Sayi jipolofesya jotumbule mu grafiku yiyi, ja jimbulula izulukutu ya bhiti mu kithangana kimoxi. Jene jilondekesa mu mawukexilu avulu kwila, etu twala ‘kudisukilu dya jithembu.’—Dan. 12:4.

• Ibatulu Dij. 11:7; 12:13, 17; 13:1-8, 12

  Polofesya “O kyama” kyene mu tumina o athu mu ixi mu 3.000 a mivu ndenge. Mu izuwa yasukidila-ku o sambwadi dya mítwe ayi kwama. Mu kusuluka, o mutwe a usaka anga o “ngongo yoso” ikayela o kyama. Satanaji ubhangesa o kyama “kùlwa ita ni yá a subhuka.”

  Kikumbidilu Kyoso kya bhiti o Diluvyu, kwa moneka jinguvulu, exile ni unguma ni Jihova, amateka kutumina o athu. Mu kubhita 3.000 a mivu, kwa moneka o unguvulu wa Bretanha. Mu Ita Yadyanga ya bhiti ku Mundu Woso, o ixi ya Bretanha ki yexile dingi ni kutena kwavulu. Nguzu yexile nayu ya vutuka dingi, kyoso kya dibundu ni Estados Unidos. Mu izuwa yasukidila-ku yiyi, Satanaji wene mu zukutisa o mundu wa Nzambi, bhu kaxi ka jinguvulu ja ngongo.

• Ibatulu Dan. 11:25-45

  Polofesya O unguma wa sobha ya thunda ni sibha ya lwiji mu thembu ya sukina.

  Kikumbidilu O Pontencia ya Alemanha i lwa ita ni Anglo-Americana. Mu muvu wa 1945 o União Sovietica ni jixi jene ku mu kwatekesa a kituka o sobha ya thunda. Mu muvu wa 1991, unguvu wa União Sovietica, u bwa, Russia ni jixi jene ku mu kwatekesa akituka o sobha ya thunda.

• Ibatulu Iza. 61:1; Mal. 3:1; Luka 4:18

  Polofesya Jihova wa tumikisa “mukunji” wê phala ‘ku yudikila o njila’ ande dya kutumbika o Utuminu wa Mexiya. O “mukunji” wamateka “kutudila jingadyama njimbu ya mbote.”

  Kikumbidilu Tundé ku 1870, phange C. T. Russell ni jiphange ja mukwa, a mateka kuboka ni kuswina phala kujimbulula o kidi kya Bibidya. Mu mivu ya 1880, ene atonginina kwila o kuboka kyexile kikalakalu kya beta-kota phala o jiselevende ja Nzambi. Ene asoneka milongi kala “Precisam-se 1.000 pregadores” ni “O Jikidistá a a undu phala kuboka o njimbu yambote.

• Ibatulu Mat. 13:24-30, 36-43

  Polofesya Diyala dya kunu jimbutu jambote mu dibhya. Mu kusuluka kwamoneka nguma, ya kunu jimbundu ja yangu mu dibhya dyenyidi. O jimbundu ja yangu anga jifuta o jimbutu jambote, kate mu kithangana kya kubhongolola; anga a ji wanuna.

  Kikumbidilu Tundé ku muvu wa 1870, o Jikidistá ja kidi ja mateka kuditungula dingi ku Jikidistá ja makutu. Mu izuwa ya sukidila-ku, o Jikidistá ja kidi ki jene mu dibunda ni Jikisdistá ja makutu.

• Ibatulu Dan. 2:31-33, 41-43

  Polofesya O inama ya felu ni utuma ya tokala ku kiteka kya ulu, phalata ni ngôndo.

  Kikumbidilu O utuma ulombolola o athu ene mu atumina kwola o jixi ja Bretanha ni Estados Unidos, maji a bukumukina o jinguvulu jiji. Mukonda dya athu yâ, o jinguvulu jiji ja lembwa kulondekesa o kutena kwâ kwoso.

• Ibatulu Mat. 13:30; 24:14, 45; 28:19, 20

  Polofesya “O jimbutu jambote” a ji bhongolola mu “kitula,” o “Kimbadi kya fiyele kya dimuka,” a kisolo phala kutambula konda dya “dibhata.” O kikalakalu kya kuboka “o njimbu yambote ya Utuminu” kya mateka kudimwanga mu “ngongo yoso.”

  Kikumbidilu Mu muvu wa 1919 a solo o kimbadi kya fiyele phala kwendesa o mundu wa Nzambi. Tundé o kithangana kyenyokyo, o adilongi a Bibidya amateka kuboka dingi ni nguzu o njimbu yambote. Lelu, o Jimbangi ja Jihova ja mu boka mu 200 a jixi ndenge, a mu bhanga ji Bibidya ni madivulu alungu ni Bibidya mu 1.000 a madimi ndenge.

