ETWENYOSO twaxikina kwila, Jihova mwene wamukwendesa o mundu we, ni kwabhana yoso yabhindamena munzumbi, mu izuwa yiyi “isukidilaku.” (2 Tim. 3:1) Maji, twabhingi kubelesela Jihova. Tutena kusokesa o ima itubhita nanyu lelu, ni yabhitile ni akwa Izalayele mukikangalakata. Ene abhingile kutambwijila, mba kubhanga kima, kyoso o akunji kyexile muxika o jikoloneta.

Jihova wabhingile kwa Mozé phala kubhanga jikoloneta jiyadi japhalata. Jihova wambe: “U jiyudika ni ufunu wakusula.” (Dya. 10:2) O akunji atokalele kuxika o jikoloneta jiji mumawukexilu aditungula, phala kutangela o mundu o ima yatokalele kubhanga. (Dya. 10:3-8) Lelu, o mundu wa Nzambi utambula we itendelesu mumawukexilu avulu. Mumbandu yiyi, twandazwela mawukexilu atatu ene mutubhana o itendelesu, adifu ngó ni uxikilu wajikoloneta mu Izalayele yokulu. O mawukexilu atatu ya utwanda dilonga, kyadyanga, kyoso kyatwixana phala kudyongeka mu yônge yonene; kayadi, kyoso o tufunga kyatumbula milongi ya ubhe mujixikola; katatu, kyoso kikwiza itendelusu ya ubhe phala o ilunga yoso kumundu.

Kyoso Jihova kyamesenene kwila o kilombo kyoso kibhongoloka “bhu mwelu wabalaka yakutanena,” o akunji exile muxika o jikoloneta jiyadi kumoxi. (Dya. 10:3) O miji yoso ya Izalayele, atungile bhumbandu yabalaka, a iwanene mumbandu jiwana, phala atene kwivwa kyoso kyejixika o jikoloneta. O miji yexile dingi bhwazukama, ejitena kubhixila sé kulaleka bhu mwelu wabalaka. O miji yengi yexile dingi kadikanga, ejilaleka dingi phala kubhixila bhu mwelu wabalaka. Jihova wamesene kwila, o miji yoso iza kwivwa o itendelesu, kikale o miji yazukamene kikale o miji yakexile dikanga dyabalaka.

Lelu kitwene mudyongeka mubalaka, maji ene mutudimuna phala kitufonge kudyongeka ni mundu wa Nzambi. Twene mudyongeka mu yônge yamakota ni yônge yamukwa yakatunda, mwene mutubhana o itendelesu. Mujixi kumundu woso, o Jimbangi ja Jihova jawabhela o yônge yiyi. Kyenyikiphe, oso axikina o kixanu kyakudyongeka ni mundu wa Nzambi, atokala kukibuka kyasanguluka. Amukwa enda dikanga dyalebha phala kubhixila mu yônge yiyi, amukwa dikanga dyabutu. Né kiki, oso axikina o kixanu anga aya muyônge yiyi, ejiya kwila, nguzu yosoyoso yabhanga yabetakota.

O yalungu ni ibuka yoyo yadikexidila, yala o makanga? O kwila ene we akatula mbote muyônge yiyi? Xé! Bhu kaxi ka jitekinolojiya, avulu atena kwivwa ni kumona o yônge yiyi, sumbala ala dikanga. Mukifika, kyoso o Filiyale ya Benim kyatambula o mujitu watundu ku sede mundial, o jiphange atumikisa o milongi ya kyônge kiki, katé kujiphange exile mukikangalakata kya Sahara, mumbanza ya Arlit, ku ixi ya Niger. Makwinyi ayadi a athu adibundu mukyônge ni jiphange jamukwa bhukaxi ka internete.  Ene abhange kiki, sumbala exile dikanga, né kiki, ene adivu kala exile kumoxi ni 44.131 ajiphange. Sayi phange wasoneka: “Twamisakidila ni muxima woso, mukutubhana o jitu wakwivwa ni kutala o kyônge kiki bhukaxi ka internete. Kiki kyalondekesa kwila, enu mwatuzolo kyavulu.”

Mu Izalayele yokulu, se o mukunji uxika ngó koloneta imoxi o “adyakimi ku jimidi ja Izalayele ene [ngó] a bhongoloka kokwê” phala kumoneka mubalaka yaditakanena. (Dya. 10:4) Bhenyobho, ene ejitambula milongi ni itendelsu kwa Mozé. O itendelesu yiyi yeji kwakwatekesa kubhanga kyambote o ikalakalu yâ bhukaxi ka miji yâ. Se wakexile bhukaxi ka akwa Izalayele, o kwila kiweji bhanga yoso phala kukalabhu ni utambule o milongi yiyi?

