Jihova, i tu kuatekesa kukolokota mu ibhidi ioso i moneka. (Luka 22:41, 42) O henda ietu ku jiphange jetu, i tu kuatekesa ku a loloka, kioso kia tu bhanga ima ia iibha. (1 Phetele 4:8) O kuzola kaza dietu, ku tu kuatekesa kukolokota mu “jingongo” jene mu bhita na-ju o makaza oso, katé muene ni ió a zediua. Ku tu kuatekesa ué kusuínisa o ukaza uetu.​—1 Kolindo 7:28.

5. Mukonda diahi Jihova, muene ngó u tena ku tu kuatekesa kukolokota?

⁵ Bhinga kua Jihova phala n’a ku suínise. Jihova muene “o Nzambi mukua kubhana o kinhenge ni kubhuisa o uôma.” (Loma 15:5) Muéne uejiia kiambote o ibhidi ietu, kiebhi ki tu divua, ni kiebhi kia tu sase. Mu kiki, muéne uejiia kiambote o ima i tua bhindamena phala kukolokota. O Bibidia izuela: “Muene u bhanga o vondadi ia ió oso a mu kala ni uoma; uívua nzongo iâ, ia kudikola, hé u a bhulula.” (Jisálamu 145:19) Kiebhi Nzambi kia-nda tambuijila o misambu ietu, se tu mu bhinga nguzu phala kukolokota?

6. Kala kia ki kanene mu Bibidia, kiebhi Jihova kia tu bhana “ditundilu dia kutena kubhita,” kioso kia tu zukutisa?

⁶ Kioso ki tu bhinga kua Jihova phala ku tu kuatekesa o kukolokota, muéne u tu kanena “ditundilu dia kutena kubhita.”(Tanga  1 Kolindo 10:13.) Kiebhi kia bhanga kiki? Saí ithangana, muéne u bhuisa o kizukutisu. Maji mu veji javulu, muéne u tu bhana o nguzu i tua bhindamena, phala “kukolokota mu ima ioso, ni kuxididika.” (Kolose 1:11) Kuma muéne ua tuijiia kiambote, Jihova ka-nda kuehela ku tu zukutisa katé kia tundu o nguzu ietu.

7. Bhana kifika kilondekesa se mukonda diahi tua bhingi ku di longa o Mak’â Nzambi, phala kukolokota.

⁷ Ehela o milongi ia Nzambi kusuínisa o kixikanu kiê. Mukonda diahi o milongi ia Nzambi iala ni valolo? Mu kifika, phala kubanda o mulundu ua dikota katé ku disukilu, o mukuá kubanda o milundu ua tokala kudia kiambote, phala kukala ni nguzu. Kiene ué kimoxi, phala kukolokota ni kutambula o mabesá a tu kanena, tua bhingi ku di longa o Mak’â Nzambi. Tua tokala kukatula kithangana kia soko phala ku di longa ubheka uetu, ni kuia mu iônge. O kubhanga o ima íii, kua-nda tu kuatekesa kukala ni kixikanu kia kolo.​—Nzuá 6:27.

8, 9. (a) Kala kilondekesa o divulu dia Jobe 2:4, 5, maka ahi a moneka, kioso ki tu dibhana ni izukutisu? (b) Ihi i u tena kuxinganeka, kioso ki u dibhana ni ji tendasá?

