1. Mukonda dyahi tu zwela kwila o ima yoso ya tokala kwa Jihova? (Tala o foto ya dyanga.)

IMA yoso ya tokala kwa Jihova! “O ‘mawúlu mala ku thandu’a mawúlu . . . ni oxi we ni ima yoso yala-mu,’ yoso ya mu tokala.” (Matendelelu 10:14; Dijingunwinu 4:11) Kuma Jihova mwene wa bhange o athu, etu enoso twa mu tokala. (Jisálamu 100:3) Maji ku athu akexile ku mwenyu, Nzambi wa solo-bhu athu a mu tokala mu ukexilu wa katunda.

2. Kala kyamba o Bibidya, a nanyi a tokala kwa Jihova mu ukexilu wa katunda?

² Mu kifika, o divulu dya Jisálamu 135 di jimbulula o abhezi a fiyele a Jihova ku Izalayele yokulu kala,“ mwiji wa undundu wê.” (Jisálamu 135:4) Hozeya wa kanene we kwila, sayi athu kexile akwa Izalayele eji kituka mundu wa Jihova. (Hozeya 2:23) O kikanenu kiki kya di kumbidila kyoso Jihova kya mateka kusola athu kexile akwa Izalayele, phala kutumina ni Kidistu ku dyulu. (Ikalakalu 10:45; Loma 9:23-26) Oso a undu ni nzumbi ikola a exana “mwiji wosole.” Ene “kifuxi kya zele”  kya Jihova. (1 Phetele 2:9, 10) Maji ihi i twamba ya lungu ni Jikidistá ja fiyele lelu, ala ni kidyelelu kya kukala mu ixi katé ku hádya ni hádya? Jihova wa exana we “mundu wami” mba “athu’ami òsole.”—Izaya 65:22.

3. (a)A nanyi ala ni ukamba wa katunda ni Jihova lelu? (b) Ihi i twa-nda zwela mu milonga yiyi?

³ Lelu, o “kakilunga kófele,” kifwa yó ala ni kidyelelu kya kuya ku dyulu, ni “jimbudi jamukwá,” yó ala ni kidyelelu kya ku tambula o mwenyu wa kalelaku mu ngongo, o ibuka iyadi yiyi ya mu bheza kumoxi Jihova kala “kilunga kimoxi.” (Luka 12:32; Nzwá 10:16) Etu twa mesena kulondekesa kwa Jihova o kisakidilu kyetu mu kukala ni ukamba wambote ni mwene. Mu milongi yiyi twa-nda di longa se kyebhi tu tena kulondekesa o kisakidilu kyetu kwa Jihova mukonda dya ujitu yú wa katunda.

4. Kyebhi ki tu tena kusakidila Jihova mu ku twehela kukala ni ukamba ni mwene? Kyebhi Jezú kya londekesa o kisakidilu kyê?

⁴ Etu tu londekesa o kisakidilu kyetu kwa Jihova, kyoso ki tu bhakula o myenyu yetu kwa mwene, ni kyoso kya tu batizala. Mu kubhanga kiki, ene oso a tena kumona kwila twa tokala kwa Jihova, twala polondo phala ku mu belesela. (Jihebelewu 12:9) Jezú kyene we kya bhange kyoso kya mu batizala. Sumbala mwene wa bhangele kyá mbandu ku mwiji wa di bhakwile kwa Jihova, mwene wa bhakula o mwenyu wê kwa Jihova. Kyexile kala wa kexile mu zwela kiki: “Nga sanguluka mu kubhanga ki wa mesena eye u Nzambi yami.”—Jisálamu 40:7, 8.

5, 6. (a) Ihi ya zwela Jihova kyoso Jezú kya mu batizala? (b) Kifika kyebhi ki tena ku tu kwatekesa kutendela kyebhi kya divwa Jihova kyoso ki tu di bhakula kwa mwene?

