JIHOVA mukuá kubhana. Ioso i tuala na-iu i tunda kua muene. Muene uavu ioso mu ixi, u tu kuatekesa kukala ku muenhu bhu kaxi ka ima iii. (Jisálamu 104:13-15; Ajeu 2:8) Mu Bibidia tu tena ku dilonga kiebhi Jihova kia dikila o ibhindamu ia mundu uê, bhu kaxi ka ima ia bhange.

1, 2. Mukonda diahi Jihova uene mu tu bhana ioso i tua mesena?

² Mu kifika, Jihova ua dikila akua Izalaiele ni maná, mu 40 a mivu kia kexile mu kikangalakata. (Makatukilu 16:35) Mu kiki, ene exile ni ioso ia bhindamene. (Nehemiia 9:20, 21) Mu kubhita thembu, Jihova ua bhana kutena kua polofeta Elija kua kuizalesa o jimbinda ja maji ja mutudi ua fiiele. O ujitu uenhó ua Nzambi, ua kuatekesa o muhatu ku futa o makongo mê, iú ua subhuka hanji ni kitadi phala kudikila o ibhindamu iê ni ia mon’ê. (2 Jisobha 4:1-7) Tuejiia ue kuila, Jihova ua bhana kua Jezú, o kutena kua ku disa athu avulu. Sai kizuua Jezú ua bhange madiuanu,  a bhangesa o muthu kusanga kitadi.​—Matesu 15:35-38; 17:27.

3. Ihi i tua-nda dilonga mu milongi iii?

³ Jihova u tena kubhanga kima kioso-kioso phala kudikila o ibhangelu iê. Né kiki, muene u bhinga ku jiselevende jê o ujitu ua kubhana ioso ia tena phala kukuatekesa o sidivisu mu kilunga kiê. (Makatukilu 36:3-7; tanga Jisabhu 3:9.) Mu milongi iii, tua-nda tambuijila o ibhuidisu iii: Mukonda diahi tua bhingi kubhana ima kua Jihova? O kuila o jiselevende ja Nzambi m’ukulu, akexile ni ukexilu ua kubhana? Kiebhi o kilunga kia Jihova kiene mu kalakala ni kitadi ki sangela o athu?

4. Ihi i tu londekesa kioso ki tu kuatekesa mu sidivisu ia Jihova?

⁴ Tu bhana ima kua Jihova mukonda, tua mu zolo kiavulu. Kioso ki tu xinganeka mu ioso iene mu tu bhana Jihova, tu divua kuila, tua bhingi ku mu bhana muene. Kiene ué kia divu Sobha Davidi, kioso muene kia jimbulula ihi ia mesenene phala kutunga o thembulu. Davidi uambe kuila, ioso i tu tambula, i tunda kua Jihova, ni kuila, ioso i tu bhana kua Jihova i tunda ku ima ioso ia tu bhana muene.​—Tanga 1 Malunda 29:11-14.

5. Kiebhi o Bibidia ilondekesa kuila, o ku sangela kima kua Jihova, ki bhanga mbandu ia ubhezelu uetu?

⁵ Tu bhana ue kua Jihova mukonda, kiki ki bhanga ue mbandu ia ubhezelu uetu kua muene. Mu kisuma, poxolo Nzuá uevu jiselevende ja Jihova ku mu tangela, exi: ‘Eie u Ngana ietu, Nzambi ietu! Kia ku fuama o kutambula fuma ni ujitu, ni unéne. Mukonda é’Muène ua bhange ioso, mu vondadi ié ua bhangesa kuiza-ku, íi iala-ku.’ (Dijingunuinu 4:11) Sé phata, Jihova ua fuama kutambula o fuma ni ujitu uoso. Mu kiki tua mesena ku mu bhakuila o muenhu uetu. Bhu kaxi ka Mozé, Jihova ua tumu o kifuxi kia Izalaiele kubhana fesa lutatu ku muvu. Mu jifesa jiji, ene a bhingile kubhana kima kua Jihova mukonda, kia bhangele mbandu ku ubhezelu uâ kua Jihova. O mundu uejidile kuila, sé-ku muthu ueji “kuiza ni maku a hatu bhu pholo ia Jihova.” (Matendelelu 16:16) Lelu, o kusangela kima ni vondadi ioso, kubhanga ue mbandu ia ubhezelu uetu. Kubhanga kiki, tua mu londekesa kuila, tu kuatekesa o kikalakalu kia kilunga kia Jihova, ni kuila, tu ki bhana ue valolo.

