1-2. (a) Mukonda dyahi o Alumajedone njimbu yambote phala o athu? (b) Ibhwidisu yebhi i twanda dilonga mu mbandu yiyi?

O ATHU kyoso kyévwa o kizwelu “Alumajedone” a xinganeka ita ya makota mba izulukutu yanda bwika o ngongo yoso. Maji o izwela o Bibidya ya lungu ni Alumajedone, njimbu yambote, i bhekela kisangusangu! (Dij. 1:3) O ita ya Alumajedone ki yanda bwika o ngongo, maji yanda bhulula o athu! Kyebhi?

² O Bibidya ilondekesa kwila o ita ya Alumajedone yanda bhulula o athu mu kuzubha o mawutuminu a ngongo. O ita yiyi yanda bhulula o mundu mu kubwika o athu ayibha. Maji o athu ambote anda nangenena-ku. Kiki kyanda langa o ngongo phala ka i bwike ku athu ayibha. (Dij. 11:18) Phala ku tu kwatekesa kutendela kyambote o pondo yiyi, twanda dilonga ibhwidisu iwana: O Alumajedone ihi? Izulukutu yebhi yanda bhita ande dya Alumajedone? Ihi i tu tena kubhanga phala kukala bhu kaxi ka yó anda bhuluka ku Alumajedone? Kyebhi ki tu tena kusuluka mu kukala fiyele káte kyanda bhixila o Alumajedone?

3. (a) O kizwelu “Alumajedone” kilombolola ihi? (b) Kala ki tu sanga mu Dijingunwinu 16:14, 16, mukonda dyahi tutena kuzwela kwila o Alumajedone ki dijina dya kididi mu ixi?

³ Tanga Dijingunwinu 16:14, 16. O kizwelu “Alumajedone” ki moneka ngó lumoxi mu Bibidya. Mu dimi dya Hebalayiku, o kizwelu Alumajedone, kilombolola “Mulundu wa Mejidu.” (Dij. 16:16) Mejidu yexile mbanza mu Izalayele yokulu. (Josu. 17:11) Maji o Alumajedone ki dijina dya kididi mu ixi. Ni kidi kyoso, yene ilombolola o ima yanda bhangesa o “jisobha ja ngongo yoso” kudibunda phala kubhânga ni Jihova. (Dij. 16:14) Kyenyiki-phe, mu milongi yiyi twanda tumbula we o kizwelu “Alumajedone” phala kulombola o Ita yanda kayela-ku kyoso o Jisobha ja Ngongo ki janda dibunda. Kyebhi ki twejiya kwila o  kizwelu Alumajedone ki dijina dya kididi mu ixi? Kya dyanga, mu Ngongo sé-ku kididi a kixana Mulundu wa Mejidu. Kya kayadi, o mbandu ya Mejidu ka kididi kofele. O “jisobha ja ngongo yoso” kumoxi ni masoladi ni mata mâ ka soko-mu. Katatu, kala ki twanda mona kupholo mu milongi yiyi, o ita ya Alumajedone yanda mateka kyoso o “jisobha” ja ngongo janda mesena kubhânga ni mundu wa Nzambi ala mu jixi joso.

4. Mukonda dyahi Jihova wa jimbulula o ita ya sukina ya dikota ni kizwelu Alumajedone?

⁴ Mukonda dyahi Jihova wa jimbulula o ita ya sukina ya dikota ni kizwelu Mejidu? Mu’kulu ku Mejidu kwexile mu bhita ita yavulu, mu jimbandu ja zukamene ku Honga ya Jizeleyele. Sayi ithangana Jihova wa kwatekesele o mundu wê kutolola o jinguma mu ita yenyoyo. Mu kifika, “bhu kaxi ka menya a Mejidu,” Nzambi wa kwatekesa o Mufundixi wa akwa Izalayele Balake kutolola o kifuxi kya akwa kanana a kexile mu kyendesa kwala Xixela. Balake ni polofeta ya muhatu Debola, a sakidila Jihova mu kwa bhana o kikôwe kiki bhu kaxi ka madiwanu. Ene embila kiki: “Katé ni jithéthembwa ku dyulu ja di te-mu . . . jala kúlwa ni Xixela. Honga ya Kixone ya a kungulula.”—Afun. 5:19-21.

