1-2. Mukonda dyahi Jezú wa thandanganyele?

MU KIZUWA kyê kya sukina-ku kala muthu mu xitu, Jezú wa thandanganyele. Kwa kambele ngó, eji mu talesa hadi ni ku mu jibha ku athu ayibha. Maji Jezú ka thandanganyele ngó mukonda o kufwa kwê kwa zukamene. Mwene wa zolele kyavulu Tat’ê, wa mesenene ku mu sangulukisa. Jezú wejidile kwila, se wa kolokotele mu ufiyele sumbala ni ibhidi, weji kwatekesa kuzelesa o dijina dya Jihova. Jezú wa zolele we kyavulu o athu, wejidile kwila, eji tena ngó kukala ni mwenyu wa kalelaku ku hádya, se mwene wa kolokotele mu ufiyele wê kwa Jihova katé ku ufwilu wê.

² Sumbala Jezú wexile mu dibhana ni maka a dikota yá, mwene wa tululukile. Mwene wambele o jipoxolo jê: “Nga mi xila o kutululuka kwami.” (Nzwá 14:27) Mwene wexile ni “kutululuka kwa Nzambi,” kifwa o kutululuka ni kubatâma kukala na-ku o muthu wala ni ukamba wambote ni Jihova. O kutululuka kuku, kwa batamesa o kilunji ni muxima wa Jezú.—Fil. 4:6, 7.

3. Ihi i twa-nda dilonga mu milongi yiyi?

³ Sé-ku muthu mudyetu wa-nda dibhana ni itatesu ya dibhanene na-yu Jezú, maji oso a kayela Jezú a-nda dibhana ni ibhidi. (Mat. 16:24, 25; Nzwá 15:20) Kala kya bhitile ni Jezú, sayi ithangana etu we twa-nda dibhana ni ibhidi. O kutandanganya ku tena ku tu nyana o kutululuka kwa muxima. Ihi i tu tena kubhanga phala kiki ki ki bhite n’etu? Twa-nda dilonga ima itatu ya bhangele Jezú mu ukunji wê mu ixi. Twa-nda mona we kyebhi ki tu tena ku mu kayela kyoso ki tu dibhana we ni ibhidi.

4. Mu kuxinganeka mu divulu dya 1 Tesalonika 5:17, bhana phangu ilondekesa kwila Jezú wa sambele lwavulu mu kizuwa kya sukina kya mwenyu wê mu ixi.

⁴ Tanga 1 Tesalonika 5:17. Mu kizuwa kya sukina kya mwenyu wê mu ixi, Jezú wa sambele kyavulu. Kyoso kya londekesa ku maxibulu mê kyebhi kya tokalele kulembalala o kufwa kwê, mwene wa sambe phala kubhitisa o mbolo, wa sambe we phala kubhitisa o vinyu. (1 Kol. 11:23-25) Ande dya kuxisa o kididi mwa bhangele o fesa ya Phasu, mwene wa sambele ni maxibulu mê. (Nzwá 17:1-26) Mu usuku wenyó, kyoso mwene ni maxibulu mê kya bhixila ku Mulundu wa Midiva, mwene wa sambele lwavulu. (Mat. 26:36-39, 42, 44) O izwelu ya sukina ya tumbula Jezú ande dya kufwa, yexile musambu. (Luka 23:46) Ima yoso ya bhitile ni mwene mu kizuwa kya kufwa kwê, Jezú wa i tangela kwa Jihova mu musambu.

5. Ihi ya zozesa o kuswina kwa jipoxolo?

⁵ Kima kimoxi kya bhangesa Jezú kukolokota mu ibhidi, o kudyelela kwa Tat’ê; mwene wa londekesa o kudyelela kuku, mu kusamba sé kufula. Ku mbandu ya mukwá, o jipoxolo ka kolokotele mu kusamba mu usuku wenyó. Mukonda dya kiki, kyoso ki kwa moneka ibhidi, o kuswina kwâ kwa zozele. (Mat. 26:40, 41, 43, 45, 56) Kyoso ki tu dibhana ni ibhidi, tu tena ngó kukolokota mu ufiyele se tu kayela o phangu ya Jezú ya ‘kusamba jinga.’ Ihi i tu tena kubhinga mu musambu?

