Londekesa Henda ku ‘Athu a Mawukexilu Oso’
KYOSO Jezú kya longo o maxibulu mê kyebhi kyeji boka o njimbu yambote, mwene wa a dimuna kwila, o athu keji xikina o njimbu mu ithangana yoso. (Luka 10:3, 5, 6) Kiki, kyene mu bhita mu ukunji wetu lelu. Sayi athu u tu sanga, nange a tu talatala ni undanda mba njinda. Kyoso ene kya tu talatala kiki, nange kubhonza ku a kwatela henda mba kulondekesa kunengana, ni kumesena ku a bokela.
O muthu wa henda u tala o ibhindamu ni maka a bhita na-u akwa, u divwa kyayibha, anga u mesena ku a kwatekesa. Maji ihi i tena kubhita se tu kamba henda ya athu u tu sanga mu ukunji wetu? O kuswina kwetu mu kuboka kwa-nda zoza, kifwa, ki twa-nda kala dingi ni hânji ya kwa longa, ya kwa kwatekesa. Tu tena kusokesa o kuswina kwetu mu kuboka ni túbhya. Phala o túbhya ku wama kyambote, ku bhinga jihwínyi javulu. Kyene we kimoxi. Phala kuswina mu kuboka, twa bhingi kukala tu athu a henda!—1 Tesalonika 5:19.
Kyebhi ki tu tena kudilonga kulondekesa dingi henda, né mwene mu ithangana yabhonzo? Twa-nda dilonga phangu jitatu ji tu tena kukayela: Jihova, Jezú, ni poxolo Phawulu.
KAYELA O HENDA YA JIHOVA
Mu mazunda a mivu, o athu ene mu tanga ima yayibha ya makutu ya lungu ni Jihova. Maji mwene wene mu ‘lendukila athu a kambe kisakidilu, a bhukumuka.’ (Luka 6:35) Kyene mwene kya londekesa o henda yê? Mwene u londekesa paxolo mba mwanu ku athu oso. Jihova wa mesena kwila, ‘athu a mawukexilu oso’ a bhuluka. (1 Timote 2:3, 4) Sumbala Nzambi wa zembe o kuyibha, mwene kandala kwila kufwa né ngó muthu umoxi, mukonda mwene u bhana valolo ku athu.—2 Phetele 3:9.
Jihova wejiya kwila, Satanaji mukwa kubhangesa athu kuxikina makutu. (2 Kolindo 4:3, 4) Athu avulu a longo makutu a lungu ni Nzambi tundé undenge. Kyenyiki o ukexilu wâ wa kuxinganeka ni kyebhi kya divwa u tena ku a bhonzesa kuxikina o kidi. Maji Jihova wa mesena kyavulu ku a kwatekesa. Kyebhi ki twejiya?
Mu kifika, xinganeka kyebhi kya divu Jihova, ya lungu ni athu mu mbanza ya Nínive. Sumbala wejidile kwila ene exile isweya, Jihova wambela Jona: ‘Kifwa eme ki nga tokala kukala ni henda ya mbanza ya dikota ya Ninive, mwala hama ni makwinyi a iyadi a midi a athu ndenge, athu kejiya lukwaku lwâ lwa kadilu ni lukwaku lwâ lwa kyasu, ni ibhaku yavulu?’ (Jona 4:11) Jihova wa kwatela henda ya athu yó kejidile o kidi kya lungu ni mwene. Kyenyiki, wa tumikisa Jona phala ku a dimuna.
Etu we tu divwa kala kya divu Jihova. Tu bhana valolo ku athu u tu sanga mu ukunji. Kala Jihova etu tu bhanga nguzu phala ku a kwatekesa ku mwijiya, né mwene se a moneka kala ka-nda xikina o kidi.