5. Mu ukexilu webhi o ita ya Alumajedone ki ya difu ni ita ya bhange Balake?

⁵ Balake ni Debola a zubha o mwimbu wâ ni izwelu yiyi: “Nguma jé, u Jihova, ji bwike kyenyiki, oso-phe a kuzola, a benye kala dikumbi.” (Afun. 5:31) Mu Alumajedone, o jinguma ja Jihova anda ku a bwika, oso a zolo Nzambi éne anda ku a bhulula. Maji sayi ima ya bhitile mu ita yokulu, ki ya difu ni yanda bhita mu ita ya Alumajedone. Mu Alumajedone, o mundu wa Nzambi ki wanda bhinga kubhânga. Kanda kala we ni mata! O nguzu yâ ya-nda kala “mu kudyelela ni mu kuximbakata” kwa Jihova ni ku ifuxi yê ya dyulu.”—Iza. 30:15; Dij. 19:11-15.

6. Ihi itena kubhanga Jihova phala kutolola o jinguma jê mu kithangana kya ita kya Alumajedone?

⁶ Kyebhi Nzambi kyanda tolola o jinguma jê ku Alumajedone? Mwene utena kubhanga kiki mu mawukexilu avulu. Mu kifika, mwene utena kubhanga kiki bhu kaxi ka mavuwa, matadi a mvula ni jinzaji. (Jobe 38:22, 23; Ize. 38:19-22) Utena we kubhangesa o jinguma jê kudilungulukila mudyâ. (2 Mal. 20:17, 22, 23) Mwene utena kubwika o jinguma bhu kaxi ka ji-anju jê. (Iza. 37:36) Kabasa kima kya sola kubhanga, mwéne wanda tambula o kikowé. Mwene wanda bwika o jinguma jê joso. Athu oso ayuka anda bhuluka.—Jisa. 3:25, 26.

7-8. (a) Kala kilondekesa o mukanda wa 1 Tesalonika 5:1-6, ngolokela yebhi yanda bhanga o atwameni a ngongo? (b) Mukonda dyahi o makutu yá anda kala kilwezu kyadikota?

⁷ O ngolokela ya kwila “kwa batama, kwa tululuka” anda i bhanga ande dya “Kizuwa kya Jihova.” (Tanga 1 Tesalonika 5:1-6.) Mu mukanda wa 1 Tesalonika 5:2, o “Kizuwa kya Jihova” kilombolola o “ hadi yadikota.” (Dij. 7:14) Kyebhi ki twanda kwijiya o kithangana kyanda mateka o hadi yiyi yadikota? O Bibidya yamba kwila, anda bhanga ngolokela nuka ya bhitile. O ngolokela yiyi yanda kala kijimbwete kyanda londekesa kwila o hadi yadikota yanda mateka.

⁸ Ene anda bhanga ngolokela ya kwila “kwa batama, kwa tululuka.” Mukonda dyahi o a twameni anda zwela kiki? Ki twejiya kyambote. O kwila o atwameni a jingeleja anda bhanga mbandu? Nange anda bhanga. Etu twejiya kwila kyoso atwameni a ngongo kyanda bhanga o ngolokela ya kwila, kwa batama, kwa tululuka, kiki kyanda kala makutu a dikota, makutu a madimonyo. Maji o makutu yá, kilwezu we kyadikota mukonda kyanda bhana kidyelelu kya makutu kya kubanza kuma kwa batama, kwa kutululuka, maji kiki kyene kyanda kala o  kithangana kyanda mateka o hadi yadikota ku mwenyu wa athu. Mu kidi, “a kà tukumuka kibwika kyâ kya tula! Kya kà kala we mukwâ ni muhatu ki mu kwata o mika ya kuvwala.” Ihi yanda bhita ni jiselevende ja fiyele ja Jihova? Ene a tena ku sasumuka kyoso ima yiyi ki yanda mateka, Mukonda kejiya kyambote o kithangana kyanda mateka o hadi yadikota. Maji né kiki, ene anda kala polondo phala o kizuwa kiki.

