1. O wôma wa Nzambi ihi? Mukonda dyahi o azolo Jihova atokala kukala ni wôma yú?

O JIKIDISTÁ azolo Nzambi, ala we ni wôma wé. Mu kidi, etu kitwamuzwela yalungu ni wôma uteketesa o muthu. Maji twandazwela o ukexilu wa wôma walungu ni kuxila o muthu. O athu ala ni wôma yú, adiwana ni ibhangelu ya Nzambi, amuxila ni muxima woso. Ene kamesena kuluwalesa o tata yâ yadyulu, mukonda kamesena kuzanga o ukamba wâ ni mwene.—Jisá. 111:10; Jisa. 8:13.

2. Bhukaxi ka izwelu ya sobha Davidi yosonekemu Jisálamu 86:11, ima yebhi iyadi itwanda dilonga?

² Tanga Jisálamu 86:11. Mukuxinganeka mu izwelu yiyi, umona kwila, o Sobha Davidi wejidile o mbote ya kuxila ni muxima woso Jihova. Kindala, twandadilonga se kyebhi kitutena kukumbidila o izwelu ya Davidi ya musambu wê. Kyadyanga, twanda mona se mukonda dyahi twatokala kuxila ni muxima woso o dijina dya Nzambi. Kayadi, twanda mona se kyebhi kitutena kulondekesa kwila tuxila ni muxima woso o dijina dya Nzambi mu kizwua ni kizuwa.

3. Ihi yabhiti kumwenyu wa Mozé yamukwatekesa kusuluka ni kuximana o dijina dya Nzambi?

³ Xinganeka ngó! Kyebhi kya divu Mozé, mukithangana kyamono o fuma ya Jihova ya mu bhitile bhu pholo, kyoso kyexile mu phudi ya ditadi? O Estudo Perspicaz yamba kwila, “nange yâ ene o madiwanu abetakota amono o muthu ande dya Jezú kwiza  mu ixi.” Mozé wevu anju wa tumbula o izwelu yiyi: “Jihova, Nzambi ya jihenda ni kyadi, wa lenduka, u kokoloka mu kuthathamana, u kôla mu kukwatela henda, ufiyele u vula.” (Mak. 33:17-23; 34:5-7) Sé phata, Mozé walembalala o madiwanu yâ, kyoso kyatumbula o dijina dya Jihova. Mu kusuluka, kiki nange kyene kya bhangesa Mozé kudimuna o mundu wa Nzambi, akwa Izalayele, phala “kuxila o dijina dyangene dikôla, di kwatesa wôma.”—Mate. 28:58.

4. Idifwa yebhi ya Jihova itwatokala kuxinganeka?

⁴ Kyoso ki tuxinganeka mu dijina Jihova, kima kyambote kuxingangeka we kumuthu wavu o dijina didi. Twatokala kulembalala o idifwa yê kala, o kutena kwê, o unjimu wê, o kuyuka kwê ni henda yê. Kuxinganeka mu idifwa yiyi ni yamukwa kutena kutubhangesa kumuxila dingi ni muxima woso.—Jisá. 77:11-15.

5-6. (a) O dijina dya Nzambi dilombolola ihi? (b) Kyebhi Jihova kyabhangesa o ima kubhita kala kilondekesa Makatukilu 3:13, 14 ni Izaya 64:8?

⁵ Ihi itwejiya yalungu ni dilombolwelu dya dijina dya Nzambi? Atokwexi avulu axikina kwila o dijina Jihova dilombolola “Eme kala-dya-kala.” O izwelu yiyi itulembalesa kwila seku kima kitena kufidisa Jihova kubhanga o kima kyamesena o kubhanga, mwene ubhangesa o ima kubhita kala kyamesena. Kiki kibhita kyebhi?

⁶ Jihova ubhangesa o ima kubhita mu kukituka yoso yabhingi phala kukumbidila o vondadi yê. (Tanga Makatukilu 3:13, 14.) Mu jivelusu jiji, o izwelu “Eme kala-dya-kala,” atena ku ilungulula we “ubheka yoso ya mesena o kubheka.” Muveji javulu, o madivulu metu ene mutuswinisa kuxinganeka mu kidifwa kiki kyakatunda, kya Nzambi yetu. Jihova utena kubhangesa we o jiselevende jê, akwa ituxi, kukituka yoso yabhingi phala kumusidivila, ni kukumbidila o vondadi yê. (Tanga Izaya 64:8.) Jihova wene mubhangesa o ima kubhita, mu mawukexilu yâ. Séku kima kitena kumufidisa kukumbidila o vondadi yê.—Iza. 46:10, 11.