KAYELA O HENDA YA JEZÚ
Kala Tat’ê, Jezú wa kwatele henda ya athu ‘mukonda a tatele, a di mwangene kala jimbudi ja kambele mubhidi.’ (Matesu 9:36) Jezú wa tendela se mukonda dyahi ene a kexile mu tala hadi. Kiki kya bhiti mukonda o atwameni a jingeleja akexile mu a tatesa ni ku a longa makutu. Jezú wejidile kwila athu avulu akexile muya mu mwivwa, ka kexile mu xinganeka kukituka maxibulu mê. Né kiki, mwene wa a longo ima yavulu.—Marku 4:1-9.
Kana kuluwala se muthu ka kubhana mátwi mu veji ya dyanga
Kyoso o ima ki i lunguluka ku mwenyu, o muthu u tena kuxikina o kidi
Kyoso athu kya dituna o njimbu yetu, twa bhingi kusota kutendela se mukonda dyahi a mu dituna. Nange ene ala ni ibanzelu yayibha ya lungu ni Bibidya, mba ya lungu ni Jikidistá, mukonda ene a mona kwila sayi athu a ejiya kala Jikidistá, a bhanga ima yayibha. Amukwa nange evu makutu a lungu ni ima i tu xikina. Amukwa nange a kala ni woma wa ku a xongwena ku jindandu mba athu a dyembu dyâ, mukonda dya kuzwela ni etu.
Sayi athu u tu sanga nange a bhiti ni ima yayibha ku mwenyu, yà a toloka o mixima. Sayi phange ya muhatu mukunji wa ixi yengi a mwixana Kim, wambe kwila, athu avulu mu mbambe yê, a bhuluka mu ita, ima yoso ya kexile na-yu ya diboto. Ene kexile ni kidyelelu kya kidi kya lungu ni hádya. Ene ala ni njinda yavulu, ka dyelela muthu. O athu mu mbambe yiyi, ene mu fidisa lwavulu o Jiphange kuboka. Sayi kizuwa phange Kim a mesenene ku mu jibha mu ukunji.
Kyebhi Kim kya suluka mu kulondekesa henda né mwene kyoso kya mu talatala kyayibha? Mwene wexile mu lembalala o divulu dya Jisabhu 19:11, dyamba: “Muthu wadimuka ki mu bateka o njinda, o kutetuluka kwê.” Kuxinganeka mu ima ya bhiti ni athu mu mbambe yê, ku mu kwatekesa ku a kwatela henda. Ko athu oso a sanga a mu talatala kyayibha. Mwene wa sange athu a mesena ku a kunda dingi mu mbambe yenyoyo.
Tu tena ku dibhwidisa: ‘Se ki ngejidile o kidi, kyebhi ki ngeji divwa se o Jimbangi ja Jihova ejile mu ngi bokela?’ Mu kifika, ihi i ngeji bhanga se ngevwile makutu avulu a lungu ni Jimbangi? Nange etu we tweji dituna kwivwa, tweji bhinga we ku tu londekesa henda. Jezú wambe kwila, twa tokala kutalatala akwetu mu ukexilu u twa mesena ku tu talatala. Twa tokala ku tendela kyebhi kya mu divwa akwetu ni ku a londekesa mwanu né mwene mu ithangana ya bhonzo.—Matesu 7:12.
KAYELA O HENDA YA PHAWULU
Poxolo Phawulu wa londekesa henda ku athu sumbala a mu talatala kyayibha, mukonda dya ku a bokela. Mukonda dyahi? Mukonda wa lembalala o ukexilu we wokulu. Mwene wambe: “Mwène wa ngi bhange kyenyiki, sumbala [m’ukulu] nga dyangele ku mu zwela kyayibha, ni ku mu zukutisa, ni ku mu sombola. Maji o Nzambi wa ngi kwatelele henda, mukonda ki nga xikanene luwa, o yoso i nga kexe mù bhanga ki nga i ijidile.” (1 Timote 1:13) Phawulu wejidile kwila, Jihova ni Jezú a mu londekesele henda. Mwene wa kexile mu tendela o athu a mesenene kufidisa o ukunji wê, mukonda mwene wa divwile we kyá kala ene.