6. Mukonda diahi kima kiambote kukala ni ukexilu ua kubhana? (Tala o foto ia dianga.)

⁶ Etu ki tu mesena ngó kutambula kima. Maji tua-ndala ue kusangela kima ni muxima uoso. (Tanga Jisabhu 29:21.) Xinganeka kuila, jitata a bhana kitadi kua mon’a. Ni kitadi kiki kia tambula, o mona u katula mbandu, anga u sumba kama phala o jitata jê. O jitata a-nda divua kiebhi? Mba xinganeka kuila, munzangala muboki ua thembu ioso, ua tungu ni jitata jê. Muene u a bhana kitadi phala kufuta o lenda ia inzo mba phala kusumba kúdia. Sumbala o jitata ka mu jijidika kubhanga kiki, maji ene a xikina o kitadi kiê. Mukonda diahi? Mukonda kiki kilondekesa kuila, muene ua a zolo kiavulu. Kiene ue kimoxi, Jihova uejiia kuila, kima kiambote ku mu bhana i tuala na-iu.

7, 8. Phangu iebhi ia tu bhana o mundu ua Nzambi mu ukulu ia lungu ni ku sangela kitadi (a) phala ku tunga kididi kia ubhezelu? (b) phala ku kuatekesa o kikalakalu kia Jihova?

⁷ Bhu kaxi ka Bibidia, tua dilongo kuila o mundu ua Jihova uala ni ukexilu ua kubhana. Sai ithangana a bhana mu ukexilu ua kutunga ididi. Mu kifika, Mozé ua suinisa akua Izalaiele ku sangela kitadi phala kutunga o balaka. Mu ku bhita mivu, kiene ue kia bhangele Sobha Davidi phala kutunga o tembulu. (Makatukilu 35:5; 1 Malunda 29:5-9) Mu mivu ia utuminu ua Sobha Jouaji, o mundu ua bhingile ku sangela kitadi phala ku iudika o tembulu. (2 Jisobha 12:4, 5) Mu hama ia dianga, kuexile nzala ia dikota. Mu kiki, o Jikidistá mu Judeia a bhingile kikuatekesu. Mu kiki, Jikidistá joso a bhana ioso ia tenene kubhana phala ku kuatekesa o jiphange jâ.​—Ikalakalu 11:27-30.

⁸ O mundu ua Jihova uene mu sangela ue kitadi phala ku kuatekesa oso ala kupholo dia ikalakalu. Mu kifika, mu Kitumu kia Mozé, o Jilevita ki jexile ni undundu kala o miji iamukuá mu Izalaiele. Kua bhingile kala muthu u bhana kama phala o Jilevita. Kiki kia kexile mu kuatekesa o Jilevita kubhanga o kikalakalu kiâ mu balaka. (Dialuilu 18:21) Mu hama ia dianga, sai ue muhatu ua bhanene iexile na-iu phala ku kuatekesa Jezú ni Jipoxolo jê.​—Luka 8:1-3

