1. Ihi izwela o Bibidya ya lungu ni kubazela?

IHI i u banza kyoso wivwa o kizwelu “kubazela”? Athu avulu a banza kwila kya lungu ni kaxtiku. Maji ki kyene ngó. O Bibidya yamba kwila, o kibazelu ki tu bhekela mbote. Say bhabha a ki sokesa ni kwijiya, unjimu ni mwenyu. (Jisabhu 1:2-7; 4:11-13) Kiki ki bhita mukonda, ku tu bazela kwa Nzambi, kilondekesu kya henda yê kokwetu, ni kwila wa mesena tu kala ni mwenyu wa kalelaku. (Jihebeleu 12:6) Sumbala say ithangana Nzambi mu ku tu bazela u tu kaxtikala, maji né kiki, mwene ka tu bazela ni usweya mba undanda. Mu kidi, o kilombolwelu kya beta-o-kota kya kizwelu “kubazela” kya lungu ni kulonga, kala o milongi yene mu bhana o jitata ja henda ku twana twâ.

2, 3. Kyebhi o kulonga ni kukaxtikala kwa lungu ni kubazela? (Tala o foto ya dyanga.)

² Xinganeka mu kifika kiki. Kana ka diyala wa mu jokala bola m’onzo. Many’â u mu tangela, wixi: “Nzwá, eye wejiya kwila, ku tokala kujokala bhabha! Wa-nda zanga kima.” Maji mwene ka mu bhana mátwi, u suluka ni kujokala. O bola anga i bula o  vazu! Ihi ya-nda bhanga many’a Nzwa phala ku mu longa? Mwene wa mu tangele kyá kwila, wexile mu bhanga kima kyayibha. O mama wa mesena kwila, mwene wijiya, o mbote ijila mu kubelesela o jitata ni kumona kwila, kima kyambote o kutumaka o ijila yâ. Phala kukwatekesa Nzwá, mwene u mona kwila, wa bhingi ku mu kaxtikala mu ku mu tambula o bola. Nzwá ka ki wabhela, maji kiki ki mu lembalesa kwila, se mwene u xibhaka o jitata jê, wa-nda dibhana ni ibhidi.

³ Kuma tu Jikidistá, tu bhanga mbandu ya inzo ya Nzambi. (1 Timote 3:15) Tat’etu, Jihova, mwéne ngó wala ni ungana wa ku tu tangela ima ya wabha ni yayibha. Kyoso ki tu xibhaka o itumu yê, mwene u tu bazela. Se twa mu dibhana ni ibhidi mukonda dya kima ki twa bhange, o kibazelu kya henda kya Jihova, ki tena ku tu lembalesa kwila, kima kyambote kubelesela. (Ngalásia 6:7) Nzambi wa tu zolo kyavulu, mwene ka mesena kwila tu bhita mu jiphaxi.—1 Phetele 5:6, 7.

4. (a) Jihova wa mesena kwila tu longa kyebhi akwetu? (b) Ihi i twa-nda dilonga mu milongi yiyi?

⁴ Kyoso ki tu bazela o mona ndenge mba dixibulu bhu kaxi ka Bibidya, tu tena ku mu kwatekesa kukituka mukayedi wa Kidistu. Tu tanga o Bibidya phala kukwatekesa o maxibulu kwijiya o ima ya tokala kubhanga ni kwa kwatekesa kutendela ni ‘kwaluka o ima yoso ya tu longo Jezú.’ (Matesu 28:19, 20; 2 Timote 3:16) Jihova wa mesena ku a longa mu ukexilu yú, phala kukwatekesa we akwa kukala akayedi a Kidistu. (Tanga Tito 2:11-14.) Twa-nda dilonga ibhwidisu itatu: (1) Kyebhi o kibazelu kya Nzambi kilondekesu kya henda yê kokwetu? (2) Ihi i tu tena kudilonga ku phangu ya athu a a bazela kwa Nzambi? (3) Kyebhi ki tu tena kukayela o phangu ya Jihova ni ya Mon’ê, kyoso ki twa mu bazela?

