1, 2. (a) Kyebhi kyene mu dívwa o jitata, kyoso o twana twâ kya mesena kwa batizala? (b) Mukonda dyahi o athu a mesena kwa batizala, a bhingi kudibhakula kwa Jihova? (Tala o foto ya dyanga.)

O JITATA ja Madiya, akexile mu mu tala bhu kaxi ka athu a-nda kwa batizala. O mulongexi wa bhange ibhwidisu iyadi. Madiya wa tambwijila ni dizwi dya swina. Mu ku suluka a mu batizala.

² O jitata ja Madiya ja sangulukile kyavulu, mu kwijiya kwila, wa bhakula o mwenyu wê kwa Jihova. Maji ande dya ku mu batizala, many’a Madiya wa kexile ni hele. Wa dibhudisa: ‘Mon’ami Madiya, kyeji kula-ku dingi ande dya ku mu batizala? Mwene wejiya kwila kubhakula o mwenyu kwa Jihova ki kima kya ku tonoka? O kwila wa bhingi ku kingila-ku dingi?’ Jitata ja henda a dibhanga o ibhwidisu yiyi, kyoso an’â kya mesena kwa batizala. (Ndongixi 5:5) Mu ima yoso yene ku mwenyu, o kima kya beta-o-kota, o kudibhakula kwa Jihova, ni ku  kubatizala.—Tala o kaxa “ O Kwila wa Dibhakula Kyá Kwa Jihova?”

3, 4. (a) Kyebhi poxolo Phetele kya tu longo kwila o batizu yala ni valolo ya dikota? (b) Mukonda dyahi Phetele wa sokesa o batizu ni kikalakalu kya Nowé, kya kutunga o alaka?

³ Phetele wa sokesa o batizu ni kikalakalu kya Nowé kya kutunga o alaka. Mwene wambe: ‘Kala o alaka ya Nowé o batizu’ i ‘tena ku mi bhulula.’ (Tanga 1 Phetele 3:20, 21.) O alaka ya kexile mu londekesa ku athu kwila, Nowé wa mesenene kubhanga o vondadi ya Nzambi ni muxima wê woso. Nowé wa bhange o kikalakalu kya mu bhana Jihova ni ufiyele woso. Mukonda dya kixikanu kyê, Jihova wa bhulula Nowé kumoxi ni mwiji wê ku menya a Dilúvyu. Ihi ya mesenene ku tu longa Phetele?

⁴ Mu kumona o alaka, o athu ejidile kwila, Nowé wa kexile ni kixikanu kwa Nzambi. Kyoso o athu kya mona muthu ku mu batizala, ene ejiya we kwila, wa bhakula o mwenyu wê kwa Nzambi, mukonda u xikina kwila Kidistu a mu fukununa. Kala Nowé, o athu a-nda kwa batizala a belesela, a bhanga o sidivisu i bhana Nzambi. Kala kya bhulula Nowé ku Dilúvyu dya bhiti, kyoso Jihova kya-nda bwikisa o mundu yú wayibha, mwene wa-nda bhulula we o jiselevende jê já fiyele a a batizala. (Marku 13:10; Dijingunuinu 7:9, 10) Mu kidi, o ku dibhakula kwa Jihova ni ku tu batizala kima kyala ni valolo ya dikota. Se muthu ka mu batizala, u tena ku texi o kidyelelu kya kutambula o mwenyu wa kalelaku.

5. Ibhwidisu yebhi i twa-nda tambwijila mu milongi yiyi?

⁵ Kuma twejiya kyá kwila o batizu yala ni valolo ya dikota, twa bhingi kwijiya o itambwijilu  ya ibhwidisu itatu: Ihi izwela o Bibidya ya lungu ni batizu? Ihi ya tokala kubhanga o muthu ande dya ku mu batizala? Mu kulonga o twana mba maxibulu, mukonda dyahi twa bhingi kwa lembalesa o valolo ya kwa batizala?

6, 7. (a) Ihi ya kexile mu lombolola o batizu ya Nzwá? (b) Batizu yebhi ki i difwile ni jibatizu ja athu a mukwa? Mukonda dyahi?

