1. Ihi ya zwela Jezú yalungu ni jimbongo ja dyulu?

SAYI mawujitu ki tu tena kwa mona. Mu kidi, o mawujitu a beta dingi kota yó ki tu tena kwa mona. Mu Diskulusu dya bhange ku Mulundu, Jezú wa tumbula mawujitu a dyulu a beta-kota o jimbote ndenge. Mu kusuluka, wa tumbula o kidi kiki: “Kwoso kwa ku kala jimbongo, kwene ku ku kala o muxima.” (Mat. 6:19-21) Se o kima tu kibhana valolo yavulu, twanda bhanga yoso phala kukala na-kyu. Etu tu bhaka “jimbongo mu dyulu” mu kubhanga dijina dyambote ni kukala ni wendelu wambote ku pholo dya Nzambi. Jezú wa jimbulula kwila, o mawujitu yá kajimuka, ka tena kwanyana.

2. (a) Kala kilondekesa 2 Kolindu 4:17, 18, Phawulu wa tu swinisa kulunga o mesu mu ihi? (b) Ihi i twanda mona mu milongo yiyi?

² Poxolo Phawulu wa tu swinisa phala ‘ki tu kale mu suwa o ima i moneka ku mesu.’ (Tanga 2 Kolindu 4:17, 18.) O ima ki imoneka ku mesu yalungu ni mabesá oso u twanda tambula ku mundu wobhe, wanda tu bhana Nzambi. Mu milongi yiyi, twanda dilonga ima iwana ki imoneka ku mesu, itena ku tu bhekela mbote, né mwene kindala kiki—o ukamba ni Nzambi, o ujitu wa kusamba, o kikwatekesu kya nzumbi ikôla ya Nzambi, ni kikwatekesu ki tu tambula kwa Jihova, kwa Jezú ni ku ji anju, phala ku kumbidila o ukunji wetu. Twanda mona we kyebhi ki tu tena kulondekesa o kisakidilu, mu mawujitu yá a katunda, ka moneka ku mesu.

3. Webhi o ujitu wa beta-kota ki umoneka ku mesu? Kiki kya bhiti kyebhi?

³ O ujitu wa beta-kota, ki umoneka ku mesu, o ukamba ni Jihova  Nzambi. (Jisá. 25:14) Nzambi utena kukala ni ukamba ni athu akwa ituxi, maji mwene usuluka mu kukala jinga muthu wazele mu mawukexilu oso. Kiki kibhita kyebhi? Kiki kibhita mukonda, o sata ya kukula ya Jezú i “katula o ituxi ya mundu” ku athu oso. (Nzwá 1:29) Jihova wejidile kyá kwila, o vondadi yê ya kubhulula o athu bhu kaxi ka Jezú, yeji dikumbidila sé kufula. Kiki kyene kya bhangesa o athu kukala ni ukamba ni Nzambi, né mwene ande dya Jezú kwiza ni ku fwa mu ngôngo.—Loma 3:25.

4. Bhana phangu ya athu exile makamba a Nzambi, ande dya Jezú kwiza mu ngôngo.

⁴ Tu tale phangu ya athu exile makamba a Nzambi, ande dya Jezú kwiza mu ngôngo. Mbalahamu wexile ni kixikanu kyakolo. Mu kubhita 1.000 ya mivu ndenge tunde kyafu Mbalahamu, Jihova wa mwixana “kamba dyami.” (Iza. 41:8) Kyenyiki-phe, tu tena kuzwela kwila, né mwene o kalunga ki ka tena kubatula o ukamba wa Jihova ni jiselevende jê. Mu kixinganeku kya Jihova, Mbalahamu wala hanji kumwenyu. (Luka 20:37, 38) O phangu ya mukwa ya Jobe. Kyoso ji anju kya dyongeka ku dyulu, Jihova wa zwela ni kidi kyoso kyalungu ni Jobe. Jihova wa mwixana “muthu wa kidi, wa yuka o muxima, u xila Nzambi, o ya ibha u i lenga.” (Jobe 1:6-8) Abha o yalungu ni Daniyele? Mwene wa sidivila Nzambi ni ufiyele woso mu 80 a mivu, mu ixi mwexile athu a bheza jinzambi jengi. Mu veji jitatu, ji anju ja mu dyelelesa kwila, mwene wexile ‘muthu a mu zolo kyavulu’ kwala Nzambi. (Dan. 9:23; 10:11, 19) Tu tena kudyelela kwila, Jihova wa mu kingila ni hanji yoso, o kizuwa kyanda fukununa o makamba mê a kazola, afu kyá.—Jobe 14:15.

