DOTOLO javulu ni asaki, ene mu kalakala ni athu ala ni mauhaxi a sambukila. Ene a kuatekesa o jihaxi jiji, mukonda a mesena o mbote iâ. Maji ene a bhingi kudilanga, phala o uhaxi ua mesena kusaka, ki ua sambukile. Etu tu abhezi a Jihova, tuala ue mu ukexilu ua difu ni ua jidotolo jiji. Avulu bhu kaxi k’etu, a tungu, a kalakala ni athu ala ni idifua iaibha ia zembe Nzambi. Kiki, ki tena ku tu bhonza kiavulu.

1, 2. Mukonda diahi mu izuua ia lelu o muenhu ua bhonzo phala o jiselevende ja Nzambi? (Tala o foto ia dianga.)

² Mu izuua ia sukina-ku ia mundu iú, athu a kambe kuzola Nzambi, kene mu xila o itumu iê ia lungu ni kia uabha ni kiaiibha. Poxolo Phaulu ua tumbula o maukexilu iá aiibha, kioso kia soneka o mukanda kua Timote. Muene uambe kuila, mu izuua i sukidila-ku o idifua iii ieji moneka kiavulu bhu kaxi ka athu. (Tanga 2 Timote 3:1-5, 13.) Tuejiia kuila o idifua iii iaiibha kiavulu, né kiki, se tu kamba kudilanga tu tena ku kaiela o ixinganeku, uzuelelu ni ibhangelu ia athu a tu kondoloka. (Jisabhu 13:20) Mu milongi iii, tua-nda dilonga kiebhi  o idifua iii ki ia difu ni idifua ia abhezi a Nzambi. Tua-nda mona ue se ihi i tua tokala o kubhanga phala kudilanga ku idifua iaiibha, kioso ki tuia ni kukuatekesa akuetu kuijiia Jihova.

3. O mukanda ua 2 Timote 3:2-5 u londekesa athu a maukexilu ebhi?

³ Phaulu ua soneka kuila, mu izuua ia sukidila-ku, “kuanda kuiza jithembu jabhonzo.” Mu kusuluka muene ua tumbula 18 dia idifua iaiibha ieji moneka mu thembu ietu. O idifua iii, ia difu ngó ni ia tumbula mu divulu dia Loma 1:29-31, maji o izuelu iê mu mukanda kua Timote, ki tu sange dingi mbandu iengi mu Madivulu a Ngeleku. Phaulu ua mateka ni izuelu: “Kuma athu a kà kala.” Maji athu oso keji kala ni idifua ia iibha ia tumbula Phaulu. O Jikidistá ala ni idifua iambote.—Tanga Malakiia 3:18.

4. Kiebhi ki kala o muthu mukuá ukumbu?

⁴ Kioso Phaulu kia zubha kuzuela ia lungu ni athu avulu kukala azodi a ene ngó, azodi a kitadi, muene uambe ue kuila o athu eji kala injenji, akua ukumbu, a vula izala. O athu ala ni idifua iii iaiibha, a fika kuila a beta-o-kota akuâ ndenge. Ene a banza kiki mukonda dia ku uabha kuâ, mauhete, jimbote, mba fuma. O athu iá a kala ni hanji ia ku a ximana ni ku a xila ku akuâ. Sai mukua kutokuesa, ua zuela ia lungu ni athu ala ni idifua iii. Muene uambe: “Ku muxima ene a di mona kala ji nzambi, mu kiki a kala mu ku di bheza.” Sai athu a zuela kuila o ukumbu, uaiibha kinene, mukonda katé muene ni muthu uala ni ukexilu iú, u divua kiaiibha kia mona akuâ kulondekesa o ukumbu.

5. Kiebhi o jiselevende ja Jihova m’ukulu kia londekesa o ukumbu?

⁵ O Bibidia izuela kuila Jihova ua zembe o ukumbu, mba “mesu ma tala ni izala.” (Jisabhu 6:16, 17) Mu kidi o ukumbu mba izala, u fidisa o muthu kukala ni ukamba ni Nzambi. (Jisálamu 10:4) O ukumbu mba izala kidifua kia Diabhu. (1 Timote 3:6) Maji sai jiselevende ja Jihova a mateka kulondekesa o kidifua kiki. Mu kifika, mu mivu iavulu o Sobha Uziia ia Judá uexile fiiele kua Nzambi. Maji o Bibidia izuela: “Kia zubha kiá o ku kituka dizonda, o muxima uê ua di zangeleka katé ki ua zangiua; anga u tondalela Jihova, Nzambi iê.” Sumbala ki ki mu fuamene, maji Uziia uai mu kuoha uasu ua dizumba ku thandu dia kalatódio mu thembulu. Sobha Ezekiia uexile ue fiiele kua Jihova, maji sai kithangana muene ua londekesa ue o ukumbu. Maji mu kubhita thembu muene ua lungulula o ukexilu uê.—2 Malunda 26:16; 32:25, 26.

