O KWILA sayi ujitu mu kilunga u wa mesenene kukala na-wu maji ku tena ku kibhanga kindala? Nange kikalakalu kya bhana ku muthu wengi. Nange sidivisu ya thembu yoso mba kikalakalu kyengi ki wexile mu bhanga kyá m’ukulu. Maji ku tena dingi ku ki bhanga mukonda dya kitala, kukata, ibhidi ijila mukonda dya kukamba kitadi mba wa mu langa mwiji. Nange ku tena dingi kusuluka mu sidivisu ya thembu yoso mukonda o ima mu kilunga ya lunguluka. Mu yoso yiyi, nange u tena kudivwa kwila, ki wa mu bhanga yoso i wa mesenene kubhanga mu sidivisu ya Nzambi. Se wa mu dibhana ni ibhidi yiyi, sayi ithangana u tena kuluwala. Ihi i u tena kubhanga phala kukatula o kuluwala ni phonzo ku muxima? Kyebhi ki u tena kusuluka ni kusanguluka kwé?

O musoso wa Nzwá dya Batizu u tena ku tu longa ndunge ya lungu ni kusanguluka mu ithangana yoso. Nzwá wexile ni mawujitu a katunda, maji nange kejidile o ima yeji bhita ku mwenyu wê mu sidivisu ya Jihova. Nzwá wa bhange muvu wa muvimba ni kubokela o athu ya lungu ni Jezú; o kithangana kya bhiti mu kaleya kya betele kota o kithangana kya bhiti ni kuboka ndenge. Maji né kiki Nzwá wa sangulukile ku mwenyu wê woso. Ihi ya mu kwatekesa? Ihi i tena ku tu kwatekesa kusuluka ni kusanguluka né mwene kyoso ki tu di bhana ni ibhidi i tu luwalesa?

Ku mbeji ya Kasamanu ka muvu wa 29 K.K., Nzwá wa mateka o kikalakalu kya mu bhanene Nzambi kya kupelepalala o athu phala o wijilu wa Mexiya. Mwene wambe: “Dyelenu o ituxi yenu, kuma o Utuminu wa dyulu wa zukama.” (Mat. 3:2; Luka 1:12-17) Athu avulu a xikina. Mu kidi, mundu wavulu wa tundu makanga phala kwívwa o njimbu yê, avulu mudya, a dyela o ituxi anga a a batizala. Ni kuswina kwoso Nzwá wa dimuna kwila, o jimesene ja jingeleja exile mu di mona kuma a yuka, eji kwa fundisa se a kambele kudyela o ituxi yâ. (Mat. 3:5-12) O kima kya beta kota kya bhangele Nzwá mu ukunji wê o kubatizala Jezú mu mbeji ya Kamusasadi ka 29 K.K.. Tundé mu kithangana kyenyókyo Nzwá wa kwatekesa o athu kukayela Jezú o Mexiya a mu kanene.—Nzwá 1:32-37.

O kya lungu ni kikalakalu kya katunda kya Nzwá, Jezú wambe: “Mu athu oso a a vwala ku ahatu, kiluwa ku zangalala mba kumoneka muthu wa tundu Nzwá dya Batizu.” (Mat. 11:11) Tu tena  kuxikina ni kidi kyoso kwila, Nzwá wa sangulukile kyavulu ni mabesá a tambwile. Kala Nzwá, Jiphange javulu ene mu tambula mabesá kwa Nzambi. Tu tale o phangu ya phange Terry. Mwene ni muhatu wê Sandra, a kalakala mu sidivisu ya thembu yoso, mu 50 a mivu ndenge. Phange Terry wambe: “Ngexile ni mawujitu avulu. Nga sidivila kala mu boki wa thembu yoso, Betelita, muboki wa katunda, kafunga ka ilunga, mubhidi wa kafunga ka ilunga, kindala ngi muboki wa katunda dingi.” Kutambula mawujitu mu kilunga ku tu sangulukisa kyavulu, maji kala ki twa-nda dilonga mu phangu ya Nzwá, kubhinga nguzu phala kusuluka ni kisangusangu, kyoso ima ku mwenyu i lunguluka.