5. Ihi yabhingi phala kukala ni ukamba ni Jihova?

⁵ Athu akuxi mu izwa ya lelu, ala ni ukamba wambote ni Jihova? Mazunda ni mazunda. Tu zwela kiki, mukonda ku mundu woso kwala mala avulu, ahatu avulu ni an’andenge, a mu londekesa bhu kaxi ka wendelu wâ, kwila, amesena kukala ni ukamba wambote ni Nzambi. Jihova ubhanga ukamba ni “athu oso ayuka [o] muxima.” (Jisa. 3:32) O athu atena kukala ni ukamba yú, mukonda dya kukala ni kixikanu mu sata ya kukula ya Jezú. Bhu kaxi ka sata yiyi, Jihova ni henda yoso, u twehela kudibhakula kwa mwene ni kudibatizala. Kyoso ki tu bhanga o ima yiyi, tu dibunda kumoxi ni mazunda a athu a dibhakula ya a dibatizala, mu ‘ukamba’ ni Muthu wa beta-kota, Jihova!

6. Kyebhi ki tu londekesa kwila, tu bhana valolo ku ujitu wa ukamba ni Nzambi?

⁶ Kyebhi ki tu londekesa kwila, tu bhana valolo ku ujitu wa ukamba ni Nzambi? Mbalahamu ni Jobe, a sidivila jinga Nzambi ni ufiyele woso mu hama ja mivu. Etu we twa tokala kukala jinga fiyele, kikale se twa mateka kusidivila Jihova ukulu mba kindala, ku mundu yu wayibha. Kala Daniyele, twa tokala kubhana dingi valolo ku ukamba wetu ni Jihova, o mwenyu wetu ndenge. (Dan. 6:7, 10, 16, 22) Ni kikwatekesu kya Jihova, tu tena kukolokota kabasa ibhidi i tu dibhana nayu. Ki kwala kima kyanda tena kubatula o ukamba wetu ni mwene.—Fil. 4:13.

7. (a) Kala kilondekesa Jisabhu 15:8, kyebhi Jihova kya mona o misambu yetu? (b) Jihova u tambwijila kyebhi o misambu yetu?

⁷ O ujitu wakamukwa ki umoneka ku mesu, o kusamba. O makamba adizolo, a wabhela kuzwela mudyâ, kuditangela o ixinganeku ni kyebhi kya mu divwa. O kwila kyene kimoxi ni ukamba wetu ni Jihova? Kyene mwene! Jihova uzwela n’etu bhu kaxi ka Mak’â mê, o Bibidya. Yene ijingununa o ixinganeku yê, ni kyebhi kya divwa. Bhu kaxi ka musambu, tu tena kuzwela nê, ni ku mu tangela o ixinganeku  yetu ni kyebhi ki twa mu divwa ku muxima. Jihova wa wabhela kyavulu kwívwa o misambu yetu. (Tanga Jisabhu 15:8.) Kala Dikamba dya kazola, Jihova k’evu ngó o misambu yetu, kana, maji u itambwijila we. Sayi ithangana u tambwijila o misambu yetu sé kulaleka. Mu ithangana yamukwa, kubhinga kusamba mu veji javulu, yalungu ni maka a moxi. Né kiki, tu tena kudyelela kwila, o itambwijilu ya misambu yetu, yanda bhixila mu kithangana kya tokala ni mu ukexilu wambote. Mu kidi, Nzambi utena kutambwijila o misambu yetu, mu ukexilu ki twa ufikile. Mu kifika, mu veji dya ku katula o kibhidi, mwene utena ku tu bhana o unjimu ni nguzu ‘phala tu tene kukolokota’.—1 Kol. 10:13.

