1. Hanji yebhi i twala na-yu etu enoso?

KYEBHI ki weji divwa se muthu wa mwijiya kyambote u jimba o dijina dyé, mba u ku jimba? Kiki ki tena ku kuluwalesa. Mukonda dyahi? Mukonda kala muthu mu dyetu wala ni hânji yambote ya ku mu xikina ku akwa. O hânji yiyi, o muthu a mu vwalé na-yu kyá. Maji ku tu ijiya ngó, ki ku soko; tu mesena kwila, ene ejiya o ifwa yetu ni ima yambote i twa bhange kyá.—Dyalwilu 11:16; Jobe 31:6.

2, 3. Ihi i tena kubhita ni hânji yetu ya kumesena kutambula kijingu ku akwetu? (Tala o foto ya dyanga.)

² Maji se ki tu di lange, o hânji ya kumesena kwila, akwetu a tu xikina i tena ku twambata mu njila yayibha. O mundu wa Satanaji u tu bhangesa kumesena fuma ni kubeta-kota bhu kaxi ka akwetu. Se kiki ki bhita, ki twa-nda tena kuxila Jihova Nzambi Tata yetu ya dyulu, ni ku mu bheza mu ukexilu wa tokala.—Dijingunwinu 4:11.

³ Mu izuwa ya Jezú, o atwameni a jingeleja akexile ni ixinganeku yayibha ya lungu ni kutambula kijingu. Jezú wa dimuna  o maxibulu mê: “Di langyenu ni asoneki, kuma a wabhela kwenda ni izwatu yalebhelela, ni ku a menekena ni ujitu woso bhu jisoki ni bhu i tanda, bhu ezala o mundu. A sola ididi ya dyanga mu jinzo ja kubhezela Nzambi, ni ididi ya ukota mu jifesa.” Mwene wambe dingi: “Enyá a-ndu beta kwêla mu kizuwa kya kufundisa.” (Luka 20:46, 47) Maji ki kyene kya bhangele Jezú; mwene wa ximana o ngadyama ya mutudi wa bhana tumilambongo tuyadi sumbala nange athu amukwa ka ki mono. (Luka 21:1-4) Sé phata o ukexilu wa Jezú wa kutala o kijingu ki u di fwile ni wa athu engi. O milongi yiyi, ya-nda tu kwatekesa kusuluka ni kukala ni ukexilu wambote wa lungu ni kutambula kijingu, o ukexilu wa mesena Jihova Nzambi kwila tu kala na-u.

4. Kyebhi o kijingu kya beta-o-kota? Mukonda dyahi?

⁴ Kyebhi o kijingu kya beta-o-kota? Ko kijingu kyene mu sota athu avulu bhu kaxi ka xikola ya katunda, ku ditunda kyambote mu mawenji, kufumana ni mu itonokenu ya mundu. Phawlu wa jimbulula kyebhi o kijingu kiki, kyoso kyambe: “O kiki-phe, ki mweza mù kwijiya Nzambi,—mba inda ngedi Nzambi ku m’ijiya enu,—phala-hi mu vutuka dingi ku ima ya kambe o valolo, ya wadyama, i mwa mesena mu vutuka dingi mu ubhika wê?” (Ngalásya 4:9) Ujitu wa dikota ‘ku twijiya kwala Nzambi’ o Nguvulu ya Dikota ya ngongo! Jihova wa twijiya, wa tu zolo, wa mesena kwila tu mu zukama. Jihova wa tu bhange phala tu tene kukala makamba mê.—Ndongixi 12:13, 14.

5. Ihi i twa tokala kubhanga kutwijiya kwala Nzambi?

⁵ Twejiya kwila Mozé wexile dikamba dya Jihova. Kyoso mwene kya bhingi kwa Jihova wixi: “[Ng’idikise] jinjila jé ja ku di tuma ni athu,” Jihova wa mu vutwila wixi: “Ngi ki bhanga mwene, kima kyenyiki ki wa zuela, kuma eye wa sange mwene ngalasa ku mesu mami, u muthu nga ku ijiya dijina.” (Makatukilu 33:12-17) Jihova u tena we kutwijya. Ihi-phe i twa tokala o kubhanga phala kukala tu makamba a Jihova? Twa tokala ku mu zola ni kubhakula o mwenyu wetu kwa mwene.—Tanga 1 Kolindo 8:3.

6, 7. Ihi i tena ku tu bhangesa kuzanga o ukamba wetu ni Jihova?

