1. Ihi i tena kubhanga Jihova phala kukumbidila o vondadi yê?

JIHOVA u tena kukituka yoso ya mesena phala kukumbidila o vondadi yê. Mu kifika, Jihova wa kituka Mulongexi, Mukwa kutululukisa, ni mu Muboki. Twa tumbula ngó ima yofele i tena kukituka Jihova. (Iza. 48:17; 2 Kol. 7:6; Nga. 3:8) Né kiki, mu veji javulu mwene u bhinga ku athu phala kubhanga yoso ya mesena. (Mat. 24:14; 28:19, 20; 2 Kol. 1:3, 4) Jihova u tena kubhana ku muthu woso-woso, o unjimu ni kutena kwa bhingi, phala kukituka yoso ya bhingi n’a kumbidila o vondadi yê. Kiki kilombolwelu kya dijina dya Jihova, kala kyene mu zwela akwa kutokwesa.

2. (a) Mukonda dyahi sayi ithangana ki tu banze kwila, Jihova u tena ku tu bhana ikalakalu? (b) Ihi i twanda dilonga mu milongi yiyi?

² Etwenyoso twa mesena kubhanga kima ki sangulukisa Jihova. Maji amoxi a kala ni phata. Ka banze kwila, Jihova u tena ku a bhana ikalakalu. Mukonda dyahi? Mukonda ene a divwa kuma ka tena mukonda dya kitala, ibhindamu ni kukamba o uhete. Kumbandu yengi, amukwa a sanguluka ni kikalakalu kya mu bhanga kyá, a banza kwila ka bhingi kubandekesa-ku dingi. Mu milongi yiyi, twanda zwela kyebhi Jihova kya tena ku tu pelepalala phala kukumbidila o vondadi yê. Mu kusuluka, twanda tala misoso ya Bibidya ya jiselevende ja Jihova, mayala ni ahatu, i londekesa kyebhi kya tambula o hanji ni kutena phala kubhanga dingi. Ku disukilu, twanda mona kyebhi ki tu tena kudibhakula phala Jihova n’a tu bhana dingi ikalakalu mu kilunga kyê.

3. Kala kilondekesa Filipe 2:13, kyebhi Jihova kya tena ku tu bhana o hanji phala kukalakala?

³ Tanga Filipe 2:13. * Jihova u tena ku tu bhana o hanji phala kukalakala. Kyebhi kya tena kubhanga kiki? Mu kifika, tu tena kwívwa kwila, sayi phange mu kilunga wa bhindamena kikwatekesu mba sayi kikalakalu kyengi mu kilunga. Mba-phe o tufunga a tanga mukanda wa tundu ku filiyale, wamba kwila, sayi kilunga kyengi kya bhindamena aboki. Kyenyiki eye u tena kudibhwidisa: ‘Ihi i ngi tena kubhanga phala kukwatekesa?’ Mba a tu bhana kikalakalu kya bhonzo. Ki twejiya se twanda kibhanga kyebhi. Mba kyoso ki u tanga jivelusu ja Bibidya, u tena kudibhwidisa, ‘Kyebhi ki ngi tena kukayela o jivelusu jiji phala kukwatekesa akwetu?’ Jihova ka tu jijila kubhanga kima kyoso-kyoso. Maji kyoso kya mona kwila twala polondo phala kuditonginina mudyetu, Jihova u tena ku tu bhana o hanji ya kuya kupholo phala kukalakala.

4. Kyebhi Jihova kya tena ku tu bhana o kutena phala kukalakala?

⁴ Jihova u tena we ku tu bhana o kutena phala kukalakala. (Iza. 40:29) Kyebhi? Mwene u tena ku tu bhana o nzumbi ikola phala kubandekesa o mawuhete metu. (Mak. 35:30-35) Bhu kaxi ka kilunga kyê, mwene u tena ku tu longa kyebhi ki tu bhanga o kikalakalu kya tu bhana. Se a kubhana kikalakalu maji ki wejiya kyebhi kya tokala ku kibhanga, bhinga ki kwatekesu. Bhinga we o kikwatekesu kwa Tata yetu ya dyulu, mwene wanda kubhana o “nguzu i lenda yoso.” (2 Kol. 4:7; Luka 11:13) Mu Bibidya mwala misoso yavulu ilondekesa kyebhi Jihova kya kwatekesa mayala ni ahatu, mu ku a bhana o hanji ni kutena phala kukalakala. Kyoso ki tuya ni kudilonga o misoso yiyi, xinganeka kyebhi Jihova kya tena ku kubhana kikalakalu phala kubhanga o ima kala kya bhangele ene.