⁶ Nzwá dya Batizu mwene a dyanga ku mu tumbula mu Bibidya kwila wa batizala athu. (Matesu 3:1-6) Mukonda dyahi o athu akexile muya kwa mwene, phala kwa batizala? Ene akexile mu bhanga kiki phala kulondekesa kwila, a dyela o ituxi yâ. Kiki kilombolola kwila, ene a xikina ni muxima woso kwila, a bhukumukine o Kitumu kya bhanene Nzambi kwa Mozé, ya a dyela ni muxima woso. Maji o batizu ya beta-o-kota ya bhange Nzwá, yexile ni kilombolwelu kyéngi. Nzwá wa kexile ni ujitu wa dikota wa kubatizala Jezú, o Mona wa yuka wa Nzambi. (Matesu 3:13-17) Jezú ka tele kituxi. Ka bhingile kudyela. (1 Phetele 2:22) Mu kiki, mukonda dyahi Jezú a mu batizala? Phala kulondekesa kwila, wexile polondo phala kusidivila Nzambi ni mwenyu wê woso.—Jihebeleu 10:7.

⁷ Kyoso Jezú kya mateka kuboka, o maxibulu mê a mateka we kubatizala o athu. (Nzuá 3:22; 4:1, 2) Athu enyó a a batizala mukonda a dyela o ituxi yâ‚ ya kubhukumukina o Kitumu kya bhanene Nzambi kwa Mozé. Maji, kyoso Jezú kyafu ya a mu fukununa, o athu a mesenene kukala maxibulu mê, a tokalele kwa batizala mukonda dya kima kya mukwá.

8. (a) Kitendelesu kyebhi kya bhana Jezú, kyoso kya mu fukununa? (b) Mukonda dyahi o Jikidistá a tokala kwa batizala?

⁸ Kyoso Jezú kya mu fukununa ku muvu wa 33, mwene wa zwelela 500 a athu ndenge. Bhwa kexile we mala, ahatu, nange ni ana ndenge. Nange mu kithangana kyenyokyo, kyene kya tendelesa o maxibulu mê. Mwene wambe: “Enu-phe ndenu, mwa ka longe jixibulu ku akwa jixi joso, ni kwa batizala mu dijina dya Tata ni dya Mona, ni dya nzumbi Ikôla; ni kwa longa kwaluka o ima yoso kyá i nga mi tumu eme.” (Matesu 28:19, 20; 1 Kolindo 15:6) Jezú wa tendelesa o akayedy’ê kubhanga maxibulu. Woso wa mesena kukala dixibulu dyê, mba kwambata o “jungu,” wa tokala ku mu batizala. (Matesu 11:29, 30) Phala kusidivila Nzambi, mu ukexilu u Mu ximanesa, o muthu wa tokala kuxikina kwila, Nzambi u kumbidila o vondadi yê bhu kaxi ka Jezú. Kyenyiki, o muthu a tena ku mu batizala mu vondadi ya Nzambi. O Bibidya ilondekesa kwila, o maxibulu a dyanga a Jezú, ejidile kyambote o valolo ya kwa batizala. Ene ka banze kwila, a bhingile hanji kukingila phala kwa batizala.—Ikalakalu 2:41; 9:18; 16:14, 15, 32, 33.

9, 10. Ihi i tu tena kudilonga ku batizu ya diyala mukwa Etyópya ni ya Sawúlu?

⁹ Tanga Ikalakalu 8:35, 36. Say diyala mukwa Etyópya wa xikina o milongi ya Jijudé, kyoso kya kexile mu vutuka kubhata, mu kutunda mu bheza mu thembulu ku Jeluzaleme. O anju ya Jihova ya tumikisa Filipe phala ku mu bokela, Filipe anga u mu tangela o “Njimbu Yambote ya Jezú.” Kyebhi kya dívu o diyala mukwa Etyópya mu kwívwa o  njimbu? Mwene wa tendela o valolo ya kuxikina Jezú kala Ngana, anga wa mesenene kubhanga o ima yandala Jihova phala o Jikidistá. A mu batizala sé kulaleka.