9. Nzambi wanda bwika o mundu wa Satanaji mu mawukexilu ebhi?

⁹ Jihova kanda bwika o ngongo ya Satanaji mu veji imoxi kala kya bhangele mu izuwa ya Nowé. Mu veji dya kiki, mwene wanda bwika o mbandu ya dyanga ya mundu wa Satanaji, mu kusuluka wanda bwika o mbandu ya mukwa. Kya dyanga, mwene wanda bwika o Babilonya yadikota, o kisangela kya jingeleja ja makutu. Mu kithangana kiki kya ita ya Alumajedone, mwene wanda bwika o mbandu ya kayadi ya mundu wa Satanaji, ya lungu ni maka a jinguvulu, o kisangela kya masoladi ni kisangela kya mawenji. Kindala twanda jimbulula kyambote o jimbandu jiji.

10. Kala kilondekesa Dijingunwinu 17:1, 6; 18:24, mukonda dyahi Jihova wanda bwika Babilonya yadikota?

¹⁰ “O kaxitiku kwa kidya-nzunga kya dikot’okyo.” (Tanga Dijingunwinu 17:1, 6; 18:24.) O Babilonya ya dikota yene mu xidisa o dijina dya Nzambi. Yene mu longa makutu alungu ni Nzambi. Yene mu bhanga ufusa mu nzumbi mu kudilunga ni Jinguvulu ja ixi. O jingeleja ja makutu jene we mu katula o kitadi kya athu. O jingeleja ja makutu jene mu jibha athu avulu katé mwene o jiselevende ja Nzambi. (Dij. 19:2) Kyebhi Jihova kyanda bwika o Babilonya ya dikota?

11. O “kyama kya kusuka” kilombolola nanyi? Ihi yanda bhanga o “kwinyi dya lumbinga” phala kubwika Babilonya ya Dikota?

¹¹ Jihova wanda bwika o “kidya-nzunga kya dikot’okyo” bhu kaxi ka “kwinyi dya lumbinga” dya “kyama kya kusuka.” O kyama kiki, kilombolola o kisangela kya Nações Unidas. O dikwinyi dya lumbinga a lombolola o jinguvulu jene mu kwatekesa o kisangela kiki. Mu kithangana kya solo Nzambi, o jinguvulu jiji, janda lungulukila o Babilonya ya Dikota. Ene “a kà mu sebulula, o yoso yala na-yu a kà mu  katula-yu, hé u xala thuxi-a-thakala.” Kifwa, a ka mu tambula o jimbote jê joso, a ka londekesa ku athu o ima yoso yayibha yexile mu bhanga. (Dij. 17:3, 16) O kibwikilu kiki, kyanda sasumukisa oso ene mu kwatekesa o Babilonya ya Dikota, mukonda kyanda bhita ni lusolo lwoso, kyanda moneka kala kya bhiti ngó mu kizuwa kimoxi. Kudisukilu, mwene kanda tena dingi kudizangeleka kiki: “Eme-mwène n’a mvwale, nga xikama ku ungana! Ki ngala ngi mutûdi, ki ngi moneka dingi dilamba!”—Dij. 18:7, 8.

12. Jihova kanda kwehela o ifuxi kubhanga ihi ni mukonda dyahi?

¹² Nzambi kanda kwehela o ifuxi kubwika o mundu wê. Ene ambata o dijina dyê ni ujitu woso, a belesela o kitumu kyê kya kutunda mu Babilonya ya Dikota. (Ika. 15:16, 17; Dij. 18:4) Ene a kalakala ni nguzu yoso phala kukwatekesa akwâ ku tunda mu Babilonya. Kyenyiki-phe, o jiselevende ja Jihova, ki janda “tambula mbandu ku mabhebhu mê.” Né kiki, anda bhinga hanji kukolesa o kixikanu kyá phala kukolokota mu izukutisu yanda kwiza kupholo.