6. Ihi ieji bhangesa Davidi kudizangeleka? Mukonda diahi ua sulukile mu kulondekesa o kulenduka?

⁶ Sai athu a kala ni ukumbu mukonda dia kuuabha o pholo, kukala ni fuma, uhete ua kuimba, nguzu mba mukonda dia ku a ximana kiavulu ku athu. Davidi uexile ni ima ioso iii, maji muene ua suluka mu kulondekesa o kulenduka ku muenhu uê uoso. Mu kifika, kia jibha Ngoliia, sobha Saulu ua bhana mon’ê phala ku kazala ni Davidi. Maji uambe: ‘Eme-phe nanhi? O kikexilu kiami ngoho kiahi? Mba o muiji ua tat’etu akuahi mu Izalaiele, phala eme ngi kale lelu ngi holome ia muenexi?’ (1 Samuuele 18:18) Ihi ia kuatekesele Davidi kulondekesa o kulenduka? Muene uejidile kuila, kidifua kioso-kioso, uhete mba ujitu uexile  na-u mukonda Nzambi ua londekesele o kulenduka mu ku bhetama phala ku mu mona. (Jisálamu 113:5-8) Davidi uejidile kuila, ima ioso iambote iexile na-iu, ia tundile kua Jihova.—Sokesa ni 1 Kolindo 4:7.

7. Ihi ia-nda tu kuatekesa kukala tu athu a lenduka?

⁷ Kala Davidi o mundu ua Jihova lelu, u sota ue kulondekesa o kulenduka. Tu sanguluka kiavulu mu kuijiia kuila Jihova, o Muthu ua Beta-o-Kota, u londekesa o kulenduka. (Jisálamu 18:35) Tua mesena kukaiela o izuelu iii: ‘Zuatenu muxima ua nengana, ni kunhephuka, ni kubatâma, ni kubelesela, ni kuxididika.’ (Kolose 3:12) Etu tuejiia ue kuila, o henda “ki iene izala, mba ukumbu.” (1 Kolindo 13:4) Kioso akuetu kia mona kuila tu athu a lenduka, nange ene a-nda mesena ue kuijiia Jihova. Mu kifika, o diiala ki Mbangi ia Jihova, u tena kumateka kusidivila Nzambi, mu kumona o uendelu uambote ua muhatu uê. Kiene ue kimoxi, o kulenduka kua jiselevende ja Nzambi, ku tena kubhangesa o athu kuzukama kua Nzambi.—1 Phetele 3:1.

8. (a) Athu a mona kiebhi o ukexilu ua kuxibhaka tata ni mama? (b) Ihi i tendelesa o Bibidia ku tuana?

⁸ Poxolo Phaulu ua londekesa kiebhi o athu kieji di talatala mu izuua isukidila-ku. Muene uambe kuila, o an’a eji xibhaka tata ni mama. Mu izuua ia lelu, madivulu avulu, jifilme, ni minangu mu mitelembe ia izuzumbia, ilondekesa kuila, o kuxibhaka mba kubhukumukina o jitata kima kiambote. Maji, mu kidi, o kuxibhaka o itumu ia jitata, kuzozesa o muiji, o kima kibhangesa o athu kukala ni ukexilu uambote. Athu ejiia kiambote o kidi kiki. Mu kifika, mu Ngeléxia iokulu, se muthu ua betele o jitata jê, keji kala dingi ni maujitu mu sanzala. Mu Utuminu ua Loma, muthu ua betele o jitata jê, a tokalele ku mu kaxtikala kála kiexile mu kaxtikala o ijibhangânga. Mu Mikanda ia Hebalaiku, ni mu Mikanda ia Ngeleku, o Bibidia i tendelesa kuila, o tuana a tokala kuxila o jitata jâ.—Makatukilu 20:12; Efezo 6:1-3.