⁶ Né kiki twa bhingi kulanga o ukamba wetu ni Tata yetu ya dyulu. Kala o Jikidistá ja dyanga akwa Ngalásya, ki tu tokala ku kala abhika a ima ‘ya kambe o valolo, ya wadyama’ ya ngongo yiyi, kala o ku di tunda kyambote mu mawenji, ni fuma. (Ngalásya 4:9) O Jikidistá akwa Ngalásya, ejidile Nzambi, ene a ejidile we kwa Nzambi. Maji Phawlu wambe kwila o jiphange jenyojo, ja ‘vutukile dingi’ mu kubhanga o ima sé valolo. Mu izwelu yamukwá mwene wa ebhwidisa: ‘Phala-hi mu vutuka dingi ku ima ya kambe o valolo, ya wadyama, i mwa mesena mu vutuka dingi mu ubhika wê?’

⁷ O kwila kiki ki tena we kubhita ni etu? Ki tena. Kala kya bhiti ni Phawlu, kyoso ki twa mateka kudilonga o kidi, nange twa xisa fuma ni mwenyu wambote ku mundu wa Satanaji. (Tanga Filipe 3:7, 8.) Nange twa ditunu ujitu wa kudilonga mu xikola ya katunda, salu yambote ni ujitu wa kunganyala kitadi kyavulu. Nange tweji tena kukala ni fuma mba kukala tu jimvwama mukonda twala ni uhete wa kwimba mba wa kujokala. Maji twa ditunu o mawjitu moso yá. (Jihebelew 11:24-27) Kyeji kala wowa wa dikota  kudyela, ni kudivwa kwila, o mwenyu wetu weji beta kota se ki twa xile o ima yoso yiyi kudima! Kuxinganeka kiki, ku tena ku tu bhangesa kuvutuka ku ima ya mundu, o ima i twa xinganekene kya ku muxima wetu kwila ‘ya kambe o valolo, ya wadyama’. *—Tala ku lwiji.

8. Ihi ya-nda kolesa o hânji yetu ya kutambula kijingu kwa Jihova?

⁸ Kyebhi ki tu tena kukolesa o vondadi yetu ya kutambula kijingu kwa Jihova? Twa bhingi kubhanga ima iyadi ya beta kota. O kima kya dyanga, twa tokala ku di kwatenena mu kixinganeku kya kwila, ithangana yoso Jihova u bhana kijingu kwa yó a mu sidivila ni ufiyele. (Tanga Jihebelew 6: 10; 11:6) Jihova u bhana valolo yavulu ku jiselevende jê joso, kyenyiki, u dívwa kwila ‘kima’ kya yibha mwene kujimba né mwene selevende imoxi ngó. Jihova wejiya “oso a mu tokala.” (2 Timote 2:19) Mwene “wejiya [o] njila ya athu ayuka,” wejiya we kyebhi kya tena kwa bhulula.—Jisálamu 1:6; 2 Phetele 2:9.

9. Bhana phangu ilondekesa kyebhi Jihova kyene mu londekesa kwila wa xikina o mundu wê.

⁹ Sayi ithangana Jihova ulondekesa kwila, wa xikina o mundu wê mu mawkexilu a katunda. (2 Malunda 20:20, 29) Mu kifika xinganeka mu ukexilu wa Jihova wa kubhulula o mundu wê mu Kalunga Kakusuka, kyoso kya kexile mu a kayela ku kifuxi kya masoladi a Falaó. (Makatukilu 14:21-30; Jisálamu 106:9-11) O kizulukutu kiki, kya bhangesa o athu mu izuwa yenyoyo kudiwana, sumbala kwa bhitile kyá 40 a mivu, maji o athu akexile hanji mu zwela o maka yá. (Josuwé 2:9-11) Kulembalala kyebhi Jihova kya londekesa henda ku mundu wê anga wa a bhulula ni kutena kwê m’ukulu ku tu swinisa, mukonda kwa kambe ngó, Ngongo dya Mangongo wa-nda tu zukutisa. (Izekiyele 38:8-12) Mu kithangana kyenyókyo twa-nda sanguluka kyavulu mukonda twa soto ku tu xikina kwala Nzambi mu veji dya ku tu xikina kwala o mundu.

10. Kixinganeku kyebhi dingi ki twa tokala ku di kwatenena?

¹⁰ Kayadi, twa tokala ku di kwatenena mu kixinganeku kya kwila, Jihova u tena ku tu bhana o kijingu mu ukexilu ki tu u xinganeka. Se athu a bhanga ima yambote phala ku a mona ngó ku athu, Jihova ka-nda a besowala. Mukonda dyahi? Mukonda, kala kyambe Jezú, kyoso o athu kya a ximana, kifwa ene a tambula kyá o kisakidilu kyâ. (Tanga Matesu 6: 1-5.) Ku mbandu ya mukwa, Jihova u ‘mona mu kaswekele’ wejiya oso kene mu tambula kijingu kya athu mu mbote ya bhanga. Mwene u mona yoso ya bhanga, anga u a bhana futu mba u a besowala. Sayi ithangana Jihova u futa o jiselevende jê mu ukexilu ka u xinganeka. Tu dilonge ifika iyadi.

