1. Kyebhi kidivwa Jihova kyoso o mbundi yê yajimbidile ivutuka mukilunga?

KALA kitwazwela mumbandu yatundumu, Jihova wasoko ni kafunga kambote, ulanga o jimbundi jê ni henda yoso. Mwene usota jojo jajimbidila. Jihova wambela akwa Izalayele amubhele o dikunda, wixi: “Ngi vutukidyenu eme, phala eme we ngi mi vutukile enu.” Twejiya kuma mwene we kyene kyadivwa lelu, mukonda mwene wambe: “Kinga’aluluka.” (Mal. 3:6, 7) Jezú wambe kwila Jihova ni jiyanju asanguluka kyavulu kyoso selevende Yê yajimbidile kyavutuka mukilunga.—Luka 15:10, 32.

2. Ihi itwanda dilonga mumbandu yiyi?

² Mumbandu yiyi twanda dilonga ifika itatu yatele Jezú, yalungu ni kukwatekesa yó ajimbidila, axisa o kilunga kya Jihova. Twanda zwela we idifwa itwabhingi kukalananyu phala kukwatekesa o jimbudi jajimbidila kuvutuka kwa Jihova. Twanda mona we kwila tukala ni kisangusangu kyavulu kyoso kitubhanga nguzu, phala kukwatekesa yó azoza n’a vutuka kwa Jihova.

3-4. Mukonda dyahi o muhatu amutumbula mu divulu dya Luka 15:8-10 wasoto kyambote o kiphata kyé kyajimbidile?

³ Twabhingi kukalakala ni nguzu yoso phala kusanga yó atexikele, maji amesena kuvutuka kwa Jihova. Mukifika kyala mu divulu dya Luka, Jezú wajimbulula muhatu wexile musota ni nguzu yoso kima kyavalolo kyajimbidile. O pondo yabetakota mukifika kiki, o nguzu yabhange o muhatu phala kusanga o kitadi kyê kyatexikile.—Tanga Luka 15:8-10.

⁴ Jezú wajimbulula kyambe o muhatu wasoto ni nguzu yoso o kitadi kyê kyajimbidile. Mu izuwa ya Jezú kyoso o muhatu mukwa Izalayele wexile mukazala, sayi ithangana manya wexile kumubhana drakima. Nange o drakima yiyi yexile ni valolo yavulu phala o muhatu yú mukonda yexile bhukaxi kamawujitu amubhele manya kyoso kyakazala. O muhatu wejidile kwila o kitadi kyabhwile  bhoxi. Kyenyikiphe wawika kandeya, wasoto mujimbandu, maji kasange kima. Nange o kandeya kê kamaji kikamubhana o mukengeji wasoko phala kusanga o kakiphaka kê kaphalata. Kudisukilu o muhatu waxixila kyambote o inzo yoso. Bhukaxi kafufuta mwene wasange o kitadi kyê kyala ni valolo, kyexile mubhenya mukonda dya mukengexi wakandeya. Mwene wasanguluka kyavulu mukusanga o kitadi kyê! Mwene wexana makamba ni athu amukwa phala kusangukulanê kumoxi.

5. Mukonda dyahi sayi bhabha kitena kubhonza kusanga yó azoza mu nzumbi?

⁵ Kala kitwamono mu kifika kya Jezú, kubhinga kukalakala kyavulu phala kusanga kima kyajimbidila. Kyene we kimoxi n’etu, twabhingi kubhanga nguzu phala kusanga yó ajimbidila. Nange kwabhiti kyá mivu yavulu tunde kyeha kudyongeka n’etu. Ene nange ayi mutunga mukididi kyenge o jiphange koko ka ejiya. Maji tutena kuxikina kwila mukithangana kiki sayi athu azoza mu nzumbi, amesena ni kidi kyoso kuvutuka kwa Jihova. Ene amesena mwene kusidivila Jihova kumoxi ni jiphange jâ, maji abhindamena o kikwatekesu kyetu.