¹⁰ O musoso wa mukwá, wa Sawúlu, diyala mukwá Judá. O kifuxi kyoso kya Judá kya di bhakwile kwa Nzambi, maji mukonda dya kubhukumuka kwâ, Jihova wa ditunu o kifuxi kioso. Sawúlu wa xikina kwila, o Jijudé akexile mu bheza Nzambi mu ukexilu wa tokala, mukonda dya kiki, mwene wa kexile mu zukutisa o Jikidistá. Sawúlu wa kexile mu banza kwila, Jezú ka mu fukununa. Maji say kizuwa Jezú wa mu tukulukila, wa zwela-nê. Kyebhi kya divu Sawúlu? Ni kusanguluka kwoso, mwene wa xikina o kikwatekesu kya dixibulu a mu ixanene Ananiya. O Bibidya izwela: ‘Mwene u balumuka, anga a mu batizala.’ (Ikalakalu 9:17, 18; Ngalásia 1:14) Mu kubhita thembu Sawúlu a mateka ku mu ixana poxolo Phaulu. Tua mono kwila, kyoso kya tendela kwila Nzambi wa kexile mu kumbidila o vondadi yê bhu kaxi ka Jezú, Sawúlu wa xikina ku mu batizala ni lusolo.—Tanga Ikalakalu 22:12-16.

11. (a) Ihi i bhangesa o maxibulu a Bibidia kusola kwa batizala? (b) Kyebhi ki tu divwa kyoso muthu kya mu batizala?

¹¹ Kiki kyene mu bhita we ni maxibulu avulu a Bibidya, kikale minzangala kikale adyakimi. Kuma ene a zolo anga a dyelela mu milongi yala mu Bibidya, ene a kala ni vondadi ya kudibhakula kwa Jihova ni kwa batizala. Mu kidi, o diskursu dya batizu mbandu ya beta-o-kota ya yônge yetu ya makota. O Jimbangi ja Jihova, a sanguluka kyavulu kyoso o maxibulu a Bibidya, a xikina o kidi anga a sola kwa batizala. O jitata a sanguluka we kyavulu kyoso o twana kya sola kwa batizala. Ku muvu wa sidivisu wa 2017, a batizala 284.000 a athu ndenge, phala kulondekesa kwila a bhakula, o myenyu yâ kwa Jihova. (Ikalakalu 13:48) Sé phata, ene a tendela kuma, o batizu kima kya beta-o-kota phala o Jikidistá ja Kidi. Maji, ihi ya bhange ande dya kwa batizala?

12. Ihi ya tokala kubhanga o dixibulu dya Bibidya ande dya ku mu batizala?

¹² Muthu ande dya ku mu batizala wa bhingi kudilonga o kidi kya lungu ni Nzambi, o vondadi yê phala o athu ni ixi, ni ihi ya bhange mwene phala kubhulula o athu. (1 Timote 2:3-6) Mu kusuluka, a tokala kulondekesa kixikanu kya-nda kwa kwatekesa kubelesela o itumu ya Nzambi ni kweha o ima ya zembe Mwene. (Ikalakalu 3:19) Kima kyambote kubhanga kiki, mukonda Jihova ka-nda xikina o kudibhakula kwa muthu u bhanga ima ya zembe Mwene. (1 Kolindo 6:9, 10) Maji ki kyene ngó. O athu a mesena kudibhakula kwa Jihova, a tokala kuya mu yônge semana joso, ni kuboka o njimbu yambote ni kuswina kwoso. Kyene kya tokala kubhanga o muthu wa mesena kukayela Kidistu.  (Ikalakalu 1:8) Kya dyanga o dixibulu wa tokala kubhanga o ima yiyi. Mu kusuluka mwene u tena kubhakula o mwenyu wê kwa Jihova bhu kaxi ka musambu, anga a mu batizala.

13. Mukonda dyahi twa tokala kulembalala kwila, o athu u twa mu longa o Bibidya a tokala kwa batizala phala kukituka Jikidistá ja kidi?

¹³ Kyoso ki tu kwatekesa o twana twetu ni maxibulu amukwá kubhanga o kima kya tokala, twa tokala kulembalala kwila, oso a mesena kukayela Jezú, a tokala kwa batizala. Mu kiki, ki tu kale ni hele ya kwa tangela yoso ya bhingi kubhanga phala kwa batizala mu kithangana kya tokala. O kima ki twamesena, o ku kwatekesa o twana ni maxibulu metu ku kula katé kya-nda ku a batizala!