9. Ihi ia-nda kuatekesa o tuana kubelesela o jitata jâ?

⁹ Ihi i tena kukuatekesa o tuana kubelesela o jitata, né muene se ala mu’axaxi ka athu ene mu xibhaka o jitata jâ? Se o tuana a xinganeka mu ioso iene mua bhangela jinga o jitata, ene a-nda a sakidila ni muxima uoso, ni kumesena kua belesela. O minzangala a tokala kuijiia ue kuila, Nzambi, Tat’etu, ua mesena kuila, ene a belesela o jitata jâ. Kioso o minzangala kia zuela ima iambote ia lungu ni jitata, ene a bhangesa o makamba mâ kuxila dingi o jitata jâ. Mu kidi, se o jitata ka kala ni henda ku tuana tuâ, o tuana a-nda kua bhonza kubelesela o jitata. Maji kioso o minzangala kia divua kuila o jitata jâ a a zolo mu kidi, kiki kia-nda kua kuatekesa kubelesela, né muene mu ithangana ia bhonzo. Sai munzangala a muixana Austin uambe: “Sai bhabha, ngexile ni ibanzelu ia kubhukumukina o itumu  ia jitata jami. Maji o kuxinganeka mu kifua kia jitata jami, kua ngi kuatekesa kiavulu. Ene kexile athu a bhonzo. Akexile mu ngi jimbuluila se mukonda diahi, akexile mu ngi bhana itendelesu. Ene akexile mu ngi bhana mátui, kuzuela kiavulu n’eme. Kuma nga muene kuila, a ngi zolo ni muxima uoso, kiki kia ngi kuatekesa kua belesela.”

10, 11. (a) Idifua iebhi iaiibha ilondekesa kuila, o athu kene mu dizola mudiâ? (b) O henda ilondekesa o Jikidistá ja kidi iia katé bhebhi?

¹⁰ Phaulu ua tumbula ue idifua iengi, ilondekesa kuila, athu keji zola akuâ. Kioso kia zuela kuila, ‘kuxibhaka tata ni mama,’ muene ua tumbula o ukexilu ua ‘kukamba kusakidila.’ Muene ua lungile, mukonda athu a kambe kisakidilu, ka bhana valolo mu ima iambote i bhanga akuâ phala ene. Phaulu ua zuela ue kuila, athu eji kamba ujitu ua Mak’â Nzambi ni kuila, keji kuloloka. Kiki kilombolola kuila, keji mesena kubhanga paze ni akuâ. Eji kala ue akua kunonga, ni akua kubhanga ufe, mu kuzuela ima iaiibha ia lungu ni athu, katé muene Nzambi. Ene eji kala ue akua kutatela ngó akuâ, mukonda eji zuela ngó ima phala kuxidisa o majina a akuâ. *​—Tala ku luiji.

¹¹ O jiselevende ja Jihova ja di tungula mukonda, ene a dilondekesa henda ia kidi. Tundé ukulu, kiene kia di talatala. Mu kidi, Jezú uambe kuila, o kitumu kia kaiiadi kia betele-o-kota, kiexile o kuzola akuetu, kala ki tua di zolo. (Matesu 22:38, 39) Jezú uambe ue kuila, o Jikidistá ja kidi eji ku jijiia ku athu, mukonda dia henda ieji di londekesa. (Tanga Nzuá 13:34, 35.) O Jikidistá ja kidi, a tokala kuzola katé muene o jinguma jâ.—Matesu 5:43, 44.

12. Kiebhi Jezú kia londekesa henda ku athu?

¹² Jezú ua zolele o athu ni muxima uê uoso. Jezú uendele sanzala ni sanzala, phala kubokela o athu o njimbu iambote ia Utuminu ua Nzambi. Muene ua sake o ifofo, o inema, o mabubu ni athu akexile ni mabhute. Muene ue ua fukununa athu a fuile kiá. (Luka 7:22) Jezú ua bhana o muenhu uê phala kubhulula o athu, sumbala avulu a mu zembele. Muene ua kaiela o henda ia Tat’ê ni kuiuka kuoso. Mu ngongo ioso, o Jimbangi ja Jihova a kaiela o phangu Ia Jezú mu kuzola ue o athu.

13. Kiebhi o henda i tu dilondekesa i suinisa o athu kuijiia Jihova?

¹³ Kioso ki tu londekesa ku athu kuila, tua a zolo, kiki kia suinisa kuijiia Jihova. Mu kifika, sai diiala mu ixi ia Tailândia, uai mu kiônge kia dikota. Muene ua diuanene kiavulu, kioso kia mono o jiphange ku di londekesa henda. Kioso kia tula m’onzo iê, muene ua bhingi phala kudilonga o Bibidia ni Jimbangi ja Jihova, luiadi ku semana. Mu kusuluka, muene ua bhana umbangi ku jindandu jê. Kioso kia bhiti mbeji jisamanu, muene ua bhange o mbandu iê ia dianga mu kiônge. Xinganeka: ‘O kuila tua mu londekesa henda ku akuetu?’ Dibhuidise: ‘O kuila nga mu bhanga ioso phala kukuatekesa jindandu jami, athu mu kilunga ni mu sidivisu ia kuboka? O kuila ngi mona o athu kala kiene mua mona Jihova?’

14, 15. Idifua iebhi iaiibha iene mu londekesa o athu? Kiebhi athu avulu ene mu lungulula o idifua iâ?

