1. Mukonda dyahi Jihova tutena kumusokesa ni mama wamukwamwisa?

“MANYI muhatu utena kujimba mon’ê wamuvwala?” Jihova wabhange o kibwidisu kiki mu izuwa yapolofeta Izaya. Jihova wambela o mundu wê, wixi: “Nembe bhukala mama ulanduka mon’ê, emephe kana, kuma eye kingakàkujimba, lémbwe!” (Iza. 49:15) Jihova kene mudisokesa mu ithangana yavulu ni mama, maji mu kithangana kiki, mwene wadisokesa. Jihova wasokesa o henda ya mama kwa monê, phala kulondekesa kwila, watuzolo kyavulu. Phange Jasmin wambe: “Kyoso kiwamukwamwisa mona, eye umateka ukamba wakatunda unangenena ku mwenyu woso.”

2. Kyebhi Jihova kyadivwa kyoso monê wakazola kyaxisa o kilunga kyê?

² Jihova umona né mwene kana kamoxi k’eha kuya muyônge ni mu sidivisu ya kuboka. Xinganekaphe o ndolo ikala ku muxima wa Jihova mukumona mazunda ni mazunda ajiselevende jê azoza mu nzumbi * mu mivu yoso.

3. Ihi yamesena Jihova?

³ Jiphange javulu jakazola azozelu mu nzumbi, lelu avutuka mukilunga. Etu twasanguluka mukuwamona kwila avutuka! Jihova wamesena kwila avutuka, etu we kyene kitwamesena. (1 Phe. 2:25) Kyebhi kitutena kwakwatekesa? Ande dya kutambwijila o kibhwidisu kiki, kima kyambote kwijiya se mukonda dyahi amoxi eha kuya mu yônge ni kubhanga o sidivisu yakuboka.

4. Mukonda dya kikalakalu kyá, ihi ibhita ni jiphange jamukwa?

⁴ Avulu, ehela o kikalakalu kyá kukala kupholo dya ima yoso kumyenyu yâ. Phange Hang, * watungu kulwiji dya Aziya wambe: “Mu kutobha kwami, ngaxinganeka kwila, ngejitena kubheza dingi kyambote Jihova, se ngikala ni jimbote javulu. Kyenyiki, ngexile mukukalakala dingi kyavulu, ngamateka kufonga mu yônge, kudisukilu, ngeha mwene kya o kuya mu yônge. Bhukaxi kamundu wê, Satanaji usota kulandukisa o athu, phala neha kusidivila Nzambi, bhofelebhofele.”

5. Kyebhi phange ya muhatu kyadibhana ni maka oso abhiti kumwenyu wê?

⁵ Jiphange javulu, amudibhana ni ibhidi yonene, ya azozesa. Mukifika, phange Ana, watungu ku ixi ya Britanha, wamusasa twana tutanu. Mwene wajimbulula: “Kyoso kingavwala mon’ami wakayadi, mwene wexile ni mawuhaxi avulu. Mukubhita kithangana, monami wakatatu, amute mukamukonde mukilunga. O mon’ami wamukwa, wakwata uhaxi wamubhekela masambisambi. Ibhidi yoso yiyi, yangibhekela kikote ku muxima. Kyenyiki, ngamateka kufonga mu yônge, ni musidivisu ya kuboka. Kudisukilu, ngazoza mu nzumbi.” Etu, tutendela yabhiti ni phange Ana, ni mwiji wê, ni jiphange joso jibhita mu ibhidi yiyi!

6. Kyebhi o kukamba kumbidila Kolose 3:13, kutena kubhangesa o muthu kuxisa o kilunga kya Jihova?

⁶ Tanga Kolose 3:13. Sayi jiselevende ja Jihova, adizangala ni phange yamukwa mukilunga. Poxolo Phawulu waxikina ni kidi kyoso kwila, mukilunga, twejibhinga ku “di loloka, se bhwala muthu wadikwata ni mukwá.” Katé, atena mwene kututalatala kyayibha. Se tukamba kudilanga, twandabaka unguma kumuxima. Se muthu ufutuluka kyavulu, kudisukilu, utena mwene kuxisa o kilunga kya Jihova. Tala yabhiti ni phange Phawulu, watungu ku America do Sul. Amutatela o makutu kwila, wabhange kima kyayibha. Kyenyiki, amukatula ujitu mukilunga. Mwene wadivu kyebhi? Phange Phawulu wambe: “Eme ngafutulukile kyavulu. Kyenyiki, bhofelebhofele, ngaxisa o kilunga.”

