1. Ihi ya tokala kwijiya o jitata Jikidistá ande dya kubatizala o twana twâ?

PHANGE ya muhatu a mwixana Blossom Brandt, wa jimbulula ya bhiti kyoso kya zwela ni jitata jê yalungu ni batizu. Mwene wambe: “Mu jimbeji javulu nga kwamesa Papá ni Mamá kwila nga mesena a ngi batizala kyá. Maji ene a mesenene kwijiya se nga tendela kyá kwila batizu ki kima kya kutonoka. Mu kizuwa kya 31, mu mbeji ya kayadi, ku muvu wa 1934, kithangana ki nga kexile mu kingila ni hanji yavulu kya bhixila, a ngi batizala.” Lelu we, o jitata a mesena kukwatekesa o twana kusola ni unjimu. Se o mona u kingila ngó se ku mu tangela kyambote mukonda dyahi, kiki kitena kuzanga o ukamba wa mona ni Jihova. (Tiyaku 4:17) Ande dya kwa batizala, o jitata ja dimuka a mesena kwijiya se o twana twâ ala kya mu kitala kyá kukala maxibulu a Kidistu.

2. (a) Maka ebhi ene mu mona o tufunga twa ilunga? (b) Ihi i twa-nda dilonga mu milongi yiyi?

 ² Say tufunga twa ilunga a mono kwila, minzangala yavulu ala mu kitala kya kikumbi ndu 20 a mivu, ka a batizala luwa, né mwene a kudila mu kilunga. Veji javulu, aya mwene mu yônge, mu sidivisu ya kuboka, a divua kala Jimbangi ja Jihova. Né kiki, ka dibhakula luwa kwa Jihova ni kwa batizala. Nange mukonda o jitata a banza kwila ene ana ndenge hanji, kala luwa mu kitala kya kwa batizala. Mu milongi yiyi, twa-nda zwela ima iwana yene mu fidisa o jitata kuswinisa o twana twâ phala kwa batizala.

3. O jitata ja Blossom ja thandanganyele ni ihi?

³ O jitata ja Blossom, twa mu tumbula mu kaxi ka dyanga, a thandanganyele, a mesenene kwijiya se o mona wexile kyá mu kitala kya ku mu batizala ni kumona o valolo ya kukala Mbangi ya Jihova. Kyebhi o jitata kya tena kwijiya se o ana ala kyá polondo phala kwa batizala?

4. Kyebhi o kitendelesu kya Jezú mu divulu dya Matesu 28:19, 20 ki kwatekesa o jitata?

⁴ Tanga Matesu 28:19, 20. O Bibidya ki izwela o kitala kya kubatizala muthu. Maji, o jitata a bhingi kuxinganeka kyambote o kilombolwelu kya kitendelesu kya kubhanga maxibulu. Mu dimi dya Ngeleku, o kizwelu ‘kubhanga maxibulu,’ kilombolola kulonga muthu ni disukilu dya ku mu kwatekesa kukituka dixibulu. Jivelusu ja mukwá mu kibatulu kiki jilondekesa kwila, o dixibulu muthu u dilonga, u tendela we o ima ya longo Jezú, yú wa mesena ku mu belesela. Mu kiki, tundé kya vwala, o jitata a bhingi kulonga o twana phala kwa kwatekesa kudibhakula kwa Jihova n’a kituka maxibulu a Kidistu. Mu kidi, tubwetele ka tena kwa batizala. Maji, o Bibidya ilondekesa kwila, katé o tu minzangala a tena kutendela ni kuzola o kidi kya Bibidya.

5, 6. (a) O ima izwela o Bibidya ya lungu ni Timote i tu londekesa ihi ya lungu ni batizu yê? (b) Kyebhi o jitata jilondekesa unjimu a tena kukwatekesa o twana?