9. Kuebhi kua kexile mu tunda o ima ia kexile mu sangela o jiselevende ja Nzambi?

⁹ M’ukulu, o jiselevende ja Nzambi, a kexile mu sangela kitadi mu maukexilu avulu. Akua Izalaiele a sangela o jimbote ja tundu na-ju ku Ijitu, phala ku kuatekesa kutunga o balaka. (Makatukilu 3:21, 22; 35:22-24) Mu hama ia dianga, sai Jikidistá a sumbisa mábhia, jinzo, ia a bheka o kitadi ku jipoxolo. Ni kitadi kiki, o jipoxolo ja kuatekesa o jiphange a bhindamene. (Ikalakalu 4:34, 35) Jikidistá jamukuá, ja kexile ni kifua kia ku tula kama bhu mbandu, phala ku kuatekesa o ikalakalu. (1 Kolindo 16:2) Ki kale se tu jimvuama mba tu jingadiama, etu enioso tu tena kubhana kima kua Nzambi.​—Luka 21:1-4.

10, 11. (a) (a) Kiebhi ki tu tena kukaiela o ukexilu ua kubhana ua jiselevende ja Nzambi j’okulu? (b) Ihi i u banza ia lungu ni ujitu ué, ua kusangela kima phala o sidivisu ia Nzambi?

¹⁰ Mu izuua ia lelu, nange a tu bhinga ue phala ku sangela kitadi phala ku bhindumuna akuetu. Nange mu kilunga kié, o jiphange a-ndala kuiudika o Kididi kia Ubhezelu, mba a-ndala kutunga kididi kiengi. Mba nange o filiiale ia ixi mu uala ia bhingi ku i iudika. Tu tena ué kusangela kitadi phala kukuatekesa o kiônge kia dikota. Mba nange o jiphange jetu mu mbanza mba mu ixi iengi, a bhiti ni divuua, mu kiki a bhindamena kikuatekesu kietu. O kitadi ki tu sangela, ki kuatekesa ue o akunji a jixi jengi, aboki a katunda, tufunga tua ilunga, ni ió a kalakala mu mbonge ietu ni mu jifiliiale ku mundu uoso. Nange o kilunga kié, mbeji joso kiene mu tumikisa kitadi ku filiiale, phala kukuatekesa kutunga  Ididi ia Iônge ia Makota ni Ididi ia Ubhezelu phala o jiphange mu jixi ja mukuá.

¹¹ Etu enioso tu tena kubhana kima phala kukuatekesa o kikalakalu kia mu bhanga o kilunga kia Jihova mu izuua íii isukidila-ku. Jiphange javulu kioso kia sangela kima, kene mua tumbula o majina mâ. Kioso ki tu ta kitadi mu itutu iala mu Ididi ia Ubhezelu, mba tu tumikisa bhu kaxi ka kijimbuete kietu jw.org, ki tu bhingi kutangela akuetu se kikuxi ki tua bhana. Abha se u divua kuila, o kitadi ki uene mu sangela ki ki soko? Kima kiambote kuijiia kuila, bhu kaxi ka athu a sangela o kitadi, avulu mudiâ kala ni jimbote javulu. Katé muene jiphange kala ni kitadi kiavulu, ene mu kaiela o phangu ia Jikidistá a tungile mu mbanza ia Masedonha. Ene akexile mu “uadiama uâ uazongo,” maji a bhingile ku bhindumuna akuâ ni ujitu uoso.​—2 Kolindo 8:1-4.