7. Ihi itena kubhita ni muthu ukala ni kitongolwelu kyaneme?

⁷ Se o muthu watele kituxi m’ukulu, mwene utena kukala ni kitongolwelu kyaneme mukithangana kyavulu. Utena kudivwa kwila, Nzambi katokala kumuzola dingi. Né mwene se wadyela kyá, anga amuloloka, mwene utena hanji kudivwa kwila, kawabha o muxima, kafwama dingi kutokala mukilunga kya Jihova. Kiki kyene kyadivu phange Xiku. Mwene wambe: “Eme angibazela mukilunga mukonda dya undumbu. Sumbala kudimatekenu ngexile mwene kuya mu yônge kyoso kyangibazela, maji ngadivu kwila, kingitokala kukala dingi kumoxi ni mundu wa Jihova, mukonda dya kikote kumuxima. Eme ngexile hanji muditatela. Kyenyiki, mukilunji kyami ngaxikina kwila, Jihova kangiloloka. Kudisukilu, ngeha o kuya mu yônge, ni kikalakalu kyakuboka.” Kyebhi ki udivwa ni jiphange jibhita ni maka utwatumbula kate bhabha? O kwila usota kwatendela? O kyabeta dingi kota, kyebhi Jihova kyadivwa ni jiphange jiji?

8. O kwila Jihova ujimba yó amusidivila? Jimbulula.

⁸ Jihova kajimbi muthu wamusidivila kyá mumivu yavulu, maji weha kudilunga ni mundu wê. Mwene kajimbi we o ikalakalu yabhange ene, mukilunga kyê. (Jihe. 6:10) Polofeta Izaya, watekifika kyambote kilondekesa kwila, Jihova usuwa o mundu wê. Izaya wasoneka,  wixi: ‘O kilunga kyê, wakàkidisa kala mubidi; o tumbudi wakà twongeka bhumaku, hé utwakata bhu jihata jê.’ (Iza. 40:11) Kyebhi kidivwa Jihova; o Kafunga Kadikota, se mukibhanga kyê mukamba mbudi imoxi? Jezú wajimbulula kyebhi kidivwa Jihova, kyoso kyatambwijila o kibhwidisu kya maxibulumê: “Enu mwafika kyebhi? Diyala se dikala ni hâma ya mbudi, anga bhu mu jimbila imoxi, mwenyó ubhanga kyebhi? Manyi kanda kuxa o makwinyi’ivwa n’ivwa ala mù kúdya ku mulundu, n’aye mu sota yiyi ya jimbidila? O kyanda ku ibonga, ngimyambela kidi, kwila ubeta ku isangulukila yoyo, dikwé o makwiny’ivwa n’ivwa ja kambele kujimbidila.”—Mat. 18:12, 13.

9. Muthembu yasoneka o Bibidya, o tufunga twexile mutalatala kyebhi o jimbudi jâ? (Tala o foto ya kapa.)

⁹ Mukonda dyahi Jihova atokala mwene kumusokesa ni tufunga twajimbudi? Mukonda, muthembu yasoneka o Bibidya, o tufunga twexile mulanga ni muxima woso o jimbudi jâ. Mukifika, Davidi wabhânge ni hoji ni ulusu, phala kulanga o kibhanga kyê. (1 Sam. 17:34, 35) Sé phata, o kafunga kambote, wejitongina se mukibhanga kyê mukamba mbudi imoxi. (Nzwá 10:3, 14) O kafunga kaka kahenda, katena kuxisa o 99 dya jimbudi mukididi kyakondoma, phala kuya musota o mbudi imoxi yajimbidila. Jezú wate o kifika kiki, phala kutulonga kidi kyakatunda: “Kyene kimoxi, kikyala muvondadi ya Tat’enu wene mu dyulu; k’andala kwila kutwana tutu bhutexika kamoxi.”—Mat. 18:14.