6. O kixikanu kya-nda tu kwatekesa kyebhi kukala ni kutululuka kunangenena?

⁶ Tu tena kusamba kwa Jihova mu kubhinga phala n’a “tu vudise dingi o kuxikana kwetu.” (Luka 17:5; Nzwá 14:1) Twa bhingi kixikanu mukonda Satanaji wa-nda polovala oso a kayela Jezú. (Luka 22:31) Kyebhi o kixikanu ki tu kwatekesa kukala ni kutululuka kunangenena,  né mwene kyoso ki tu dibhana ni ibhidi i di kayela? Se twa bhange kyá yoso i twa tena phala kutolola o kibhidi, kudyelela kwila Jihova wa-nda tu kwatekesa kutululuka, kwa-nda zubha o kuthandanganya kwetu, mukonda twejiya kwila, Mwene wa-nda batula o maka mu kithangana kya tokala. Twala ni kutululuka kwa muxima mukonda, twa dyelela kwila, Jihova wa beta kota mu kubatula o maka etu ndenge.—1 Phe. 5:6, 7.

7. Ihi i wa dilongo mu izwelu ya Betu?

⁷ O misambu i tu kwatekesa kulanga o kutululuka kwetu kwa muxima, né mwene se tu dibhana ni ibhidi ya bhonzo. Tala o phangu ya Betu, kafunga ka fiyele wala kyá mu 80 a mivu. Mwene wambe: “O kitendelesu mu divulu dya Filipe 4:6, 7, kya ngi kwatekesa kudibhana ni ibhidi yavulu ku mwenyu wami. Nga dibhanene ni maka a lungu ni kukamba o kitadi. A ngi katwile o ujitu wa kusidivila kala kafunga.” Ihi ya kwatekesele Betu kukala ni kutululuka kwa muxima? Mwene wambe: “Nga sambe kyoso ki nga mateka kudivwa kyayibha ku muxima. Nga dyelele kwila, phala kukala dingi ni kutululuka kwa muxima, nga tokalele kusamba lwavulu ni nguzu yoso.”

8. Kala kyamba o divulu dya Nzwá 8:29, ihi dingi ya bhangesa Jezú kukala ni kutululuka kwa muxima?

⁸ Tanga Nzwá 8:29. Jezú wexile ni kutuluka kwa muxima né mwene kyoso kyexile ku mu zukutisa, mukonda wejidile kwila, wa kexile mu sangulukisa Tat’ê. Mwene wa belesela né mwene mu ithangana ya bhonzo. Mwene wa zolele Tat’ê. Kyenyiki, o kusidivila Jihova, kyexile o kima kya beta kota ku mwenyu wê. Ande  dya kwiza mu ngongo, mwene wexile “dixibulu dyê.” (Jisa. 8:30). O kyexile mu ngongo, wa longo akwá ya lungu ni Tat’ê ni kuswina kwoso. (Mat. 6:9; Nzwá 5:17) O kikalakalu kiki kya mu sangulukisa kyavulu.—Nzwá 4:34-36.

9. O kulunga o muxima mu sidivisu ya kuboka ku tu kwatekesa kyebhi kukala ni kutululuka kwa muxima?

⁹ Etu tu tena kukayela o phangu ya Jezú mu kubelesela Jihova, ni kyoso ki tu ‘swina jinga mu kikalakalu kya Ngana.’ (1 Kol. 15:58) O ku “jijila ngó” o sidivisu ya kuboka, kwa-nda tu kwatekesa kutala o ibhidi i tu dibhana na-yu mu ukexilu wambote. (Ika. 18:5) Mu kifika, o ibhidi ya athu u tu sanga mu ukunji mu veji javulu, yene mu beta kota o yetu ndenge. Né kiki, kyoso kya mateka kuzola Jihova ni kukayela o itendelesu yê, o myenyu yâ i kala dingi kyambote, o kusanguluka kwâ ku dibandekesa dingi. Kyoso ki tu mona o ima yiyi, o kidyelelu kyetu kya kwila Jihova wa-nda tu langa ki di bandekesa dingi. O kidyelelu kiki, ki tu kwatekesa kulanga o kutululuka kwetu kwa muxima. Sayi phange ya muhatu wa kexile mu divwa sé valolo ku mwenyu wê woso, wexile we ni kikote ku muxima, wa mono kwila kiki kidi mwene. Mwene wambe: “Mu ithangana i nga kexile mu ukunji, ngexile mu langa o ixinganeku yami yayibha, ngexile we mu sanguluka dingi. Nga fika kwila, kiki kyexile mu bhita mukonda, mu sidivisu ya kuboka nga zukamene dingi kwa Jihova.”

