JIHOVA muéne Suke-ku. Muéne ua bhange o ima ioso. O unjimu uê ni kutena kuê, ki kuene disukilu. Kioso kia kuatekesa Jobe kuijiia o kidi kiki, Jobe uambe: “Nga k’ijiia muene kiambote kuila, eie ioso ua soko na-iu; ki bhuala kima ki u xinganeka kubhanga anga a ku lembuesa na-kiu.” (Jobe 42:2) Jihova u tena kubhanga kima kioso-kioso, sé kikuatekesu kia muthu. Maji muéne ulondekesa o henda iê mu kuixana o athu, n’a kalakale kumoxi ni muéne, phala kukumbidila o vondadi iê.

2. Kikalakalu kiahi kia bhana Jihova kua Jezú?

² Ande dia kubhanga o athu oso, mba o ima ioso mu ngongo, Nzambi ua bhange o Mon’ê Jezú. Mu kusuluka, Jihova uehela Mon’ê ku mu kuatekesa kubhanga o ima ioso. (Nzuá 1:1-3, 18) Ia lungu ni Jezú, poxolo Phaulu ua soneka: “Mukonda ima ioso  Nzambi ua i bhangela mua muène, ni ku diulu, ni mu ngongo, ni iii ia moneka ku mesu, ni ioio ki iene mu moneka ku mesu, kixi o jinguzu joso ja nzumbi, kixi makusuina, kixi maungana, kixi atumini. Ima ioso Nzambi ua i bhangela mua muène, kuma ioso ia mu tokala muène.” (Kolose 1:15-17) Mu kiki, Jihova ua bhana kikalakalu kia dikota kua Mon’ê, anga u tangela ué o athu amukuá ia lungu ni kikalakalu kiki. Iú, ujitu ua dikota!

3. Kikalakalu kiahi kia bhana Jihova kua Adá, ni mukonda diahi?

³ Jihova uixana ué o athu phala kukalakala kumoxi ni muéne. Mu kifika, muéne ua bhana kua Adá, o kikalakalu kia ku luka o majina ku iama. (Dimatekenu 2:19, 20) Xinganeka o kisangusangu kia kexile na-kiu Adá, mukonda dia kubhanga o kikalakalu kiki! Muéne ua di longo kiambote o ídifua ia iama, mu kusuluka, ua i luku o majina a tokala. Kuma Jihova muéne ua bhangele o iama, muéne ua kexile ni kutena kua ku i luka o majina a tokala. Maji muéne ua londekesa o henda iê kua Adá, mu ku mu ehela ku luka o majina ku iama ioso. Nzambi ua bhana ué kua Adá, o kikalakalu kia kubhanga o ixi ioso palaízu. (Dimatekenu 1:27, 28) Maji mu kubhita thembu, Adá ua ditunu kukalakala kumoxi ni Nzambi. O kima kia bhangele, kia bheka ibhidi ia dikota phala muéne ni muiji uê.​—Dimatekenu 3:17-19, 23.

4. Kiebhi o athu amukuá a kalakala kumoxi ni Nzambi phala kukumbidila o vondadi iê?

⁴ Mu kubhita thembu, Nzambi uexana athu a mukuá phala kukalakala nê kumoxi. Noué ua tungu o álaka ia mu bhulula ku Dilúviu, kumoxi ni muiji uê. Mozé ua bhulula o kifuxi kia Izalaiele ku Ijitu. Josuué, uambata akua Izalaiele ku Ixi ia a Kanene. Solomá ua tungu o tembulu mu Jeluzaleme. Madiia ua vuala Jezú. O athu oso iá a fiiele, ni athu a mukuá dingi, a kalakala kumoxi ni Jihova, phala kukumbidila o vondadi iê.

5. Kikalakalu kiahi ki tu tena o kubhanga? O kuila Jihova ua bhingile ku tu bhana o kikalakalu kiki? (Tala o foto ia dianga.)