7. Kyebhi ki tutena kubandekesa o kisadilu kyetu kwa Tata yetu yadyulu?

⁷ Tutena kubandekesa o kisadilu kyetu kwa Tata yetu yadyulu, mukuxinganeka mu  ima yoso yabhange, ni kutena kwatubhana phala kubhanga o ima. Mukifika, kyoso kituxinganeka mu ima yoso yabhange Nzambi, etu tudiwana kyavulu, ni ukexilu wabhange o ima. (Jisá. 8:3, 4) O kyoso kituxinganeka mukikwatekesu kyene mutubhana Jihova phala kukumbidila o kubhanga o vondadi yê, tumuxila dingi ni muxima woso. Sé phata, twatokala kuxila o dijina dya Jihova! Mukonda o dijina didi, dyalungu ni ukexilu woso wa Tata yetu, yoso yabhange m’ukulu, ni yoso yandabhanga kuhádya.—Jisá. 89:7, 8.

8. Kala kilondeksa Matendelelu 32:2, 3 Jihova wamesena kwila o jiselevende jê abhanga ihi kudijina dyê?

⁸ Ande dyakubokona mu ixi ya akanene, Jihova wazwela kwa Mozé, izwelu ya mwimbu. (Mate. 31:19) Mozé watokalele kulonga we o mwimbu yú ku athu. (Tanga Matendelelu 32:2, 3.) Kyoso kituxinganeka mujivelusu 2 ni 3, tutena kumona kwila, Jihova, kamesena kusweka o dijina dyê, mba kuditalatala kala dyene dikôla kinéne phala kuditumbula. Mwene wamesena kwila, o ji anju ni athu, ejiya o dijina dyê! O mwiji wa Izalayele, wexile ni ujitu wonene wakwalonga kwala Mozé, maka alungu ni Jihova ni dijina dyê dikôla! O ima yalongo Mozé, yakolesa o kixikanu kyâ, ya’aswinisa, yedile kala dimume ku isasa. Kyebhi kitutena kwijiya se o ukexilu wetu wakulonga, wadifu we kiki?

9. Kyebhi kitutena kukwatekesa mukikalakalu kyakuzelesa o dijina dya Jihova?

⁹ Kyoso kitukalakala nzo ni inzo, mba mukididi mubhita athu avulu, twatokala kulondekesa o dijina dya Nzambi, Jihova, ku athu utusanga. Tutena kwabhana we madivulu, kwalondekesa jividyu, ni milongi yala mu sayte yetu, ijingisa Jihova. Tutena kusota we kithangana phala kuzwela ni athu yalungu ni Nzambi yetu yahenda, ni idifwa yê, kyoso kitukala kusalu, kuxikola, mba kyoso kitwamukwenda njila. Kyoso kitutangela ku athu o ima yambote yandabhanga Jihova mu ixi, nange ene andamona muveji yadyanga kwila, Jihova watuzolo kyavulu. Tuzelesa o dijina dya Nzambi, kyoso kitutangela o athu kwila, o ima yayibha yenemulonga o athu yalungu ni Jihova, makutu. O ima itulonga ku athu bhukaxi ka Bibidya, itena kwaximbakatesa.—Iza. 65:13, 14.

10. Kyoso kitulonga o Bibidya ku athu, mukonda dyahi kitutokala ngó kwalonga o ijila ni itumu ya Nzambi?

¹⁰ Mukulonga o Bibidya ku athu, twamesena kukwatekesa o maxibulu metu kwijiya ni kutumbula o dijina dya Jihova. Kumbandu yengi we, twamesena kwakwatekesa kwijiya kyambote Jihova. O kwila twandatena kwakwatekesa kuzola Jihova, mukwalonga ngó o itendelesu, o itumu ni kyebhi kyatokala kwenda? O dixibulu dyambote, ditena kwijiya kyambote o ijila ya Nzambi, katemwene ni ku iwabhela kyavulu. Maji o kwila o dixibulu dyanda belesela Jihova mukonda dyahenda yê kwa mwene? Lembala kwila, Adá ni Eva ejidile o ijila, maji kazolele ni muxima woso, Nzambi, wa abhele o ijila yiyi. (Dim. 3:1-6) Kyenyikiphe, mukulonga o Bibidya kwakwetu, kitwatokala kwalonga ngó o itendelesu ni ijila ya Nzambi.

11. Mukulonga o ijila ni itendelesu ya Nzambi, mukonda dyahi twatokala kukwatekesa o maxibulu metu kuzola yó wabhana o ijila yiyi?