⁵ Kyebhi kya divu Jihova kyoso kya batizala Jezú? O Bibidya yamba: “Jezú-phe kya zubha ku mu batizala, u kala mu zawúka kindala ku menya; talesa-phe, mawúlu ma jikuka ku thandu dyê, anga u mona nzumbi ya Nzambi [ya] mu tuluka kala dyembe, ni ku mu tula mwène ku thandu. Tala, bhenyobho ni dízwi di tunda mu dyulu, dixi: ‘Mwenyú Mon’ami wa kazola, nga mu wabhela kyavulu.’ (Matesu 3:16, 17) Jezú wa kexile ku mbandu ya Nzambi ithangana yoso. Maji Jihova wa sangulukile mu kumona kwila, Jezú wa kexile polondo phala ku Mu sidivila ku mwenyu wê woso. Jihova u sanguluka we kyoso ki tu bhakula o myenyu yetu kwa mwene, anga u tu besowala.—Jisálamu 149:4.

⁶ Maji ima yoso ya tokala kyá kwa Jihova! Ihi-phe i tu tena ku mu bhana? Xinganeka diyala wala ni jaludim ya ithulu ya yuka. O kambonga kê ka muhatu, u tondola-ku kithulu kimoxi há u mu bhana-kyu. Sumbala o kithulu kya mu tokala kyá, o tata yiyi ya henda u sanguluka ni ujitu wa mu bhana mon’ê. Kiki kilondekesa kwila mon’ê wa mu zolo. Phala mwene, o kithulu kya mu bhana mon’ê, kya beta-o-kota o ithulu yoso yala mu jaludim ndenge. Kyene we kimoxi ni Jihova, mwene u sanguluka kyoso ki tu kala polondo phala kubhakula o myenyu yetu kwa mwene.—Makatukilu 34:14.

7. Kyebhi Malakiya kya tu kwatekesa kutendela kyebhi Jihova kya divwa ya lungu ni yó a mu sidivila?

⁷ Tanga Malakiya 3:16. Mukonda dyahi kima kya katunda kubhakula mwenyu wé  kwa Jihova ni ku kubatizala? Tundé kya kuvwala, eye wa tokalele kyá kwa Mubhangi wé Jihova. Xinganeka kyebhi Jihova kya-nda sanguluka mu kumona eye wa mu xikina kala Mutwameni wé ni kudibhakula kwa mwene! (Jisabhu 23:15) Jihova wejiya oso a mu bheza ni muxima woso, mwene u soneka o majina mâ mu ‘divulu dya dilembalelu’ dyê.

8, 9. Ihi i bhinga Jihova kwa yó ala ni majina osoneke mu ‘divulu dya dilembalelu’?

⁸ Se twa mesena kwila o dijina dyetu di kalela-ku mu ‘divulu dya dilembalelu,’ dya Jihova; sayi-ku kima ki twa tokala kubhanga. Malakiya wambe kwila, twa bhingi kukala ni woma wa Jihova, ni kuxinganeka mu dijina dyê. Se tu bheza dingi muthu mba kima kyengi, o dijina dyetu a-nda di jimuna mu divulu dya Jihova!—Makatukilu 32:33; Jisálamu 69:28.

⁹ O kukanena kwila twa-nda bhanga o vondadi ya Jihova ni ku tu batizala, ki ku soko. O ima yiyi tu i bhanga ngó mu kithangana kimoxi, maji ubhezelu kwa Jihova wene o ukexilu wa mwenyu wetu. Izuwa yoso ku mwenyu wetu twa tokala kulondekesa mu ibhangelu yetu kwila tu belesela Jihova.—1 Phetele 4:1, 2.

10. Kyebhi o yó a sidivila Jihova ka tokala ku difwa ni yó ka mu sidivila?

¹⁰ Mu milongi ya tundu-mu, twa dilongo kwila Kayni, Solomá ni akwa Izalayele, a zwela kwila exile mu bheza Jihova, maji ka mu londekesele ufiyele. O phangu yâ, i tu longa kwila kwamba ngó kuma twa mu bheza Jihova ki ku soko. Twa bhingi kuzemba o ima yayibha ni kuzola o ima yambote. (Loma 12:9) Jihova wambe kwila, oso eji tena kumona o ‘katungu bhu kaxi ka muthu wa yuka, ni mukwa ituxi wa bhukumuka; ni bhu kaxi ka yó u bheza Nzambi, ni yú wa ditunu ku mu bheza.’—Malakiya 3:18.