⁸ Xinganeka mu ufiiele uê kua Nzambi. Kioso ki tu bhita ni izukutisu, tu tala hadi iavulu. Maji saí dingi kima. O ufiiele uetu kua Nzambi, a mu u polovala. O ukexilu uetu ua ku dibhana ni izukutisu, ulondekesa se tu xikina o Ungana ua Jihova, mba kana. Kiki ki bhita kiebhi? Satanaji, o nguma ia Nzambi, ua bhukumukina o Utuminu ua Nzambi. Muéne ua xonguena Jihova mu kuzuela kuila, o athu a sidivila ngó Nzambi mukonda dia jimbote jene mu tambula. Satanaji uambe: “O muthu ioso iala na-iu u i bhana mu ku kula o muenhu uê.” Ia lungu ni Jobe, Satanaji uambe: “Sunununa ngó lukuaku lué, u mu kuate hanji mu ifuba ni mu misuínhi, u mone mba muene ka-nda ku ku xonguena muène bhu pholo ié!” (Jobe 2:4, 5) O kuila Satanaji ua lungulula kiá o ibanzelu iê, tundé kia zuela o ima íii? Kana! Mu kubhita mivu iavulu, kioso Satanaji kia mu kaie ku diulu, muéne ua kexile mu tatela hanji o jiselevende ja fiiele ja Nzambi. (Dijingunuinu 12:10) Satanaji uene mu tatela hanji o athu kuila, ene a sidivila ngó Nzambi mukonda dia jimbote jene mu tambula. Muéne ua mesena kuila, tu bhukumukina o ungana ua Nzambi, ni tu bhuile mu ku Mu bheza.

⁹ Kioso ki u dibhana ni tendasá, xinganeka mu maka iá: Satanaji ni madimonho, ala ku mbandu imoxi. Ene a mu mona se ihi i ua-nda sola, ene a mesena kiavulu kuila, u bhuila. Ku mbandu ia mukuá, kuala Jihova, Sobha ietu Jezú Kristu, o athu a a undu, a a fukununa kiá, ni mazunda a ji anju. Ene a mu mona ué o nguzu i ua mu bhanga, maji a mu ku suínisa phala ku ditunda kiambote! Ene a sanguluka kiavulu mu kumona kuila, eie u tena kukolokota mu ufiiele uê kua Jihova. Mu kusuluka, eie uivua o dízui dia Jihova. Muéne u zuela: “Dimuka mon’ami, u tanese o muxima uami, phala ngi kale ni kia ku vutuila oso a ngi tembula.”​—Jisabhu 27:11.

10. Kiebhi ki u tena kukaiela o phangu ia Jezú, mu kuxinganeka mu mabesá ijila mu kukolokota?

 ¹⁰ Xinganeka mu mabesá. Xinganeka kuila, eie ua mu kuenda njila. Mu kuenda o njila, eie ua tokala kubhita mu muxitu ua dikota. O kididi kioso kia vundu. Maji eie uejiia kuila, se u kolokota mu kuenda katé ku disukilu dia muxitu, ua-nda mona o muanha. Tu tena kusokesa o muenhu uetu, ni njila íii ia vundu. Nange eie u bhita mu ithangana ia bhonzo, anga u mona kuila, kuala dingi ni nguzu phala kukolokota mu ku dibhana ni ibhidi íii. Nange kiene kia divuile ué Jezú. Kioso kia mu jibha ku taka, a mu sebhulula, muéne ua kexile mu kuívua ndolo iavulu. Nange, kiki kiexile o kithangana kia bhonzele dingi ku muenhu uê! Ihi ia mu kuatekesa kukolokota? O Bibidia izuela kuila, muéne ua kexile “mu kusuua o ngalasa ia mu idikiza.” (Jihebeleu 12:2, 3) Jezú ua kexile mu xinganeka mu mabesá eji tambula, mukonda dia kukolokota kuê. Muéne uejidile ué kuila, o kukolokota kuê, kueji kuatekesa kuzelesa o dijina dia Nzambi, ni kuzokela o ungana uê. Muéne uejidile kuila, o izukutisu ki ieji nangenena, maji o mabesá eji tambula, eji nangenena katé ku hádia ni hádia. Nange uene mu dibhana ni ibhidi iavulu, maji lembalala kuila, o ibhidi íii, ki ia-nda nangenena.

11. Mukonda diahi kima kiambote kuijiia o misoso ia ‘athu a kolokota?’

¹¹ K’etu ngó tua bhingi kukolokota. Poxolo Phetele ua suínisa o Jikidistá kukolokota mu izukutisu ia Satanaji. Muéne uambe: “Kolokotenu-phe mu kuxikana, mbé mu tene kubhânga ni Diabhu, kuma mua k’ijiia kuila jiphax’ojo jene jimoxi ni jala kubhita-naju o jiphange jenu ja xikana, jala mu ngongo.” (1 Phetele 5:9) O misoso ia ‘athu a kolokota,’ i tu kuatekesa kuijiia se ihi i tua tokala o kubhanga phala kukolokota mu ufiiele uetu. I tu bhangesa ué kudielela kuila, tua-nda ditunda kiambote mu ku dibhana ni izukutisu, ni kuila, Nzambi ua-nda besoala o ufiiele uetu. (Tiiaku 5:11) Tua-nda di longa phangu ia athu a kolokota. ^[1]— Tala ku disukilu dia milongi.