⁵ O dixibulu Timote wa solo kusidivila Jihova, mu undenge wê. Poxolo Phaulu wambe kwila, Timote wa mateka kudilonga o kidi kya Mak’â Nzambi “tundé undenge.” O tata ya Timote kexile mubhezi wa Jihova, maji many’â ni kuku’ê a mu kwatekesa kuzola o Mak’â Nzambi. Mu kiki, mwene wa kexile ni kixikanu kya kolo. (2 Timote 1:5; 3:14, 15) Nange, kya tenesa 20 a mivu, wexile kyá polondo phala kutambula ikalakalu ya katunda mu kilunga.—Ikalakalu 16:1-3.

⁶ Kala mona wala ni kibhindamu kyê. O ana ka kulu mu nzumbi mu ukexilu umoxi. Say yá a tendela o milongi ya Bibidya, a sola kyambote o ima ku mwenyu, a mesena ku a batizala, mu unzangala wâ. Amukwá ka kala luwa polondo, né mwene se ala kyá ni kitala kya soko. O jitata alondekesa unjimu mu kudituna kwa jijidika phala ku a batizala. Mu veji dya kiki, ene a kwatekesa kala mona ku kula mu kithangana kyê mwene. O jitata a sanguluka kyoso o twana kya kumbidila Jisabhu 27:11. (Tanga) Maji ene a bhingi kulembalala o kikalakalu kyâ, kya kukwatekesa o ana kukituka maxibulu  a Kidistu. Mu kwijiya o maka enyá, a tokala kudibhwidisa: ‘O kwila mon’ami wala ni kwijiya kwa soko phala ku mu batizala?’

7. O kwila o muthu wa bhingi kwijiya o milongi yoso ya Bibidya phala ku mu batizala? Jimbulula.

⁷ O jitata a longa o twana, a mwa kwatekesa kwijiya kyambote o milongi ya Bibidya. O kwijiya kwa-nda bhangesa o twana kudibhakula kwa Nzambi. Maji kiki, ki kilombolola kwila, o mona wa bhingi kwijiya o milongi yoso ya Bibidya, kyene kiwa kya mu batizala. Maxibulu oso a Jezú, aya hanji ni kudilonga, né mwene se a a batizala kyá. (Tanga Kolose 1:9, 10.) Maji-phe, muthu wa bhingi kudilonga katé bhebhi ande dya ku mu batizala?

8, 9. Ihi ya bhiti ni kasalelu mu mbanza ya Filipe, ni ihi i tu tena kudilonga ku phangu yê?

⁸ Say musoso wa mwiji u tena kukwatekesa o jitata mu izuwa ya lelu. (Ikalakalu 16:25-33) Ku muvu wa 50, Phawlu wayi ku mbonge ya Filipe, mu njila yê ya kayadi kala mukunji wa jixi. Kya bhixila, mwene ni Sila a a tatela umbangi wa makutu, a a kase, a a takula mu kaleya. Mu usuku, kwa bhiti kitungutu kya jikula o mabhitu oso a kaleya. O kasalelu wa fika kwila jipelezu joso ja lengele, yú wa mesenene ku dijibha. Maji Phawlu wa mu fidisa. Mu kusuluka, Phawlu ni Sila a longo o kidi kya lungu ni Jezú kwa kasalelu ni mwiji wê. Ene a xikina o ima ya dilongo ya lungu ni Jezú, ya tonginina kwila kima kya valolo ku mu belesela. Kyenyiki a a batizala. Ihi i tu longa o musoso yú?

⁹ Nange o kasalelu m’ukulu wexile disoladi mukwá Loma. Kejidile o Mak’â Nzambi. Phala kukituka Kidistá, wa bhingile kudilonga o kidi kya Bibidya, kutendela ya mesena Jihova ku jiselevende jê, ni kubelesela o milongi ya Jezú. O milongi ya tambula mu kithangana kyofele, ya mu bhangesa kumesena ku mu batizala. Mu kidi mwene wa suluka hanji ni kudilonga, né mwene kya mu batizala. Mu kiki-phe, ihi i wa tokala kubhanga, se mon’é wa zolo Jihova, wa mesena kyá ku mu batizala? U mwehela kuzwela ni tufunga, ene a-nda mona se a tena ku mu batizala. * (Tala ku lwiji.) Ene a-nda suluka ni kudilonga dingi yalungu ni Jihova ku mwenyu wâ woso, kala ki bhanga o Jikidistá joso.—Loma 11:33, 34.