12. Ihi i bhanga o kilunga kia Jihova, phala kukalakala kiambote ni kitadi ki sangela o athu?

¹² O Kibuka Kia Utuminu kiene mu londekesa o ufiiele ni unjimu, mu ku kalakala kiambote ni kitadi kiene mu sangela o athu. (Matesu 24:45) O jiphange ala mu kibuka kiki, a samba phala kusola kiambote o ima ni kukalakala kiambote ni kitadi. (Luka 14:28) M’ukulu, o maiala a fiiele akexile mu langa o ima ia sangele o athu, akexile mu bhanga ioso phala ku ngastala o kitadi mu ubhezelu ua Jihova. Mu kifika, Ejidala ua vutuka mu mbanza ia Jeluzaleme ni jimbote ja sangele o sobha ia Pélesa. Kuexile ulu, phalata, ni jimbote ja mukuá dingi. Mu izuua ietu, o jimbote joso jenhojo ji tenesa 100 a mazunda a jidolare. Ejidala ua mono o jimbote jenhojo kala maujitu phala Jihova. Mukonda dia kiki, muene ua bhana itendelesu ia tokala ku akunji, phala ku ji langa kiambote kioso kieji kuendela mu ididi iexile ni iluezu ia jibandi. (Ejidala 8:24-34) Mu kubhita mivu, poxolo Phaulu ua bhongolola kitadi phala kukuatekesa o jiphange akexile mu bhita mu ibhindamu. Muene ua bhange ioso, phala kuijiia kuila o athu eji langa o kitadi, eji ki bhanga mu ukexilu ‘uaiuka, kana ngó bhu pholo ia Ngana, maji ni bhu pholo ue ia athu.’ (Tanga 2 Kolindo 8:18-21.) Lelu, o kilunga kia Jihova, kiene mu kaiela ue o phangu ia Ejidala ni ia Phaulu, mu ku langa kiambote o kitadi kiene mu sangela o athu.

13. Mukonda diahi o kilunga kia Jihova kia lungulula o ima?

¹³ Sai bhabha o muiji u lungulula o ukexilu ua muenhu, phala ku popala dingi kitadi. Mba nange a lungulula o ukexilu ua muenhu phala kubhanga dingi mu sidivisu ia Jihova. Kiene ue ki bhita ni kilunga kia Jihova. Mu izuua ietu, tuene mu mona ikalakalu iavulu ia ubhe mu kilunga. Mukonda dia kiki, tua kexile mu ngastala dingi kitadi, o ki tua tambuile ndenge. Kála ki bhita ku muiji, o kilunga kia Jihova kia soto ndunge ia ku popala dingi o kitadi, ni ku bhebhulukisa o ikalakalu. Maji o jiphange a bhange kiki, mukonda a mesena kukalakala kiambote ni kitadi kiene mu sangela o jiphange ni henda ioso.

14-16. (a) Ihi iene mu bhanga ni kitadi ki tuene mu sangela? (b) O ima i bhanga o kilunga i ku kuatekesa kiebhi?

¹⁴ Avulu a mu bheza Jihova ni ufiiele tundé ukulu, a zuela kuila, lelu o kilunga kia Jihova kia mu tu bhana dingi maujitu, m’ukulu ndenge. Lelu, tuala ni kijimbuete jw.org ni JW Broadcasting. Tua tambula  o Bibidia Tradução do Novo Mundo da Bíblia Sagrada ia ubhe, mu madimi avulu. Ku muvu ua 2014/2015, o Kiônge Kia Dikota ni diambu ‘Diangenu ku Sota o Utuminu ua Nzambi!’ kia bhiti mu ididi ia makota ia malunda a fiti, mu 14 kia jimbanza mu ngongo ioso. Oso a ile mu kiônge kiki, a sangulukile kiavulu!

¹⁵ Avulu a londekesa kisakidilu mu maujitu ene mu bhana o kilunga kia Jihova. Mu kifika, sai dikaza ku Azia dia soneka: “O mbambe ietu ka mbonge kófele. Mu kiki, sai bhabha tu divua ubheka, tu di jimba kuila tuala ni jiphange javulu mu ixi ioso. Maji kioso ki tu tala o vidiu ia mbeji ia JW Broadcasting, tu lembalala kuila tua tokala ku kilunga kia di sanzumuna mu ixi ioso. O jiphange mu kilunga kietu a sanguluka kiavulu ni JW Broadcasting. Tuevu kiá jiphange kuzuela kuila, kioso kia tala o vidiu ia mbeji, a di zukama dingi ku Kibuka kia Utuminu. Kindala a sanguluka dingi mu ku tokala ku kilunga kia Nzambi.”