12. Mbote iebhi i tu katula mu phangu ia jixelube akexile mu Edene?

¹² O jixelube, ji-anju jonene. Kioso Adá ni Eva kia bhukumukina Nzambi, Jihova ua tumina jixelube kubhanga kikalakalu mu ixi. O kikalakalu kiki, ki ki difuile ni kia kexile mu bhanga ku diulu. O phangu ia jixelube, i tena ku tu suínisa kukolokota, kioso kia tu bhana kikalakalu kia bhonzo. O Bibidia i zuela kuila, Jihova ua te “jixelube ku mutundila-kumbi ua kadíbhia kia Edene, ni xibhata ia mulengu u lunga kuku, u lunga koko, mu kuxita o njila iia ku muxi ua muenhu.”  ^[2] (Tala ku  disukilu dia milongi.) (Dimatekenu 3:24) O Bibidia ki i zuela kuila, o jixelube a divu kia iibha, mukonda dia kikalakalu kia tambuile. Ene ka divuile ué kala, o kikalakalu kiki, ki kia fuamene phala ene, mukonda dia kukala ji-anju jonene. Ene ka luuala, né kubhuila. Mu veji dia kiki, ene a kolokotele mu kubhanga o kikalakalu kiâ katé ku disukilu, kioso kia mateka o Dilúvio. Nange mu kubhita 1.600 ja mivu ndenge.

13. Ihi ia kuatekesa Jobe kukolokota mu ibhidi?

¹³ Jobe uexile diiala dia fiiele. Saí ithangana, nange u divuua kia iibha, mukonda saí ndandu mba dikamba dia kuzuela kia iibha. Nange u divua kia iibha mukonda ua mu kata, mba ua fundu ndandu ia kazola. O phangu ia Jobe, i tena ku kusuínisa mu ibhidi ioso ioso i u dibhana na-iu. (Jobe 1:18, 19; 2:7, 9; 19:1-3) Jobe kejidile se mukonda diahi ua kexile mu bhita ni ibhidi iavulu, maji né kiki, muéne ka bhuila. Ihi ia mu kuatekesa kukolokota? Jobe ua zolele Jihova ni muxima uoso, mu kiki, muéne ka mesenene ku mu luualesa. (Jobe 1:1) Jobe ua mesenene kusangulukisa Nzambi, ki kale mu ithangana iambote mba mu ithangana ia bhonzo. Jihova ua kuatekesa Jobe kuijiia o kutena Kuê, mu ku mu tangela ia lungu ni ibhangelu Iê. O ima íii, ia bhana dingi kidielelu kua Jobe kuila, mu kithangana kia tokala, Jihova ueji zubha o ibhidi ioso ia kexile mu bhita na-iu. (Jobe 42:1, 2) Kiene kia bhiti. “Jihova anga u lungulula kikexilu kia Jobe, . . . u mu bhana mu luiadi ima ioso ia kexile na-iu kiá ku dimatekenu.” Jobe anga “ua kuka ua kikidila, izuua ia mu kumu.”​—Jobe 42:10, 17.

14. Kala kilondekesa o divulu dia 2 Kolindo 1:6, kiebhi o kukolokota kua Phaulu kua kuatekesa akuâ?

¹⁴ Poxolo Phaulu. O kuila a mu ku zukutisa kiavulu? Se u kafunga ka kilunga mba ka ilunga, o kuila u bhuila mukonda dia kubhanga ikalakalu iavulu? Se kiene, o phangu ia Phaulu i tena ku ku kuatekesa. Phaulu a mu zukutisile kiavulu. Muéne ua thandanganhele kiavulu ni jiphange mu kilunga.(2 Kolindo 11:23-29) Maji Phaulu ka bhuila, mukonda  dia kiki, o phangu iê ia suínisa akuâ. (Tanga 2 Kolindo 1:6.) Kiene ué kimoxi, o kukolokota kuê, ku tena kukuatekesa o jiphange ja mukuá kukolokota ué.