10. Kala kilondekesa Izekiyele 34:11-16, ihi yakanena Jihova kubhanga kujimbudi jê jajimbidila?

¹⁰ Jihova wazolo o jiselevende jê joso, wazolo o “twana” twê twaxisa o kibhanga kyê. Bhukaxi ka polofeta Izekiyele, Nzambi wakanena kusota o jimbudi jê jajimbidila, ni kwakwatekesa kukala dingi ni nguzu mba sawidi mu nzumbi. Mwene wajimbulula o ima yejibhanga, phala kubhulula o jimbudi jajimbidila, kala kyexile mubhanga o tufunga mu Izalayele yokulu, kyoso kikujimbidila mbudi imoxi kukibhanga kyê. (Tanga Izekiyele 34:11-16.) Kyadyanga, o kafunga usota o mbudi. Kubhanga  kiki, kubhinga kithangana ni nguzu. O kyasanga o mbudi yajimbidile, o kafunga uyambata kate bhwala o kibhanga. Mukusuluka, se o mbudi yadikwama mba yala ni nzala, ni henda yoso, o kafunga ukwatekesa o mbudi yakambe o nguzu, ukuta o italakanyu mba jifidila, uyambata anga uyidisa. O tufunga twene mukwinga “o kilunga kya Nzambi” lelu, atokala kubhanga we kiki, phala kwatekesa yó wazoza mu nzumbi. (1 Phe. 5:2, 3) O tufunga a asota, akwatekesa kuvutuka mukibhanga, a alondekesa o henda mukubhana o kikwatekesu kyabhindamena mu nzumbi. *

11. Ihi itendela o kafunga kambote?

¹¹ O kafunga kambote, katendela kwila, o jimbudi jitena kujimbidila. Se o mbudi ikala munyunga, anga ixisa o kibhanga, kafunga katalatala ni undanda o mbudi yiyi, kana. Tala kyebhi Nzambi kyatalatala o jiselevende jê m’ukulu, ehele kubhanga o vondadi yê mu ithangana yofele.

12. Kyebhi Jihova kyatalatala Jona?

¹² O Polofeta Jona, walengele o kikalakalu kyamubhele Nzambi. Nékiki, Jihova kamubhana dikunda. Kuma Jihova kafunga kambote, wamubhulula, wamukwatekesa kukala dingi ni nguzu yabhingile, phala kukumbidila o kikalakalu kyê. (Jona 2:7; 3:1, 2) Mukusuluka, Jihova wakwatekesa Jona kutendela o valolo ya mwenyu wa muthu, bhukaxi ka musala wadinyangwa. (Jona 4:10, 11) Ihi itwadilonga? Twadilongo kwila, o tufunga atokala kusuluka ni kwatekesa phange wazoza mu nzumbi, asota kutendela se ihi yabhangesa o mbudi kuxisa o kibhanga. O kyoso o mbudi yiyi ki ivutuka kwa Jihova, o tufunga atokala kusuluka ni kwilondekesa o henda.

13. Ihi itudilonga m’ukexilu wa Jihova kudivwa ni musoneki wa Sálamu 73?

¹³ O musoneki wa Sálamu 73 waluwalele mukonda wexile mumona kwila, o athu ayibha edile kala azediwa dingi, mwene ndenge. Mwene wamateka kukala ni phata, wadibhwidisa se o kubhanga o vondadi ya Nzambi, kubhekela mwene mbote. (Jisá. 73:12, 13, 16) Kyebhi  kyadivu Jihova? Mwene kamutatela. Mukidi, Jihova wabhangesa o izwelu yê kukala mu Bibidya. Mukusuluka, o mukwa Jisálamu yú wamono kwila, o ukamba ni Jihova kyene o kima kyabetakota, o kima kyosokyoso kumwenyu ndenge. (Jisá. 73:23, 24, 26, 28) Ihi itwadilonga? Twadilongo kwila, o tufunga katokala kufundisa yó abanza kwila, o kusidivila Jihova, kikwa mwabhekela mbote. Muveji dya kwafundisa, o tufunga atokala kusota kutendelela se mukonda dyahi ene amuzwela kiki, mba amubhanga o ima m’ukexilu yú. Kyene kyuwa kyandabhana o kiswinisu kyabhindamena, bhukaxi ka Bibidya.