5. Ihi i tu dilonga mu ukexilu wa Jihova wa bhana o kikalakalu kwa Mozé wa kubhulula o mundu wê?

⁵ Jihova wa bhanene kikalakalu kwa Mozé kya kubhulula o mundu wa akwa Izalayele. Jihova wa mu bhanene o kikalakalu kiki mu kithangana kyebhi? O kwila kiki ki kya bhiti kyoso Mozé kya divwile kwila wala polondo, mukonda dya ku mu longa o “unjimu woso wa akwa Ijitu?” (Ika. 7:22-25) Kana, Jihova wa bhanene ngó o kikalakalu kwa Mozé kyoso mwene kya kitukile muthu wa lenduka wa batama o muxima. (Ika. 7:30, 34-36) Jihova wa bhanene o kuswina kwa Mozé phala kuzwela ni nguvulu ya Ijitu wexile ni kutena kwavulu. (Mak. 9:13-19) Ihi i tu dilonga mu ukexilu wa Jihova wa bhana o kikalakalu kwa Mozé? Tu dilonga kwila, Jihova u bhana kikalakalu kwa yó a sota kukayela o idifwa yê anga a dyelela mu kutena kwê.—Fil. 4:13.

6. Ihi i twa dilongo mu ukexilu wa Jihova kukalakala ni Badizilayi phala kukwatekesa Sobha Davidi?

⁶ Hama ja mivu kupholo, Jihova wa bhanene kikalakalu kwa Badizilayi kya kukwatekesa Sobha Davidi. Davidi ni mundu wê exile ni “nzala ni dibhwilu, ni dinyota” kyoso ene exile mu lenga Abisalone mona Davidi. Badizilayi, wexile kya mwadyakime. Né kiki wa te o mwenyu wê mu kilwezu phala kukwatekesa Davidi ni yó exile-né. Badizilayi ka xinganeka kwila kala dingi ni valolo kupholo dya Jihova mukonda dya kukuka. Mu veji dya kiki mwene ni henda yoso wa bhana o ima yexile na-yu phala kukwatekesa o jiselevende ja Nzambi ja bhindamene. (2 Sam. 17:27-29) Ihi i tu dilonga ku  musoso yú? Kya tu longo kuma, né mwene se tu adyakime, Jihova u tena ku tu bhana kikalakalu kya kudikila o ibhindamu ya jiselevende jê, kikale mu kilunga kyetu mba mu kididi kyengi kwa bhindamena-ku kima. (Jisa. 3:27, 28; 19:17) Né mwene se ki tu tena kukwatekesa ni nguzu yetu, tu tena kusangela kitadi phala o kikalakalu kyetu ku mundu woso. O kitadi kiki kyanda kwatekesa kwoso kumoneka o ibhindamu.—2 Kol. 8:14, 15; 9:11.