¹¹ O itendelesu ni ijila ya Nzambi, phala o mbote yetu. (Jisá. 119:97, 111, 112) Maji o maxibulu metu, nange kandatendela kwila, Jihova ubhana o ijila yiyi, mukonda watuzolo. Kyenyikiphe, tutena kwibhwidisa o maxibulu metu: “Mudyê, mukonda dyahi Nzambi ubhinga ku jiselevende jê phala kubhanga o kima kiki, mba wafidisa kubhanga o kima kina? Yiyi itulonga ihi yalungu ni mwene?” Se tukwatekesa o maxibulu metu kuxinganeka kwa Jihova ni kuzola ni muxima woso o dijina dyê, o maka  andabhixidila mu mixima yâ. Ene kandazola ngó o ijila, maji andazola we yó wa abhana o ijila, Jihova. (Jisá. 119:68) Kiki kyandabandekesa o kixikanu kyâ, kyanda kwakwatekesa kukolokota mu izukutisu yabhonzo yanda kwiza kupholo.—1 Kol. 3:12-15.

12. Davidi wexile ni mixima iyadi mu kithangana kyebhi? Ihi yabhiti?

¹² Mu Sálamu 86:11 tusangamu izwelu yakatunda, yambe kiki: “endesa o muxima wami,” mba ‘ki ungehele kukala ni mixima iyadi.’ Sobha Davidi amubhusu bhukaxi ka nzumbi ikôla, phala kusoneka o izwelu yiyi. Kumwenyu we woso, Davidi wamono kwila, kikubhonzo muthu kukala ni mixima iyadi. Sayi kizuwa, mwene wexile kuthala dya inzo yê, anga umona muhatu wexile muzowa. Mukithangana kyenyokyo, Davidi wexile ni muxima umoxi, inga wexile ni mixima iyadi? Mwene wejidile o kijila kiki kya Jihova: “Kana kukala ni lwimbi lwa muhatu wamukwenu.” (Mak. 20:17) Nékiki, mwene wasuluka ni kutala o muhatu. O muxima we wadiwanene muluyadi. Kumbandu wexile ni hanji yakukala ni muhatu, Bateseba, o kumbandu yamukwa, wamesenene kusangulukisa Jihova. Davidi wazolele Jihova, wexile ni wôma wê. Né kiki, wasolo kubhanga o vondadi yé, yú wate kituxi kyadikota. Davidi, wabhekela lusebhu kudijina dya Jihova, wabhekela we maka ku athu akambele o kikuma, kala o mwiji wê.—2 Sam. 11:1-5, 14-17; 12:7-12.

13. Kyebhi kitwejiya kwila, kupholo Davidi wavutuka mukukala dingi ni muxima umoxi?

¹³ Davidi amubazela. Mukubhita kithangana, wavutuka kukala dingi ni ukamba wambote ni Jihova. (2 Sam. 12:13; Jisá. 51:2-4, 17) Davidi walembalala o ibhidi ni jiphaxi jibhita ni muthu ukala ni mixima iyadi. O izwelu yasoneka mu divulu dya Jisálamu 86:11 atena we ku ilungulula kiki: “ngi kwatekese kukala ni muxima umoxi mba ki ungehele kukala ni mixima iyadi.” O kwila Jihova wakwatekesa Davidi kukala ni muxima watenena, mba muxima umoxi? Xé! Tuzwela kiki, mukonda, mukubhita mivu, yalungu ni Davidi, Jihova wambe: “O muxima wê wa kexi wa tenena kwa Jihova Nzambi yê.”—1 Jis. 11:4; 15:3.

14. Ihi itwatokala kudibhwidisa ni mukonda dyahi?

¹⁴ O phangu ya Davidi ituswinisa, maji itudimuna we. O kituxi kya tele mwene, kidimwinu phala o jiselevende ja Nzambi lelu. Etu kitwamesena kuta o kituxi kyatele Davidi. Kyenyikiphe, kikale se twamateka kusidivila Jihova kindala, mba twamusidivila kya mu mivu  yavulu, etwenyoso twatokala kudibhwidisa kiki, ‘O kwila ngamubhanga yoso phala kingehele Satanaji kuwana o muxima wami?’