• Ibatulu Dan. 12:11; Dij. 13:11, 14, 15

  Polofesya O kyama kya mbinga jiyadi kikala ku pholo mu kikalakalu kya kubhanga o “kitéka kya kyama,” anga “u ki bhana kubhwima.”

  Kikumbidilu O pontencia ya Anglo-Americana yene yexile kupholo phala kubhanga o kisangela kya Liga das Nações. Jixi ja mukwa ja dibundu we mu kisangela kiki. Mu kubhita kithangana, o sobha ya thunda ya bokona we mu kisangela kya Liga das Nações. Maji tundé ngó mu muvu wa 1926 ndu 1933. O athu a dyelele kwila, o Liga das Nações, yeji bheka kutululuka. Maji o Utuminu wa Nzambi, wene ngó utena kubheka o kutululuka. Lelu we, o athu a dyelela kwila, o Nações Unidas (UN), atena kubheka wê o kutululuka.

• Ibatulu Dan. 8:23, 24

  Polofesya Sayi sobha wala ni pholo ya kiswéya “wa kà bhanga isunji ni kujibha o mundu.”

  Kikumbidilu O pontensya ya Anglo-Americana ya bheka kibwika kyadikota, a jibha athu avulu. Mu kifika, mu Ita ya Kayadi, o Estados Unidos abheka kijibha kya kisunji, nuka kya bhitile, kyoso kya takula o bomba atomika ku ixi yexile nguma ya Estados Unidos ni Bretanha.

• Ibatulu Dan. 11:31; Dij. 17:3, 7-11

  Polofesya O kyama “kya kusuka” kya kwinyi dya lumbinga kitunda mu dikungu ki dimoneka hole. O divulu dya Daniyele, ditumbula o sobha yiyi kala ‘kisunji ki bwikisa o mundu.’

  Kikumbidilu O kisangela kya Liga das Nações kyabhu mu kithangana kya Ita ya Kayadi ya bhiti ku Mundu Woso. Kyoso kya bhiti o ita o kisangela kya Nações Unidas kyene kya “bhinganesa-bhu.” Kala kya bhiti ni Ligas das Nações, o kisangela kya Nações Unidas, kyene mu tambula o fuma ya tokala ku Utuminu wa Nzambi. O Nações Unidas, ene anda bwikisa o jingeleja.

• Ibatulu 1 Tes. 5:3; Dij. 17:16

  Polofesya O ifuxi yanda bhanga o ngolokela ya kwila, “kwa batama, kwa tululuka,” o “kwinyi dya lumbinga” ni “kyama” a bwikisa o “kidya-nzunga.” Kyanda bhita o ima yiyi, o ifuxi yoso mu ngôngo a ibwika.

  Kikumbidilu O ifuxi yanda bhana o ngolokela ya kwila, asange o kutuluka ni kubatama ku mundu woso. Kyenyiki, o ifuxi yoso yene mu kwatekesa o kisangela kya Nações Unidas, anda bwika o jingeleja joso ja makutu. O kizulukutu kiki, kyene o dimatekenu dya hadi ya dikota. O hadi yiyi yanda bhwa kyoso Jezú kyanda bwika o mundu woso wa Satanaji, mu ita ya Alumajedone.

• Ibatulu Ize. 38:11, 14-17; Mat. 24:31

  Polofesya Ngongo ubanda ku ixi ya mundu wa Nzambi. Mu kusuluka, o ji anju ji bhongolola o ‘athu ósole.’

  Kikumbidilu O sobha ya thunda, kumoxi ni jinguvulu jamukwa ku mundu, anda kwiza phala ku bwika o mundu wa Nzambi. Ande dya kumateka o kibwika kiki, o Jikidistá a undu anda subhuka mu ixi, anda ku ambata ku dyulu.

• Ibatulu Ize. 38:18-23; Dan. 2:34, 35, 44, 45; Dij. 6:2; 16:14, 16; 17:14; 19:20

  Polofesya “O wa mondala” ku “kabalu kazele” uzubha o “kutolola,” mu kubwika Ngongo ni kilômbo kyê kya ita. O “kyama” anga a ki “takula . . . mu kizanga kya túbhya,” anga kumoneka ditadi di bwika o kiteka kyonéne.

  Kikumbidilu Jezú, o sobha ya Utuminu wa Nzambi, wanda kwiza phala kubhulula o mundu wa Nzambi. Jezú, o 144.000 a undu, kumoxi ni ji anju, anda bwika o ifuxi yoso ya mesene kubwika o mundu wa Nzambi. Kiki kyanda kala o disukilu dya mundu woso wa Satanaji.