8. Kyebhi ki tu londekesa o kisakidilu kyetu ku ujitu wa kusamba?

⁸ Kyebhi ki tu londekesa o kisakidilu kyetu ku ujitu wa kusamba? Ukexilu umoxi, o kutumaka o kitendelesu kya Jihova kyoso kyambe: “Sambenu sé kufula.” (1 Tes. 5:17) Jihova ka tu jijidika kusamba, kana. Mu veji dya kiki, mwene uxila o ufôlo wetu wa kusola. Jihova u tu swinisa: “Kolokotenu mu kusamba.” (Loma 12:12) Kyenyiki-phe, tu londekesa o kisakidilu ku ujitu yú, mu kusamba izuwa yoso. Mu kidi, ki twa tokala kujimba kusakidila ni kufumanesa Jihova mu misambu yetu.—Jisá. 145:2, 3.

9. O phange mu kifika kiki udivwa kyebhi mu kusamba? Eye kyebhi ki udivwa mu ujitu wa kusamba?

⁹ Kusidivila Jihova mu mivu yavulu, ni kumona kyebhi kyene mu tambwijila o misambu, ku tena ku bandekesa dingi o valolo i tu bhana ku ujitu wa kusamba. Tala o phangu ya phange Chris, wala mu sidivisu ya thembu yoso mu 47 a mivu. Mwene wambe: “Eme nga wabhela kyavulu kubalumuka mu kamene ka selu, phala kusamba kwa Jihova. Ki sangulukisa o muxima wami kusamba kwa Jihova, kyoso o dikumbi ki diya ni kubanda mu kamene, ima yoso ya fwama! Kiki ki ngi bhangesa kusakidila Jihova, mukonda dya mawujitu oso a ngi bhana, kala o ujitu wa kusamba. Mu usuku, ngi sanguluka kyavulu mu kusamba ni kuya mu zeka ni kitongolwelu kya zele.”

10. Mukonda dyahi twa tokala kubhana valolo ku ujitu wa nzumbi ikôla ya Nzambi?

¹⁰ O nzumbi ikôla ya Nzambi, ujitu wamukwa ki umoneka ku mesu. Jezú wa tu swinisa kubhinga o nzumbi ikôla bhu kaxi ka musambu. (Luka 11:9, 13) Bhu kaxi ka nzumbi yê ikôla, Jihova u tu bhana o kutena, katé mwene “o nguzu i lenda yoso.” (2 Kol. 4:7; Ika. 1:8) Ni kikwatekesu kya nzumbi ikôla ya Nzambi, etu tu tena kukolokota mu ibhidi yoso i tu dibhana nayu.

11. O nzumbi ikôla itena ku tu kwatekesa mu mawukexilu ebhi?

¹¹ O nzumbi ikôla, itena ku tu kwatekesa ku kumbidila o ikalakalu yetu mu sidivisu ya Nzambi. Itena kubandekesa o ufunu ni mawuhete u twala nawu. I tu kwatekesa we ku kumbidila kyambote o ikalakalu yetu ya Ukidistá, mu kilunga. Kyenyiki-phe, se twa ditundu kyambote, twa tokala kufumanesa Nzambi mu ku tu kwatekesa bhu kaxi ka nzumbi yê ikôla.

12. Kala kilondekesa o Jisálamu 139:23, 24, tu tena kubhinga o ki kwatekesu kya nzumbi ikôla phala kubhanga ihi?

¹² O ukexilu wa kamukwa wa kulondekesa o kisakidilu ku nzumbi ikôla ya Nzambi, o ku ibhinga mu musambu phala itene ku tu kwatekesa kutonginina o ixinganeku ni jihanji jayibha jala ku muxima wetu. (Tanga Jisálamu 139:23, 24.) Se tu bhanga kiki, bhu kaxi ka nzumbi yê ikôla, Jihova wanda ku tu dimuna se ixinganeku mba jihanji jayibha jimoneka mu kilunji kyetu. Se tu mona kwila twala ni ixinganeku mba jihanji jayibha, twa tokala kusamba mu kubhinga o nzumbi ikôla ya Nzambi, phala tu kale ni ngunzu ya kutolola o ixinganeku ni jihanji jiji. Se kyene ki tu bhanga, Jihova wanda mona kwila ki twa mesena kubhanga kima kyoso-kyoso ki mu fidisa ku tu kwatekesa bhu kaxi ka nzumbi yê ikôla.—Efe. 4:30.

