1. Kala kilondekesa Matesu 11:28-30, kikanenu kyebhi kya bhange Jezú?

JEZÚ wa bhange kikanenu ku mundu wexile mu mwivwa. Mwene wambe: “Zenu kokwami . . . eme nda ngi mi nyohese.” (Tanga Matesu 11:28-30.) Maji kiki ki kyexile ngó kizwelu kya hatu, kana. Xinganeka ya bhangele mwene phala kusaka o muhatu wexile ni uhaxi wa bhonzo!

2. Ihi ya bhange Jezú phala kusaka o muhatu?

² O muhatu yó wa bhindamene kikwatekesu kya dikota. Mwene wa ile kyá ku jidotolo javulu mukonda wa mesene kudisanza. Mwene wa tale hadi mu 12 kya mivu, maji a saki a lembwa ku mu kwatekesa. Mwene wa tokalele kudikexidila kala kyambele o Kijila. (Iji. 15:25) Mu kusuluka-phe, mwene wevu kwila Jezú wexile mu saka o jihaxi, yú wayi ku mu sanga. Kyoso kya mu sange, wa mu kwata ku muhuhu wa kizwatu kyê. Mu kithangana kyenyókyo-phe, manyinga ma batuka! Jezú ka sake ngó o mukutu wa muhatu. Mwene wa talatala kyambote o muhatu. Kyenyiki, o muhatu wa divu kwila a mu zolele ni ku mu xila. Mu kifika, kyoso kya zwela ni muhatu, Jezú wa londekesa kwila wa mu zolele ni ku mu xila mu ku mwixana “monami.” O muhatu wevu o kiximbakatesu ni kiswinisu kiki!—Luka 8:43-48.

3. Ihi i twanda dilonga mu milongi yiyi?

³ Tala kuma o muhatu mwene wayi mu sota Jezú. Mwene wa bhange nguzu phala ku mu sanga. Lelu, kyene we kimoxi, twa tokala kubhanga ngunzu phala “kubhixila” kwa Jezú. Mu thembu yetu, Jezú kanda bhanga dingi madiwanu phala kusaka o mawuhaxi a mukutu wa yó a “zukama” kwa mwene. Maji wene mu twixana hanji: “Zenu kokwami . . . eme nda ngi mi nyohese.”  Mu milongi yiyi, twanda tambwijila Ibhwidisu itanu: Ihi i tu tena kubhanga phala “kuzukama” kwa Jezú? O izwelu ya Jezú “Di twikyenu jungu yami” i lombolola ihi? Ihi i tu tena kudilonga mu phangu ya Jezú? Mukonda dyahi o kikalakalu kya tu bhana ki tu ximbakatesa? Kyebhi ki tu tena kusuluka mu ku sanga o dinyohenu mu jungu ya Jezú?

4-5. Tu tena “kuzukama” kwa Jezú mu mawukexilu ebhi?

⁴ O ukexilu wa “kuzukama” kwa Jezú, o kudilonga yoso i tu tena ya lungu ni ima ya zwela ni ima bhange. (Luka 1:1-4) Sé-ku muthu u tena kubhanga o ima yiyi bhu kididi kyetu. Kikalakalu kyetu o kudilonga ya lungu ni Jezú. Twa tokala we “kuzukama” kwa Kidistu mu ku tu batizala ni kukituka maxibulu mê.

⁵ O ukexilu wa mukwá wa “kuzukama” kwa Jezú, o kusota o kikwatekesu kya tufunga mu kilunga kyoso ki tu bhindama. Jezú wa tu bhana o ‘mawujitu a mayala’ ya phala kulanga o jimbudi jê. (Efe. 4:7, 8, 11; Nzwá 21:16; 1 Phe. 5:1-3) Twa tokala ku dyangela mu kusota o kikwatekesu kyâ. Ki twa tokala kukingila kwila o tufunga a tanga o kixinganeku kyetu, phala nejiya se ihi i twa bhindamena. Tala ya zwela phange Julian: “Nga xisa o kikalakalu kyami ku Betele mukonda dya uhaxi. Sayi dikamba dya ngi swinisa kusota o kikwatekesu kya tufunga. Ku dimatekenu nga banze kwila ki nga bhindamene o kikwatekesu. Maji mu kubhita kithangana, nga bhingi o kikwatekesu. O kikwatekesu kiki kyexile ujitu wa dikota u nga tambwile.” Tufunga twa fiyele kala o tufunga tuyadi a kundile Julian, a tena ku tu kwatekesa kwijiya ‘o kixinganeku kya Kidistu’ phala kutendela ni kukayela o ukexilu wê. (1 Kol. 2:16; 1 Phe. 2:21) Kyoso ene kya tu kwatekesa mu ukexilu yú, a mu tu bhana ujitu wa katunda, wa beta-kota.