6. Kyebhi o jiphange joso mukilunga kyatena kukwatekesa mukikalakalu kyakusota yó azoza mu nzumbi?

⁶ Nanyi utena kukwatekesa mukikalakalu kyakusota yó kene mukwiza mukilunga? Etwenyoso tutena, kikale o tufunga, o aboki athembuyoso, mwiji wâ, ni aboki oso mukilunga, atena kukwatekesa kusanga yó azoza mu nzumbi. O kwila eye wala ni dikamba mba ndandu wazoza mu nzumbi? Ihi iwatokala kubhanga se mukuboka nzo ni inzo mba mukididi mubhita athu avulu, udisanga ni muthu wazoza mu nzumbi? Se mwene wamesena kutangela kutufunga o kididi bhwatungu ni muxinda wê wa mutelembe wa kafwetele, utena ku usoneka ni ku ubhixidisa kutufunga mukilunga kyê.

7. Ihi iwadilongo mu izwelu ya kafunga amwixana Tomas?

⁷ Bengebenge o tufunga ene dingi ala ni kikalakalu kyakusanga yó amesena kuvutuka kwa Jihova. Kyebhi kyabhanga kiki? Tala yazwela kafunga amwixana Tomas. * Mwene watungu ku ixi ya Espanha, wakwatekesa kyá 40 ndenge ajiphange kuvutuka mu kilunga. Phange Tomas wambe: “Kyadyanga ngibhwidisa jiphange javulu se ene ejiya kwebhi kwatungu o jiphange azoza mu nzumbi. Mbaphe ngibhwidisa kwaboki se ene atena kulembalala muboki kene mukwiza dingi muyônge. Avulu mu kilunga asanguluka mukonda adivwa kuma amubhanga mbandu mu kikalakalu kyakusota. Mukusuluka, kyoso kingiya kukunda o aboki azoza mu nzumbi, eme ngibhwidisa kyebhi kyala o twana ni jindandu kubhata. Sayi aboki azoza mu nzumbi exile mukwambata o twana twâ mu kyônge, o twana tutu nange akitukile aboki kyá. Kyenyiki abhingi we kwakwatekesa kuvutuka kwa Jihova.”

8. Kala kilondekesa o kifika mudivulu dya Luka 15:17-24, kyebhi o tata kyatalatala o mona wadyela?

⁸ Idifwa yebhi itwatokala kukalananyu phala kukwatekesa yó amesena kuvutuka kwa Jihova? Tala o disá ditudilonga mukifika kyate Jezú kyalungu ni mona waxisa o dibhata. (Tanga Luka 15:17-24.) Mukifika kiki Jezú wajimbulula kuma, kudisukilu o mona watonginina o kutobha kwê, yu wasolo kuvutuka kubhata. O tata walenge, wayi musanga mon’ê, wamundwakula ni henda yoso, walondekesa o henda yexile nayu kwa mwene. O mona wadivu kyayibha ni kima kyabhangele, wadivu kuma kikyamufwamene dingi kumutalatala kala mona. Kuma o mona wajikula o muxima kwa tat’ê, o tata wasoto kutendela monê. Kyenyikiphe, o tata wabhange kima phala o mona n’a divu kyambote kubhata. O tata keji mutalatala kala mukalakadi, kana, maji weji mutalatala kala mona wakazola. Phala kulondekesa o henda yê kwa  mona, mwene wabhange fesa, wabhana kizwatu kyafwama kwa mone wadyela.

9. Idifwa yebhi itwatokala kukalanayu phala kukwatekesa o aboki azoza mu nzumbi kuvutu kwa Jihova? (Tala o kaxa “ Kyebhi Kitutena Kukwatekesa yó Amesena Kuvutuka Kwa Jihova?”)

⁹ Jihova wadifu ni tata mukifika kiki. Mwene wazolo o jiphange jamala ni ja’ahatu, yu wamesena kwila, avutuka kwa mwene. Mukukayela o phangu ya Jihova, etu tutena kwakwatekesa kuvutuka mu kilunga. Phala kubhanga kiki, twabhingi kukala ni mwanyu, kudita mukiki kyâ ni kwa azola. Mukonda dyahi twatokala kulondekesa o idifwa yiyi ni kyebhi kitutena kubhanga kiki?