13. (a) O Ngôngo nanyi? (b) Kala kilondekesa Izekiyele 38:2, 8, 9 ihi yanda mu bhangesa kubhixila mu kididi kya kifika, a kixana Alumajedone?

¹³ O Kizukutisu kya Ngôngo. (Tanga Izekiyele 38:2, 8, 9.) Kyoso kyanda zubha kubwika o jingeleja joso ja makutu, o mundu wa Nzambi wanda xala u bheka, kala muxi wa subhuka ku kitembu kyonene. Sé phata, Satanaji wanda kala ni njinda yavulu. Mwene wanda londekesa o njinda yê bhu kaxi ka jingolokela mba minangu ya makutu ya madimonyo; kifwa izwelu ya “jinzumbi jayibha,” janda bhangesa o ifuxi kudyongeka phala kumesena kubwika o jiselevende ja Jihova. (Dij. 16:13, 14) O jixi jiji janda dibunda, mu Bibidya a jixana “Ngôngo, o ixi ya Mangongo.” O kyoso o ifuxi ki yanda kwiza mu zukutisa o mundu wa Nzambi, ene anda bhixila mu kididi kya kifika, a kixana Alumajedone.—Dij. 16:16.

14. Ihi yanda tonginina Ngôngo?

¹⁴ O Ngôngo wanda dyelela ku “lukwaku lwa xitu,” kifwa ku kilombo kyê kya ita, mba masoladi. (2 Mal. 32:8) Etu twanda dyelela kwa Jihova Nzambi yetu, sumbala o ifuxi ya ixi anda  banza kwila yú wôwa. Ene anda xinganeka: O jinzambi ja Babilonya ya Dikota ja lembwa ku mu bhulula “ku kyama kya kusuka” ni ku “kwinyi dya lumbinga,” sumbala wexile ni kutena kwavulu! (Dij. 17:16) Kyenyiki, Ngôngo wanda xinganeka kwila, éne anda tambula o kikowé. “Mukwâ ni dituta” divungina o ixi, ene anda kwiza mu zukutisa o mundu wa Jihova. (Ize. 38:15, 16) Maji Ngôngo wanda mona kwila, wabu mu mubhetu. Kala kya bhitile ni Falawó mu Kalunga ka Kusuka, Ngôngo wanda tonginina kwila, a mu bhânga ni Jihova.—Mak. 14:1-4; Ize. 38:3, 4, 18, 21-23.

15. Ihi yanda bhanga Jezú mu ita ya Alumajedone?

¹⁵ Kidistu kumoxi ni kilômbo kyeta kya dyulu, anda zokela o mundu wa Jihova, ni kubwika Ngôngo ni masoladi-mê moso. (Dij. 19:11, 14, 15) Abha ihi yanda bhita ni nguma ya dikota ya Jihova, Satanaji, wa bhangesa o ifuxi kuzukutisa o mundu wa Nzambi, ni kubheka o ita ya Alumajedone? Jezú wanda mu takula mu dikungu ki di moneka hole kumoxi ni madimonyo-mê. Kwenyóko, ene anda kala mu kangolonda, mu midi ya mivu.—Dij. 20:1-3.

16. (a) Kyebhi ki tu londekesa kwila “twejiya Nzambi” (b) Mu ita ya Alumajedone, ihi yanda bhita ni athu ejiya Jihova?