6. Ihi ya mesenene kuzwela Jezú kyoso kyambe: “Di twikyenu jungu yami”?

⁶ O izwelu ya Jezú: “Di twikyenu jungu yami,” i tena kulombolola “Xikinenu o kutena kwami.” I tena kulombolola we “Ngi beleselyenu, tu kalakale phala Jihova kumoxi.” Kyenyiki-phe, o kizwelu jungu, kya lungu ni kukalakala.

7. Kala kilondekesa Matesu 28:18-20, kikalakalu kyahi kya tu bhana? Ihi i tu tena kudyelela ni kidi kyoso?

⁷ Etu twa xikina o kixanu kya Jezú kyoso ki twa bhakula o mwenyu wetu kwa Jihova, anga a tu batizala. O kixanu kiki Jezú wa ki bhange phala o athu oso. Mwene nuka wanda dituna muthu wa mesena kusidivila Nzambi ni kidi kyoso. (Nzwá 6:37, 38) O akayedi oso a Kidistu a tambula o ujitu wa kukalakala kumoxi ni Jezú mu kikalakalu kya mu bhana Jihova. Tu tena kudyelela kwila, Jezú wanda tu kwatekesa jinga mu kikalakalu kiki.—Tanga Matesu 28:18-20.

8-9. Mukonda dyahi o athu a lenduka, a zukama kwa Jezú? Ibhwidisu yebhi i twa tokala kudibhanga?

⁸ O athu a lenduka, a zukama kwa Jezú. (Mat. 19:13, 14; Luka 7:37, 38) Mukonda dyahi? Mukonda Jezú ka difwile ni Jifalizewu. O Jifalizewu ka kexile ni henda, exile akwa ukumbu. (Mat. 12:9-14) Maji Jezú wexile muthu wa henda, wa lenduka. O Jifalizewu exile akwa lwimbi, exile mu dizangeleka mukonda dya mawujitu-mâ bhu kaxi ka athu. Jezú wa a tendelesa o maxibulu-mê phala ka kale akwa lwimbi, wa tendelesa we phala kuditulula bhu kaxi ka akwâ. (Mat. 23:2, 6-11) O Jifalizewu exile mu kusa ni ku kwatekesa wôma ku athu phala n’a a belesela. (Nzwá 9:13, 22) Maji Jezú wa nyohesa akwâ bhu kaxi ka ibhangelu yê ya henda, ni izwelu ya kilendu.

⁹ Yá madisá a katunda u tu tena kudilonga  kwa Jezú? Dibhwidise: ‘O kwila o athu a ngi tala kala ngi muthu wa tululuka o muxima, ngi muthu wa lenduka? O kwila ngi xikina kubhanga o ikalakalu yedi kala ki yala ni valolo? Ngi talatala akwetu ni henda?’

12-14. Mukonda dyahi o kikalakalu kya tu bhana Jezú ki tu nyohesa?

¹² Mukonda dyahi o kikalakalu kya tu bhana Jezú ki tu nyohesa? Kwene ima yavulu, maji twanda jimbulula ngó ima itatu.

¹³ Twala ni kafunga ka beta-kota, Suke-ku. Jihova mwene o Kafunga, Suke-ku yetu. Mwene ki mesene wa kambe o kisakidilu, u zwela sé kuxila. Mwene u bhana valolo mu kikalakalu ki tu bhanga. (Jihe. 6:10) Mwene u tu bhana o kutena ku twa bhindamena phala kukumbidila kyambote o kikalakalu kya tu bhana. (2 Kol. 4:7; Nga. 6:5) Sobha yetu Jezú, wa tu longo kyebhi ki twa tokala kutalatala akwetu. (Nzwá 13:15) O tufunga ene mu tu langa, a sota kukayela o phangu ya Jezú o “mubhidi wa dikota wa jimbudi.” (Jihe. 13:20; 1 Phe. 5:2) Phala ku tu dikila ni ku tu langa, ene a bhanga yoso ya tena phala kukala athu a henda, athu a swina.

¹⁴ Twala ni makamba ambote. Ki kwala kibuka kyala ni makamba a henda, ala ni kikalakalu kibhekela o kisangusangu kala etu. Xinganeka ngó: Twala ni ujitu wa kukalakala ni athu ala ni wendelu wambote, maji ka di mono kwila ene a beta-kota akwá ndenge. Ene ala ni mawuhete avulu, maji a di tulula bhu kaxi ka akwá. Ene ka tu tale ngó kala tu jikoleka ja sulu, maji a tu tala we kala tu makamba. O henda yâ kokwetu ya dikota, ene katé ala polondo phala kubhana o mwenyu wâ phala ku tu bhulula!