5. Kyebhi o kibazelu kya Jihova ki londekesa kwila, mwene wa tu zolo?

⁵ Jihova u bazela o itondalu yetu, u tu ijidisa o ifwa yambote, u tu longa, mukonda wa tu zolo. Mwene wa mesena kwila, tu kala ni ukamba wambote ni mwene, phala tu tambule o mwenyu wa kalelaku. (1 Nzuá 4:16) Mwene ka tu xongwena mba u tu bhangesa kudivwa kwila ki twala ni valolo. (Jisabhu 12:18) Mu veji dya kiki, Jihova u mona o idifwa yetu yambote, anga u tu bhana o ufolo wa kusola. U tena kumona kwila, o kibazelu ki tu tambula bhu kaxi ka Bibidya, madivulu, jitata jetu ni tufunga kilondekesa o henda ya tu kwatela Jihova? Mu kidi, kyoso o tufunga kya tu bhana itendelesu ni henda yoso, né mwene se ki tu mono luwa o kima kyaybha ki twa bhange, ene a londekesa kwila, a mu kayela o phangu ya henda ya Jihova.

6. Kyebhi o kubazela kulondekesa o henda ya Nzambi né mwene se muthu a mu katula mawjitu mu kilunga?

 ⁶ Say bhabha, ka tu bazela ngó bhu kaxi ka itendelesu. Se muthu u ta kituxi kya dikota, mwene ka fwama dingi phala kukala ni mawjitu mu kilunga. Né mwene se kiki ki bhita, o kibazelu kilondekesa kwila Nzambi wa mu zolo. Mu kifika, kiki ki tena ku mu kwatekesa kumona kwila, kima kyambote kudilonga dingi o Bibidya, kuxinganeka mu milongi, ni kusamba. Kubhanga kiki, kutena kukolesa dingi o ukamba wê ni Jihova. (Jisálamu 19:7) Mu kubhita kithangana, nange mwene u tena kutambula dingi o mawjitu mê. Né mwene kyoso muthu kya mu kaya mu kilunga, kilondekesu kya henda ya Jihova, mukonda kiki ki sidivila phala kulanga o kilunga, phala ka ki fwinyise. (1 Kolindo 5:6, 7, 11) Kuma o kibazelu kya Nzambi kya yuka, kubhanga kiki, kukwatekesa o muthu a mu kaye, kutendela kwila wa te kituxi kya dikota. Kiki, ki tena ku mu bhangesa kudyela o kituxi kyê.—Ikalakalu 3:19.

7. Nanyi wexile Sebena? Kidifwa kyebhi kyayibha kya kexile na-kyu?

⁷ Phala ku tendela o mbote ya kibazelu, twa-nda dilonga phangu jiyadi ja athu a bhingile kwa bazela kwa Jihova. Ya dyanga Sebena, mukwa Izalayele wa tungile mu thembu ya Sobha Ezekiya. Ya kayadi Graham, phange yetu mu izuwa ya lelu. Sebena wexile “kimbadi” kya inzo ya Sobha Ezekiya, wexile ni kutena kwavulu. (Izaia 22:15) Maji Sebena wa kituka mukwa ukumbu, wa kexile mu di zangeleka kwila, mwene wa beta-o-kota, akwa ndenge. Katé wa di sotela kididi kya fuma phala ku mu fundila-ku, wa di bhangela we ‘makalu a katunda.’—Izaia 22:16-18.