14. Mukonda dyahi Elija wabhingile kikwatekesu? Kyebhi Jihova kya bhana o kikwatekesu kiki?

¹⁴ Polofeta Elija, walengele N’amvwale, Jezabele. (1 Jis. 19:1-3) Mwene waxinganekene kwila, kikwexile dingi muthu wengi wexile musidivila kala polofeta ya Jihova. Waxinganekene we kwila, o kikalakalu kyoso kyabhangele, kyakingoho. O muxima wa Elija watolokele kyavulu, katé wamesenene kufwa. (1 Jis. 19:4, 10) Muveji dyakumutatela, Jihova wadyelelesa Elija kwila, kexile ubheka. Watokalele kudyelela mukutena kwa Nzambi, ni kwila, mwene wexile hanji ni ikalakalu yavulu phala kubhanga. Ni henda yoso, Jihova wevu o ima yexile mutandanganyesa Elija. Mukusuluka, wamubhana ikalakalu yawubhe. (1 Jis. 19:11-16, 18) Ihi itwadilonga? Twadilongo kwila, etwenyoso, kotelele o tufunga, twatokala kutalatala o jimbudi ja Jihova, ni henda. Né mwene se o muthu wala ni kulula kwa muxima, mba udivwa kwila, Jihova katokala dingi kumuloloka, o tufunga atokala kumwivwa  ni mwanyu woso, kyoso kyaya ni kwatangela yoso yamukala kumuxima. Mukusuluka, asota kumukwatekesa kumona kwila, Jihova wamuzolo kyavulu, wamusuwu.

15. Kala kilondekesa Nzwá 6:39, kyebhi Jezú kyatala o jimbudi ja Tat’ê?

¹⁵ Jihova wamesena kwila, tutala kyebhi o jimbudi jê jajimbidila? Tutena kudilonga kuphangu ya Jezú. Jezú wejidile kwila, o jimbudi joso mukilunga kyê, jala ni valolo yavulu kumesu a Jihova. Kyenyiki, Jezú wabhange yoso phala kukwatekesa o “jimbudi ja jimbidila” mu “dibhata dya Izalayele,” kuvutuka kwa Jihova. (Mat. 15:24; Luka 19:9, 10) Kuma mwene kafunga kambote, Jezú wabhange yoso yatena, phala ku jimbudi ja Jihova kikujimbidile né ngo mbudi imoxi.—Tanga Nzwá 6:39.

16-17. Kyebhi o tufunga kyatokala kukwatekesa o jimbudi jajimbidila? (Tala o kaxa “ Kyebhi Kitena Kudivwa o Kambudi ka Jimbidila?”)

¹⁶ Poxolo Phawulu, waswinisa o tufunga mukilunga kya Efezu phala kukayela o phangu ya Jezú. Mwene wasoneka: “Mwa fwama kukalakala ni kubhindumuna mukwenu watate. Endenu ni kuxinganeka o kizwelu kya Ngana Jezú, kyambele wixi: O kubhana kota mukuzediwisa, o kutambula ndenge.’” (Ika. 20:17, 35) Sé phata, o velusu yiyi ilondekesa kwila, o tufunga mu izuwa yalelu, ala ni kikalakalu kyadikota, kyakulanga o mundu wa Jihova. Phange Salvador ku ixi ya Espanha, wambe: “Kyoso kingixinganeka mu henda ilondekesa Jihova kujimbudi jê jajimbidila, ngisota kubhanga yoso ingitena phala kwakwatekesa. Ngejiya kwila, Jihova wamesena kuma ngilanga kyambote o jimbudi jê.”

¹⁷ Oso utwatumbula bhabha, axile o kilunga kya Jihova. Maji a’akwatekesa, ya avutuka kwa Jihova. Kindala mwene kiki, athu avulu axisa o kilunga, amesena we kuvutuka. O mbandu yakayelaku, yandazwela dingi se ihi itutena kubhanga, phala kwakwatekesa kuvutuka kwa Jihova.