11. Ihi ya bhange Jihova phala kubhana kijingu kwa Madiya?

¹¹ Jihova wa solo Madiya, munzangala wa lenduka phala kuvwala Mon’e Jezú. Madiya wa tungile mu mbanza yofele a ixanene Nazalé, yexile dikanga dya Jeluzaleme ni tembulu yê ya yuka. (Tanga Luka 1:26-33.) Mukonda dyahi Jihova wa solo Madiya? O anju Ngabidiyele wa mu tangele kwila, mwene “wa bongo ku zediwa kwa Nzambi.” Tu tena kumona kwila mwene wexile ni ukamba wambote ni Jihova, kyoso kya zwela ni ndandu yê Ilizabete. (Luka 1:46-55) Jihova wexile mu tala Madiya, wa mu besowala mu ukexilu wa tundu o kixinganeku kyê mukonda dya ufiyele wê kwa mwene.

12, 13. Kyebhi Jezú, kya mu jingisa kyoso kya mu vwala, ni kyoso Madiya kya mwambata mu thembulu mu kubhita 40 a izuwa?

¹² Kyoso Jezú kya mu vwala, Jihova wa dyanga kubhana o ngolokela ya uvwalelu wê kwa nanyi? Ki ku athu a tokalele ku nguvulu ya Jeluzaleme, ni Beleme. Mu veji dya kiki, mwene wa tumikisa ji anju ku tufunga twa kexile mu kwinga o jimbudi mu mukawu wa kexile dikanga dya Beleme. (Luka 2: 8-14) O tufunga tutu, ayile mu kunda o kabwetele. (Luka 2:15-17) Madiya ni Zuze, nange a diwanene mu kumona o kijingu kyoso kya kexile mu bhana kwa Jezú. O ukexilu wa Jihova wa kubhanga o ima, ki u difu ni ukexilu wa Dyabhu. Kyoso Satanaji kya tumikisa akwa ku di longa o jithéthembwa, phala kukunda Jezú ni jitata jê, athu oso a suku mu kwijiya o uvwalelu wa Jezú, kiki kya bhekela maka. (Matesu 2:3) Mukonda dya kiki, a jibha tubwetele twavulu.—Matesu 2:16.

¹³ O kijila kya bhanene Jihova ku akwa Izalayele, kyambele kwila, o mama wa tokalele kubhana sata kwa Jihova, kyoso o mona kyeji tenesa 40 a izuwa. Mu kiki-phe, Madiya ni Zuze ayile ku Beleme ni Jezú, endele njila ya divwa dya jikilómetulu, tundé ku Beleme katé mu tembulu ku Jeluzaleme. (Luka 2:22-24) Mu njila nange Madiya wa banze se o mukunji weji bhanga kima kya katunda phala kujingisa Jezú. Jezú a  mu jingisa, maji mu ukexilu wa tundu o ixinganeku ya Madiya. Jihova wa solo Ximinyá, ‘muthu wambote, wa zolele Nzambi’ ni Ana, polofeta ya muhatu, mutudi wa kexile ni 84 kya mivu, phala kubhana ngolokela kwila Jezú weji kituka Mexiya mba Kidistu.—Luka 2:25-38.

14. Kyebhi Jihova kya besowala Madiya?

¹⁴ O kwila Jihova wa suluka ni kujingisa Madiya, mukonda dya kusasa Jezú ni ufiyele woso? Kyene, wa suluka. Say ima ya zwela ni ya bhange Madiya, Nzambi wa bhangesa kwila a i soneka mu Bibidya. Nange Madiya ka tena kwenda ni Jezú, mu ukunji wê wa mivu itatu ni kaxaxi. Nange mukonda mwene wexile mutudi, wa tokalele kukala ku Nazalé. Kyenyiki say ima ya bhangele Jezú, mwene ka tena ku i mona. Maji mwene wa kexile ni Jezú kyoso kyafu. (Nzwá 19:26) Mu kubhita thembu, Madiya wexile ni maxibulu a Jezú, ande dya kutambula o nzumbi ikola ku Pendekoxi. (Ikalakalu 1:13, 14) Mwene nange a mu undu we kumoxi ni maxibulu amukwa. Se kyene, kifwa-phe mwene wa tambula ujitu wa kukala ni Jezú ku dyulu katé ku hádya. Sé phata yiyi futu ya fwama ya tambula mukonda dya sidivisu yê ya fiyele!