8. Kyebhi Jihova kya kwatekesa Sebena? Ihi ya bhange mwene?

⁸ Mukonda dya ku mesena ku di fumanesa, Nzambi wa bhana o kikalakalu kyê kwa Elyakime. (Izaia 22:19-21) Ima yiyi ya bhiti kyoso Sobha Senakedibe mukwa Asidya, kyeza  phala kubwikisa Jeluzaleme. Mu ku suluka, Senakedibe wa tumikisa isengele yê ni kifuxi kyonene phala kukwatesa woma ku Jijudé ni Sobha Ezekiya n’a toloka. (2 Jisobha 18:17-25) Ezekiya wa tumikisa Elyakime ni mala ayadi amukwa phala ku disanga ni isengele ya Asidya. Sebena wexile bhu kaxi ka mala atatu yâ, maji wexile ngó seketa. O musoso yú, u tu longa kwila, Sebena wa dilongo o kulenduka, ka divu kyaibha mba wa luwala mu ku mu katula o ujitu, kana. Wexile polondo phala kutambula dingi mawjitu. Mu milongi yiyi, mwala madisá atatu u tu tena kudilonga ni ima ya bhiti ni Sebena.

9-11. (a) Madisá ebhi u tu tena kudilonga ku musoso wa Sebena? (b) O ukexilu wa Jihova wa kutalatala Sebena u tu longa ihi?

⁹ Disá dya dyanga: O kwijiya kwila Sebena a mu katula o mawjitu, ku tu lembalesa kwila “O izala yene ya mu twama, anga kukayela o kusenguluka.” (Jisabhu 16:18) Se twala ni mawjitu avulu mu kilunga, jiphange a tena kubanza kwila, twa beta-o-kota ene ndenge. O kwila twa-nda di tulula? Twa-nda xikina kwila, mawhete moso u twala na-u, mba kima kyoso-kyoso ki tu bhanga kyambote, tu kitena ngó ni kikwatekesu kya Jihova? (1 Kolindo 4:7) Poxolo Phawlu wa dimuna: “Ng’ambela kala muthu mudyenu, kwila: Muthu ka di fike ima ya mu tundu. Maji a bhanze ni ku di tulula katé wa di fika ya kubatâma.”—Loma 12:3.

¹⁰ Disá dya kayadi: O kibazelu kya Jihova kwa Sebena, kilondekesa kwila, mwene wa dyelele kwila Sebena weji lungulula o ukexilu wê. (Jisabhu 3:11, 12) Didi disá dyonene phala yó exile kyá ni mawjitu mu kilunga. Mu veji dya kudizangala mba kuluwala, ene a tokala ku kalakala ni nguzu yoso mu sidivisu ya Jihova. A tena kumona o kibazelu kala kilondekesu kya henda ya Jihova. Ki tu jimbe kwila, Tat’etu wa-nda bhana futu kwa yó a lenduka. (Tanga 1 Phetele 5:6, 7.) O kibazelu kya henda ki bhana Jihova, ki tena ku tu umba se tu kála kala tu utuma wa beleketa.

¹¹ Disá dya katatu: Twa dilongo o ukexilu wa Jihova ku talatala Sebena. Sumbala o ukexilu wa Jihova kubazela, u londekesa kwila mwene wa zembe o kituxi, maji kiki ki londekesa we kwila mwene wa zolo o muthu wa te o kituxi. Jihova u mona o ima yambote ku mixima ya athu. Se u tata, mba u kafunga, o kwila wa-nda kayela o ukexilu wa Jihova, wa kubazela?—Juda 22, 23.

12-14. (a) Ihi yene mu bhanga athu avulu kyoso kya a bazela kwa Jihova? (b) Kyebhi o Mak’â Nzambi a kwatekesa phange kulungulula o ukexilu wê? Mbote yebhi ya katula mwene?

¹² Say athu kyoso kya a bazela a luwala kyavulu, mukonda dya kiki a bhana dikunda kwa Nzambi ni ku kilunga kyê. Kiki ki luwalesa. (Jihebeleu 3:12, 13) O kwila kiki ki lombolola kwila, sé-ku dingi muthu u tena ku a kwatekesa? Ki kyene! Tu mone o phangu ya Graham, a mu kayele mu kilunga, maji mu kubhita thembu wa vutuka. Né mwene kyoso kya vutuka mu kilunga, mwene kexile mu boka ni kuya mu yônge. Say kafunga wa bhange yoso phala kukala dikamba dya Graham, kyenyiki-phe, mwéne wa bhingi ku kafunga phala ku mu longa o Bibidia.

