Kyebhi ki u Tena Kuwabhesa ni Kukatula Dingi Mbote mu Kudilonga o Bibidya

BUETA

JOSUWÉ wexile ni kikalakalu kya kwendesa o kifuxi kya Izalayele katé ku Ixi ya Kanana. Kiki kyeji bhonza kyavulu. Kyenyiki-phe, Jihova wa mu swinisa, wa mu kolokotesa bhu kaxi ka izwelu yiyi: “Kala ngó u kindanda, u kole muxima kyavulu.” Mwene wambela Josuwé kwila, phala kusola ni ku di tunda kyambote wa tokalele kutanga ni kubelesela o Kitumu.—Josuwé 1:7, 8.

Etu twala ku “jithembu jabhonzo,” kyenyiki ku mwenyu wetu ku tena kumoneka ibhidi. (2 Timote 3:1) Se twa mesena kuditunda kyambote kala Josuwé, twa tokala kukayela o itendelesu ya mu bhanene Jihova. Twa bhingi kutanga o Bibidya izuwa yoso. O milongi i tu dilonga ya-nda tu kwatekesa kusola kyambote.

Maji sayi athu bhu kaxi ketu, kejiya kyebhi kya di longa; amukwa nange ka wabhela kudilonga. Maji kudilonga o Bibidya kima kya tokala. Kyoso ki uya ni kubhitulula o kaxa, “Fikisa o Jindunge Jiji,” wa-nda sanga jindunge ja-nda kukwatesa kukatula dingi mbote mu kudilonga ubheka ni kuwabhela kudilonga.

O mukwa Jisálamu wembila: “Ng’endese, Ngana, mu hota ya itumu yé; kuma mwene mwa ngi kala o kusanguluka kwami.” (Jisálamu 119:35) Eye we u tena kuwabhela kyavulu kudilonga o Mak’â Nzambi. Wa-nda sanga milongi ya katunda ya tokala kyoso ki uya ni kudilonga o Bibidya.

Sumbala eye kwa mu kwendesa kifuxi kala kya bhangele Josuwé, eye wala we ni ibhidi yê. Kyenyiki, di longe, belesela o Mak’â Nzambi kala kya bhangele Josuwé. Se kyene ki u bhanga wa-ndaya ni kusola ni unjimu, wa-nda di tunda kyambote.

FIKISA O JINDUNGE JIJI

Samba ande dya kudilonga. Mu Bibidya mwala ixinganeku ya Jihova; a i soneka phala o mbote yé. Kyenyiki, ande dya kutanga o Bibidya, bhinga kwa Jihova phala ku kukwatekesa kutendela i wa-nda tanga; bhaka o milongi ku muxima, u i kayela phala ku kukwatekesa kusola o ima ku mwenyu wê.—Ejidala 7:10.
Dibhange ibhwidisu kyoso ki uya ni kutanga o Bibidya mba madivulu a soneka bhu kaxi ka Bibidya. Mu kifika: ‘Ihi i ngi longa o velusu yiyi ya lungu ni Jihova? Kyebhi o mbandu yiyi ya lungu ni dyambu dya Bibidya? Kyebhi ki ngi tena kukwatekesa a kwetu ni jivelusu jiji?’
Xinganeka mu ima i wa mu di longa. Imana bhofele, xinganeka o milongi i wa dilongo. Dibhwidise: ‘O milongi yiyi i ngi bhangesa kudivwa kyebhi? Mukonda dyahi o milongi yiyi ya mu ngi bhangesa ku divwa kiki? Kyebhi o milongi yiyi ya lungu ni maka u nga bhiti nawu, u nga mu bhita nawu kindala, mba nange u nga-nda bhita nawu ku hádya? Kyebhi ki ngi tena kukumbidila o itumu yiyi ya Bibidya mba kitendelesu kiki ku mwenyu wami?’ (Jobe 23:5; Jisálamu 49:3) Kyoso ki wa mu xinganeka, tala se u tena kujimbulula se mukonda dyahi sayi ima Jihova u fudisa o mundu wê ku i bhanga. Mba xinganeka mu ibhidi yeji dibhana na-yu o muthu u wa tange, se wa bhangele o ima mu ukexilu wê.—Matendelelu 32:28, 29.
Kyoso ki uya ni kutanga, di xinganeke kala yó a mu tange mu musoso. Mu kifika, u tena kuxinganeka kyoso Zuzé kya mu sumbisa ku jiphange jê? (Dimatekenu 37:18-28) Ihi i wa mu mona, ihi wa mu kwívwa, dizumba dyebhi di wa mu kwívwa? Dite bhu kididi kya athu u wa mu tanga. Ihi ya banze ene ni kyebhi kya divu? Kyoso ki u di-ta mu kididi kya athu u wa mu dilonga, wa-nda katula mbote yavulu.
Tokwesa mu jifalamenda ja kudilonga jene mu bhana o kilunga. Ji tena kubandekesa o kwijiya kwé. Di longe kyebhi ki u tena kutokwesa mu jifalamenda jala mu dimi dyé, u tena we ku i tanga mu internete ni ku i katula. Kana kukala ni hele ya kubhinga kikwatekesu kya akwenu kya kudilonga kyambote ni jifalamenda ja kudilonga. Mu kifika, o Índice das Publicações da Torre de Vigia mba o Kadivulu ka ku Tokwesa Phala o Jimbangi jya Jihova ka-nda ku kukwatekesa kusanga ima i wa mu sota ni ku kulondekesa o jivelusu ja Bibidya. Tokwesa mu kadivulu Kikwatekesu Phala ku di Longa o Mak’a Nzambi se kala mu dimi di u tena kutanga. Jene ji londekesa o ima ya lungu ni ididi, Ithangana ya bhiti o ima, inemenu, izongelu, ni mambu a mukwá.
Bhitulula o jipondo ja beta-o-kota. Kubhanga kiki kwa-nda kukwatekesa kulembalala o ima i wa di longo kyá. Kota se u zwela ni akwenu o ima i wa di longo. O kwila sayi-ku kima kya-nda kwatekesa o ukunji wê? Mu kubhanga o ima yiyi, wa-nda lembalala o jipondo ja beta-o kota ni jipondo ja mukwa ja milongi i wa dilongo.