10. Mukonda dyahi kwabhingi mwene mwanyu phala kukwatekesa muthu kuzukama dingi kwa Jihova?

¹⁰ Twabhingi mwene mwanyu, mukonda phala muthu kudisanza mu nzumbi kubhinga ithangana yavulu. Jiphange javulu azozele mu nzumbi m’ukulu ambe kwila, ande dya kumateka dingi kusidivila Jihova, o tufunga ni jiphange jamukwa mukilunga a akundu muveji javulu. Sayi phange watungu kulwiji dya Asia amwixana Nancy wasoneka, wixi: “Sayi kamba dyakazola mukilunga wangikwatekesa. Mwene wangizolele kala kota dyami dya muhatu. Mwene wangilembalesa o ima yambote itwabhitile m’ukulu. Mwene wexile we mungivwa ni mwanyu woso kyoso kingexile mu mutangela o ibhidi yami, mwene kafulu kungibhana o itendelesu ingabhindamene. Mwene walondekesa ni kidi kyoso kuma, wexile dikamba dya kidi, wexile polondo phala kungikwatekesa kabhasa kithangana.”

11. Mukonda dyahi twabhingi kudita mukididi kya yó aluwala?

¹¹ Kyoso o muthu kyakala ni kuluwala kwa muxima, wila kala wala ni italakanyu mba fedila ya muxixima kyavulu. Kudita mukididi kyakwetu kyadifu ni milongo yanguzu itena kusaka o jifedila  jiji. Sayi athu azoza mu nzumbi akala ni kuluwala kwa muxima mumivu yavulu, mukonda sayi muthu mu kilunga wa aluwalesa. Kya abhonza kuvutuka kwa Jihova mukonda dya kudivwa kiki. Amoxi, atena kudivwa kwila atalatala se kuyuka. O kima kyabhindamena, muthu wa evwa, utendelela kyebhi kyadivwa. (Tiya. 1:19) Phange Madiya wazozele mu nzumbi m’ukulu, wambe: “Eme ngabhingile muthu ungivwa, muthu ungiximbakatesa, muthu ungibhana itendelesu ni kikwatekesu.

12. Mukonda dyahi o henda ya Jihova tutena ku isokesa ni mukolo?

¹² O Bibidya ijimbulula kuma o henda ya Jihova yedi kala mukolo. Mu ukexilu webhi? Xinganeka kwila eye wamuboba mumenya akalunga, kubhixila muthu anga ukubhana kulete ya kubhulula. Sé phata, wejisakidila kyavulu o kikwatekesu kiki, mukonda dyeji kukwatekesa phala ki ubobe mumenya. Maji o kulete yakubhulula mumenya kiyeji soka phala kusuluka ni mwenyu wê. O menya atalala, kyenyiki phala kubhulula o mwenyu wabhingi kubhixila mu ulungu wa kubhulula. Wanda bhindamena muthu ukutakula o mukolo, ukukwatekesa kubhixila mu ulungu. Yalungu ni akwa Izalayele amubhele o dikunda, Jihova wambe: “Nga akwata jinga ni uthu, nga atekula ni henda.” (Hoz. 11:4) Lelu Jihova kyene kyadivuwa ni athu yó kamumusidivila dingi, amuboba mumaka ni ibhidi yâ. Mwene wamesena kwejidisa o henda ya akwatela ni kwabheka mukilunga. Bhukaxi kê eye, Jihova utena kulondekesa o henda yê ku athu azoza.

13. O musoso wa phange Phawulu ulondekesa kyebhi kwila o henda yetu itena kukwatekesa muthu kuvutuka kwa Jihova?

¹³ Kima kyambote kutangela kwa aboki azoza kwila, Jihova wa azolo kyavulu ni kulondekesa o henda yiyi. Phange Phawulu twamutumbula mumbandu yatundumu, wazozele  mu nzumbi mu 30 amivu ndenge, wambe: “Sayi kizuwa mukamene ngexile mutunda kubhata ngadisange ni phange ya muhatu mwadiyakime kyá wazwela n’eme ni henda yoso. Ngamateka kudila kala ngi monandenge. Ngamutangela kuma kyedile kwila Jihova wamutumikisa phala kuzwela n’eme. Mukithangana kyonyokyo ngasolo kumuxima wami kuvutuka kusidivila Jihova.”