10. Ihi i wa dilongo mu izwelu ya Bhalanga?

¹⁰ Tala we o phangu ya phange Bhalanga. Mwene ni phang’yê a dibhanene ni uhaxi wa bhonzo. Bhalanga ka tenene kwenda. Phala kuya kididi kyengi wa bhingile kyalu kya malola, k’exile ni nguzu yavulu. Sayi ithangana mwene u boka nzo ni inzo, maji mwene u boka dingi bhu kaxi ka mikanda. Mwene wambe: “Kuxikina ni muxima woso kwila o uhaxi wami ki wala ni usakelu ku mundu yú, ku ngi bhangesa kulunga o mwenyu wami mu ukunji. Mu kidi, o sidivisu ya kuboka i ngi bhangesa kujimba o ibhidi yami yoso. I ngi bhangesa kulunga o muxima mu kukwatekesa oso u ngene mu bokela o njimbu yambote mu mbambe ya kilunga kyetu. Kyoso ki nga mu boka, ngi di lembalala o kidyelelu kyami kya lungu ni hádya.”

11-13. (a) O jipoxolo ni athu engi, a londekesa kyebhi kwila exile mwene makamba a kidi a Jezú? (b) Jezú wa divu kyebhi mu kukala ni ukamba ni éne?

¹¹ Mu ithangana yoso ya ukunji wa Jezú, o jipoxolo ja fiyele exile makamba a kidi a Jezú. Ene a londekesa ni kidi kyoso kwila: “Sayi-phe dikamba di beta kota, o phange ndenge.” (Jisa. 18:24) Jezú wa bhanene valolo ku makamba yá. Mu kithangana kya ukunji wê kana-ku phang’yê mu xitu wa mu xikana. (Nzwá 7:3-5) Sayi kithangana o jindandu jê a banzele kwila, mwene wa salukile. (Mál. 3:21) Ku mbandu ya lungu ji poxolo jê ja fiyele, mu usuku ande dya kufwa kwê Jezú wa ambela: “Enu-phe, en’wenu mwa xala ni eme mu kuxikamena o jiphaxi jami.”—Luka 22:28.

¹² Sayi ithangana o jipoxolo a luwalesele Jezú, maji mwene ka di kwatenena mu itondalu yâ. Mu veji dya kiki, mwene wa di kwatenena mu kixikanu kya kexile na-kyu kwa mwene. (Mat. 26:40; Mál. 10:13, 14; Nzwá 6:66-69) Mu usuku wa sukina wa bhiti na-wu ande dya ku mu jibha, Jezú wambela o mayala yá a fiyele: “Enu nga m’ixana-phe mu makamba, mukonda ima yoso i ngevu kwa Tata yami, nga m’ijidisa-yu.” (Nzwá 15:15) Sé phata o makamba a Jezú a mu swinisa kyavulu. O kikwatekesu kya mu bhanene mu ukunji wê kya sangulukisa kyavulu Jezú.—Luka 10:17, 21.

¹³ Katu-ku o jipoxolo, Jezú wa kexile ni makamba engi, mayala ni ahatu a mu kwatekesa mu sidivisu ya kuboka ni mu mawukexilu engi.  Amoxi, a mwixanene phala kudya ku mabhata mâ. (Luka 10:38-42; Nzwá 12:1, 2) Amukwá ende-nê njila, a mu kwatekesa ni ima ya kexile na-yu. (Luka 8:3) Jezú wexile ni makamba ambote mukonda mwene wexile we dikamba dyambote. Mwene wexile mu a bhangela ima yambote, kexile mu a bhinga kubhanga ima ya túndu o nguzu yâ. Sumbala Jezú wexile muthu wa yuka, wa kexile mu sakidila o kikwatekesu kya makamba mê akwa ituxi. Sé phata ene a mu kwatekesa kukala ni kutululuka kwa muxima.

14-15. Kyebhi ki tu tena kukala ni makamba ambote? Kyebhi ene kya tu kwatekesa?