¹³ O kafunga u lembalala: “O maka exile na-u Graham, o ukumbu. Mwene wexile mu zwela ima yayibha ya lungu ni tufunga twa batwile o maka mê m’ukulu. Mu kiki, twa dilongo milongi yavulu ya lungu ni ukumbu ni kyebhi ki u tena kuzanga o ukamba wetu ni  Nzambi. Kuma o Mak’â Nzambi a difu ni lumwenu Graham, wa mateka kumona kwila kexile ni ukexilu wambote. Mwene wa diwana! Kyoso kya mono kwila, o ukumbu wa kexile mu mu ‘bhangesa’ kumona o ima mu ukexilu wayibha, ni kwila o maka akexile na-u, o kulongolola o tufunga, mwene wa lungulula o ukexilu wê woso. Graham, wa mateka kuya mu yônge semana joso, kudilonga jinga o Mak’â Nzambi, ni kusamba izuwa yoso. Mwene wa kexile mu langa kyambote o muyji mu nzumbi. Mukonda dya kiki, o muhatu ni an’ê a sanguluka kyavulu.—Luka 6:41, 42; Tiiaku 1:23-25.

¹⁴ O kafunga kambe dingi: “Say kizuwa Graham, wa ngi tangela kima kya ngi sangulukisa kyavulu. Mwene wambe: ‘Ngi Mbangi ya Jihova tundé ukulu, nga kexile kyá ngi muboki wa thembu yoso. Maji lelu ngó ngi tena kuzwela ni kidi kyoso kwila, nga zolo Jihova.’” Mu kubhita thembu, Graham, a mu bhana o kikalakalu kya kukwatekesa kubhitisa o ji koloneta mu yônge, mwene wa sangulukile kyavulu mu kubhanga o kikalakalu kiki. O kafunga kambe dingi: “O phangu ya Graham, ya ngi longo kwila, kyoso o muthu kya xikina ku mu bazela kwa Nzambi ni kulenduka kwoso, mwene u tambula mabesá avulu!”

15. Ihi i twa tokala o kubhanga phala o athu a xikine o itendelesu yetu?

¹⁵ Se twa mesena kukala tu alongexi ambote, kya dyanga twa bhingi kuwabhela kudilonga. (1 Timote 4:15, 16) Kyene we kimoxi, se twa tambula o kikalakalu kya kukwatekesa mba kubazela akwetu, twa bhingi tu lenduka, twehela Jihova kwendesa o mwenyu wetu. Kyoso akwetu kya mona kwila, twa lenduka, ene a-nda tu xila, ki kya-nda kwa bhonza kuxikina o kitendelesu kyetu. Tu tena kukayela o phangu ya Jezú.

16. Ihi i tu tena kudilonga mu phangu ya Jezú ya lungu ni kulonga ni kubhana itendelesu?

¹⁶ Ithangana yoso, Jezú wa belesela Tat’ê, katé mwene kyexile mu ibhidi. (Matesu 26:39) Jezú wa lendukile wa kexile we mu belesela, kiki kya mu kwatekesa kukala mulongexi wa henda. (Nzuá 5:19, 30) Kuma Jezú wa bhange o ima ya mesenene Tat’ê, mwene wexile mulongexi wa henda. O athu a mesenene kwijiya Jihova a wabhele kukala ni mwene. (Tanga Luka 4:22.) O izwelu ya henda ya Jezú, ya swinisa o athu a tolokele mixima ni yó a zozele. (Matesu 12:20) Mwene wa bazela o jipoxolo jê ni henda, katé mwene mu ithangana yeji mu bhangesa kukala ni njinda mukonda akexile mu zoka se nanyi wexile o dikota mu kaxi kâ.—Marku 9:33-37; Luka 22:24-27.