15. Kyebhi ki twa tokala kudivwa ni kikalakalu ki twa mu bhanga?

¹⁵ Twala ni kikalakalu kya beta-kota. Tu longa o athu o kidi kya lungu ni Jihova, tu tungununa o makutu a zwela Dyabhu. (Nzwá 8:44) Satanaji u bhangesa athu kudivwa kyayibha mu kwa dinga makutu a a bhangesa kukala sé kidyelelu. Mu kifika, mwene wa mesena ku tu xikinisa kwila Jihova kanda loloka o ituxi yetu, ki twa fwama ku tu zola. O makutu yâ a makota, ene mu luwalesa kyavulu o athu! Kyoso ki tu “zukama kwa Kidistu,” o ituxi yetu a i loloka. Mu kidi Jihova wa zolo kyavulu athu oso. (Loma 8:32, 38, 39) Kisangusangu kya dikota kukwatekesa o athu kukala ni kidyelelu kwa Jihova, ni kubandekesa o kuzediwa kwâ!

16. Kyebhi o kimbamba kya tu bhingi Jezú phala kwambata, ki kya difu ni imbamba i twambata izuwa yoso?

¹⁶ O kimbamba kya tu bhingi Jezú phala kwambata, ki kya difu ni imbamba i twambata  izuwa yoso. Mu kifika, ku disukilu dya kizuwa kyoso athu kya tunda kusalu, avulu a bhixila kubhata a tohoka, a luwala. Maji kyoso ki tu bhita kithangana mu kusidivila Jihova ni Kidistu, tu divwa kyambote, tu sanguluka kyavulu. Nange ku disukilu dya kizuwa twa tohoka, kubhinga nguzu phala kuya mu kyônge mu usuku. Maji kyoso ki tu tunda mu kyônge, twa ximbakata, twala dingi ni nguzu. Kyene wé ki bhita kyoso ki tu bhanga nguzu phala kuboka ni kudilonga o Bibidya ubheka. O mbote i tu katula ya beta dingi kota o nguzu i tu bhakula mu kubhanga o ima yiyi ndenge!

17. Ihi i twa tokala kutendela?

¹⁷ Twa tokala kutendela kwila kala muthu mudyetu wala ni nguzu yê. Kyenyiki-phe, twa tokala kusola kyambote o ima i twanda kuditwika. Mu kifika, tu tena kubhanga nguzu yavulu phala kusota o jimbote. Tala ya zwela Jezú ku munzangala wexile mvwama. Mwene webhudisa: “Mesene ya mbote, eme ngi bhanga kyebhi, phala ngi lundule o mwenyu ki wabhwa?” O munzangala yú wexile kyá mu belesela o Kijila. Mwene nange wexile diyala dyambote, mukonda o musoso wa divulu dya Máluku u zwela kwila Jezú “wa mu zolo.” Jezú wa mwixana phala kukala dixibulu dyê yú wa mwambela: “Ndé, ka sumbise yoso i wavu, o kitadi u ki wanene jingadyama, mbé u kale ni jimbongo ku dyulu; nda wize kiwa, u ngi kayele.” O munzangala yú wa mesenene mwene kukayela Jezú, maji wa lembwa kuxisa o “jimbongo javulu” ja kexile naju. (Mar. 10:17-22) Kyenyiki o munzangala wa ditunu o jungu ya mu bhana Jezú, yú wa suluka mu kubhikila o “jimbongo.” (Mat. 6:24) Se eye, ihi i weji bhanga?

18. Ihi i twa tokala kubhanga mu ithangana ni ithangana ni mukonda dyahi?

¹⁸ Mu ithangana ni ithangana, kima kyambote kuxinganeka se ima yebhi i twa mu bhana dingi valolo ku mwenyu wetu. Mukonda dyahi? Phala ki tu zange o nguzu yetu mu ima ya kambe o valolo. Tala ya zwela o munzangala, a mwixana Mark: “Mu mivu yavulu nga fikile kwila ngexile mu kwambata mwenyu wa bhebhuluka. Eme ngexile ngi muboki wa thembu yoso, maji ngexile mu zanga ithangana ni nguzu yavulu mu kusota o kitadi ni kukala ni mwenyu wambote. Nga dibhwidisa se mukonda dyahi o mwenyu wami wa bhonzele lwavulu. Nga mono kwila ngexile mu ta o jivondadi jami kupholo, ngexile mu bhana ngó kwa Jihova o kithangana ni nguzu yexile mu subhuka.” Mark wa lungulula o ixinganeku ni ukexilu wê wa mwenyu. Wa dibhakula dingi mu sidivisu ya Jihova. Mark wambe: “Sayi ithangana ngexile hanji mu kala ni héle mukonda dya kitadi, maji ni kikwatekesu kya Jihova ni Jezú, nga tolola o ibhidi yami.”