7. Kikalakalu kyebhi kya bhana Jihova kwa Ximinyá ni mukonda dyahi kiki kya mu swinisa?

⁷ Jihova wa kanena kwa Ximinyá, mwadyakime wa fiyele mu Jeluzaleme kwila, mwene weji mona Mexiya ande dya kufwa. O kikanenu kiki kya swinisa kyavulu Ximinyá, mukonda mwene wa kingila Mexiya mu mivu yavulu. Mukonda dya kixikanu ni kukolokota kwê Jihova wa besowala Ximinyá. Sayi kizuwa, “bhu kaxi ka nzumbi ikôla,” mwene wayile mu tembulu. Kwenyóko mwene wa tale o kabwetele Jezú. Jihova wa bhana dingi ujitu kwa Ximinyá wa kubhanga kikanenu kya kwila, o mona weji kituka Kidistu. (Luka 2:25-35) Sumbala Ximinyá nange wa fwile kyá kyoso Jezú kya mateka o ukunji wê mu ixi, mwene wa sangulukile ni ikalakalu ya mu bhele Jihova. Ku hádya, mwene wanda tambula mabesá avulu! O diyala didi dya fiyele, ku mundu wobhe wanda mona kyebhi Jezú kyanda bhekela mabesá avulu phala o ifuxi yoso mu ngongo. (Dim. 22:18) Etu we tu tena kulondekesa kisakidilu mu ujitu woso-woso u tu tambula kwa Jihova, mu sidivisu yé.

8. Kyebhi Jihova kya tena ku tu bhana kikalakalu kala kya bhangele ni Balanabé?

⁸ Ku hama ya dyanga mu K.K., sayi diyala a mwixanene Zuze, wexile polondo phala kubhanga o vondadi ya Jihova. (Ika. 4:36, 37) Nange, o jipoxolo a mu luku Balanabé dilombolola, ‘muthu u kolokotesa akwâ’ mukonda wexile mu ximbakatesa akwa. Mu kifika kyoso Sawulu kya kituka Kidistá, avulu mu kilunga akexile ni wôma wa kumu zukama mukonda dya kuzukutisa o Jikidistá m’ukulu. Maji, Balanabé wa ximbakatesa yu wa kwatekesa Sawulu. Mukonda dya kiki Sawulu wa sangulukile kyavulu. (Ika. 9:21, 26-28) Mu kubhita kithangana, o tufunga mu Jeluzaleme, a bhindamene kuswinisa o jiphange a tungile ku Andiyokiya ni ku Sidiya. A tumikisa-ku nanyi? A tumikisa-ku Balanabé! Ene a solo kyambote. Etu twa mu zwela kwila Balanabé “ anga u a swinisa ene oso kuma a kolokote kwenda mu kidi ni Ngana, ni kutetuluka kwa muxima.” (Ika. 11:22-24) Kyene we kimoxi lelu, Jihova u tena ku tu kwatekesa kukituka “muthu u kolokotesa akwâ” phala kuximbakatesa o jiphange. Mba mwene u tena ku tu bhangesa kukunda muthu, kuxinda muthu wa mu kata mba kuzwela ima i mu swinisa. O kwila wanda kwehela Jihova ku kubhana kikalakalu kala kya bhanene kwa Balanabé?—1 Tes. 5:14.

9. Ihi i tu dilonga mu ukexilu wa Jihova wa kwatekesa phange a mwixana Vasily kukituka kafunga kambote mu nzumbi?

⁹ Jihova wa kwatekesa phange a mwixana Vasily kukituka kafunga kambote mu nzumbi. Kyoso Vasily kya tambula o ujitu wa kukala kafunga wexile ni 26 kya mivu. Mwene wexile ni wôma, kya divwile kwila weji tena kukwatekesa o kilunga kukula mu nzumbi, benge-benge yó exile mu dibhana ni ibhidi. Maji mwene wa tambula kikwatekesu kya tufunga exile ni uhete ni kyoso kya dilongo o Xikola ya tufunga. Phange Vasily wa kalakala ni nguzu yoso phala kuditunda kyambote. Mu kifika mwene wa soneka jimbambe jofele jeji kumbidila. Kyoso kyayi ni kukumbidila o jimbambe jiji, o wôma wê wa sosoloka. Kindala mwene wamba: “o ima yexile mu ngi bhekela wôma m’ukulu, kindala i ngi sangulukisa. O kyoso Jihova kya ngi kwatekesa kusanga velusu i ximbakatesa jiphange  mu kilunga ngi sanguluka kyavulu.” Enu jiphange ja mala, se mu kayela o phangu ya phange Vasily ni mu wehela Jihova ku mi kitula o muthu wa mesena mwene, mwene wanda ku mi bhana uhete wa kulanga kyambote o kikalakalu kya mi bhana mu kilunga.