14. Kala kilondekesa o kifika mu divulu dya Luka 15:4, 5 ihi yabhange o kafunga kyoso kyasange o kambudi katexikile?

¹⁴ Twabhingi kusuluka ni kukwatekesa ni kuswinisa aboki azozele mu nzumbi kyoso kitwasanga. Kala o mona wajimbidile mu kifika kya Jezú, ene nange ala ni ndolo kumuxima ibhinga ithangana yavulu phala kubhita. Kuma ene exile mu mundu wa Satanaji nange o ukamba wâ ni Jihova kiwala kala kiwexile m’ukulu. Twabhingi kwakwatekesa phala kukolesa o kixikanu kyâ kwa Jihova. Mukifika kya kambudi kajimbidile, Jezú wajimbulula kyebhi o kafunga kyondeleka o kambudi yu wakambata dingi mukibhanga. O kafunga wangastala kyá kithangana ni nguzu yavulu phala kusanga o kambudi kajimbidile. Maji mwene wejiya kuma o mbudi yandabhinga kuyambata, yene kiyala ni nguzu yasoko phala kwenda ubheka wê kate mukibhanga. Kyenyiki mwene uyambata kate mukibhanga.—Tanga Luka 15:4, 5.

15. Kyebhi kitutena kukwatekesa yo azoza mu nzumbi maji amesena kuvutuka kwa Jihova? (Tala o kaxa “ Falamenda Yala ni Valolo Yadikota.”)

¹⁵ Twabhingi kubhanga nguzu ni kubhita kithangana ni yo azoza mu nzumbi phala kwakwatekesa kutulolola o ibhidi yamwabhonzesa kuvutuka dingi kusidivila Jihova. Maji ni kikwatekesu kya nzumbi ikôla ya Jihova, o Maka mê ni madivulu a kilunga kyê, tutena kwakwatekesa kukala dingi ni ukamba wambote ni Jihova.  (Loma 15:1) Kyebhi kitutena kubhanga kiki? Sayi kafunga wala ni uhete, wambe: “Avulu azozele, abhingi kudilonga o Bibidya ni muthu kyoso kyasola ni kidi kyoso kuvutuka kwa Jihova.” * Kyenyikiphe se tufunga a kubhinga phala kudilonga ni muboki wazozele mu nzumbi watokala kuxikina ni kisangusangu kyoso o kikalakalu kiki. O kafunga kaka wambe dingi: “O muboki ulonga o Bibidya ku muthu wazozele mu nzumbi wabhingi ukala dikamba dyambote, muthu wakidi.”

16. Kyebhi kitwejiya kwila o ji anju janda tu kwatekesa?

¹⁶ Ifika yavulu ilondekesa kwila o ji yanju jamu kalakala kumoxi n’etu phala kutukwateketesa kusanga yó azoza mu nzumbi phala n’a vutuka kwa Jihova. (Dij. 14:6) Mukifika, sayi phange wazozele mu nzumbi amwixina Silvyu watungu ku ixi ya Equador, wasambele kwa Jihova phala kutumikisa muthu phala n’a mukwatekese kuvutuka mu kilunga. Mukithangana kyexile hanji musamba kwabhixila tufunga tuyadi kudibhata dyê. Mukithangana kyamukundu o tufunga amukwatekesa ni kisangusangu kyoso kuvutuka kwa Jihova.

17. Kyebhi kitwanda divwa se tukwatekesa muthu wa azoza mu nzumbi?

¹⁷ Kukwatekesa o athu azoza mu nzumbi kyandatubhekela kisangusangu kyadikota. Phange Salvador muboki wathembu yoso wabhange nguzu yavulu phala kukwatekesa yó azozele. Mwene wambe: “Kyoso kingikwatekesa muthu wazozele mu nzumbi kuvutuka kwa Jihova, ngi sanguluka kyavulu, kate ngidila. Ngisanguluka kyavulu mukwijiya kuma ngatena kukwatekesa Jihova mukubhulula selevende yê kumundu wa Dyabhu ni kumubheka dingi mukilunga kyê.”—Ika. 20:35.

18. Se wazoza mu nzumbi ihi iwutena kudyelela ni kidi kyoso?

¹⁸ Se kiwene mudyongeka dingi ni mundu wa Jihova utena kudyelela kuma Jihova wakuzolo hanji kyavulu. Mwene wamesena kwila uvutuka kwa mwene. Kwabhingi ubhanga nguzu phala kuvutuka kwa mwene. Maji kala o tata mukifika kya Jezú, Jihova wamukukingila, wamesena kwila uvutuka, mwene wanda kutambulula kubhata ni kisangusangu kyoso.