Sayi ithangana, Phawulu wa sange athu a xikinine ni muxima woso mu milongi ya makutu. Kyebhi kya divu mwene ni maka yá? Mu divulu dya Ikalakalu 17:16, tu tanga-mu kwila kyoso kyexile ku Atena, “muxima wa mu suku kya mono mbanza yoso yezala iteka.” Maji, Phawulu wa longo o athu bhu kaxi ka ima ya mu sukisa o muxima. (Ikalakalu 17:22, 23) Mwene wa lungulula o ukexilu wê wa kuboka, ni wa ku zwela ni athu a mawkexilu avulu phala kutena “kubhulula-ku amoxi.”—1 Kolindo 9:20-23.
Kyoso ki tu bokela o athu ene mu dituna o njimbu yetu, mba ala ni ibanzelu yayibha tu tena kubhanga ya bhange Phawulu. Tu tena ku a kwatekesa kwijiya o “njimbu ya kubhanduluka,” bhu kaxi ka ima i twejiya ya lungu ni ene.”(Izaya 52:7) Sayi phange a mwixana Dorothy, wambe: “Mu mbambe yetu, athu avulu ene mu a longa kwila, Nzambi muthu wayibha. Ngi ximana o athu yá mukonda dya kixikanu kyâ kwa Nzambi. Mu kusuluka nga a londekesa ihi i longa o Bibidya, ya lungu ni henda ya Jihova, idifwa yê, ni ikanenu yê ya lungu ni hádya.”
SULUKA NI “KUTOLOLA O PHULU NI MBOTE”
Kyoso ki tuya ni kuzukama ku disukilu dya mundu yú, o ukexilu ‘wayibha wa athu wa-ndaya ni ku di bandekesa.’(2 Timote 3:1, 13) Maji ki tu tokala kwehela o ukexilu wa athu ku tu fidisa kulondekesa o henda ni kisangu-sangu kyetu. Jihova u tena ku tu bhana nguzu phala “kutolola o phulu ni mbote.” (Loma 12:21) Sayi muboki a mwixana Jessica wambe kwila, wene mu sanga athu a dizangeleka, a tu xongwena, a xongwena we o njimbu yetu. Mwene wambe dingi: “Kiki ki kwatesa njinda. Kyoso ki ngi mateka kuzwela ni muthu, ngi samba kwa Jihova ku muxima, ngi mu bhinga kikwatekesu phala kumona o muthu kala ki mu mona mwene.” Kubhanga kiki, kwa kwatekesa Jéssica kusota ndunge ya ku a kwatekesa mu veji dya ku di banza ngó mwene.
Twa-nda suluka ni kusota oso a mesena ku sanga o kidi
Mu kithangana ni mbandu, sayi athu a-nda xikina o kikwatekesu kyetu, a-nda dilongo o kidi
Etu twa tokala we kuswinisa o jiphange jetu kyoso ki tu boka na-u. Jéssica wambe kwila, kyoso kya kala mu ukunji ni akwá, anga sayi muthu u dibhana ni kima kyayibha, mwene u bhanga yoso phala ka di kwatenene mu kima kyayibha kya bhiti na-kyu. Mu veji dya kiki, mwene u ta-ku maka a swinisa, kala kima kyambote kya bhiti, sumbala sayi athu a dituna ku a evwa.
Jihova wejiya kyambote kwila, sayi ithangana ki tu bhonza o kuboka. Maji mwene u sanguluka kyoso ki tu kayela o phangu yê ya kulondekesa henda! (Luka 6:36) Sé phata Jihova kanda londekesa henda ni mwanu ku athu ku mundu yú, katé ku hádya ni hádya. Tu tena kudyelela kwila, mwene wejiya kyambote o kithangana kya-nda bheka o dizubhilu. Katé kya-nda bhixila o kithangana kiki, twa bhingi kuboka ni lusolo lwoso. (2 Timote 4:2) Kyenyiki-phe tu bokyenu ni kuswina kwoso, tu londekesyenu henda ya kidi ku ‘athu a mawukexilu oso.’