10. Ihi ya bhangele Abingayíle ni ihi i tu dilonga mu phangu yê?

¹⁰ Davidi ni masoladi-mê, exile mu a sota kwala Sobha Sawulu. A bhindamene kikwatekesu. Kyenyiki, o masoladi a Davidi a bhingi ka kudya ku diyala a mwixana Nabale, mukwa Izalayele. Ene a bhingile kudya mukonda a bhangele kikalakalu phala Nabale. A langele o jimbudi jê mu kikangalakata. Maji Nabale wexile mukwa kwimina. Ka a bhanene kima. Davidi wa dizangala kyavulu, wa mesene kujibha Nabale ni mala oso a mu tokalele. (1 Sam. 25:3-13, 22) Maji Abingayíle, muhatu wa Nabale, wexile mukwa kilunji. Ni kuswina kwoso, mwene wa tolokela Davidi, wa mu dyondela phala ka kale ni kikuma kya manyinga mu kujibha Nabale. Ni uhete woso, wa mu bhingi phala kuxisa o maka yá bhu maku a Jihova. O izwelu ya lenduka ni ibhangelu yambote ya Abingayíle, ya tululukisa o muxima wa Davidi. Mwene wa tonginina kwila, Jihova mwene wa tumikisa Abingayíle. (1 Sam. 25:23-28, 32-34) Abingayíle wexile ni idifwa yambote, ya bhangesa Jihova ku mu bhana ikalakalu. Kyene we kimoxi ni jiphange ja ahatu, ala ni kilendu, ala ni kilunji, a tena ku fikidila o miji, ni akwâ mu kilunga.—Jisa. 24:3; Titu 2:3-5.

11. Ihi ya bhangele o an’â Salume ni a nanyi a mu kayela o phangu yâ lelu?

¹¹ Mu kubhita ji hama ja mivu, an’a ahatu a tokalele ku mwiji wa Salume, exile bhu kaxi ka yo a a solele kwala Jihova phala kuyudika o ilumbu ya thembulu. (Neh. 2:20; 3:12) Sumbala o tata yâ wexile kilamba, o ana a Salume a dibhakula phala kubhanga ikalakalu ya bhonzele kyavulu. (Neh. 4:15-18) Ene ka difwile ni atwameni a mwiji wa akwa Tékowa. O mayala yá “ku kikalakalu kya Ngana yâ k’a tele-ku xingu jâ” phala kukwatekesa! (Neh. 3:5) O an’â Salume, a sangulukile kyavulu mu kumona kwila, o kikalakalu a ki zubha mu 52 a izuwa! (Neh. 6:15) Mu izuwa ya lelu, twene mu mona jiphange ja ahatu ala ni ukexilu yú. Ene a bhanga ikalakalu ya lungu ni kutunga ni kulanga ididi yo bhakule phala o ubhezelu kwa Jihova. O uhete wâ, o kufulujuka kwâ ni ufiyele wâ, u kwatekesa kyavulu o kikalakalu kiki.

12. Kyebhi Jihova kya tena ku tu bhana kikalakalu kala kya bhangele ni Tabita?

¹² Jihova wa bhangesa Tabita kubhanga “ima yavulu yambote ni kukwatekesa we kyavulu o jingadyama,” kotelele o atudi a ahatu. (Ika. 9:36) Mukonda dya henda ni ukexilu wê wa kubhana, o jiphange a luwalele kyavulu kyoso Tabita kyafu. Maji ene a sangulukile kyavulu kyoso Phetele kya mu fukununa. (Ika. 9:39-41) Ihi i tu dilonga ku phangu ya Tabita? Kikale se tu minzangala mba tu adyakime, tu mala mba tu ahatu, etwenyoso tu tena kubhanga kima phala kukwatekesa o jiphange mu kilunga.—Jihe. 13:16.