10, 11. (a) Kyebhi kyene mu banza jitata javulu? (b) Ihi i tena kulanga o mona?

¹⁰ Say jitata a banza kwila, kima kyambote se o twana twâ a a batizala ngó kyoso  kya-nda zubha o xikola ya katunda ni kya-nda kala ni salu yambote. O jitata a banza kiki, nange a mesena o mbote ya twana twâ, maji ene a bhingi kudibhwidisa: ‘O kwila kubhanga kiki kwa-nda mu kwatekesa mwene? Kyene ki longa o Bibidya? Ihi ia mesena Jihova kokwetu?’—Tanga Ndongixi 12:1.

¹¹ Kima kyambote kulembalala kwila, o ngongo yiyi ni ima yala-mu, ki i lungu ni ima ya mesena Jihova kokwetu. (Tiiaku 4:7, 8; 1 Nzuá 2:15-17; 5:19) Kukala ni ukamba uambote ni Jihova, kyene o kima kya beta-o-kota ki tena kulanga mon’é kwa Satanaji, kwa ngongo yiyi, ni funza yê. Se jitata a ta ku pholo o xikola ni salu yambote ku mwenhu, kifwa a mu tangela o mona kwila, ima yiyi yala dingi ni valolo, o ukamba wambote ni Jihova ndenge. Kiki kilwezu kya dikota. Enu mu jitata ja henda, o kwila mwa mesena mwene kwila o ngongo yiyi yene i longa an’enu? Ku ta Jihova ku pholo ku mwenyu wetu, kyene ngó o kima ki tena ku tu zediwisa.—Tanga Jisálamu 1:2, 3.

12. Mukonda dyahi say jitata a banza kwila, kota se o twana twâ tu kula-ku dingi ande dia kwa batizala?

¹² Say mama ya jimbulula mukonda dyahi ka mesenene kwila mon’ê a mu batizala kyá. Mwene wambe: “Sonhi ja ngi te, maji ngi ki zwela. Ngexile ni hele mukonda, mu kilunga kya Jihova o athu a ta kituxi sé ka dyela, a a kaya.” Kala o phange yú, say jitata a divwa kwila, kota se o mon’a u kula-ku dingi, phala mungu ka te kituxi. (Dimatekenu 8:21; Jisabhu 22:15) Nange o jitata a xinganeka kiki, mukonda muthu ka mu batizala luwa ka tena ku mu kaya mu kilunga. Maji mukonda dyahi kuxinganeka kiki kilwezu?—Tiiaku 1:22.

13. Se muthu ka mu batizala luwa, o kwila kiki kilombolola kuma, mwene ka bhingi kubhakula jikonda kwa Jihova? Jimbulula.

¹³ Sé-ku tata wa mesena kwila mon’ê a mu  batizala ande dya kukala polondo phala kudibhakula kwa Jihova. Maji, kima kyaybha kubanza kwila, o mon’a se ka mu batizala luwa ka bhingi kubhakula jikonda kwa Jihova. Ku mesu ma Jihova, o mona-ndenge, kabasa wejiya kyawabha ni kyayibha, u bhakula kyá jikonda kwa Nzambi. (Tanga Tiiaku 4:17.) Jitata ja unjimu, ka fidisa o twana twâ kwa batizala. A a longa kuzola ya zolo Jihova, ni kuzemba ya zembe Mwene, tundé undenge, kala kya bhanga ene. (Luka 6:40) O henda ya mon’ê kwa Jihova, ya-nda mu langa phala ka te kituxi kya dikota, mukonda mwene wa-nda mesena kubhanga yandala Jihova.—Izaia 35:8.