¹⁴ O makamba ambote a-nda tu kwatekesa kukolokota mu ufiyele kwa Jihova. O ndunge ya beta kota i tu kwatekesa kubhanga makamba ambote o kukala dikamba dyambote. (Mat. 7:12) Mu kifika, o Bibidya i tu swinisa kukwatekesa akwetu ni kithangana ni nguzu yetu, kotelele yó a “bhindama.” (Efe. 4:28) Nanyi u tena ku mu kwatekesa mu kilunga kyé? O kwila u tena kuya mu sumba imbamba phala muthu ka tena kutunda bhu kanga mukonda dya kitala mba uhaxi? O kwila u tena kubhana kudya ku mwiji wala ni maka a lungu ni kitadi? Se wejiya kukalakala ni sayte jw.org^® ni aplikativu JW Library^®, o kwila u tena kukwatekesa we akwenu mu kilunga kusanga o milongi yala-mu? Kyoso ki tu lunga o muxima mu kukwatekesa akwetu, tu sanguluka dingi.—Ika. 20:35.

¹⁵ O makamba u tu sola a-nda tu kwatekesa kyoso ki tu dibhana ni ibhidi, a-nda tu kwatekesa we kukala ni kutululuka kwa muxima. Kala Edihu wevwile ni mwanyu kyoso Jobe kya mu tangela o ibhidi yê, o makamba metu a twívwa ni mwanyu woso kyoso ki twa a tangela kyebhi ki twa mu divwa. (Jobe 32:4) Ki tu tokala kukingila  kwila o makamba metu a sola o ima bhu kididi kyetu, maji tu londekesa unjimu se twívwa o itendelesu ya tu bhana bhu kaxi ka Bibidya. (Jisa. 15:22) Sobha Davidi wa xikina o kikwatekesu kya makamba mê ni kulenduka kwoso. Etu we ki tu tokala kudizangeleka, kifwa kudivwa kala akwetu ka tokala ku tu bhana o kikwatekesu ki twa bhindamena. (2 Sam. 17:27-29) Mu kidi, o makamba ambote ujitu u tunda kwa Jihova.—Tiya. 1:17.

16. Kala kilondekesa Filipe 4:6, 7, webhi ngó o ukexilu u tu kwatekesa kukala ni kutululuka? Jimbulula.

¹⁶ Tanga Filipe 4:6, 7. Mukonda dyahi Jihova u tu tangela kwila tu tena kukala ni kutululuka kubhana mwéne ‘bhu kaxi ka Kidistu Jezú’? Mukonda tu tena ngó kukala ni kutululuka kunangenena ku muxima ni mu kilunji, se tu tendela anga tu xikana mu kikalakalu kya Jezú mu kikumbidilu kya vondadi ya Jihova. Mu kifika, bhu kaxi ka sata ya kukula ya bhana Jezú, o ituxi yetu yoso a tena ku i loloka. (1 Nzwá 2:12) Kyoso ki tu xinganeka mu maka yá, o muxima u tululuka dingi! Kuma mwéne o Sobha ya Utuminu wa Nzambi, Jezú wa-nda zubha o hadi yoso ya tu bhekela Satanaji ni mundu wê. (Iza. 65:17; 1 Nzwá 3:8; Dij. 21:3, 4) Kiki ki tu bhana kidyelelu! Sumbala Jezú wa tu bhana kikalakalu kya bhonzo, mwene kya tu xisa ubheka, wa mu tu kwatekesa mu izuwa yiyi ya sukidila-ku ya mundu yú. (Mat. 28:19, 20) O maka yá a tu swinisa kyavulu! O kutululuka kwetu kwa muxima, kwa xilamena mu ima itatu yiyi: Kuzela kwa muxima, kidyelelu ni kuswina.

17. (a) Kyebhi o Kidistá kya tena kulanga o kutululuka kwê kwa muxima? (b) Kala kya ki kanena mu divulu dya Nzwá 16:33, kima kyahi ki twa-nda tena kubhanga?

¹⁷ Kyebhi-phe ki u tena kukala ni kutululuka kunangenena kyoso ki u dibhana ni ibhidi i ku thandanganyesa kyavulu? U tena kubhanga kiki, mu kukayela o ima ya bhangele Jezú. Kya dyanga, samba, kolokota ni kusamba, kiza ki kizé. Kayadi, belesela Jihova, boka ni kuswina né mwene mu ithangana ya bhonzo. Katatu, dyelela kwila o makamba mê, a-nda ku kwatekesa mu ibhidi yé yoso. Se kyene ki u bhanga, o kutululuka kwa Nzambi, kwa-nda langa o kilunji ni muxima wé. Kala kya bhangele Jezú, eye we wa-nda tena kutolola o ibhidi yoso i moneka.—Tanga Nzwá 16:33.