⁵ Lelu, Jihova u tuixana phala kubhanga ioso i tu tena mu kikalakalu kia Utuminu uê. Kuene maukexilu avulu a kusidivila Nzambi. Sumbala etu enioso ki tu tena ku mu sidivila mu ukexilu umoxi, etu enioso tu tena kuboka o njimbu ia Utuminu. Jihova uala ni kutena kua kubhanga o kikalakalu kiki. Tundé ku diulu, muéne u tena kuzuela ni athu mu ixi. Jezú ua zuela kuila, Jihova u tena kubhangesa o matadi kutula o njimbu ia Utuminu Uê. (Luka 19:37-40) Maji Jihova ua tuixana phala ku “kalakala kumoxi” ni muéne. (1 Kolindo 3:9) Poxolo Phaulu ua soneka: “Uila kiki, ki tuedi tu akuenu mu kikalakalu kia Nzambi, tua mi bhingi kiki: O kiadi kia Nzambi, ki mua tambula kiá, ki mu ki ehele dingi ku di bota.” (2 Kolindo 6:1) O kukalakala kumoxi ni Nzambi, ujitu ua dikota. Tu di longe se mukonda diahi, o ujitu iú u tu bhekela kisangusangu kia dikota.

6. Kala kia zuela o Mon’a ua phande kumbi ua Nzambi, kiebhi kia divu muéne mukonda dia kukalakala kumoxi ni Tat’ê?

⁶ Tundé ukulu, o jiselevende ja Jihova ene mu sanguluka kiavulu mukonda dia kukalakala kumoxi ni Nzambi. Ande dia kuíza mu ixi, o Mon’a ua phande kumbi ua Nzambi, uambe: “Jihova ua ngi bhanga tunde bhu diandekelu dia jinjila jê . . . eme-phe nga  kexi-nê kumoxi bhenhobho, ngi dixibulu diê; kizuua ni kizuua ngi kala ngi minangu iê, ngi kuata [kusanguluka] ni kukemba bhu pholo iê ithangana ioso.” (Jisabhu 8:22, 30) Jezú ua sangulukile mu kukalakala kumoxi ni Tat’ê, mukonda ua bhangele ima iavulu. Muéne uejidile kuila, Jihova ua mu zolele. Ihi i tu zuela ia lungu n’etu?

7. Mukonda diahi o kikalakalu kia kuboka ki tu bhekela kisangusangu?

⁷ Jezú uambe kuila, kioso ki tu bhana kima, tu sanguluka. O ki tu tambula kima, tu sanguluka ué. (Ikalakalu 20:35) Kioso ki tua di longo o kidi kia Bibidia, tua sanguluka kiavulu. Maji mukonda diahi tu sanguluka ué kioso ki tu longa o kidi kiki ku akuetu? Mukonda tu mona o kisangusangu kiâ, kioso kia di longa o kidi kia Bibidia, anga a mateka kubhanga o ukamba ni Nzambi. Kioso kia lungulula o ibanzelu iâ ni ukexilu uâ, tu sanguluka kiavulu. O kikalakalu kia kuboka, kiene o kikalakalu kia beta kota, ki tu tena kubhanga. Sé-ku dingi kikalakalu kiéngi ki bheka kisangusangu kia dikota. O kikalakalu kiki, ki kuatekesa o athu a bhanga o ukamba ni Nzambi, kutambula o muenhu ua kalela-ku.​—2 Kolindo 5:20.