¹⁶ Kikale se twejiya o kidi mu mivu yavulu mba kana, phala kubhuluka ku Alumajedone, twa tokala “kwijiya Nzambi” ni “kutumaka o Njimbu Yambote ya Ngana yetu Jezú Kidistu.” (2 Tes. 1:7-9) Tu londekesa kwila “twejiya Nzambi” kyoso ki twijiya o ima ya wabhela, o ima ya zembe ni itumu yê. Tu londekesa we kwila twejiya Nzambi, kyoso ki tu mu zola, tu mu belesela ni kubheza ngó mwene ni muxima woso. (1 Nzwá 2:3-5; 5:3) Kyoso ki tulondekesa kwila, twejiya Nzambi, tu tambula o ujitu wa ku “twijiya kwala mwène.” O kiki kyanda bhulula o mwenyu wetu mu Alumajedone!” (1 Kol. 8:3) Kiki ki bhita kyebhi? Kiki ki bhita mukonda ku “twijiya kwala mwène” kulombolola kwila, Nzambi wa tu xikina.

17. Ihi i lombolola “kutumaka o Njimbu Yambote ya Ngana yetu Jezú Kidistu”?

¹⁷ “O njimbu yambote ya Ngana yetu Jezú Kidistu” ya lungu ni kidi kyoso kya longo Jezú  kala ki tu sanga mu Mak’â Nzambi. Tu tumaka o njimbu yambote, kyoso ki tu i kumbidila ku mwenyu wetu. O kubelesela kuku, kwa lungu ni ku ta o Utuminu kupholo, kukayela o itendelesu yayuka ya Nzambi ni kuboka o njimbu ya Utuminu. (Mat. 6:33; 24:14) Kiki kya lungu we ni kukwatekesa o Jiphange a a undu ja Kidistu mu ikalakalu yâ.—Mat. 25:31-40.

18. Mu ukexilu webhi o jiphange ja Kidistu a a undu anda tena kuvutula o mbote ya a bhangela?

¹⁸ Kwa kambe ngó o jiselevende ja Nzambi a a undu, anda tena kuvutula o mbote ya a bhangela o “jimbudi jamukwá.” (Nzwá 10:16) Kyebhi? Ande dya kumateka o Alumajedone, oso a tokala ku 144.000 anda ya ku dyulu, anda tambula mwenyu ki wabhwa, anda kituka athu mu nzumbi. Ene anda bhanga mbandu ku kifuxi kya dyulu, kyanda tolola Ngôngo ni kubhulula “mundu wavulu” a difu ni jimbudi. (Dij. 2:26, 27; 7:9, 10) Ujitu wa dikota phala o mundu wavulu, wa kwatekesa o Jikidistá a undu kyoso kyexile mu ixi!

19-20. Sumbala ni ibhidi yetu, kyebhi ki tutena kusuluka mu kukala fiyele kate kyanda bhixila o Alumajedone?

¹⁹ Mu izuwa ya sukidila-ku yiyi ya bhonzo, mundu wavulu wa Jihova wa mu di bhana ni ibhidi. Né mwene kiki twa mu kolokota ni kisangusangu. (Tiya. 1:2-4) O sabhi phala kukolokota o kusamba ni muxima wetu woso. (Luka 21:36) Ki tu tokala ngó kusamba. Maji twa tokala we kudilonga o Mak’â Nzambi izuwa yoso ni kuxinganeka mu ima i tu dilonga. Twa tokala kuxinganeka mu ikanenu ya Bibidya ya mu dikumbidila mu izuwa yetu yiyi. (Jisá. 77:12) Se tu bhanga o ima yiyi ni kubhanga o ukunji kala o kima kya beta-kota phala etu, twanda kolokota mu ufiyele ni kidyelelu kyetu!

²⁰ Xinganeka o kisangusangu kyadikota ki wanda kala na-kyu kyoso kyanda bwika Babilonya ya Dikota, ni kyoso kyanda bhwa o ita ya Alumajedone! O kya beta dingi kota, xinganeka we o ujitu ni kisangusangu ki wanda kala na-kyu kyoso o dijina dya Nzambi ni usobha we kyanda u fumanesa ku mundu woso! (Ize. 38:23) Se phata, o Alumajedone njimbu yambote phala yó ejiya Nzambi, a tumaka mon’ê, ni yó anda kolokota kate kudisukilu.—Mat. 24:13.