14. Mukonda dyahi ki twa tokala kujijidika o athu kwa batizala?

¹⁴ Maji, ki twa tokala ku jijila mona mba dixibulu dyetu phala ku mu batizala. Jihova kene mu jijidika muthu phala ku mu sidivila. (1 Nzuá 4:8) Kyoso ki tu longa akwetu, twa tokala kwa kwatekesa ku tendela o mbote ya kukala ni ukamba ni Jihova. Se dixibulu dya Bibidya wa sanguluka mwene mu kwijyia o kidi kya lungu ni Nzambi, hé ukala ni hanji ya kubhanga yoso ya tokala kubhanga o jikidistá ja kidi, wa-nda mesena kwila a mu batizala.—2 Kolindo 5:14, 15.

15, 16. (a) O kwila say kitala phala kubatizala muthu? Jimbulula (b) Mukonda dyahi kubhinga ku tu batizala kala Mbangi ya Jihova, né mwene se a tu batizala kyá mu ngeleja yengi?

¹⁵ Sé-ku kitala kyo xinde phala kubatizala muthu. Athu ka-difu mu maukexilu avulu, say maxibulu a kula dingi lusolo, amukwá  ndenge. Say yá a a batizala mu kitala kya kikumbi, a kala fiyele kwa Jihova katé mu ukukilu wâ. Amukwá a dilonga o kidi kya Bibidya mu ukukilu wâ, hé a a batizala. Amukwâ a tenesa kyá 100 (hama) ya mivu!

¹⁶ Say mwadyakimi wa muhatu a mu batizala kyá mu jingeleja jengi, wa dilongo o Bibidya. Mwene webhwidisa phange wa kexile mu mu longa o Bibidya, se wa bhingile dingi ku mu batizala. Mwene wa mu londekesa jivelusu mu Bibidya, ja tambwijila o kibhwidisu kyê. Kyoso mwene kya tendela yoso i longa o Bibidya, a mu batizala, sumbala wakexile kyá ni 80 (makwinyi a nake) a mivu. Ihi i tu dilonga mu kifika kiki? Jihova u xikina ngó o batizu yetu se twejiya o kidi kya lungu ni vondadi yê. Mu kiki-phe, né mwene se a tu batizala kyá mu ngeleja yengi, phala kukala Mbangi ya Jihova, kubhinga ku tu batizala dingi.—Tanga Ikalakalu 19:3-5.

17. Ihi ya tokala kubanza o muthu mu kizuwa kya-nda mu batizala?

¹⁷ O kizuwa kya batizu, kizuwa kya kusanguluka. Kithangana we kya kuxinganeka mu kilombolwelu kya kudibhakula kwetu ni batizu. Phala kukumbidila o itumu yoso ya Jihova, kubhinga nguzu. O maxibulu a Jezú a bhingi kukumbidila o kitendelesu kiki: “Oso kiki ala ku mwenyu, ki ki kale ene dingi a di vu, maji wa a vu mwène wa a fwidile bhu kididi, yú wa fukunuka.”—2 Kolindo 5:15; Matesu 16:24.

18. Ibhwidisu yebhi i twa-nda tambwijila mu milongi ya kayela?

¹⁸ Kála ki twa dilongo mu milongi yiyi, o kusola kukala Kidistá, maka a dikota. Mu kiki-phe, many’a Madiya wa di bhange o ibhwidisu i twa mono mu dimatekenu dya milongi yiyi. Se u tata, nange kizuwa wa dibhwidisa kyá: ‘O kwila mon’ami wala polondo phala ku mu batizala? O kwila mwene wala kyá ni kwijiya kwa soko kwa lungu ni Jihova phala kudibhakula kwa Nzambi? O kwila wa bhingi hanji kudilonga kyavulu mu xikola, kukala ni salu yambote, kyene kiwa kya mu batizala? Abha se kya mu batizala u ta kituxi kya dikota?’ Twa-nda tambwijila o ibhwidisu yiyi mu milongi ya kayela, ni kumona kyebhi o jitata Jikidistá kya tena kukala ni ibanzelu yambote ya lungu ni batizu.