11. Mukonda dyahi oso a tokala kumona kyambote kwila tu bheza ngó Jihova?

¹¹ Tu sakidila Jihova mu ku tu sola phala kukala tu mundu wê! Athu oso a tokala kumona kyambote kwila, twala ku mbandu ya Jihova. (Matesu 5:16; 1 Timote 4:15) Dibhwidise: ‘O kwila akwetu a tena kumona kwila ngi londekesa ufiyele kwa Jihova ni muxima woso? O kwila Ngi tangela o athu ni kisangusangu kyoso kwila Ngi Mbangi ya Jihova?’ Jihova wa-nda divwa kyayibha, se tu kala ni jisonyi ja kutangela akwetu kwila twa tokala kwa mwene.—Jisálamu 119:46; Tanga Marku 8:38.

12, 13. Kyebhi amukwá a bhangesa kwila o athu ka tena ku a mona kala Jimbangi ja Jihova?

¹² Kima kyayibha kwijiya kwila katé mwene ni Jiphange, ene mu kayela ‘o ukexilu wa mundu.’ Mukonda dya kiki ka di tungula lwavulu mu yó ka mu bheza Jihova. (1 Kolindo 2:12) ‘O ukexilu wa mundu’ u bhangesa o athu kukayela dingi o jihânji jâ-éne jayibha. (Efezo 2:3) Mu kifika né mwene ni itendelesu yoso i twene mu tambula, sayi  jiphange ene mu zwata hanji mu ukexilu wa yibha. Né mwene mu ithangana ya yônge, ene a ta izwatu i naminina, i londekesa o mukutu. Amukwá a sola usamwinu mba jingindu jabhonzo. (1 Timote 2:9, 10) Mukonda dya kiki, kubhonza phala athu kwa ejiya se Jimbangi jya Jihova mba kana.—Tiyaku 4:4.

¹³ Kwala mawukexilu engi a londekesa kwila sayi Jiphange kene mu di tungula kyavulu ku athu ku mundu. Mu kifika mu jifesa, amukwá a kina mu ukexilu wa ibha, alondekesa ukexilu ki wa tokala phala o Jikidistá. A mukwá a ta jifoto jâ ni izwelu mu internete ilondekesa o ibanzelu yâ ya xitu. Sumbala ka a bazela mukonda dya kuta kituxi kya dikota, ene a tena kufunyisa mu ukexilu wayibha o jiphange a mu di sunga phala ku di tungula ku ukexilu wa mundu.—Tanga 1 Phetele 2:11, 12.

14. Ihi i twa tokala kubhanga phala kulanga o ukamba wetu wa katunda ni Jihova?

¹⁴ Yoso mu ngôngo a i bhange phala ku tu bhangesa kusuwa ngó “o jihânji jayibha ja lwimbi lwa xitu, o vondadi ya lwimbi lwa kumesena ima yoso i mona o mesu, ni izala mu ima yoso yene ku mwenyu.” (1 Nzwá 2:16) Etu twa tokala kwa Jihova, twa di tungula. Tweha “o kubhuma ni jihânji jayibha ja mundu,” twa mu kwenda ‘bhu kaxi ka mundu yú ni kilunji, ni kuyuka, ni kuxila Nzambi.’ (Titu 2:12) Ukexilu woso wa mwenyu wetu, kala o uzwelelu wetu, o udilu wetu, o unwinu wetu, o uzwatelu wetu ni salu yetu, u tena kulondekesa kwa athu oso sé dixaka; kwila twa tokala kwa Jihova.—Tanga 1 Kolindo 10:31, 32.

15. Mukonda dyahi twa tokala kuzola o Jiphange jetu?

¹⁵ Tu londekesa kwila tu bhana valolo ku  ukamba wetu ni Jihova, mu ukexilu u tu talatala o jiphange jetu ja mala ni ja ahatu. Ene a tokala kwa Jihova kala etu. Se tu lembalala ima yiyi, etu twa-nda talatala o phange jetu ni henda. (1 Tesalonika 5:15) Mukonda dyahi kima kyambote? Jezú wambela o maxibulu: ‘Kyene kya m’ijidila ku athu oso, kuma mwala mu maxibulu mami, se mwa di zolo mu dyenu.’—Nzwá 13:35.