13. Kyebhi ki tu tena kulondekesa o kisakidilu kyetu mu ujitu wa nzumbi ikôla?

¹³ Tu tena kulondekesa o kisakidilu kyetu mu ujitu wa nzumbi ikôla kyoso ki tu xinganeka mu ima yene mu bhanga mu izuwa  yetu. Ande dya kuya ku dyulu Jezú wambela maxibulu mê: “Enu-phe mwandu tambula kutena, ki anda kwiza nzumbi ikôla ku thandu dyenu. Mwa kà ngi kalela jimbangi, . . . katé ni ku maxokololo ma jixi.” (Ika. 1:8) O izwelu yiyi yene mu dikumbidila mu izuwa yetu. Ni kikwatekesu kya nzumbi ikôla 8.5 (nake dya mazunda ni kaxaxi) ndenge ya athu atokala ku mundu woso, a mu bheza Jihova. Ku mbandu yamukwa etu twala kya mu palayizu mu nzumbi. Ni kikwatekesu kya nzumbi ikôla, tu tena kukala ni idifwa yambote kala: O henda, kusanguluka, kutululuka, mwanyu, kubhanga mbote, ujitu, kixikanu, kubatama, kuditumina jihânji. O idifwa yiyi ya tokala ku “ibundu iyma o Nzumbi.” (Nga. 5:22, 23) Se phata o nzumbi ikôla ujitu wadikota!

14. Ananyi ene ku tu kwatekesa kyoso ki twa mu boka?

¹⁴ O ujitu wa mukwa ki tu tena kumona ni mesu o ‘kukalakala kumoxi’ ni Jihova, Jezú ni ji anju. (2 Kol. 6:1) Etu tu kukalakala ni ene kabasa kididi ki twa mu boka. Yalungu ni mwene ni akalakadi ni akwâ Phawulu wambe: ‘Etu twala tu jingunza, tu kalakala kumoxi ni Nzambi.’ (1 Kol. 3:9) Kyoso ki tu kalakala mu sidivisu ya kuboka, twa mu kalakala we kumoxi ni Jezú. Lembalala kuma kyoso mwene kya tumu o akayedi’ê “ndenu, mwa ka longe jixibulu ku akwa jixi joso,” Jezú wambe dingi: “Eme-mwène ngà kala ni enu.” (Mat. 28:19, 20) O yalungu ni ji anju? Etu twala ni dibesá dyadikota dya ku twendesa ku ji anju kyoso ki tu tula o “njimbu yambote, phala . . . athu oso a tungu mu ngongo.”—Dij. 14:6.

15. Bhana phangu ya Bibidya ilondekesa o kikwatekesu kya katunda ki tu bhana Jihova mu ukunji wetu.

¹⁵ Ni kikwatekesu kiki ki tunda ku dyulu, kikalakalu kyahi ki twene mu bhanga? Kyoso ki tu kuwa o njimbu ya Utuminu, sayi jimbutu ji tula mu mixima yambote anga jikula. (Mat. 13:18, 23) Nanyi ukudisa o jimbutu jiji ja kidi, anga jibhana ibundu? Jezú wa jimbulula kwila, sé-ku muthu ukituka mukayedi wê, “se Tata . . . u kamba ku mu sunga.” (Nzwá 6:44) Mu Bibidya mwala misoso ilondekesa o kidi kiki. Lembalala kyoso Phawulu kya bhana umbangi ku ahatu, kukanga dya mbonge ya Filipe. Tala izwela o Bibidya yalungu ni Lidiya, wexile bhu kaxi ka ahatu yâ: “Ngana wa mu jikula o muxima mu kutambulula o maka matange Phawulu.” (Ika. 16:13-15) Kala kya bhitile ni Lidiya, lelu, Jihova wene mu sunga mazunda a athu phala kwiza mu kilunga kyê.