14. Kyebhi o tufunga kya tena kukwatekesa o jitata?

¹⁴ O tufunga a tena kukwatekesa o jitata, mu kuzwela mu ukexilu wambote o jimbambe ji tu xinda mu sidivisu ya Jihova. Say phange ya muhatu u lembalala kwila, o Phange Russell wa zwela nê kyoso kyexile ni mivu isamanu. Mwene wambe: “Mu 15 kya ithangana, Phange Russell wa zwela n’eme ya lungu ni jimbambe jami.” Ihi ya bhiti? Mu kubhita mivu, mwene wa kituka muboki wa thembu yoso, wa kalakala mu sidivisu yiyi mu 70 a mivu ndenge! Sé phata, o kuswinisa akwetu kutena kwa kwatekesa ku myenyu yâ yoso. (Jisabhu 25:11) O tufunga a tena we kwixana o jitata ni ana ndenge phala kukwatekesa kusokejeka ni kuyudika o ima mu Kididi kya Ubhezelu. Ene a tena kwa bhinga phala kubhanga o ima ya soko ni nguzu yâ.

15. Kyebhi o jiphange ja mukwá mu kilunga a tena kukwatekesa o minzangala?

¹⁵ Kyebhi o jiphange ja mukwá ji tena kukwatekesa? Bhu kaxi ka kulondekesa o henda ku minzangala mu ukexilu wa tokala. Mu kifika, eye u tena kusota kima  kilondekesa kwila o minzangala ala ni ukamba wambote ni Jihova. O kwila say kambonga ka tambwijila kyambote mu kyônge, mba wa bhange mbandu yambote? Wa bhana umbangi mu xikola, mba wa londekesa ufiyele kyoso kya mu tendala? Se wa mono kiki, sota ku mu ximana! Tu tena kusuwa o mbambe ya kuzwela ni minzangala ande dya kyônge ni ku disukilu. Kyoso ki tu bhanga kiki, o tu minzangala a-nda dívwa kwila, a bhanga mbandu ya ‘kilunga kya dikota.’—Jisálamu 35:18.

16, 17. (a) Mukonda dyahi o twana twa bhingi kukala polondo phala kwa batizala? (b) Kisangusangu kyebhi ki tena kukala na-kyu o jitata? (Tala o foto ya dyanga.)

¹⁶ Ujitu wonene wala naw o jitata, o kulonga o twana twâ kuzola Jihova. (Jisálamu 127:3; Efezo 6:4) Mu Izalayele yokulu, an’a mu kwa vwala, kifwa a dibhakwile kya kwa Jihova. Maji an’etu kana. O an’a ka tena kuzola Jihova ni kilunga kyê, mu kukayela ngó o jitata. Tundé mu uvwalelu, o jitata a tokala kuta ku muxima o mbambe ya kukwatekesa o mona kukituka dixibulu, kudibhakula kwa Nzambi ni kwa batizala. Kiki kyene o kima kya beta-o-kota. O kudibhakula, o batizu ni kusidivila Jihova ni ufiyele woso, kwene kwa-nda kwatekesa mon’é ku bhuluka mu hadi ya dikota.—Matesu 24:13.

¹⁷ Kyoso o phange Blossom Brandt kya mesenene ku mu batizala, o jitata jê ja mesenene kukatula o phata yoso, se wexile mwene polondo. Kya mono kwila kidi mwene, a mu kwatekesa. Blossom wa jimbulula ya bhange tat’ê m’usuku ande dya ku mu batizala: “Ua tu fukamesa, yú wa sambe. Mwene wambela Jihova kwila, wa sangulukile kyavulu mukonda kasule-kê wa solo kubhakula o mwenyu wê kwa Mwene.” Kwa bhiti kya 60 a mivu, maji phange Blossom wambe: “Ku kale ni phata, eme nuka nga-nda jimba o usuku yó!” Enu mu jitata, mu tena we kukala ni kisangusangu ni kukemba, mu kumona an’enu a dibhakula, a batizala kala ji selevende ja Jihova.