¹⁶ Ku mundu uoso, a mu tunga ni kuiudika Ididi ia Ubhezelu. Kua kambe bhofele phala kutenesa 2.500. Jiphange ku ixi ia Honduras, ambe kuila mu ukulu ku kala ni Kididi Kia Ubhezelu iexile ngó nzoji, lelu nzoji ia kituka kidi. Ene a soneka: “Kisangusangu kia dikota ku bhanga mbandu ia muiji ua Jihova, ni ku kilunga kiê ku mundu uoso.” Izuelu kala iii tuene mu ivua ue kioso jiphange ki ji tambula o Bibidia mba madivulu etu mu mazui mâ ma-uvualukilu, ni kia tambula o kikuatekesu kia bhita mu mavuua, mba kia mona kuila o sidivisu ia kuboka ni tu makalu mu ididi mu bhita athu avulu,  ia mu ditunda kiambote, mu mbambe iâ.

17. Ihi i tu bhangesa kuxikina kuila, Jihova ua mu kuatekesa o kilunga kiê?

¹⁷ Avulu ki Jimbangi ja Jihova, a di uana mu ku mona o ikalakalu i tu bhanga né muene ni kitadi kia ku sangela ngó. Sai muthu uala ku pholo dia ditenda dia fumana kiavulu, uai mu tala o kididi bhu tuene mu bhanga o madivulu metu. Muene ua diuana mu kuijiia kuila o kikalakalu kioso a kexile mu kibhanga ku athu a dibhakula ngó, ni kuila o kitadi kiene muene ngó ki tuene mu sangela, sé kubhanga ima i bhana kitadi. Muene uixi: “I muene mu bhanga, madiuanu.” Etu tu xikina! Tua kijiia kuila, kiki ki bhita ngó mukonda Jihova u kuatekesa o sidivisu ietu.​—Jobe 42:2.

18. (a) Mabesá ebhi u tu tambula kioso ki tu bhana kima phala ku kuatekesa o sidivisu ia Nzambi? (b) Kiebhi ki tu tena ku kuatekesa o tuana ni maxibulu a Bibidia kukala ni ukexilu ua kubhana?

¹⁸ Jihova ua tu bhana o ujitu ni kithangana kia ku kuatekesa o ikalakalu ia Utuminu. Muene ua tu kanena kuila, se tu kuatekesa muene ua-nda tu besoala. (Malakiia 3:10) Jihova ua tu kanena kuila, se tu bhana ima phala ku kuatekesa o kilunga kiê, tua-nda tambula mabesá. (Tanga Jisabhu 11:24, 25.) Muene u tu tangela ue kuila, tua-nda sanguluka dingi se tu kala ni ukexilu ua kubhana, mukonda “o kubhana kota mu kuzediuisa, o kutambula ndenge.” (Ikalakalu 20:35) Mu kaxi ka ima i tu zuela ni ibhangelu ietu, tu tena kulonga o tuana, ni maxibulu a Bibidia, kiebhi kia tena kukuatekesa o sidivisu ia Nzambi ni ku tambula mabesá.

19. Kiebhi o milongi iii, ia kusuinisa?

¹⁹ Ioso i tuala naiu, Jihova muene ua tu bhana-iu. Kioso ki tu mu vutuila kima, tu londekesa kuila, tua mu zolo ni kuila, tu bhana valolo ku ima ioso iene mu tu bhangela. (1 Malunda 29:17) Kioso akua Izalaiele kia sangela ima phala kutunga o thembulu, ene “a sanguluka ni ima ia bhana mu vondadi iâ, mukonda a i bhana ni vondadi ioso kua Jihova, ni muxima ua tenena.” (1 Malunda 29:9) Tua-nda sanguluka ue kiavulu se mu ima iene mu tu bhana Jihova, tu katula ue kama koso-koso phala ku mu londekesa o kisakidilu kietu.