15. O kukala ni wôma wa Nzambi kutulanga kyebhi ku ufusa?

¹⁵ Mukifika, ihi iwandabhanga, se umona kima mu mutelembe mba mu internete, itena kukubhangesa kukala ni ixinganeku yabolo? Eye utena kuxinganeka kwila, o foto mba vidyu iwamono, ki ufusa kana. O kwila kiki kitena kukala mubhetu wa Satanaji, phala kusota kuwana o mixima we? (2 Kol. 2:11) O jifoto mba jividyu jiji, jitena kukala kala dikuwa dyakwata o muthu, phala kuwana bhukaxi, muxi wonene. Mwene umateka ni kuta o mbandu yatu yadikuwa kumuxi. Mwene uya ni kukoka o muxi bhofelebhofele, kate ki udiwana muluyadi. O kwila o jifoto jibhekela o ixinganeku yabolo, kijitena kukala we kala o dikuwa didi? O kama kamoneka kala kama kofele, kikabhange kima, katena kuwana o muxima wa muthu, ni kuzanga o ukamba wé ni Jihova. Kyenyikiphe, kana kwehela kima kyabolo kubokona mu muxima wê. Bhanga yoso phala kukala ni muxima watenena, mukuxila o dijina dya Jihova!

16. Mukudibhana ni jitendasá, ibhwidisu yebhi itwatokala kudibhanga?

¹⁶ Katuku o jifoto jibhekela o jihanji jabolo, Satanaji ututendala we bhuka ka ima yamukwa. Ihi itandabhanga? Kiki kibhonzo muthu kuxinganeka kwila, o kima kiki, kikibhangye kima. Kikima kyayibha kinéne. Mukifika, tutena kuxinganeka: ‘Mbo, o kima kiki, kikyandabhangesa kungitamukamukonde mu kilunga. Kyenyikiphe, kikituxi kyadikota. ‘O kuxinganeka kiki, kilwezu kyadikota. Se kumoneka tendasá, kima kyambote kudibhwidisa kiki: ‘O kwila Satanaji wamusota kuwana o muxima wami, bhukaxi katendasá yiyi? Se ngibhanga o vondadi yami, o kwila ngandabhekela lusebhu kudijina dya Jihova? Kubhanga o kima kiki, kyandangizukamesa dingi  kwa Nzambi yami, inga kyandangisondolokesa?’ Xinganeka mu ibhwidisu yiyi. Bhinga unjimu bhukaxi kamusambu, phala kutambwijila o ibhwidisu yiyi, sé kudinganala mudyê. (Tiya. 1:5) Kubhanga kiki, kifikidilu kyakidi. Kutena kutulanga phala kudituna o jitendasá ni nguzu yoso, kala kyabhangele Jezú, kyoso kyambe: “Tunda bhabha Satana!”—Mat. 4:10.

17. Mukonda dyahi kikima kyambote kukala ni mixima iyadi? Bhana phangu.

¹⁷ O muxima wadiwane muluyadi, kiwala ni valolo. Xinganeka kibuka kya malunda afiti. Bhukaxi kâ, mwala athu kadibhana kyambote, umoxi wamusota ngó o fuma yê, akamukwa kamukayela o itendelesu yalungu ni kujokala, o mukwa kaxila o mesene wa endesa. O kibuka kikala kiki, kitena kunganyala joko? Kana! Maji kumbandu yengi, o kibuka kikalakala kumoxi, kiditunda kyambote. O muxima we utena kukala kala o kibuka kikalakala kumoxi, se o ixinganeku yê, o ukexilu wê wakudivwa, ni jihanji jê, jitakana mba jilunga mu nguzu yubhanga phala kusidivila Jihova. Kana kujimba kwila, Satanaji wamesena kyavulu kuwana o muxima wê. Maji, eye wabhingi ukala ni muxima watenena phala kusidivila Jihova. (Mat. 22:36-38) Kana kwehela Satanaji kuwana o muxima we!

18. Kala kilondekesa Mikeya 4:5, ihi iwamesena kubhanga?

¹⁸ Kala kyabhangele Sobha Davidi, eye we watokala kusamba kiki kwa Jihova: “Endesa o muxima wami.” Bhanga yoso yutena, phala kukumbidila o musambu yú kumwenyu we woso. Izuwa yoso kumwenyu we, dikwatenene mu dijina dikôla dya Jihova ni muxima woso, mu ima yusola, kikale yofele, kikale yonene. Kuma Umbangi ya Jihova, mukubhanga kiki, wandalondekesa kwila, kyakufwama mwene kwambata o dijina didi. (Jisa. 27:11) Se kyene kitubhanga, etwenyoso twandatena kuzwela kala kala kyambele polofeta Mikeya: “Etuphe twak’èndela mudijina dya Jihova Nzambi yetu, ku izuwa ni izuwa kiyene ni dizubhilu.”—Mik. 4:5.