16. Se tu ditunda kyambote mu kuboka, nanyi wa tokala kutambula o kijingu?

¹⁶ Se tu ditunda kyambote mu kuboka, nanyi wa tokala kutambula o kiximanu? Phawulu wa tambwijila o kibhwidisu kiki, kyoso kya sonekena o jiphange mu kilunga kya Kolindu: “Eme nga kunu o mbutu, Apolo wa i tekela, maji o wa i kudisa-phe Nzambi. Wila kiki, wa kunu ki kima, wa tekela ki kima, maji o wa kulu-phe Nzambi wa tena kukudisa.” (1 Kol. 3:6, 7) Kala kyabhangele Phawulu, kyoso ki tu ditunda kyambote mu ukunji wetu, twa tokala kubhana o fuma ni kijingu kwa Jihova.

17. Kyebhi ki tu tena londekesa kwila, tu bhana valolo ku ujitu wa ‘kukalakala kumoxi’ ni Jihova, Jezú ni ji anju?

¹⁷ Kyebhi ki tu tena londekesa kwila, tu bhana valolo ku ujitu wa ‘kukalakala kumoxi’ ni Jihova, Jezú ni ji anju? Tu tena kubhanga kiki, mu kusota kithangana phala kutula o njimbu yambote kwa akwetu. Kwala mawukexilu avulu akubhanga kiki, kala o kubhana o umbangi “bhu nangu dya mundu, ni ku mabhata, inzo ni inzo.” (Ika. 20:20) Avulu awabhela we kubhana o umbangi, kyoso ki kumoneka kithangana, né mwene se ka mu boka. Kyoso kya sanga muthu ka mwijiya, ene a mu menekena ni kisangusangu kyoso, anga a sota kuzwela-ku bhofele. Se o muthu utambwijila kyambote,  ene a mu tudila o njimbu ya Utuminu ni kilendu kyoso.

18-19. (a) Kyebhi ki twene mu kuna o jimbutu ja kidi? (b) Bhana phangu ilondekesa kyebhi Jihova kya kwatekesa dixibulu dya Bibidya.

¹⁸ Kuma tu ‘jingunza ja Nzambi’ etu ki tu kunu ngó, maji tu tekela we o jimbutu ji twa kunu. Kyoso ki tu sanga muthu wa mesena kwijiya dingi, tu bhanga yoso phala kuvutuka ku bhata dyê, ni kuzwela nê. Se ki tu tena, tu sota muthu wengi phala ku mu kunda, ni kumateka ku mu longa o Bibidya. Tu sanguluka kyavulu, kyoso ki tu mona Jihova wa mu kwatekesa o dixibulu dya Bibidya kulungulula o ixinganeku ni ukexilu wé wa ku divwa.

¹⁹ Tala ya bhiti ni Raphalalani, wexile kimbanda ku Africa do Sul. Mwene wazolele o ima yexile mu dilonga mu Bibidya. Maji mwene wa dibhana ni ibhidi yadikota, kyoso kya tange o milongi ya Bibidya yalungu ni kusota kuzwela ni athu afu kyá. (Mate. 18:10-12) Bhofele-bhofele, mwene wehela Jihova kulungulula o ixinganeku yê. Mukubhita kithangana, mwene wa xisa o umbanda, sumbala kwene kwexile mu tunda o mbolo yê ya kizuwa. Kindala Raphalalani wala ni 60 a mivu. Mwene wambe: “Ngi sakidila kyavulu o Jimbangi ja Jihova, mu ku ngi kwatekesa mu mawukexilu avulu, kala o kusanga salu yengi. O kya beta-kota, ngi sakidila Jihova mu ku ngi kwatekesa kulungulula o mwenyu wami, phala ngi tene kuboka ni kudibatizala kala Mbangi ya Jihova.”

20. Ihi i wa mesena kubhanga ni muxima woso?

²⁰ Mu milongi yiyi, twa dilongo mawujitu awana a tu bhana Nzambi, ki tu tena ku amona ni mesu. O Ujitu wa beta-kota, o kukala ni Ukamba wambote ni Mwene. O ukamba ni Nzambi, u tu kwatekesa kukatula mbote mu mawujitu amukwa, kala: O kusamba kwa mwene, kutambula o nzumbi yê ikôla, ni kutambula we o kikwatekesu kitunda kudyulu phala kukumbidila o ukunji wetu. Kyenyiki-phe, tu bhang’yenu yoso phala kubhana valolo ku mawujitu yâ ka moneka ku mesu. Ki tu fule we kusakidila Jihova, mukonda dya kukala Dikamba dyetu dya kazola.