19. Mukonda dyahi kima kyambote kutala o ima mu ukexilu wa tokala?

¹⁹ Sayi dingi ima itatu i twa tokala kubhanga phala kusanga o dinyohenu mu kwambata o jungu ya Jezú. Kya dyanga, o kutala o ima mu ukexilu wa tokala. O kikalakalu ki twa mu bhanga kya Jihova, twa tokala ku ki bhanga we mu ukexilu wa Jihova. Etu tu akalakadi ngó, o Mesene Jihova. (Luka 17:10) Se tu bhanga o kikalakalu mu ukexilu wetu, kyanda kala wila twa mu bhânga ni jungu ya Jezú. Ihi i bhita se o ngombe ya mu sunga o dikalu ku mabhya i mesena ku ila mbandu yengi, o kwa mesena ngana yé kana? Yanda bhwila dingi. Kyene we kimoxi n’etu. Se tu bhanga o ikalakalu ya Jihova mu ukexilu wa mesena mwene, twanda bhanga ima ki twa i fikile kwila twanda i tena. Twanda tolola we ibhidi ya túndu o nguzu yetu. Lembalala kwila, ki kwala muthu u tena kufidisa o vondadi ya Jihova kudikumbidila!—Loma 8:31; 1 Nzwá 4:4.

20. Ihi ya tokala ku tu bhangesa kwambata o jungu ya Jezú?

 ²⁰ Kayadi, kalakala ni kixinganeku kyambote. O ki tu bhangesa kwambata o jungu ya Jezú o kumesena kubhekela o kijingu kwa Tata yetu ya henda, Jihova. Mu hama ya dyanga, o athu akexile mu bhanga o ima mukonda dya lwimbi ni kudixinganeka ngó éne, mu kubhita kithangana a luwala, a bwazeka o jungu ya Jezú. (Nzwá 6:25-27, 51, 60, 66; Fil. 3:18, 19) Maji o yó a kexile mu kalakala mukonda dya kuzola Nzambi ni azukami-â, ni kisangusangu kyoso, ambata o jungu ya Jezú ku mwenyu wâ woso mu ixi. exile we ni kidyelelu kya kutumina ku dyulu kumoxi ni Kidistu. Kala ene, twanda kwambata o jungu ya Jezú ni kisangusangu kyoso, ni kixinganeku kyambote.

21. Kala kilondekesa Matesu 6:31-33, ihi i tu tena kukingila kwa Jihova?

²¹ Katatu, kana kukingila ima yavulu. Etu twa solo mwenyu wa bhebhuluka, wa kukalakala ni nguzu yoso. Jezú wa tu dimuna kwila, o athu eji tu zukutisa. Maji twa dyelela kuma, Jihova wanda tu bhana o nguzu i twa bhindamena phala kukolokota mu ibhidi. O kixikanu kyetu ki kola dingi, kyoso ki tu kolokota mu ibhidi i moneka. (Tiya. 1:2-4) Etu n’â twa dyelela kwila, Jihova wanda tu bhana yoso i twa bhindamena, Jezú wanda tu langa, o jiphange jetu anda tu swinisa. (Tanga Matesu 6:31-33; Nzwá 10:14; 1 Tes. 5:11) Sé phata, etu twala ni yoso i twa bhindamena!

22. Kima kyahi ki tu bhangesa kulondekesa o kisakidilu?

²² O muhatu a mu sake kwala Jezú, wa tambula dinyohenu mu kizuwa kyenyókyo kya mu sake. Maji weji tambula ngó o dinyohenu dya kalela-ku, se wa kitukile dixibulu dya fiyele dya Kidistu. Mu kixinganeku kyé, ihi ya bhange o muhatu yú? Se mwene wa solo kwambata o jungu ya Jezú, wa tambula o ujitu wa kutumina ni Jezú ku dyulu! Ima yoso ya xisa kudima phala kukayela Kidistu, ki ya sokele ni mabesá onene a tambula. Kikale se twala ni kidyelelu kya kuya ku dyulu mba kya kutambula mwenyu wa kalelaku mu ixi, etwenyoso twa tokala kulondekesa kisakidilu mu kixanu kya tu bhange Jezú: “Zenu kokwami!”