8. Ihi ia zuela o athu ia lungu ni kisangusangu kijila mu kukalakala kumoxi ni Jihova?

⁸ Tuijiia kuila, kioso ki tu kuatekesa akuetu ku di longa o kidi kia Nzambi, tua mu sangulukisa o muxima ua Jihova, ni kuila, muéne u mona o nguzu i tu bhanga phala ku mu sidivila. Kiki ki tu bhekela ué kisangusangu. (Tanga 1 Kolindo 15:58.) Marco, ua tungu ku ixi ia Itália, uambe: “Ki ngi tena kujimbulula o kisangusangu kiami mu kuijiia kuila, nga mu bhanga ioso phala kusidivila Jihova, mu veji dia kusidivila muthu ua-nda jimba ni lusolo luoso, o ima i ngi bhanga.” Franco, ua mu sidivila ué ku ixi ia Itália, uambe: “Izuua ioso, bhu kaxi ka Mak’â mê ni ima ia mukuá iene mu bhanga, Jihova u tu lembalesa kuila, muéne ua tu zolo. Muéne u tu lembalesa ué kuila, né muéne se tu mona kuma o nguzu i tu bhanga  ki iala ni valolo, muéne u bhana valolo ku ima ioso i tu bhanga phala muéne. Kiki kiene ki ngi bhangesa ku divua kuma, o kukalakala kumoxi ni Nzambi, ku ngi bhekela kisangusangu ku muenhu.”

9. Ukamba uahi ua kexile nau Jihova ni Jezú, ni mukonda diahi?

⁹ Kioso ki tu kalakala kumoxi ni athu u tua zolo, tu di zukama dingi. Tuijiia kiambote o idifuá iâ. Tuijiia o jimbambe ja mu suua, ni nguzu ia mu bhanga phala kukumbidila o ima ia mesena. Jezú ua kalakala ni Jihova ku mivu iavulu. O henda iâ mudiâ, ia dibandekesa kiavulu. Mu kiki, sé-ku kima ki tena kubatula o ukamba uâ. Jezú ua jimbulula o ukamba iú, kioso kiambe: ‘Mbata eme ni Tata etu’ene amoxi.’ (Nzuá 10:30) Mu kidi, ene akexile ni ukamba uambote, akexile ué mu bhanga o kikalakalu kiâ kumoxi.

10. Mukonda diahi o kikalakalu kia kuboka ki tu zukamesa dingi kua Nzambi ni akuetu?

¹⁰ Jezú ua bhingi kua Jihova phala kulanga o maxibulu mê. Mukonda diahi? Muéne ua sambe: ‘Phala ene a kale kumoxi, kala etu ki tuala kumoxi, n’eie, n’eme.’ (Nzuá 17:11) Kioso ki tu belesela o itumu ia Nzambi ni kubhanga o kikalakalu kia kuboka, tuijiia kiambote o ídifua iê. Tu mona kuila, o kudielela kua Nzambi ni kubelesela o itumu iê, kulondekesa unjimu. Kioso ki tu zukama kua Nzambi, muéne u tu zukama ué. (Tanga Tiiaku 4:8.) Tu zukama ué ku jiphange jetu mukonda, kala ki bhita ni ene, etu uetu tuene mu tala hadi. Saí bhabha tu sanguluka ué. Kiki ki bhita mukonda, o jimbambe ji tua mu suua jene jimoxi. Tu kalakala kumoxi, tu sanguluka kumoxi, tu kolokota kumoxi. Octavia ua tungu ku ixi ia Grã-Bretanha, uambe: “O kukalakala kumoxi ni Jihova, ku ngi zukamesa ku akuetu.” Muéne uambe kuila, kiki ki bhita mukonda, lelu muéne u sola o makamba a mu suua ué o jimbambe ja mu suua muéne. Sé phata, etu ué tu divua kiki. Kioso ki tu mona o nguzu i bhanga o jiphange jetu phala kusangulukisa o muxima ua Jihova, tu a zukama dingi.