15, 16. (a) ‘Kikalakalu’ kiebhi ki tenesa o kukolokota? (b) Bhana phangu ilondekesa se kiebhi ki tu tena kuehela o kukolokota ‘ku tenesa o kikalakalu’ kiê.

¹⁵ O dixibulu Tiiaku ua soneka: “O kukolokota kuenu-phe suinenu na-ku, phala ku mi zubhile kikalakalu kiê, mbè mu tenene, mu kale kivimba, sè kima kia mi kambe.” (Tiiaku 1:4) Kiebhi ki tu tena kuehela o kukolokota ku tenesa o ‘kikalakalu kiê’ ko kuetu? Kioso ki tu bhita ni ibhidi, nange tu mona kuila, tua bhingi kulondekesa dingi muanhu, ni henda. Kioso ki tuia ni kukolokota mu ibhidi, tu londekesa dingi o ídifua íii. Mukonda dia kiki, tu kala tu Jikidistá jambote.

¹⁶ Kuma o kukolokota ku tu kuatekesa kukala tu Jikidistá jambote, etu ki tu xikina kuxibhaka o itumu ia Jihova mukonda dia ibhidi. Mu kifika, se ua mu bhanga nguzu phala ku xinganeke mu ima ia ufusa, kana kubhuila! Bhinga kua Jihova phala ku ku kuatekesa kudituna o ibanzelu ia iibha. O kuila saí muthu ku muiji uene mu ku zukutisa? Kana kubhuila! Kolokota mu kusidivila Jihova. Se u bhanga kiki, ua-nda dielela dingi kua Jihova. Ejiia kuila, se tua mesena kukala ni ukamba uambote ni Nzambi, tua tokala kukolokota.​—Loma 5:3-5; Tiiaku 1:12.

17, 18. (a) Bhana kifika, kilondekesa o valolo ia kukolokota katé ku disukilu. (b) Kuma o dizubhilu dia zukama, kidielelu kiahi ki tua tokala kukala na-kiu?

¹⁷ Ki tu tokala kukolokota ngó mu kithangana kiofele, maji tua tokala kukolokota katé ku disukilu. Xinganeka o baluku ia mu boba mu menha. Phala kubhuluka, o athu a tokala kuzoua katé ku sámbua. Se muthu u bhuila kioso kia mateka o kuzoua, ua-nda boba mu menha. Kiene ué kimoxi, se o muthu u kolokota mu kuzoua, maji u bhuila ande dia kubhixila ku sámbua, ua-nda boba ué. Se tua mesena kukala ku mundu ua ubhe, tua tokala kukolokota katé ku disukilu. Tu kaiele o phangu ia poxolo Phaulu, uambe: Etu “ki tu kuata usudi.”​—2 Kolindo 4:1, 16.

¹⁸ Kála kia bhitile ni Phaulu, etu tuejiia ni kidi kioso kuila, Jihova ua-nda tu kuatekesa kukolokota katé ku disukilu. Phaulu ua soneka: “Mukonda eme nga tetuluka kuila kana-ku kima ki tu batula ku henda ia Nzambi. Né kalunga, né muenhu; né ji-anju; né atumini mba makota ma ji-anju; né ima ia kindala, né ima ia hadia; né kusuina, né o mundu uala ku thandu dietu, né ima iala bhoxi-elele. Né kima dingi kioso-kioso kia di bhange, kana-ku kima ki tena ku tu batukisa ku henda ia Nzambi, iene mua Kristu Jezú.” (Loma 8:37-39) Mu kidi, saí ithangana tua-nda bhuila. Maji tua tokala kukolokota mu kukaiela o phangu ia Ngidiione ni masoladi mê. Sumbala a bhuidile, maji a kolokota. Mu kidi, ene a kolokota ni ku “kaia” o jinguma jâ.​—Afundixi 8:4.