16. Ihi i tu dilonga ku Kijila kya bhanene kwa Mozé kya lungu ni henda ya Jihova ku mundu wê?

¹⁶ Sayi phangu ya lungu ni Kitumu kya bhanene kwa Mozé, ki tu kwatekesa kutendela kyebhi ki twa tokala kutalatala akwetu mu kilunga. Mu thembulu ya Jihova, mwa kexile imbamba ya tokalele ngó phala o ubhezelu. O Kitumu kya kexile mu jimbulula kyambote kyebhi o Jilevita kya tokalele kulanga o imbamba yóyo. O muthu woso-woso wa kambele ku ki kayela a tokalele ku mu jibha. (Dyalwilu 1:50, 51) Se Jihova wa mesene kwila imbamba ya ubhezelu mu tembulu a i langa mu ukexilu yú, kiki kilondekesa kwila mwene wa mesena kwila abhezi’ê a fiyele a dibhakula kwa mwene, a a talatala kyambote. Mwene wa tu londekesa o valolo ya dikota i twala na-yu kwa mwene kyoso kyambe: “mukonda woso u mi kwata enu, wa kwata mu mona wê-mwène wa dyesu.”—Zakadiya 2:8.

17. Jihova wene mu suwa ni kwívwa ihi?

¹⁷ Malakiya wambe kwila, Jihova u ‘suwa; wívwa’ o mundu wê, phala kutala kyebhi kya mu di talatala mudyâ. (Malakiya 3:16) Jihova “Ngana wejiya oso a mu tokala.” (2 Timote 2:19) Mwene wejiya o ima yoso i tu bhanga ni ima i tu zwela. (Jihebelew 4:13) Kyoso ki tu talatala o jiphange jetu ni undanda, Jihova u mona. Maji Jihova u mona we kyoso ki tu londekesa o ukexilu wa kuzalela, henda, ni kyoso ki tu loloka o  jiphange jetu.—Jihebelew 13:16; 1 Phetele 4:8, 9.

18. Kyebhi ki tu tena kusakidila Jihova mu ku tu sola phala kukala tu mundu wê?

¹⁸ Twa mesena kulondekesa o kisakidilu kyetu kwa Jihova mu ku tokala kwa mwene kala tu mundu wê. Twejiya kwila twa solo ni unjimu woso, kyoso ki twa bhakula o myenyu yetu kwa mwene. Twejiya kwila twa tungu bhu kaxi ka “mwiji wa athu a bhengalala, ezala ni ituxi” tu tena hanji ku kala tu athu ka “moneka kwêla” mba “kulokalala,” tu tena we ku mwika kala tu ‘mukengeji’ ku mundu. (Filipe 2:15, 16) Mu kiki twala polondo phala kulenga kima kyoso-kyoso kya zembe Jihova. (Tiyaku 4:7) Etu twa zolo, tu xila o jiphange jetu mukonda ene a tokala we kwa Jihova.—Loma 12:10.

19. Kyebhi Jihova kya-nda besowala oso a mu tokala?

¹⁹ O Bibidya ya kanena:’Jihova ka-nda kwehelela o mundu wê’ (Jisálamu 94:14) Kiki kidi. Kima kyoso-kyoso ki bhita n’etu, Jihova u tu langa. Né mwene se tu fwa Jihova ka-nda tu jimba. (Loma 8:38, 39) ‘Kixi tu laya, twa layela Jihova; kixi tu fwa, twa fwila Jihova. Wila kiki, kixi tu kala ku mwenyu, kixi tu fwa, tu athu a ngene a Jihova.’ (Loma 14:8) Twa mu kingila o kithangana kyoso Jihova kya-nda fukununa o makamba mê oso a fiyele afu. (Matesu 22:32) Né mwene lelu, tu sanguluka ni mawujitu avulu a tunda kwa Tata yetu. Kala kyambe o Bibidya, ‘Ya zediwa o ixi, ya solo Jihova kuma Nzambi yâ; ni mundu woso wa solo mwene, kala undundu wê.’—Jisálamu 33:12.