Nzwá dya Batizu wexile ni kisangusangu ki nangenena mukonda dya kukala ni kisakidilu ku mawujitu exile na-wu. Tala phangu imoxi. Kyoso mwene kya batizala Jezú, o ukunji wê wa mateka ku tunuka, o wa Jezú wa mateka ku dibandekesa. O maxibulu-mê a thandanganyele, kyenyiki ambela Nzwá: “Mesene, muthu yó wa kexile-nê ku sámbwa dya Njolodá . . . Talesa, wa-la ku batizala kyá, ene oso ala kuya kwa mwène!” (Nzwá 3:26) Nzwá wa a tambwijila: “Mu ukaza, woso wala ni dibhanga, mwène nga-yala. Dikamba-phe dya nga-yala, wa mu imanena ngó ni ku mu ívwa, u sanguluka kyavulu, mukonda dya kwívwa dízwi dya nga-yala. Eme wami ki ng’ívwa yoso ya-lu bhita, kwene o kuzediwa kwami, kwa ngi soko.” (Nzwá 3:29) Nzwá ka soto kusokesa o ikalakalu yê ni ya Jezú. Ka xinganeka we kwila, o ikalakalu ya tambwile ki yexile dingi ni valolo mukonda dya ikalakalu ya katunda yexile mu bhanga Jezú. Mu veji dya kiki, mwene wa sanguluka, wa bhana valolo ku kikalakalu kyê kala “dikamba dya nga-yala.”

O ukexilu wa kumona o kikalakalu kyê, kya mu kwatekesa kusuluka ni kisangusangu, sumbala kyexile kikalakalu kya bhonzele. Mu kifika, Nzwá wexile Nazilé tundé kya mu vwala. Kyenyiki mwene ka tokalele kunwa vinyu. (Luka 1:15) Ya lungu ni ukexilu wa mwenyu wa bhebhuluka wa Nzwá, Jezú wambe: “Nzwá wejile sé kúdya ni kúnwa.” Ku mbandu yengi, Jezú ni maxibulu mê ka bhingile kubelesela o kijila kya Nazilé, o ukexilu wa mwenyu wâ wexile kala wa athu oso. (Mat. 11:18, 19) Kya mukwa, Nzwá kyexile mu bhanga madiwanu, maji wejidile kwila o maxibulu a Jezú ni yó exile mu kayela Nzwá eji tambula kutena phala kubhanga madiwanu. (Mat. 10:1; Nzwá 10:41) Sumbala o mawujitu ka difwile, mwene kehela o ima yiyi ku mu landukisa. Nzwá ni kuswina kwoso wa di kwatenena mu kikalakalu kyê kwa Jihova.

Se etu we lelu, tu bhana valolo ku kikalakalu kyetu mu sidivisu ya Jihova, tu tena kukala ni kisangu-sangu. Phange Terry, a mu tumbula kudimatekenu, wambe: “Eme ngi di kwatenena mu kikalakalu kyami, kya ngi bhana.” Kyoso kya xinganeka mu sidivisu yê ya thembu yoso, mwene wamba: “Sé-ku kima ki ngi bhangesa kudyela, yoso i ngi sangulukisa ngó.”

Tu tena kukala dingi ni kisangu-sangu se tu xinganeka mu kima ki bhangesa o kikalakalu mu sidivisu ya Nzambi kukala dingi ni valolo. Etu “Twala tu jingunza, tu kalakala kumoxi phala Nzambi.” Yú ujitu wa dikota! (1 Kol. 3:9) O kima ki tu ximana kya-nda suluka ni kuwabha se tu ki langa mu ithangana yoso. Kyene kimoxi we, twa-nda sanguluka se tu suluka ni kuxinganeka mu ujitu wa kukalakala ni Jihova. Ki twa-nda sokesa o ngunzu yetu ni ya athu engi. Ki twa-nda xinganeka kwila o kikalakalu kya bhana ku akwetu kya beta-kota, o kya tu bhana phala kubhanga ndenge.—Nga. 6:4.

Nzwá wejidile kwila o ukunji wê ki weji nangenena. Maji mwene kejidile kwila, weji bhwa ni lusolo. (Nzwá 3:30) Kyoso kya batizala Jezú ku muvu wa 30 K.K., kwa bhiti mbeji jisamanu Sobha Helode wa te Nzwá mu kaleya. Né kiki, Nzwá wa suluka ni kulonga o kidi. (Mál. 6:17-20) Ihi ya mu kwatekesa kusanguluka kiki sumbala ni ibhidi? Mwene wa di kwatenene mu ima ya nzumbi.