11. Mukonda diahi tua-nda zukama dingi kua Jihova ni jiphange jetu ku mundu uobhe?

¹¹ Lelu, etu tua zolo kiavulu Nzambi ni jiphange jetu, maji ku mundu uobhe, o henda íii ia-nda dibandekesa dingi. Xinganeka o kikalakalu kiambote ki tua-nda bhanga ku hádia! Tua-nda tambulula o athu a-nda fukunuka, ni ku a longa o kidi kia Jihova. Tua-nda kalakala ué phala kubhangesa o ixi kukala palaízu. Tua-nda sanguluka kiavulu, mukonda mu utuminu ua Kristu, tua-nda kalakala kumoxi. Tua-nda kala ué tu athu a iuka. O athu oso a-nda di zukama dingi. Ene a-nda zukama dingi kua Jihova, mukonda muéne ua-nda bhangesa o ‘mienhu ioso kudia, ni kuikuta ni ima iambote.’​—Jisálamu 145:16.

12. Kiebhi o kikalakalu kia kuboka ki tu langa?

¹² Tua bhingi kulanga o ukamba uetu ni Jihova. Kuma tuala ku mundu ua Satanaji, ni kuila tu akua ituxi, tu tena kumateka kubanza, ni kubhanga o ima kala o athu ku mundu iú. Kiki kia difu ni kuzoua mu ngiji, maji mu veji dia kuia bhu kididi bhu tua mesena, o menha a tuambata bhu kididi kiéngi. Mu kiki, kubhinga nguzu phala kuia bhu kididi kia tokala. Etu ué tua bhingi kukalakala kiavulu, phala ku di langa ku mundu iú ua Satanaji. Mu kiki, kiebhi o sidivisu ia kuboka i tu langa? Kioso ki tu zuela ia lungu ni Jihova ni Bibidia, tu xinganeka mu ima ia valolo mba iambote, mu veji dia kuxinganeka mu ima ia-nda zozesa o kixikanu kietu. (Filipe 4:8) O kikalakalu kia kuboka ki suínisa o kixikanu kietu, mukonda ki tu bhangesa kulembalala o ikanenu ia Nzambi ni itumu iê ia henda. Ki tu kuatekesa ué kukolokota mu kulondekesa o ídifua i tua bhingi phala ku di langa kua Satanaji ni mundu uê.​—Tanga Efezo 6:14-17.

13. Kiebhi kia divu o phange ku ixi ia Austrália, ia lungu ni kikalakalu kia kuboka?

¹³ Kioso ki tu dibhakula mu sidivisu ia kuboka, mu ku di longa ni kubhanga ima iambote phala akuetu mu kilunga, tu di langa, mukonda ki tu kala ni kithangana phala kuthandanganha kiavulu ni ibhidi ietu. Joele ua tungu ku ixi ia Austrália, uambe: “O sidivisu ia kuboka i ngi kuatekesa kuxinganeka mu ima iene mu bhita. I ngi kuatekesa ué kuxinganeka mu hadi ia mu tala o athu lelu, ni mabesá u ngene mu tambula mukonda dia kubelesela o itumu ia Bibidia ku muenhu uami.”

14. Kiebhi o kukolokota kuetu mu sidivisu ia kuboka kulondekesa kuila, tuala ni nzumbi ikola ia Nzambi?

¹⁴ O kikalakalu kia kuboka ki tu bhangesa kudielela kuila, tuala ni nzumbi ikola ia Nzambi. Mu kifika, xinganeka kuila, a kubhana o kikalakalu kia kuuana jimbolo ku athu mu sanzala iê. O muthu ua kutumina ka-nda kufuta, maji eie uala ni makongo phala kufuta. Athu avulu ka mesena o mbolo i ua mu a bhana. Sai iá a ku zemba mukonda dia ku a bhekela o mbolo. O kuila ueji kolokota mu kubhanga o kikalakalu kiki? Nange ueji luuala, mu kusuluka, ueji xisa o kikalakalu kiki. Sumbala o kikalakalu kiki ki bhinga kithangana ni kitadi, o athu a tu xonguena, amukuá a tu kuatela njinda iavulu, né kiki, avulu mudietu a kolokota mu kubhanga o kikalakalu kia kuboka ku mivu ioso. Kiki kilondekesa kuila, o nzumbi ikola ia Nzambi ia mu tu kuatekesa.