Lelu, o tufunga mu ilunga ki “adyakimi ku jimidi,” mba ji xefe bhukaxi ka jimbudi jangene ja Jihova, ja abhana ngó kulanga. (1 Phe. 5:1-3) Maji ene abhanga yoso yatena, phala kwendesa o jimbudi jangene ja Jihova. Kyenyiki, ene axikina kuya kutambula milongi ya ubhe, kala o milongi yatambula mu Xikola ya Ukunji wa Utuminu. Mu jixikola jiji, o tufunga a alonga kulanga kyambote o maka mu ilunga. Kiki kibhangesa athu oso mu kilunga kukula mu nzumbi ni kukala ni ukamba wambote ni Nzambi. Né mwene se nuka wayile muxikola yiyi, sé phata, eye wakatula kya mbote yavulu kwa yó abhange o xikola yiyi.

O akunji mu Izalayele, sayi ithangana exile muxika o koloneta m’ukexilu wengi, phala kulondekesa kwila, o kifuxi kya Izalayele kyatokalele kukatuka. Kyoso o mundu kiwexile mukatuka, exile mukibhanga sé kavwanza. (Dya. 10:5, 6) Maji kwabhingile nguzu phala kulongela o ima. Sayi ithangana, o mukwa Izalayele kamesenene kuya kididi kyengi. Mukonda dyahi?

Nange akwa Izalayele aluwalele mukwivwa o kololeneta mu veji yavulu ni mukithangana kya kifikile. O Bibidya yamba: “Se [o dituta] dya tula ku balaka . . . an’a Izalayele a xikama mwene bhu kibangu kyâ.” Maji, “Bhu kala ni bhabha dituta di tula tundé mu ngoloxi katé mu kimene.” Mu ithangana ya mukwa, dyexile mu “bhanga izuwa iyadi, mba mbeji, mba muvu” ande dya kukatuka. (Dya. 9:21, 22) Akwa Izalayele akatuka mba alongela o imbamba mu veji jikuxi? O divulu dya Dyalwilu kibatulu 33 ditumbula 40 a ididi mwa bhitile akwa Izalayele.

Sayi ithangana, akwa Izalayele exile mutula mu kididi kyafwama kyambote. Kukala mu kididi kiki, kyeji kwawabhela kyavulu, mukonda ene exile munyunga mu “kikangalakata.” (Mate. 1:19) Kyenyikiphe, kikyeji kwabhonza kuxinganeka kwila, se tu tunda mukididi mutwala, twanda kuya kididi kyayibha.

Kyoso o mwiji umoxi ki uya ni kulongela phala kukatuka, o miji yamukwa itena kudivwa kwila, kyabhonzo kukingila, kate kibhixila o kithangana kya kyakukatuka. O miji yoso yexile mukwivwa o koloneta, maji kexile mu tunda mu kithangana kimoxi. Se o koloneta a ixika dingi ni nguzu, o miji yala kuthunda dya balaka, kifwa, o miji ya Juda, Isakale ni Nzebulone, yene yatokalele kukatuka. (Dya. 2:3-7; 10:5, 6) Kyoso kyazubha o kukatuka, o akunji axika dingi o koloneta ni nguzu mu veji yakayadi, phala kulondekesa kwila, o ibuka itatu yala kulwiji, yatokala we kyakukatuka. O akunji exile mubhanga jinga kiki, katé kizubha kukatuka o kifuxi kyoso kya Izalayele.

Nange kya kubhonzele we kyá kuxikina kitendelesu kya ubhe mu kilunga, waxinganeka kwila, ima yavulu yamulunguluka mu kilunga. Mbaphe waxinganeka kwila, eye wejidila kya ni ukexilu wokulu wa kubhanga o ima, wamesena kwila, o ima ikalé mwene kyenyiki, sé ku ilungulula. Kyenyiki, nange ki kubhonza kukala ni mwanyu, kyoso ki uya ni kwijidila ni milongi ya ubhe. Maji se ubhanga nguzu phala kuxikina o milongi mba itendelesu ya ubhe, wanda mona kuma, yene itendelesu yambote, wandamona we kwila, Jihova wamutubesowala.

Mu izuwa ya Mozé, Jihova wendesa mazunda ni mazunda a athu, bhukaxi ka kingalakata, mala, ahatu ni an’andenge. Se Jihova k’alangele, ni kwabhana itendelesu, ene kejitena kubhuluka. Lelu, etu tutena we ngó kubhuluka mu nzumbi, se Jihova utwendesa. Mukidi, etu twazediwa kyavulu! Kyenyikiphe, tubhange yoso itwatena, phala kubelesela Jihova, kala akwa Izalayele m’ukulu, kyexile mubelesela o uxikilu wa jikoloneta!