Kyoso Nzwá kya kexile mu kaleya, mwene wa tambula njimbu ya lungu ni ukunji wexile mu sanzumuna Jezú. (Mat. 11:2; Luka 7:18) Nzwá wa xikinine ni kidi kyoso kwila, Jezú mwene wexile o Mexiya. Maji mwene wexile mu dibhwidisa se kyebhi Jezú kyeji kumbidila o ikanenu yoso yo soneke mu Mikanda Ikôla ya lungu ni Mexiya. Kuma o Mexiya weji  tambula o ungana, o kwila Jezú weji mateka kutumina mu kithangana kyenyókyo? O kwila weji katula Nzwá mu kaleya? Nzwá wa mesenene kwijiya dingi ya lungu ni ima yeji bhanga Jezú. Mu kiki, wa tumikisa maxibulu mê ayadi kwa Jezú, anga a mwibhwidisa: “Ei’mwène yuná a mu tanga-jinga o kwiza, inga tu kinga muthu wengi?” (Luka 7:19) Kyoso ene kya vutuka, nange Nzwá wevu kyambote kyoso kyexile mu mu jimbulwila kwila Jezú wexile mu bhanga madiwanu ni kusaka o athu, ni njimbu ya mu tumikisine Jezú. Mwene wambe: “Ifôfo íyi mona, inema íyi yenda, akwa-kikunzu mba akwa mabhute ya a disanza, mixilu íyi ívwa, afwile ya a fukunuka, jingadyama ya évwa o Njimbu Yambote.—Luka 7:20-22.

Sé phata, o njimbu ya tambula Nzwá ku maxibulu-mê ya mu ximbakatesa kyavulu. Ya mu dyelelesa dingi kwila, Jezú wexile mu kumbidila o ikanenu yoso ya lungu ni Mexiya. Sumbala Jezú ka mu katula mu kaleya, Nzwá wejidile kwila, o ikalakalu yoso ya bhangele, ki yexile ya ki ngoho. Sumbala ni ibhidi yiyi, mwene wa sange kima phala kukala ni kisangu-sangu.

O ima ya bhiti ni Nzwá, i tu longa kwila, se tu di kwatenena mu ima ya nzumbi, twa-nda tena kukolokota, twa-nda kala ni kusanguluka ni mwanyu. (Kol. 1:9-11) Tu tena kukolokota se twe-nda jinga ni kutanga o Bibidya, ni kuxinganeka mu ima i tu tanga. Kubhanga kiki, kwa-nda tu kwatekesa kwijiya kwila, kama koso-koso ku tu bhanga mu sidivisu ya Nzambi, kala ni valolo yavulu. (1 Kol. 15:58) Sandra wambe: “Kutanga kibatulu kimoxi mu Bibidya izuwa yoso, kwa ngi kwatekesa kuzukama dingi kwa Jihova. Kwa ngi kwatekesa kulunga o muxima kwa mwene, mu veji dya kulunga o muxima kokwami.” Tu tena we kulunga o muxima mu ji njimbu ja lungu ni ikalakalu ya mu bhanga o jiphange jetu phala Jihova. Kiki, kya-nda tu fidisa ku di kwatenena ngó kokwetu. Sandra wambe: “O minangu ya JW Broadcasting^® i twene mu tambula mbeji joso, ya ngi kwatekesa kuzukama dingi ku kilunga kya Jihova, ya ngi kwatekesa we kukala ni kusanguluka mu kikalakalu kyami.”

Mu ukunji wê, Nzwá dya Batizu wa kalakala ni “nguzu ni kutena,” kala kwa “polofeta Elija.” Kala Elija, mwene “wa kexile muthu ni mukwetu.” (Luka 1:17; Tiya. 5:17) Se tu kayela o phangu ya Nzwá mu kukala ni kisakidilu ni ku lunga o muxima mu sidivisu ya Jihova, twa-nda kala we ni kusanguluka kwavulu mu sidivisu yetu ya Utuminu, kiza ki kizé.