O jivelusu jiji jilondekesa divwa dya idifwa yatokala kukala nayu o Jikidistá. Yiyi: “O ibundu iyma o nzumbiphe, henda, ngalasa, kutululuka, kuxididika [mba mwanyu], kulenduka, kubhanga mbote [mba ujitu], kukala fiyele [mba kixikanu], kubelesela [mba kubatama], ni kuditumina jihanji.” Kitwatokala kubhanza kwila, o ibundu yiyi iyma o nzumbi ikôla ya Nzambi, yene ngó itena kutukwatekesa kukala ni kifwa kyambote mu nzumbi.

Tala yasoneka poxolo Pawulu mu jivelusu jadyanga: “Imbamba yoyo ibhanga o xitu ki ijimbi, yen’yi: Undumbu, ufusa, uhabhu. Ubhezelu wa iteka, wanga, athu adikwatela unguma, adi dya milonga, adibhanga kuswina, aditemena, adikwata jimvunda, akwadifuba, akwalwimbi, adizemba, adimwangununa kumadyandamadyanda, ni ku ibuka ibuka. Akwadixinga, ijibhanganga, jihôlwa, o mwenyu wâ wakudita ngó mu izomba yayibha, ni ima yamukwá yadifu kiki.” (Nga. 5:19-21) Nange Phawulu wejitumbula ima yengi yatokala ku “imbamba yoyo ibhanga o xitu,” kala yotumbule mu Kolose 3:5. Kyene kimoxi we kyabhange kyoso kyatumbula o divwa dya idifwa yambote, kyoso kyambe: “O ima kala yiyi, kanaku kitumu kya ku ikidika.” Kyenyikiphe, Phawulu katumbula o idifwa yoso itutena kukalanayu, ni kikwatekesu kya nzumbi ikôla.

Kiki tukimona kyoso kitwisokesa ni idifwa yasonekena o kilunga kya Efezu: “O kwima kwa mukengeji kudimonekena mu kubhongolola nzungule ya jimbote, ni kuyuka, ni kidi.” (Efe. 5:8, 9) Kyene, o “kubhanga o mbote,” o kuyuka ni kidi, kibhanga mbandu kya “kwima kwa mukengeji,” maji yene we imbanga mbandu ya “ibundu yima o Nzumbi.”

Etu we tutena kutendela kiki kyoso kitusokesa o idifwa isamanu yatendelesa Phawulu kwa Timote, ibanga mbandu ya ibundu yima nzumbi: “O kuyuka, o kuxila Nzambi, o kuxikana, o kuzola, o kukolokota ni kubelesela.” (1 Tim. 6:11) O idifwa itatu yiyi (o kuxikana, o kuzola, kukolokota [mba kubatama]) yene ngó kyotumbule kala jibhanga mbandu ku “ibundu yima o nzumbi.” Timote wabhingile we kukala ni idifwa kala: O kuyuka, o kukolokota, ni kubelesela.—Sokesa ni Kolose 3:12; 2 Phetele 1:5-7.

Kyenyiki, o Ngalásya 5:22, 23 kikitumbula o idifwa yoso yatokala kukala nayu o Jikidistá. O nzumbi ikôla ya Nzambi, itena kutukwatekesa kukala ni divwa dya idifwa ibhanga mbadu ya “ibundu yima o Nzumbi.” Maji sayi dingi idifwa yengi itwabhindamena we phala kukala tu Jikidistá jakulu mu nzumbi ni kuzwata “o muthu wobhe amubhangulula mukidifwa kya Nzambi, kidimonekena mukukala ni mwenyu wakuyuka, ni mukuzela kwakidi.”—Efe. 4:24.