17. Idifwa yebhi ya-nda kwatekesa o tufunga kulanga kyambote o kilunga?

¹⁷ O tufunga a bhana itendelesu bhu kaxi ka Bibidya, a bhingi we kukayela o phangu ya Kidistu ithangana yoso. Mu kubhanga kiki, a-nda londekesa kwila, a mesena  kwa endesa kwa Nzambi ni Mon’ê. Poxolo Phetele wa soneka: ‘Ingenu o kilunga kya Nzambi ku mwal’oko, ni ku ki tambula konda, kana ni usudi, maji ni vondadi yoso, kyoso kya mesena Nzambi. Ki mu ki bhangela nganhu yaxidi, maji mu kibhangela o muxima wa mi tumu ku di bheka mu kusidivila. Ki mu kale mu jingana ja kutumina yó ene a mi bhana-nâ ku a enga, maji mu kala mù atwameneni mwa bhana phangu ku kilunga.’ (1 Phetele 5:2-4) O tufunga a belesela Nzambi ni Kidistu ni kisangusangu, ni athu ene mu a langa, a-nda tambula mabesá avulu.—Izaia 32:1, 2, 17, 18.

18. (a) Jihova wa mesena kwila o jitata a bhanga ihi? (b) Kyebhi Nzambi kya kwatekesa o jitata?

¹⁸ Ihi i twamba ya lungu ni kubazela ni kulonga o twana? Jihova u tangela o atwameni a miji: “Kana kuthathamesa an’enu ni ku a kwatesa njinda. Maji mu a sasa ni ku a beta, ni ku a longa kyoso kya tumu Ngana.” (Efezo 6:4) O kwila kubhinga mwene kulonga ni kubazela? O divulu dya Jisabhu 19:18, dizwela: “Mona u mu bazela, kyoso kwila say hanji kima kya kudyelela-ku; maji kana ku mu bazela ni njinda katé ki u mu jibha.” Jihova wa bhana ku jitata, o kikalakalu kya kulonga o twana. Se ka ki bhange, a-nda bhakula jikonda kwa mwene! (1 Samuuele 3:12-14) Maji kyoso o jitata kya bhinga o kikwatekesu kya Jihova bhu kaxi ka musambu, anga ehela o Mak’â mê ni nzumbi yê ikola ku a endesa, mwene u a bhana o unjimu ni nguzu ya bhindamena.—Tanga Tiiaku 1:5.

19, 20. (a) Mabesá ebhi u tu tambula kyoso ki tu xikina ku tu bazela kwa Nzambi? (b) Ihi i twa-nda dilonga mu milongi ya-nda kayela?

¹⁹ Se tu xikina ku tu bazela, kwa Nzambi ni kukayela o ukexilu wa Jihova ni Jezú wa kubazela, twa-nda tambula mabesá avulu! O mwiji wetu ni kilunga kya-nda tululuka, athu oso a-nda divwa kyambote. Ene a-nda mona kwila a a zolo, ala ni valolo ya dikota. Kiki kilondekesu ngó kya paze ni kisangu-sangu ki twa-nda kala na-kyu ku hádya. (Jisálamu 72:7) Kyoso Jihova kya tu bazela, mwene wa mu tu pelepalala phala ku hádya tu tene kukala kumoxi ni kutululuka kala tu mwiji umoxi ngó, Jihova mwéne o Tata. (Tanga Izaia 11:9.) Se tu lembalala o ima yiyi, Twa-nda mona kwila, kyoso Nzambi kya tu bazela wa mu tu londekesa o henda yê mu ukexilu wa katunda.

²⁰ Mu milongi ya-nda kayela, twa-nda dilonga dingi ya lungu ni kubazela ku mwiji ni mu kilunga. Twa-nda mona kyebhi ki tu tena ku di bazela. Twa-nda dilonga we kyebhi ki tu tena kulenga kima ki beta-o-kota mu ku tu luwalesa, o ku tu bazela ndenge.