15. Kyebhi Jihova kya londekesa kwila wa xikina Jezú kyoso kyexile mu ixi?

¹⁵ Jezú ka mesenene kutambula kijingu kya atwameni a jingeleja mba kya jinguvulu. Maji mu ithangana itatu, Jihova wa zwela tundé ku diwlu, phala kwehela Mon’ê kwijiya kwila wa mu zolele. O kiximanu kiki kya swinisa kyavulu Jezú! Kyoso Jezú kya mu batizala mu Ngiji ya Njolodá, Jihova wambe: ‘Mwenyú Mon’ami wa kazola, nga mu wabhela kyavulu.’ (Matesu 3:17) Nange Nzwá dya Batizu mwene ngó o muthu wengi wevu o izwelu yoyo. Muvu ande dya ufwilu wa Jezú, maxibulu mê atatu evu Jihova kuzwela ya lungu ni Jezú: ‘Mwenyú Mon’ami nga mu zolo, wene mu ngi sangulukisa. Yoso ya zwela, mu ivwenu mwene!’ (Matesu 17:5) Jihova wa zwela dingi ni Mon’ê tundé ku  diwlu, kyoso ki kwa kambele ngó izuwa yofele ande dya Jezú kufwa.—Nzwá 12: 28.

16, 17. Kyebhi Jihova kya jingisa Jezú mu ukexilu wa tundu o kixinganeku kyê?

¹⁶ Jezú wejidile kwila o athu eji mwixana muxongwedi, wejidile we kwila eji mu kwatesa jisonyi ande dya kufwa. Né kiki, mwene wa sambe phala o vondadi ya Nzambi, a i bhange mu veji ya vondadi yê. (Matesu 26:39, 42) ‘Wa kolokota mu tháka, wa tende o sonyi,’ mukonda mwene wa mesenene kutambula kijingu kwa Tat’ê mu veji dya kijingu ki bhana o mundu. (Jihebelew 12: 2) Kyebhi Jihova kya bhana kijingu kwa Jezú?

¹⁷ Kyoso Jezú kya kexile mu ixi, mwene wa sambe phala kutambula o ujitu wexile na-u kyoso kyexile ku diwlu ni Tat’ê. (Nzwá 17: 5) Kana-ku kididi mu Bibidya kilondekesa kwila Jezú wa mesenene dingi kima kyengi. Mwene ka kexile mu kingila futu ya katunda mukonda dya kubhanga o vondadi ya Jihova mu ixi. Maji ihi ya bhange Jihova? Mwene wa jingisa Jezú mu ukexilu wa tundu o kixinganeku kyê. Kyoso Jihova kya fukununa Jezú, mwene “wa mu zangeleka kyavulu” ku dyulu, kya kexile ande dya kwiza mu ngongo ndenge. Mwene wa bhana we mwenyu ki wabhwa kwa Jezú, kana-ku muthu wa u tambwile kyá! * (Tala ku lwiji.) (Filipe 2:9; 1 Timote 6:16) Ukexilu wa katunda wa Jihova kubesowala Jezú mukonda dya sidivisu yê ya fiyele!

18. Ihi ya-nda tu kwatekesa ku tu xikina kwa Jihova mu veji dya dya ku twijiya ku mundu?

¹⁸ Ihi ya-nda tu kwatekesa ku twijiya kwa Jihova mu veji dya ku twijiiya ku mundu yú? Twa tokala ku di kwatenena mu milongi ya kwila, mu ithangana yoso Jihova u bhana kijingu kwa yó a mu sidivila ni ufiyele, ni kwila, mu veji javulu u a bhana dibesá mu ukexilu wa tundu o ixinganeku yâ. Tu tena kuxinganeka kyebhi Jihova kya-nda tu besowala ku hádya! Kyoso ki tuya ni kudibhana ni ibhidi mba maka ku mundu yú wa yibha lelu, twa tokala kulembalala kwila, o mundu yu wa mu bhita. Kijingu kyoso-kyoso kijila ku mundu yú, kya-nda bhita we. (1 Nzwá 2: 17) Ku mbandu ya mukwa, o Tata yetu ya henda Jihova, ka-nda jimba o kikalakalu ni henda i twa londekesa ku dijina dyê, mukonda mwene “ki mukwa kaxixi.” (Jihebelew 6: 10) Sé phata mwene wa-nda londekesa kwila wa tu xikina, nange mu ukexilu wa tundu o ixinganeku yetu!