13. Kyebhi Jihova kya bhana kikalakalu kwa phange a mwixana Lute wexile mukwa Jisonyi? Ni ihi ya yambe mwene?

¹³ Sayi phange a mwixana Lute wexile mukwa Jisonyi wa mesenene kukala mukunji wa jixi jengi. Mu undenge we mwene wa swinine mu kubhana o tumikanda inzo ni nzo. Mwene wambe: “Mu kidi nga wabhelele o kikalakalu kiki.” Maji kya mu bhonzele o kuzwela ni athu pholo ni pholo yalungu ni Utuminu wa Nzambi. Sumbala wexile mukwa jisonyi, Lute wa kituka muboki wa thembu yoso, kyoso kya tenesa 18 dya mivu. Ku muvu wa 1946, a mwixana  phala kubhanga o Xikola ya Ngiliyade, mu kubhita kithangana a mu tumikisa ku Hawaiyi ni ku Japá. Jihova wa mu kitula muthu wa kutena mu ukexilu wa kusanzumuna o njimbu yambote mu jixi jojo. Mwene wa kumbidila o ukunji wê mu a 80 mivu. Lute wambe: “Jihova wa ngi kwatekesa mu ku ngi bhana o kutena kwê. Mwene wa ngi kwatekesa kutolola o jisonyi jami. Ni kidi kyoso ngi xikina kwila Jihova u tena kuku kitula o muthu wa mesena se u mu dyelela.”

14. Kala kilondekesa Efezu 3:16, 17, ihi i twa tokala kubhanga phala Jihova na tu bhana ikalakalu mu kilunga?

¹⁴ Tunde ukulu, Jihova wene mu bhana ku jiselevende jê ikalakalu yavulu mu mawukexilu ka difu. Ikalakalu yebhi yanda ku kubhana mwene? Kwa bhingi ukala polondo. (Tanga Efezu 3:16, 17.) Se ukala polondo, Jihova u tena kuku kitula mulongexi ni muboki wa mbote, u tena we kuku kitula muthu u kolokotesa, u ku kitula mukalakadi wa uhete, dikamba di ximbakatesa, mba muthu woso-woso wa mesena mwene phala kukumbidila o vondadi yê.

15. Kala kya ki jimbulula mu 1 Timote 4:12, 15, o minzangala ya lelu a tokala kubhinga kwa Jihova phala ku a kwatekesa kubhanga ihi?

¹⁵ Abha o ya lungu ni jiphange jetu minzangala a mu zukama kyá ku u wadyakime? Twa bhindamena mala a nguzu, phala kukwatekesa o kikalakalu kya kulanga o kilunga, kala akwatekexi a tufunga. Sayi ilunga, mwala dingi tufunga o akwatekexi a tufunga ndenge. O kwila enu mu minzangala mu tena kubandekesa o hanji yenu phala kubhanga dingi mu kilunga? Sayi minzangala amba kwila, “Eme nga wabhela kusidivila mwene ngó kala muboki kwabhu.” Se kyene ki wene mu divwa, bhinga kwa Jihova kikwatekesu na kubhane o hanji ya kusidivila kala mukwatekexi wa tufunga ni kukala ni kutena phala kubhanga ikalakalu yavulu mu kilunga kyê. (Ndo. 12:1) Twa bhindamena o kikwatekesu kyé!—Tanga 1 Timote 4:12, 15.

16. Ihi i twa tokala kubhinga kwa Jihova ni mukonda dyahi?

¹⁶ Jihova u tena ku kubhana o uhete phala kukumbidila o vondadi yê. Kyenyiki-phe mu bhinge o hanji phala kubhanga o kikalakalu kyê. Mu kusuluka mu bhinge o kutena ku wa bhindamena. Kikale se u munzangala mba u mwadyakime, bhakula o kithangana ni nguzu yé phala kujingisa Jihova kindala. (Ndo. 9:10) Se a kubhana kikalakalu mu kilunga kya Jihova, kana kudituna ni lusolo kwila ki wanda tena. Ujitu wa dikota kubhanga mbandu né mwene yofele mu kikalakalu ki fumanesa o Tata yetu ya henda!