15. Kiebhi o kikalakalu kia kuboka o njimbu iambote kia lungu ni vondadi ia Nzambi phala o athu?

¹⁵ Kiebhi o kikalakalu kia kuboka kia lungu ni vondadi ia Jihova phala o athu? Nzambi ua mesenene kuila, o athu a kala mu ixi katé ku hádia ni hádia. Sumbala Adá ua tele  kituxi, maji o vondadi ia Nzambi ki i lunguluka. (Izaia 55:11) Nzambi ua iudika o ima, phala ku tu bhulula ku kituxi ni kalunga. Ihi ia bhange? Ua tumikisa Jezú mu ixi, phala kubhana o muenhu uê kala sata. Phala ku katula mbote mu sata iê, o athu a bhingi kubelesela Nzambi. Mu kiki, Jezú ua longo o athu o ima ia kingila Nzambi kua ene, anga u tendelesa o maxibulu mê kubhanga ué kiki. Kioso ki tu kuatekesa akuetu kubhanga o ukamba ni Nzambi, tua mu kalakala kumoxi ni Nzambi, phala kubhulula o athu ku kituxi ni kalunga.

16. Kiebhi o sidivisu ia kuboka ia lungu ni itumu ia dikota ia Nzambi?

¹⁶ Kioso ki tu kuatekesa akuetu kusanga o njila iambata ku muenhu ua kalela-ku, tu londekesa kuila, tua a zolo. Tu londekesa ué kuila, tua zolo Jihova. Muène ua mesena kuila, “athu oso a bhuluke, eze mu kuijiia o kidi.” (1 Timote 2:4) Kioso kia mu ibhuidisa kua Falizeu, se kiebhi kiexile o kitumu kia dikota kia Nzambi, Jezú ua tambuijila: “Zola Ngana, Nzambi iê, ni muxima ué uoso, ni muenhu ué uoso, ni kilunji kié kioso. Kiene kijila kia dianga kia dikota. Kia kaiadi kia difuê ngó ni kia dianga, kiki: Zola mukuenu kala ki ua di zola eie-muène.” (Matesu 22:37-39) Kioso ki tu boka o njimbu iambote, tu belesela o itumu íii.​—Tanga Ikalakalu 10:42.

17. Kiebhi ki u divua ia lungu ni ujitu ua kuboka o njimbu iambote?

¹⁷ A tu bhana mabesá avulu! O kikalakalu kia tu bhana Jihova, ki tu bhekela kisangusangu, ki tu kuatekesa ku zukama kua muéne ni jiphange jetu, ki langa ué o ukamba uetu ni muéne. O kikalakalu kiki, ki tu bhana ué kithangana phala kulondekesa o henda ietu kua Nzambi ni akuetu. Jihova uala ni jiselevende javulu ku mundu uoso. Maji kala muthu uala ni ibhindamu iê. Maji ki kale se tu minzangala mba tu adiakimi, tu jimvuama mba tu jingadiama, tua suína mba tua zoza, etu enioso tu bhanga ioso phala kutula o kidi kia lungu ni kixikanu kietu ku akuetu. Tu divua kala Chantel ku ixi ia França, uambe: “O Muthu ua beta kota mu kutena mu ngongo ioso, o Mubhangi ua ima ioso, o Nzambi ia zediua, u ngi tangela: ‘Ndeie! Zuela! Zuela mu dijina diami, maji o izuelu ia tokala i tunda ku muxima uê. Ngi kubhana o nguzu iami, o Maka mami o Bibidia, o kikuatekesu ki tunda ku diulu, o athu mu ixi phala kukalakala nau, ngenda ni ku ku longa, ngi ku tangela o ima mu kithangana kia tokala.’ O kubhanga o ima i tu tumina Jihova ni kukalakala kumoxi ni muéne, ujitu ua dikota!”