¹⁴ Mu izuua i sukidila-ku, o athu eji londekesa dingi kidifua kiengi ki tua tokala kulenga. Mu kifika, avulu eji di zemba ni ima iambote. Ene ka kambe ngó ku bhanga o mbote, maji a fidisa akuâ ku i bhanga. Athu iâ, keji kufikisa jihanji, a kaka. Amukuá a thathamana. Ene a bhanga ima sé kuxinganeka kiebhi akuâ kia-nda divua.

¹⁵ Avulu exile kala iama, a lungulula o ukexilu ua mienhu iâ. O madiuanu iâ, a tangele kiá mu Bibidia. (Tanga Izaia 11:6, 7.) O divulu dia Izaia dia zuela ia lungu ni iama ia muxitu kala imbungu ni jihoji a tunga kumoxi ni ku tululuka ni jimbudi ni kana ka ngombe. Mukonda diahi a tululuka? O Bibidia i jimbulula dingi: “Oxi ioso ia kèzala ni kuijiia Nzambi.” (Izaia 11:9) O iama ki i tena ku dilonga ia lungu ni Jihova, maji o kikanenu kiki, kia lungu ni kiebhi o athu kieji lungulula o ukexilu ua mienhu iâ.

16. Kiebhi o Bibidia ia kuatekesa athu kulungulula o ukexilu uâ?

¹⁶ Phange jetu javulu, exile ni ukexilu kala ua imbungu, maji lelu athu a tululuka. U tena ku tanga misoso iii mu mbandu “O Bibidia i Lungulula o Ukexilu ua Athu” iene mu moneka mu kijimbuete jw.org. O athu eza mu kuijiia Jihova, ni ku mu sidivila ka difu ni ió, ku kanga a kuata kidifua kala kia kuxila Nzambi, maji ki kalakala o kutena kua Nzambi-phe, a ditunu-kiu. Athu avulu lelu, a zuela kuila a sidivila Nzambi maji a bhanga ima iavulu iaiibha. Maji o mundu ua Jihova kala ni ukexilu iú,  ene a bhanga ioso phala ku “zuata o muthu uobhe a mu bhangulula mu kidifua kia Nzambi, ki di monekena mu kukala ni muenhu ua kuiuka, ni mu kuzela kua kidi.” (Efezo 4:23, 24) Kioso kia dilonga ia lungu Jihova, o athu a mona kuila a bhingi ku kaiela o itumu iê. Kubhanga kiki, ku a kuatekesa kulungulula o ima ia xikina, ni ukexilu ua kubanza ni kubhanga o ima. Tuejiia kuila, kibhonza phala o muthu kubhanga o ima iii, maji o nzumbi ikola, i kuatekesa o athu a mesena kubhanga o vondadi ia Jihova.

17. Ihi i tua tokala kubhanga phala o athu a iibha ka tu funhise?

¹⁷ Ki kua mu bhonza dingi kumona o athu a sidivila Nzambi ni ió ka mu mu sidivila. Tua bhingi ku di langa ni idifua iaiibha ia athu ka mu sidivila Nzambi, phala ka tu funhise. Tua tokala ku kaiela o kitendelesu kia Jihova kia ku di sondoloka ku athu ala ni idifua i tu sanga mu divulu 2 Timote 3:2-5. Tuejiia kuila, ki tu tena ku di sondoloka ku athu iá mu maukexilu oso. Nange tu kalakala nau bhua moxi, tu dilonga nau mu xikola, mba tua tungu nau. Maji tu tena kudilanga phala ki tu banze kala ene, mba kubhanga o ima ia bhanga. Ihi ia-nda tu kuatekesa? Tu tena kukolesa o ukamba uetu ni Jihova, mu ku dilonga o Bibidia, ni kusola kukala ni makamba a zolo ue Jihova.

18. Kiebhi kia tokala kukala o uendelu uetu phala kukuatekesa o athu kuijiia Jihova?

¹⁸ Etu tua mesena kuila, akuetu a dilonga ue ia lungu ni Jihova. Sota kithangana phala kubhana umbangi, ni kubhinga kua Jihova phala ku kukuatekesa kuzuela o ima ia tokala mu kithangana kia tokala. O ukexilu uetu ua tokala kulondekesa ku akuetu kuila, tu Jimbangi ja Jihova. Mu kusuluka, o uendelu uetu uambote ua-nda bhangesa kuila, athu a bhana kijingu kua Nzambi, ki kokuetu kana. Jihova ua tu longo kuila, “tu ehe o kubhuma ni jihânji jaiibha ja mundu, phala tuende mu ngongo muenhumu ni kilunji, ni kuiuka, ni kuxila Nzambi.” (Tito 2:11-14) Se tu kaiela o phangu ia Jihova ni kubhanga o ima i mu sangulukisa, akuetu a-nda ki mona. Nange sai iá a-nda zuela, exi: “Tua-nda kuia ni enu, mukonda tuene mu kuívua kuila o Nzambi uala ni enu.”—Zakadiia 8:23.